CCI Penalty: ಮೇಕ್ಮೈಟ್ರಿಪ್, ಓಯೊ, ಗೊಯಿಬಿಬೊಗೆ ಸಿಸಿಐಯಿಂದ 392 ಕೋಟಿ ರೂ. ದಂಡ
ಕಾನೂನು ಪ್ರಕಾರ ಸಮ್ಮತವಲ್ಲದ ವ್ಯಾಪಾರ ತಂತ್ರಗಳನ್ನು ಅನುಸರಿಸಿದ್ದಕ್ಕಾಗಿ ಆನ್ಲೈನ್ ಟ್ರಾವೆಲ್ ಕಂಪನಿಗಳಾದ ಮೇಕ್ಮೈಟ್ರಿಪ್, ಗೊಯಿಬಿಬೊ ಹಾಗೂ ಸೇವಾ ಪೂರೈಕೆದಾರ ಕಂಪನಿ ಓಯೊಗೆ ಭಾರತೀಯ ಸ್ಪರ್ಧಾ ಆಯೋಗವು 392 ಕೋಟಿ ರೂಪಾಯಿ ದಂಡ ವಿಧಿಸಿದೆ.
Updated on:Oct 20, 2022 | 11:29 AM
ನವದೆಹಲಿ: ಕಾನೂನು ಪ್ರಕಾರ ಸಮ್ಮತವಲ್ಲದ ವ್ಯಾಪಾರ ತಂತ್ರಗಳನ್ನು ಅನುಸರಿಸಿದ್ದಕ್ಕಾಗಿ ಆನ್ಲೈನ್ ಟ್ರಾವೆಲ್ ಕಂಪನಿಗಳಾದ ಮೇಕ್ಮೈಟ್ರಿಪ್ (Make My Trip), ಗೊಯಿಬಿಬೊ (Goibibo) ಹಾಗೂ ಸೇವಾ ಪೂರೈಕೆದಾರ ಕಂಪನಿ ಓಯೊಗೆ ಭಾರತೀಯ ಸ್ಪರ್ಧಾ ಆಯೋಗವು (Competition Commission of India) 392 ಕೋಟಿ ರೂಪಾಯಿ ದಂಡ ವಿಧಿಸಿದೆ. ಮೇಕ್ಮೈಟ್ರಿಪ್-ಗೊಯಿಬಿಬೊಗೆ (MMT-Go) 223.48 ಕೋಟಿ ರೂ. ಹಾಗೂ ಓಯೊಗೆ 168.88 ಕೋಟಿ ರೂ. ದಂಡ ವಿಧಿಸಲಾಗಿದೆ ಎಂದು 131 ಪುಟಗಳ ಆದೇಶದಲ್ಲಿ ಸ್ಪರ್ಧಾ ಆಯೋಗ ತಿಳಿಸಿದೆ.
ಮೇಕ್ಮೈಟ್ರಿಪ್-ಗೊಯಿಬಿಬೊ ತನ್ನ ಹೋಟೆಲ್ ಪಾಲುದಾರರೊಂದಿಗೆ ಬೆಲೆಯ ಕುರಿತು ಒಪ್ಪಂದ ಮಾಡಿಕೊಂಡಿದ್ದವು. ಈ ಒಪ್ಪಂದದ ಪ್ರಕಾರ, ಪಾಲುದಾರ ಹೋಟೆಲ್ಗಳು ಬೇರೆ ಯಾವುದೇ ಆನ್ಲೈನ್ ತಾಣಗಳಲ್ಲಿ ಕಡಿಮೆ ದರಕ್ಕೆ ಕೊಠಡಿಗಳನ್ನು ಕಾಯ್ದಿರಿಸಲು ಅವಕಾಶ ನೀಡುವಂತಿಲ್ಲ. ಅಲ್ಲದೆ, ತಮ್ಮದೇ ಆದ ಆನ್ಲೈನ್ ತಾಣಗಳಲ್ಲಿಯೂ ಮೇಕ್ಮೈಟ್ರಿಪ್-ಗೊಯಿಬಿಬೊದ ದರಕ್ಕಿಂತ ಕಡಿಮೆ ಬೆಲೆಗೆ ಕೊಠಡಿ ಬುಕಿಂಗ್ಗೆ ಅವಕಾಶ ನೀಡುವಂತಿಲ್ಲ.
ಇದನ್ನೂ ಓದಿ: Rupee Value: ಮತ್ತೆ ಪಾತಾಳಕ್ಕೆ ಕುಸಿದ ರೂಪಾಯಿ, ಡಾಲರ್ ವಿರುದ್ಧ 83.06ಕ್ಕೆ ಇಳಿಕೆ
ದಂಡ ವಿಧಿಸಿರುವುದು ಮಾತ್ರವಲ್ಲದೆ, ಹೋಟೆಲ್ಗಳೊಂದಿಗೆ ದರಕ್ಕೆ ಸಂಬಂಧಿಸಿ ಮಾಡಿರುವ ಸಮ್ಮತವಲ್ಲದ ಒಪ್ಪಂದವನ್ನು ಹಿಂಪಡೆಯುವಂತೆ ಮೇಕ್ಮೈಟ್ರಿಪ್-ಗೊಯಿಬಿಬೊಗೆ ಆಯೋಗ ಸೂಸಿಚಿದೆ.
ಕಂಪನಿಗಳ ವಿರುದ್ಧ ದಾಖಲಾದ ದೂರುಗಳಿಗೆ ಸಂಬಂಧಿಸಿ ವಿಸ್ತೃತ ತನಿಖೆ ನಡೆಸುವಂತೆ ಆಯೋಗವು 2019ರಲ್ಲಿ ಆದೇಶಿಸಿತ್ತು.
ಗ್ರಾಹಕರು ಆನ್ಲೈನ್ ಮೂಲಕ ಕೊಠಡಿಗಳನ್ನು ಕಾಯ್ದಿರಿಸುವ ಸಂದರ್ಭದಲ್ಲಿ ಮೇಕ್ಮೈಟ್ರಿಪ್-ಗೊಯಿಬಿಬೊ ಒಂದು ಶುಲ್ಕ ವಿಧಿಸುತ್ತಿತ್ತು. ಅದನ್ನು ಸಂಬಂಧಪಟ್ಟ ಹೋಟೆಲ್ಗೆ ವರ್ಗಾಯಿಸುತ್ತಿರಲಿಲ್ಲ. ಪರಿಣಾಮವಾಗಿ ಗ್ರಾಹಕರು ಹೋಟೆಲ್ನಲ್ಲಿ ಮರಳಿ ಶುಲ್ಕ ನೀಡಬೇಕಾಗುತ್ತಿತ್ತು ಎಂಬುದು ತನಿಖೆ ವೇಳೆ ತಿಳಿದುಬಂದಿದೆ ಎಂದು ಸ್ಪರ್ಧಾ ಆಯಯೋಗ ತಿಳಿಸಿದೆ.
ಇಬಿಬೊ ಸಮೂಹವನ್ನು 2017ರಲ್ಲಿ ಎಂಎಂಟಿ ಇಂಡಿಯಾ (ಮೇಕ್ಮೈ ಟ್ರಿಪ್) ಖರೀದಿಸಿತ್ತು. ಎಂಎಂಟಿ ಇಂಡಿಯಾವು ಮೇಕ್ಮೈಟ್ರಿಪ್ ಎಂಬ ಬ್ರ್ಯಾಂಡ್ ಅಡಿಯಲ್ಲಿ ಹಾಗೂ ಇಬಿಬೊ ಇಂಡಿಯಾ ಗೊಯಿಬಿಬೊ ಬ್ರ್ಯಾಂಡ್ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿವೆ.
ಭಾರತೀಯ ಸ್ಪರ್ಧಾ ಆಯೋಗವು ದೇಶದಲ್ಲಿ ಉದ್ಯಮಗಳ ನ್ಯಾಯಸಮ್ಮತವಲ್ಲದ ಸ್ಪರ್ಧಾತ್ಮಕತೆಯನ್ನು ತಡೆಯುವುದಕ್ಕಾಗಿ ರೂಪಿಸಲ್ಪಟ್ಟಿರುವ ಸಂಸ್ಥೆಯಾಗಿದೆ. ಇದು ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯದ ಅಧೀನದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಶಾಸನಬದ್ಧ ಸಂಸ್ಥೆಯಾಗಿದೆ. 2002ರ ಸ್ಪರ್ಧಾ ಕಾಯ್ದೆಯನ್ನು ಅನುಷ್ಠಾನಗೊಳಿಸುವ ಜವಾಬ್ದಾರಿ ಈ ಸಂಸ್ಥೆಗಿದೆ. ಆಯೋಗವು 2003ರ ಅಕ್ಟೋಬರ್ 14 ರಂದು ಅಸ್ತಿತ್ವಕ್ಕೆ ಬಂತು. ಇದು 2009ರ ಮೇ ತಿಂಗಳಲ್ಲಿ ಪೂರ್ಣಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲಾರಂಭಿಸಿತ್ತು.
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 11:19 am, Thu, 20 October 22
