Krutrim Record: ಒಂದು ಬಿಲಿಯನ್ ಡಾಲರ್ ಮೌಲ್ಯದ ಭಾರತದ ಮೊದಲ ಎಐ ಕಂಪನಿ; ಓಲಾ ಸ್ಥಾಪಕರ ಹೊಸ ಸಾಹಸಕ್ಕೆ ಫಲಶೃತಿ

ನವದೆಹಲಿ, ಜನವರಿ 26: ಒಲಾ ಸಂಸ್ಥೆಯ ಭವೀಶ್ ಅಗರ್ವಾಲ್ ಸ್ಥಾಪಿಸಿದ ಕೃತ್ರಿಮ್ (Krutrim) ಎಂಬ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಸಂಸ್ಥೆ ಕೃತ್ರಿಮ್ ಯೂನಿಕಾರ್ನ್ ಆಗಿ ಬೆಳೆದಿದೆ. ಮ್ಯಾಟ್ರಿಕ್ಸ್ ಪಾರ್ಟ್ನರ್ಸ್ ಇಂಡಿಯಾ ಸೇರಿದಂತೆ ವಿವಿಧ ಹೂಡಿಕೆದಾರರಿಗೆ ಕೃತ್ರಿಮ್​ಗೆ 50 ಮಿಲಿಯನ್ ಡಾಲರ್ ಫಂಡಿಂಗ್ ಸಿಕ್ಕಿದೆ. ಇದರೊಂದಿಗೆ ಈ ಸ್ಟಾರ್ಟಪ್​ಗೆ ಸಿಕ್ಕಿದ ಒಟ್ಟು ಹೂಡಿಕೆ ಮೊತ್ತ 1 ಬಿಲಿಯನ್ ಡಾಲರ್ ಗಡಿ ದಾಟಿದೆ. ಈ ಮೂಲಕ ಯೂನಿಕಾರ್ನ್ ಕಂಪನಿ ಎನಿಸಿದೆ. ಭಾರತದ ಎಐ ಸ್ಟಾರ್ಟಪ್​ವೊಂದು ಯೂನಿಕಾರ್ನ್ (unicorn company) ಎನಿಸಿದ್ದು ಇದೇ ಮೊದಲು.

ಅಚ್ಚರಿ ಎಂದರೆ ಕೃತ್ರಿಮ್ ಸಂಸ್ಥೆ ಒಂದು ತಿಂಗಳ ಹಿಂದಷ್ಟೇ ಶುರುವಾಗಿದ್ದು. ಇಷ್ಟು ಅಲ್ಪಾವಧಿಯಲ್ಲಿ ಬಿಲಿಯನ್ ಡಾಲರ್ ಮೌಲ್ಯದ ಕಂಪನಿಯಾಗಿ ಬೆಳೆದಿದ್ದು ಗಮನಾರ್ಹವೇ ಸರಿ.

ಕೃತ್ರಿಮ್ ಸಂಸ್ಥೆ ಲಾರ್ಜ್ ಲ್ಯಾಂಗ್ವೇಜ್ ಮಾಡಲ್ ಅಭಿವೃದ್ಧಿಪಡಿಸುವ ಉದ್ದೇಶ ಹೊಂದಿದೆ. ಹಾಗೆಯೇ, ಡಾಟಾ ಸೆಂಟರ್​ಗಳನ್ನೂ ತಯಾರಿಸುತ್ತಿದೆ. ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಇಕೋಸಿಸ್ಟಂಗೆ ಬೇಕಾದ ಸರ್ವರ್ ಮತ್ತು ಸೂಪರ್ ಕಂಪ್ಯೂಟರ್​ಗಳ ನಿರ್ಮಾಣ ಮಾಡುವುದು ಕೃತ್ರಿಮ್​ನ ಗುರಿ ಎನ್ನಲಾಗಿದೆ.

ಇದನ್ನೂ ಓದಿ: CEO Drives Cab: ಹಗಲಿನಲ್ಲಿ ಸಿಇಒ, ರಾತ್ರಿಯಲ್ಲಿ ಬೆಂಗಳೂರಿನ ಕ್ಯಾಬ್ ಡ್ರೈವರ್; ಹೀಗೂ ಇರುತ್ತಾರಾ ಒಂದು ಸಂಸ್ಥೆಯ ಮುಖ್ಯಸ್ಥರು?

ಭಾರತಕ್ಕೆ ತನ್ನದೇ ಆದ ಎಐ ನಿರ್ಮಾಣವಾಗಬೇಕು. ದೇಶದ ಮೊದಲ ಪೂರ್ಣ ಎಐ ಕಂಪ್ಯೂಟಿಂಗ್ ಸ್ಟ್ಯಾಕ್ ಅನ್ನು ನಿರ್ಮಿಸಲು ನಾವು ಬದ್ಧರಾಗಿದ್ದೇವೆ ಎಂದು ಭವೀಶ್ ಅಗರ್ವಾಲ್ ಹೇಳಿದ್ದಾರೆ.

ಮೈಕ್ರೋಸಾಫ್ಟ್ ಬೆಂಬಲಿತ ಓಪನ್​ಎಐ ಸಂಸ್ಥೆ ಚ್ಯಾಟ್​ಜಿಪಿಟಿ ಶುರು ಮಾಡಿದ ಬಳಿಕ ಜಾಗತಿಕವಾಗಿ ಹಲವು ಕಂಪನಿಗಳು ಎಐ ರೇಸ್​ನಲ್ಲಿ ನಿರತವಾಗಿವೆ. ದೊಡ್ಡ ಬಂಡವಾಳ ಹೊಂದಿರುವ ಗೂಗಲ್ ಮುಂತಾದ ಕಂಪನಿಗಳು ಮುಂದೋಡುತ್ತಿವೆ. ಈ ರೇಸ್​ಗೆ ಭಾರತೀಯ ಕಂಪನಿಗಳೂ ಪ್ರವೇಶ ಪಡೆದಿವೆ. ಆದರೆ, ತಂತ್ರಜ್ಞಾನ ಮತ್ತು ಬಂಡವಾಳದ ಕೊರತೆ ಇರುವ ಈ ಓಟದಲ್ಲಿ ಹಿಂದುಳಿದಿವೆ. ಆದರೂ ಕೂಡ ಭಾರತೀಯ ಭಾಷೆಗಳಲ್ಲಿ ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್​ಗಳನ್ನು ರಚಿಸುವ ಪ್ರಯತ್ನಗಳಾಗುತ್ತಿವೆ.

ಇದನ್ನೂ ಓದಿ: Calligo: ಬೆಂಗಳೂರಿನ ಕ್ಯಾಲಿಗೋ ಸಾಧನೆ; ಪೊಸಿಟ್ ಎನೇಬಲ್ಡ್ ಸಿಲಿಕಾನ್ ರಚಿಸಿದ ವಿಶ್ವದ ಮೊದಲ ಕಂಪನಿ

ಸದ್ಯ ಎಐ ತಂತ್ರಜ್ಞಾನದಲ್ಲಿ ಅಮೆರಿಕ ಮತ್ತು ಚೀನಾ ಹೆಚ್ಚು ಪ್ರಾಬಲ್ಯ ಹೊಂದಿವೆ. ಇದರ ಮಧ್ಯೆ ಬೇರೆ ದೇಶಗಳಲ್ಲಿ ಅವುಗಳ ಮಟ್ಟದಲ್ಲಿ ಎಐ ಇಕೋಸಿಸ್ಟಂ ರೂಪಿಸುವ ಪ್ರಯತ್ನ ಇದೆ. ಸರ್ವಂ ಎಂಬ ಭಾರತೀಯ ಕಂಪನಿಯೊಂದು ಓಪನ್ ಹಾಥಿ ಎಂಬ ಮೊದಲ ಹಿಂದಿ ಎಲ್​ಎಲ್​ಎಂ ಅನ್ನು ಆರಂಭಿಸಿತು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ