ಪಾಕಿಸ್ತಾನದಲ್ಲಿ ಕೊವಿಡ್​ 2ನೇ ಅಲೆಗೆ ಒಂದೇ ದಿನ 111 ಸಾವು.. ಸದ್ಯ ಪಾಕ್​ ಪರಿಸ್ಥಿತಿ ಹೇಗಿದೆ?

ಪಾಕಿಸ್ತಾನದಲ್ಲಿ ಕೊವಿಡ್​ 2ನೇ ಅಲೆ ನವೆಂಬರ್​ನಲ್ಲಿ ಆರಂಭವಾಗಿದೆ. ಕಳೆದ 24 ಗಂಟೆಯಲ್ಲಿ 111 ಜನ ಕೊರೊನಾ ಸೋಂಕಿಗೆ ಬಲಿಯಾಗಿದ್ದು, 2ನೇ ಅಲೆ ಆರಂಭವಾದ ಮೇಲೆ ಒಂದೇ ದಿನದಲ್ಲಿ ದಾಖಲಾದ ಗರಿಷ್ಠ ಸಾವಿನ ಸಂಖ್ಯೆ ಇದಾಗಿದೆ ಎಂದು ಪಾಕ್​ ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ.

ನವೆಂಬರ್​ನಲ್ಲಿ ಕೊವಿಡ್​ 2ನೇ ಅಲೆ ಆರಂಭವಾದ ನಂತರ ಡಿಸೆಂಬರ್​ 15ರಂದು ಒಂದೇ ದಿನ 105 ಜನ ಸೋಂಕಿತರು ಮೃತಪಟ್ಟಿದ್ದು ಗರಿಷ್ಠ ಸಾವಿನ ಪ್ರಮಾಣವಾಗಿತ್ತು. ಆದರೆ, ಈಗ 111 ಜನ ಸಾವಿಗೀಡಾಗುವ ಮೂಲಕ ಕೊರೊನಾ ಅಟ್ಟಹಾಸ ಮುಂದುವರೆಯುತ್ತಿದೆ ಎಂದು ತಿಳಿಸಿದ್ದಾರೆ.

ಕೊರೊನಾ ಮೊದಲ ಅಲೆಗೆ ಜೂನ್​ 20ರಂದು 24 ಗಂಟೆ ಅವಧಿಯಲ್ಲಿ 153 ಜನ ಮೃತಪಟ್ಟಿದ್ದರು. ಇದು ಪಾಕಿಸ್ತಾನದಲ್ಲಿ ಇದುವರೆಗೆ ಕೊರೊನಾ ಸೋಂಕಿಗೆ ಒಂದು ದಿನದಲ್ಲಿ ಮೃತಪಟ್ಟವರ ಗರಿಷ್ಠ ಸಂಖ್ಯೆಯಾಗಿದೆ. ಸದ್ಯ ಪಾಕಿಸ್ತಾನದ ಕೊರೊನಾ ಸೋಂಕಿತರ ಸಂಖ್ಯೆ 4,65,070 ಕ್ಕೆ ತಲುಪಿದ್ದು ಆ ಪೈಕಿ 4,17,134 ಜನ ಗುಣಮುಖರಾಗಿದ್ದಾರೆ.

ಪಾಕಿಸ್ತಾನದಲ್ಲಿ ಪ್ರಸ್ತುತ 38,268 ಸಕ್ರಿಯ ಪ್ರಕರಣಗಳಿದ್ದು, 2,361 ಜನ ಗಂಭೀರ ಪರಿಸ್ಥಿತಿಯಲ್ಲಿದ್ದಾರೆ. ಆರಂಭದಿಂದ ಇಲ್ಲಿಯವರೆಗೆ ಒಟ್ಟು 9,668 ಜನ ಕೊರೊನಾ ಸೋಂಕಿತರು ಸಾವಿಗೀಡಾಗಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ.