ಮಲಗಿದ್ದಾಗ ಮುಖದ ಮೇಲೆ ಬಿದ್ದ ಬಾವಲಿ, ಕಡಿತದ ಗುರುತಿಲ್ಲದಿದ್ದರೂ ರೇಬೀಸ್ನಿಂದ 11 ವರ್ಷದ ಬಾಲಕ ಸಾವು
ಒಂದು ದುರಂತ ಘಟನೆಯು ಬಾವಲಿಗಳ ಸಂಪರ್ಕದಿಂದ ರೇಬೀಸ್ ಸೋಂಕಿನ ಗುಪ್ತ ಅಪಾಯವನ್ನು ಎತ್ತಿ ತೋರಿಸುತ್ತದೆ. ಕಡಿತದ ಗುರುತುಗಳಿಲ್ಲದಿದ್ದರೂ, 11 ವರ್ಷದ ಬಾಲಕ ರೇಬೀಸ್ನಿಂದ ಸಾವನ್ನಪ್ಪಿದ್ದಾನೆ. ಬಾವಲಿಗಳ ಹಲ್ಲುಗಳು ಅತ್ಯಂತ ಸೂಕ್ಷ್ಮವಾಗಿರುವುದರಿಂದ ಕಡಿತಗಳು ಅಸ್ಪಷ್ಟವಾಗಿರಬಹುದು. ಯಾವುದೇ ಬಾವಲಿ ಸಂಪರ್ಕದ ನಂತರ ತಕ್ಷಣ ವೈದ್ಯಕೀಯ ಚಿಕಿತ್ಸೆ (ಲಸಿಕೆ) ಪಡೆಯುವುದು ಅತ್ಯಗತ್ಯ, ಏಕೆಂದರೆ ರೋಗಲಕ್ಷಣಗಳು ಕಾಣಿಸಿಕೊಂಡ ನಂತರ ರೇಬೀಸ್ ಮಾರಕ. ಜಾಗೃತಿ ಮತ್ತು ತಕ್ಷಣದ ಚಿಕಿತ್ಸೆ ಜೀವಗಳನ್ನು ಉಳಿಸುತ್ತದೆ.
Updated on: Jul 03, 2026 | 8:21 AM
ಒಂಟಾರಿಯೊ,ಜುಲೈ 03: ಬಾವಲಿ(Bats)ಗಳ ಕಡಿತದಿಂದ ಹರಡುವ ರೇಬೀಸ್(Rabies) ವೈರಸ್ ಎಷ್ಟು ಅಪಾಯಕಾರಿ ಎಂಬುದಕ್ಕೆ ಕೆನಡಾದಲ್ಲಿ ನಡೆದಿರುವ ಒಂದು ಅತ್ಯಂತ ದುಃಖಕರ ಘಟನೆ ಸಾಕ್ಷಿಯಾಗಿದೆ. ಬಾವಲಿ ಕಚ್ಚಿದ ಅಥವಾ ಗೀಚಿದ ಯಾವುದೇ ಲಕ್ಷಣಗಳು ಹೊರಗಣ್ಣಿಗೆ ಕಾಣಿಸದಿದ್ದರೂ, 11 ವರ್ಷದ ಬಾಲಕನೊಬ್ಬ ರೇಬೀಸ್ ಸೋಂಕಿಗೆ ಒಳಗಾಗಿ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾನೆ. ಬಾವಲಿಗಳ ಒಡನಾಟದಲ್ಲಿ ಅಡಗಿರುವ ಈ ಗುಪ್ತ ಅಪಾಯದ ಬಗ್ಗೆ ವೈದ್ಯಕೀಯ ತಜ್ಞರು ಸಾರ್ವಜನಿಕರಿಗೆ ತೀವ್ರ ಎಚ್ಚರಿಕೆ ನೀಡಿದ್ದಾರೆ.
ಕಡಿತದ ಗುರುತಿರಲಿಲ್ಲ, ಕುಟುಂಬದ ನಿರ್ಲಕ್ಷ್ಯ ವರದಿಗಳ ಪ್ರಕಾರ, ಆ ಬಾಲಕ 2024 ರ ಬೇಸಿಗೆಯ ಸಮಯದಲ್ಲಿ ಉತ್ತರ ಒಂಟಾರಿಯೊದಲ್ಲಿ ತನ್ನ ಕುಟುಂಬದೊಂದಿಗೆ ರಜೆಯಲ್ಲಿದ್ದ. ಒಂದು ರಾತ್ರಿ ಮಲಗಿದ್ದಾಗ ಇದ್ದಕ್ಕಿದ್ದಂತೆ ಎಚ್ಚರವಾದಾಗ ಆತನ ಮೂಗು ಮತ್ತು ಬಾಯಿಯ ಮೇಲೆ ಬಾವಲಿಯೊಂದು ಬಿದ್ದಿರುವುದು ಗೊತ್ತಾಗಿದೆ. ಗಾಬರಿಗೊಂಡ ಬಾಲಕ ಅದನ್ನು ಕೈಯಿಂದ ದೂರ ತಳ್ಳಿದ್ದಾನೆ, ಬಳಿಕ ತಂದೆ ಬಾವಲಿಯನ್ನು ಹಿಡಿದು ಹೊರಗೆ ಬಿಟ್ಟಿದ್ದಾರೆ. ಬಾಲಕನ ಮೈಮೇಲೆ ಯಾವುದೇ ಗಾಯ ಅಥವಾ ರಕ್ತದ ಗುರುತುಗಳು ಇಲ್ಲದಿದ್ದರಿಂದ, ಕುಟುಂಬಸ್ಥರು ತಕ್ಷಣಕ್ಕೆ ಯಾವುದೇ ಚಿಕಿತ್ಸೆ ಕೊಡಿಸಿರಲಿಲ್ಲ.
ಘಟನೆ ನಡೆದ ಸುಮಾರು 19 ದಿನಗಳ ನಂತರ ಬಾಲಕನಿಗೆ ನಿರಂತರ ವಾಂತಿ, ಮುಖ ಮರಗಟ್ಟುವಿಕೆ ಮತ್ತು ಜುಮ್ಮೆನಿಸುವಿಕೆ ತೊಂದರೆಗಳು ಕಾಣಿಸಿಕೊಂಡವು. ಪರಿಸ್ಥಿತಿ ಹದಗೆಟ್ಟಾಗ ಆಸ್ಪತ್ರೆಯ ತುರ್ತು ವಿಭಾಗಕ್ಕೆ ದಾಖಲಿಸಲಾಯಿತು. ಆದರೆ, ವೈದ್ಯರು ಅದನ್ನು ರೇಬೀಸ್ ಎಂದು ಪತ್ತೆಹಚ್ಚುವಷ್ಟರಲ್ಲೇ ವೈರಸ್ ಆತನ ಮೆದುಳು ಹಾಗೂ ನರಮಂಡಲಕ್ಕೆ ವ್ಯಾಪಿಸಿತ್ತು. ಎರಡು ವಾರಗಳ ತೀವ್ರ ನಿಗಾ ಘಟಕದ (ICU) ಚಿಕಿತ್ಸೆಯ ನಂತರ ಬಾಲಕ ಕೊನೆಯುಸಿರೆಳೆದಿದ್ದಾನೆ. ಒಂಟಾರಿಯೊ ಪ್ರಾಂತ್ಯದಲ್ಲಿ ಕಳೆದ 50 ವರ್ಷಗಳಲ್ಲೇ ವರದಿಯಾದ ಮೊದಲ ರೇಬೀಸ್ ಸಾವು ಇದಾಗಿದೆ.
ಮತ್ತಷ್ಟು ಓದಿ: Video: ನಾಯಿ ಕಡಿತದಿಂದ 14 ವರ್ಷದ ಬಾಲಕನಿಗೆ ಬಂತು ರೇಬಿಸ್, ಪರಿಸ್ಥಿತಿ ಏನಾಗಿದೆ ನೋಡಿ
ಬಾವಲಿ ಕಡಿತ ಕಣ್ಣಿಗೆ ಕಾಣಿಸುವುದಿಲ್ಲವೇಕೆ? ವೈದ್ಯರ ಪ್ರಕಾರ, ಬಾವಲಿಗಳ ಹಲ್ಲುಗಳು ಮತ್ತು ಉಗುರುಗಳು ಅತ್ಯಂತ ಸೂಕ್ಷ್ಮ ಹಾಗೂ ಚೂಪಾಗಿರುತ್ತವೆ. ಅವು ಕಚ್ಚಿದಾಗ ಅಥವಾ ಗೀಚಿದಾಗ ಚರ್ಮದ ಮೇಲೆ ಯಾವುದೇ ದೊಡ್ಡ ಗಾಯ ಅಥವಾ ರಕ್ತದ ಗುರುತುಗಳು ಮೂಡುವುದಿಲ್ಲ. ಇದರಿಂದಾಗಿ ತಮಗೆ ಸೋಂಕು ತಗುಲಿದೆ ಎಂಬುದು ಜನರಿಗೆ ತಿಳಿಯುವುದೇ ಇಲ್ಲ. ರೇಬೀಸ್ ಲಕ್ಷಣಗಳು (ಜ್ವರ, ಗೊಂದಲ, ಪಾರ್ಶ್ವವಾಯು, ಆಹಾರ ನುಂಗಲು ತೊಂದರೆ) ಒಮ್ಮೆ ದೇಹದಲ್ಲಿ ಕಾಣಿಸಿಕೊಂಡರೆ, ಆ ವ್ಯಕ್ತಿಯನ್ನು ಬದುಕಿಸುವುದು ಅಸಾಧ್ಯ ಮತ್ತು ಸಾವು ಶೇ.100 ಖಚಿತ.
ವೈದ್ಯರು ನೀಡುವ ಪ್ರಮುಖ ಸಲಹೆಗಳೇನು? ತಕ್ಷಣದ ಚಿಕಿತ್ಸೆ: ಲಕ್ಷಣಗಳು ಕಾಣಿಸಿಕೊಳ್ಳುವ ಮೊದಲೇ ಚಿಕಿತ್ಸೆ (ಲಸಿಕೆ ಮತ್ತು ಇಮ್ಯೂನ್ ಗ್ಲೋಬ್ಯುಲಿನ್) ಪಡೆದರೆ ರೇಬೀಸ್ ಅನ್ನು ಶೇ.100 ತಡೆಯಬಹುದು. ನೀವು ಮಲಗಿರುವ ಕೋಣೆಯಲ್ಲಿ ಬಾವಲಿ ಪತ್ತೆಯಾದರೆ ಅಥವಾ ಬಾವಲಿಯೊಂದಿಗೆ ನೇರ ಶಾರೀರಿಕ ಸಂಪರ್ಕ ಉಂಟಾದರೆ, ಯಾವುದೇ ಗಾಯದ ಗುರುತು ಇಲ್ಲದಿದ್ದರೂ ತಕ್ಷಣವೇ ವೈದ್ಯರನ್ನು ಭೇಟಿಯಾಗಿ ರೇಬೀಸ್ ಲಸಿಕೆ (PEP) ಪಡೆದುಕೊಳ್ಳಬೇಕು.
ಇಂತಹ ದುರಂತ ಮತ್ತೊಬ್ಬರಿಗೆ ಸಂಭವಿಸಬಾರದು ಮತ್ತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಬೇಕು ಎಂಬ ಉದ್ದೇಶದಿಂದ ಬಾಲಕನ ಪೋಷಕರು ಈ ಕಥೆಯನ್ನು ಮಾಧ್ಯಮಗಳೊಂದಿಗೆ ಹಂಚಿಕೊಂಡಿದ್ದಾರೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
