ಅಮೆರಿಕ ಅಧ್ಯಕ್ಷ ಜೋ ಬೈಡನ್​ ಕೀವ್​​ಗೆ ತೆರಳಲಿದ್ದಾರಾ?- ಪ್ರಶ್ನೆಗೆ ಉತ್ತರ ನೀಡಿದ ಶ್ವೇತ ಭವನ

ಅಮೆರಿಕ ಅಧ್ಯಕ್ಷ ಜೋ ಬೈಡನ್​ ಉಕ್ರೇನ್​​ ರಾಜಧಾನಿ ಕೀವ್​ಗೆ ಭೇಟಿ ಕೊಡುವ ಬಗ್ಗೆ ಯೋಚಿಸಿಲ್ಲ. ಸದ್ಯ ಅಲ್ಲಿಗೆ ಹೋಗುವುದಿಲ್ಲ ಎಂದು ಶ್ವೇತಭವನ ಸೋಮವಾರ ತಿಳಿಸಿದೆ. ರಷ್ಯಾ ಸಾರಿರುವ ಯುದ್ಧದಿಂದ ಉಕ್ರೇನ್​ ಪರಿಸ್ಥಿತಿ ಹದಗೆಟ್ಟಿದೆ. ಈ ಮಧ್ಯೆ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಕ್ಸಿ ಯುಎಸ್​ ಸಹಾಯವನ್ನು ಪದೇಪದೆ ಕೇಳುತ್ತಿದ್ದಾರೆ. ಅಲ್ಲದೆ, ಯುಎಸ್​ ನೇತೃತ್ವದ ನ್ಯಾಟೋ ನಮ್ಮನ್ನು ಕೈಬಿಟ್ಟಿದೆ ಎಂದು ಆಕ್ರೋಶವನ್ನೂ ವ್ಯಕ್ತಪಡಿಸಿದ್ದಾರೆ. ಇದೆಲ್ಲದರ ಮಧ್ಯೆ ಬೈಡನ್​ ಕೀವ್​ಗೆ ಹೋಗಲಿದ್ದಾರಾ ಎಂಬ ಪ್ರಶ್ನೆ ಎದ್ದಿತ್ತು. ಆದರೆ ಸದ್ಯಕ್ಕಂತೂ ಅಂಥ ಭೇಟಿ ಇಲ್ಲ ಎಂದು ಅಧಿಕೃತಗೊಳಿಸಲಾಗಿದೆ.

ಒಂದಷ್ಟು ಯುರೋಪಿಯನ್ ನಾಯಕರು ಈಗಾಗಲೇ ಕೀವ್​ಗೆ ತೆರಳಿ, ಉಕ್ರೇನ್​ ಅಧ್ಯಕ್ಷ ಝೆಲೆನ್ಸ್ಕಿಯವರನ್ನು ಭೇಟಿಯಾಗಿದ್ದಾರೆ. ಆದರೆ ಜೋ ಬೈಡನ್​ ಭೇಟಿ ಅಷ್ಟು ಸುಲಭವಲ್ಲ.  ಬೈಡನ್​ ಭೇಟಿ ವಿಷಯದಲ್ಲಿ ಭದ್ರತೆ ಸವಾಲುಗಳೂ ಸಂಕೀರ್ಣವಾಗಿವೆ. ಹೀಗಾಗಿ ಜೋ ಬೈಡನ್​ ಕೀವ್​ಗೆ ತೆರಳುವ ಬಗ್ಗೆ ಯಾವುದೇ ಯೋಜನೆ ರೂಪುಗೊಂಡಿಲ್ಲ. ಅದರ ಬದಲು ಉನ್ನತ ಶ್ರೇಣಿಯ ಅಧಿಕಾರಿಗಳನ್ನು ಅಲ್ಲಿಗೆ ಕಳಿಸಲಾಗುವುದು. ಯುಎಸ್​ ರಾಜ್ಯ ಕಾರ್ಯದರ್ಶಿ ಅಂಟೋನಿ ಬ್ಲಿಂಕನ್​ ಅಥವಾ ರಕ್ಷಣಾ ಕಾರ್ಯದರ್ಶಿ ಲಾಯ್ಡ್​ ಆಸ್ಟಿನ್​ ಕೀವ್​ಗೆ ತೆರಳಲಿದ್ದಾರೆ ಎಂದು ವೈಟ್​ ಹೌಸ್​ ತಿಳಿಸಿದೆ. ಕಳೆದ ವಾರ ಈ ಬಗ್ಗೆ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದ ಜೋ ಬೈಡನ್​, ನಾನು ಕೀವ್​​ಗೆ ಹೋಗುವ ಬಗ್ಗೆ ಯೋಚಿಸುತ್ತೇನೆ, ಶೀಘ್ರದಲ್ಲೇ ನಿರ್ಣಯ ತೆಗೆದುಕೊಳ್ಳುತ್ತೇನೆ ಎಂದು ಹೇಳುವ ಮೂಲಕ  ಈ ವಿಚಾರದಲ್ಲಿ ಕುತೂಹಲ ಮೂಡಿಸಿದ್ದರು.

ಹಾಗೇ, ಬೈಡನ್​ ಭೇಟಿಯ ಬಗ್ಗೆ ಝೆಲೆನ್ಸ್ಕಿ ಕೂಡ ಆಶಯ ವ್ಯಕ್ತಪಡಿಸಿದ್ದರು. ಯುನೈಟೆಡ್​ ಸ್ಟೇಟ್ಸ್​ಗೇ ನಾಯಕ ಅವರು. ಅಂದಮೇಲೆ ಇಲ್ಲೊಮ್ಮೆ ಬಂದು ಯಾಕೆ ಇಲ್ಲಿನ ಪರಿಸ್ಥಿತಿ ವೀಕ್ಷಿಸಬಾರದು? ಎಂದೂ ಪ್ರಶ್ನಿಸಿದ್ದರು. ಉಕ್ರೇನಿಯನ್​ ವಿದೇಶಾಂಗ ಇಲಾಖೆ ಸಚಿವ ಡಿಮಿಟ್ರೋ ಕುಲೆಬಾ ಕೂಡ ಬೈಡನ್​​ರನ್ನು ಹೊಗಳಿದ್ದರು. ಬೈಡನ್ ಉಕ್ರೇನ್​ಗೆ ಬೆಂಬಲ ನೀಡುತ್ತಿದ್ದಾರೆ ಎಂದು ಹೇಳಿದ್ದ ಅವರು, ಒಮ್ಮೆ ಅವರು ಇಲ್ಲಿಗೆ ಭೇಟಿ ಕೊಟ್ಟು ಹೋದರೆ ಉಕ್ರೇನ್​​ಗೆ ಇನ್ನಷ್ಟು ಬಲಬಂದಂತೆ ಆಗುತ್ತದೆ ಎಂದಿದ್ದರು.

ಇದನ್ನೂ ಓದಿ: ಉಂಡ ಮನೆಗೆ ಮೂರು ಬಗೆದ ನೈಜ ಕಳ್ಳ ಯಾರು?- ಸಿದ್ದರಾಮಯ್ಯ ವಿರುದ್ಧ ಮತ್ತೆ ಗುಡುಗಿದ ಹೆಚ್​ಡಿ ಕುಮಾರಸ್ವಾಮಿ

Published On - 9:56 am, Tue, 19 April 22