ಇಪಿಎಫ್​ಒದ ಬಹುನಿರೀಕ್ಷಿತ ಎಟಿಎಂ ಫೀಚರ್: ಜನವರಿಯಿಂದ ಸಿಗುತ್ತಾ ಈ ಸೌಲಭ್ಯ?

ನವದೆಹಲಿ, ಸೆಪ್ಟೆಂಬರ್ 24: ಇಪಿಎಫ್​ಒ (EPFO) ಸದಸ್ಯರು ತಮ್ಮ ಹಣವನ್ನು ಹಿಂಪಡೆಯುವ ಕಾರ್ಯ ಮುಂದಿನ ದಿನಗಳಲ್ಲಿ ಬಹಳ ಸುಲಭವಾಗಲಿದೆ. ಬಹಳ ದಿನಗಳಿಂದ ನಿರೀಕ್ಷಿಸಲಾಗಿದ್ದ ಎಟಿಎಂ ವಿತ್​ಡ್ರಾಯಲ್ ಸೌಲಭ್ಯ 2026ರ ಜನವರಿಯಲ್ಲಿ ಲಭ್ಯ ಇರಲಿದೆ. ಉದ್ಯೋಗಿಗಳು ತಮ್ಮ ಪಿಎಫ್ ಹಣವನ್ನು ಎಟಿಎಂನಿಂದ ನೇರವಾಗಿ ವಿತ್​ಡ್ರಾ ಮಾಡಲು ಸಾಧ್ಯವಾಗಲಿದೆ. ಮನಿ ಕಂಟ್ರೋಲ್ ವರದಿ ಪ್ರಕಾರ ಇಪಿಎಫ್​ಒನ ಕೇಂದ್ರೀಯ ಟ್ರಸ್ಟೀಗ ಮಂಡಳಿಯ ಮುಂದಿನ ಸಭೆಯಲ್ಲಿ ಎಟಿಎಂ ವಿತ್​ಡ್ರಾಯಲ್ ಸೌಲಭ್ಯಕ್ಕೆ ಅನುಮೋದನೆ ಕೊಡುವ ನಿರೀಕ್ಷೆ ಇದೆ.

ಎಟಿಎಂ ಮೂಲಕ ಪಿಎಫ್ ಹಣ ವಿತ್​ಡ್ರಾ ಮಾಡಲು ಅನುವಾಗುವಂತೆ ಇಪಿಎಫ್​ಒನ ಐಟಿ ಇನ್​ಫ್ರಾಸ್ಟ್ರಕ್ಚರ್ ಸಿದ್ಧವಾಗಿದೆ. ಅದಕ್ಕೆ ಅನುಮೋದನೆ ಸಿಗಬಹುದು. 2026ರ ಜನವರಿಯಿಂದ ಈ ಸೌಲಭ್ಯ ಸಿಗಬಹುದು ಎಂದು ವರದಿಯಲ್ಲಿ ಹೇಳಲಾಗಿದೆ.

ಇದನ್ನೂ ಓದಿ: ಪೋಸ್ಟ್ ಆಫೀಸ್​ನ ಈ ಸ್ಕೀಮ್​ನಿಂದ ತಿಂಗಳಿಗೆ 9,250 ರೂವರೆಗೂ ನಿಯಮಿತ ಆದಾಯ ಸೃಷ್ಟಿಸಿ

ಆದರೆ, ಎಟಿಎಂಗಳಲ್ಲಿ ಪಿಎಫ್ ಹಣ ಹೇಗೆ ವಿತ್​​ಡ್ರಾ ಮಾಡಬಹುದು, ಎಷ್ಟು ವಿತ್​ಡ್ರಾಯಲ್ ಮಿತಿ ಇರುತ್ತದೆ ಎಂಬಿತ್ಯಾದಿ ವಿವರ ಸದ್ಯಕ್ಕೆ ಲಭ್ಯವಾಗಿಲ್ಲ.

ಸದ್ಯ ಇರುವ ವ್ಯವಸ್ಥೆಯಲ್ಲಿ ಇಪಿಎಫ್ ಸದಸ್ಯರು ತಮ್ಮ ಅಕೌಂಟ್​ನಲ್ಲಿರುವ ಹಣವನ್ನು ಹಿಂಪಡಯಬೇಕೆಂದರೆ ಒಂದಷ್ಟು ಪ್ರಕ್ರಿಯೆಗಳಿವೆ. ಮೊದಲಿಗೆ ಹಣಕ್ಕೆ ಕ್ಲೇಮ್ ಸಲ್ಲಿಸಬೇಕು. ಅದಕ್ಕೆ ಅನುಮೋದನೆ ಸಿಕ್ಕರೆ ಆ ಹಣವು ಬ್ಯಾಂಕ್ ಅಕೌಂಟ್​ಗೆ ಜಮೆ ಆಗುತ್ತದೆ. ಅದನ್ನು ಉದ್ಯೋಗಿಗಗಳು ವಿತ್​ಡ್ರಾ ಮಾಡಿಕೊಳ್ಳಬಹುದು.

ಆದರೆ, ಎಟಿಎಂ ಫೀಚರ್​ನಲ್ಲಿ ಸದಸ್ಯರು ನೇರವಾಗಿ ಹಣ ವಿತ್​ಡ್ರಾ ಮಾಡಲು ಸಾಧ್ಯವಾಗಬಹುದು. ಬ್ಯಾಂಕ್ ಅಕೌಂಟ್​ನಲ್ಲಿರುವ ಹಣವನ್ನು ಎಟಿಎಂ ಕಾರ್ಡ್ ಮೂಲಕ ಹಿಂಪಡೆಯಲಾಗುವಂತೆ ಈ ವ್ಯವಸ್ಥೆ ಇರಬಹುದು. ಹಿಂದೆ ಬಂದ ವರದಿಯೊಂದರ ಪ್ರಕಾರ, ಇಪಿಎಫ್​ಒದಿಂದ ಎಲ್ಲಾ ಸದಸ್ಯರಿಗೂ ಎಟಿಎಂ ಕಾರ್ಡ್ ರೀತಿ ಇಪಿಎಫ್ ಕಾರ್ಡ್ ನೀಡಲಾಗಬಹುದು. ಅದನ್ನು ಬಳಸಿ ಎಟಿಎಂಗಳಲ್ಲಿ ಹಣ ವಿತ್​ಡ್ರಾ ಮಾಡಲು ಸಾಧ್ಯ ಎನ್ನಲಾಗಿದೆ.

ಇದನ್ನೂ ಓದಿ: ಇಪಿಎಫ್​ಒನಲ್ಲಿ ಹೊಸ ಫೀಚರ್ಸ್; ಪಾಸ್​ಬುಕ್ ಲೈಟ್, ಟ್ರಾನ್ಸ್ಫರ್ ಸರ್ಟಿಫಿಕೇಟ್, ತ್ವರಿತ ಅನುಮೋದನೆ

ಈ ಬಗ್ಗೆ ಇಪಿಎಫ್​ಒದಿದ ಯಾವ ಅಧಿಕೃತ ಮಾಹಿತಿ ಬಂದಿಲ್ಲ. ಆದರೆ, ಎಟಿಎಂ ವಿತ್​ಡ್ರಾಯಲ್ ಸೌಲಭ್ಯ ಬರಲಿರುವ ವಿಚಾರ ಮಾತ್ರ ಅಧಿಕೃತವಿದೆ. ಹಣವನ್ನು ಹೇಗೆ ವಿತ್​ಡ್ರಾ ಮಾಡುವುದು, ಎಷ್ಟು ಹಣ ವಿತ್​ಡ್ರಾ ಮಾಡುವುದು ಇತ್ಯಾದಿ ವಿವರಗಳು ಮುಂದಿನ ದಿನಗಳಲ್ಲಿ ಗೊತ್ತಾಗಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ