BSNL Masterplan: ಜಿಯೋ, ಏರ್ಟೆಲ್ ಪ್ರಾಬಲ್ಯ ತಡೆಯಲು ಬಿಎಸ್ಎನ್ಎಲ್ನಿಂದ ಭರ್ಜರಿ ‘ವೊಡಾಫೋನ್’ ಐಡಿಯಾ
Telecom survival war: ಜಿಯೋ ಮತ್ತು ಏರ್ಟೆಲ್ ಎದುರು ಪೈಪೋಟಿಯಲ್ಲಿ ನಿಲ್ಲಲು ಹವಣಿಸುತ್ತಿರುವ ಬಿಎಸ್ಎನ್ಎಲ್ ಈ ನಿಟ್ಟಿನಲ್ಲಿ ವೊಡಾಫೋನ್ ಐಡಿಯಾ ನೆರವು ಪಡೆಯಲು ಆಸಕ್ತವಾಗಿದೆ. ವೊಡಾಫೋನ್ ಐಡಿಯಾದ 4ಜಿ ನೆಟ್ವರ್ಕ್ ಅನ್ನು ಬಳಸಲು ಅವಕಾಶ ದೊರಕಿಸಿಕೊಡುವಂತೆ ಕೋರಿ ಕೇಂದ್ರ ಸಚಿವರಿಗೆ ಬಿಎಸ್ಎನ್ಎಲ್ ಪ್ರಸ್ತಾಪ ಸಲ್ಲಿಸಿದೆ. ಟಿಸಿಎಸ್ನಿಂದ ಬಿಎಸ್ಎನ್ಎಲ್ಗೆ ದೇಶಾದ್ಯಂತ 4ಜಿ ನೆಟ್ವರ್ಕ್ ಅಳವಡಿಕೆ ಆಗುವವರೆಗೂ ವೊಡಾಫೋನ್ ಐಡಿಯಾದ ನೆಟ್ವರ್ಕ್ ಬಳಕೆಗೆ ಮನವಿ ಮಾಡಲಾಗಿದೆ.
ನವದೆಹಲಿ, ಫೆಬ್ರುವರಿ 20: ದೇಶದ ಟೆಲಿಕಾಂ ವಲಯದಲ್ಲಿ ರಿಲಾಯನ್ಸ್ ಜಿಯೋ ಮತ್ತು ಭಾರ್ತಿ ಏರ್ಟೆಲ್ ಸಂಸ್ಥೆಗಳ ಪ್ರಾಬಲ್ಯ ಎದುರಿಸಲು ಸರ್ಕಾರಿ ಸ್ವಾಮ್ಯದ ಬಿಎಸ್ಎನ್ಎಲ್ (BSNL) ಹೊಸ ಲೆಕ್ಕಾಚಾರ ಹಾಕಿದೆ. ಜಿಯೋ ಮತ್ತು ಏರ್ಟೆಲ್ ಎದುರು ಪೈಪೋಟಿ ನೀಡಲು ಪರದಾಡುತ್ತಿರುವ ಬಿಎಸ್ಎನ್ಎಲ್, ಇದೀಗ ತನ್ನಂತಹುದೇ ಸ್ಥಿತಿಯಲ್ಲಿರುವ ವೊಡಾಫೋನ್ ಐಡಿಯಾ (Vodafone-Idea) ಜೊತೆ ಕೈಜೋಡಿಸಲು ಬಯಸುತ್ತಿದೆ. ವೊಡಾಫೋನ್ ಐಡಿಯಾದ 4ಜಿ ನೆಟ್ವರ್ಕ್ ಬಳಕೆಗೆ ಅವಕಾಶ ಪಡೆಯಲು ಈಗ ಬಿಎಸ್ಎನ್ಎಲ್ ಪ್ರಯತ್ನಿಸುತ್ತಿದೆ. ಈ ಮೂಲಕ ಬಿಎಸ್ಎನ್ಎಲ್ ಗ್ರಾಹಕರು ಬೇರೆ ಕಡೆ ವಲಸೆ ಹೋಗುವುದನ್ನು ತಪ್ಪಿಸುವುದು ಮಾಸ್ಟರ್ ಪ್ಲಾನ್ ಆಗಿದೆ. ಬಿಎಸ್ಎನ್ಎಲ್ನ ಉದ್ಯೋಗಿಗಳ ಒಕ್ಕೂಟ ಇಂಥದ್ದೊಂದು ಪ್ರಸ್ತಾಪವನ್ನು ಕೇಂದ್ರ ಟೆಲಿಕಾಂ ಮತ್ತು ಐಟಿ ಸಚಿವ ಡಾ. ಅಶ್ವಿನಿ ವೈಷ್ಣವ್ ಅವರಲ್ಲಿ ಸಲ್ಲಿಸಿದೆ ಎಂದು ಎಕನಾಮಿಕ್ ಟೈಮ್ಸ್ ಪತ್ರಿಕೆಯಲ್ಲಿ ವರದಿಯಾಗಿದೆ.
ವೊಡಾಫೋನ್ನ 4ಜಿ ನೆಟವರ್ಕ್ ಬಳಕೆಯಿಂದ ಬಿಎಸ್ಎನ್ಎಲ್ಗೆ ಏನು ಪ್ರಯೋಜನ?
ಸರ್ಕಾರಿ ಸ್ವಾಮ್ಯದ ಬಿಎಸ್ಎನ್ಎಲ್ ಒಂದು ಕಾಲದಲ್ಲಿ ಪ್ರಮುಖ ಟೆಲಿಕಾಂ ಕಂಪನಿಯಾಗಿತ್ತು. ಆದರೆ, ಟೆಕ್ನಾಲಜಿ ಅಪ್ಗ್ರೇಡ್ ಆಗದೇ ಇದ್ದ ಪರಿಣಾಮ ಇವತ್ತು ಬಹಳಷ್ಟು ಗ್ರಾಹಕರನ್ನು ಕಳೆದುಕೊಂಡಿದೆ. ಬಿಎಸ್ಎನ್ಎಲ್ ನೆಟ್ವರ್ಕ್ ಇನ್ನೂ 3ಜಿ ಹಂತ ದಾಟಿ 4ಜಿಗೆ ಬಂದಿಲ್ಲ. ಹೀಗಾಗಿ, ಗ್ರಾಹಕರನ್ನು ಕಳೆದುಕೊಳ್ಳುತ್ತಿದೆ.
ಇದನ್ನೂ ಓದಿ: 16ನೇ ಹಣಕಾಸು ಆಯೋಗದ ಸದಸ್ಯ ನಿರಂಜನ್ ರಾಜಾಧ್ಯಕ್ಷ ಹೊರಕ್ಕೆ; ವೈಯಕ್ತಿಕ ಕಾರಣದಿಂದ ಹಿಂದೆ ಸರಿದ ಸದಸ್ಯ
ಇನ್ನೊಂದೆಡೆ ವೊಡಾಫೋನ್ ಐಡಿಯಾ ಬಳಿ ಉತ್ತಮವಾದ 4ಜಿ ನೆಟ್ವರ್ಕ್ ಇದೆ. ಆದರೆ, ಬೇರೆ ಬೇರೆ ಕಾರಣಕ್ಕೆ ಅದೂ ಕೂಡ ಅದರ ಗ್ರಾಹಕರು ಜಿಯೋ, ಏರ್ಟೆಲ್ಗೆ ವಲಸೆ ಹೋಗುವುದು ತಪ್ಪಿಲ್ಲ. ಈಗ ವೊಡಾಫೋನ್ ಐಡಿಯಾದ 4ಜಿ ನೆಟ್ವರ್ಕ್ ಅನ್ನು ಬಳಕೆ ಮಾಡಲು ಬಿಎಸ್ಎನ್ಎಲ್ಗೆ ಅವಕಾಶ ದೊರಕಿಸಿಕೊಟ್ಟರೆ ಅದರಿಂದ ಎರಡೂ ಟೆಲಿಕಾಂ ಕಂಪನಿಗಳಿಗೆ ಅನುಕೂಲವಾಗುತ್ತದೆ ಎಂದು ಸಚಿವರಿಗೆ ಬರೆದ ಪತ್ರದಲ್ಲಿ ಬಿಎಸ್ಎನ್ಎಲ್ ಎಂಪ್ಲಾಯೀ ಯೂನಿಯನ್ನ ಪ್ರಧಾನ ಕಾರ್ಯದರ್ಶಿ ಪಿ ಅಭಿಮನ್ಯು ವಿವರಿಸಿದ್ದಾರೆ.
ಅಲ್ಲದೇ, ವೊಡಾಫೋನ್ ಐಡಿಯಾದಲ್ಲಿ ಸರ್ಕಾರದ ಷೇರುಪಾಲು ಶೇ. 33.1ರಷ್ಟಿರುವುದರಿಂದ ಅದರ 4ಜಿ ನೆಟ್ವರ್ಕ್ ಬಳಕೆಗೆ ಅವಕಾಶ ಕೊಡಿಸುವುದು ಕಷ್ಟವೇನಲ್ಲ ಎಂದು ಅಭಿಮನ್ಯು ತಮ್ಮ ಪತ್ರದಲ್ಲಿ ತಿಳಿಸಿದ್ದಾರೆ.
ಟಿಸಿಎಸ್ನಿಂದ ಬಿಎಸ್ಎನ್ಎಲ್ಗೆ 4ಜಿ ಅಳವಡಿಕೆ
ಜಿಯೋ, ಏರ್ಟೆಲ್, ವೊಡಾಫೋನ್ ಐಡಿಯಾ ಈಗಾಗಲೇ 5ಜಿ ಅಳವಡಿಕೆ ಮಾಡುತ್ತಿವೆ. ಆದರೆ, ಈ ರೇಸ್ನಲ್ಲಿ ಬಿಎಸ್ಎನ್ಎಲ್ ತೀರಾ ಹಿಂದುಳಿದಿದೆ. 3ಜಿಯಲ್ಲೇ ಇರುವ ಬಿಎಸ್ಎನ್ಎಲ್ ಈಗ 4ಜಿಗೆ ಅಪ್ಗ್ರೇಡ್ ಆಗುತ್ತಿದೆ. ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ ಸಂಸ್ಥೆ ಬಿಎಸ್ಎನ್ಎಲ್ಗೆ 4ಜಿ ನೆಟ್ವರ್ಕ್ ಅಳವಡಿಕೆ ಮಾಡುತ್ತಿದೆ. ದೇಶಾದ್ಯಂತ ಇನ್ನೂ ಪೂರ್ಣವಾಗಿ ಇದರ ಅಳವಡಿಕೆ ಆಗಿಲ್ಲ. ಹೀಗಾಗಿ, ಬಹಳಷ್ಟು ಬಿಎಸ್ಎನ್ಎಲ್ ಗ್ರಾಹಕರು ಜಿಯೋ ಅಥವಾ ಏರ್ಟೆಲ್ ಕಡೆಗೆ ವಾಲುತ್ತಿದ್ದಾರೆ.
ಇದನ್ನೂ ಓದಿ: ಎನ್ವಿಡಿಯಾ ಸಿಇಒ: ಒಬ್ಬ ಸಾಧಾರಣ ವೈಟರ್ ವಿಶ್ವದ ಶ್ರೀಮಂತ ವ್ಯಕ್ತಿಯಾದ ಇಂಟರೆಸ್ಟಿಂಗ್ ಕಥೆ
ಟಿಸಿಎಸ್ನಿಂದ 4ಜಿ ನೆಟ್ವರ್ಕ್ ಪೂರ್ಣ ಆಗುವವರೆಗೂ ವೊಡಾಫೋನ್ ಐಡಿಯಾದ 4ಜಿ ನೆಟ್ವರ್ಕ್ ಅನ್ನು ಬಳಸುವುದರಿಂದ ಗ್ರಾಹಕರ ವಲಸೆಯನ್ನು ತತ್ಕ್ಷಣಕ್ಕೆ ತಡೆಯಬಹುದು. ಇದು ತಾತ್ಕಾಲಿಕ ವ್ಯವಸ್ಥೆ ಮಾತ್ರ ಎಂಬುದು ಬಿಎಸ್ಎನ್ಎಲ್ನ ಲೆಕ್ಕಾಚಾರ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
