2024ರ ಏಪ್ರಿಲ್ನಿಂದ ಸೆಪ್ಟೆಂಬರ್ನಲ್ಲಿ ಭಾರತಕ್ಕೆ ಬಂತು 29.79 ಬಿಲಿಯನ್ ಡಾಲರ್ ಎಫ್ಡಿಐ; ಕರ್ನಾಟಕಕ್ಕೆ ಸಿಕ್ಕಿದ್ದೆಷ್ಟು?
FDI to India: ಭಾರತಕ್ಕೆ ವಿದೇಶೀ ನೇರ ಹೂಡಿಕೆ ಏಪ್ರಿಲ್ನಿಂದ ಸೆಪ್ಟೆಂಬರ್ ಅವಧಿಯಲ್ಲಿ 29.79 ಬಿಲಿಯನ್ ಡಾಲರ್ಷ್ಟು ಸಿಕ್ಕಿದೆ. ಮೊದಲ ಕ್ವಾರ್ಟರ್ನಲ್ಲಿ 16.17 ಬಿಲಿಯನ್ ಡಾಲರ್, ಎರಡನೇ ಕ್ವಾರ್ಟರ್ನಲ್ಲಿ 13.6 ಬಿಲಿಯನ್ ಡಾಲರ್ ಎಫ್ಡಿಐ ಸಿಕ್ಕಿದೆ. ಆರು ತಿಂಗಳಲ್ಲಿ ಬಂದ 29.79 ಎಫ್ಡಿಐನಲ್ಲಿ ಮಹಾರಾಷ್ಟ್ರಕ್ಕೆ ಅರ್ಧದಷ್ಟು ಹೋಗಿದೆ. ಕರ್ನಾಟಕ ನಂತರದ ಸ್ಥಾನದಲ್ಲಿದೆ.
Updated on: Dec 03, 2024 | 4:10 PM
ನವದೆಹಲಿ, ಡಿಸೆಂಬರ್ 3: ಭಾರತದಲ್ಲಿ ವಿದೇಶೀ ನೇರ ಹೂಡಿಕೆಗಳು (ಎಫ್ಡಿಐ) ಏಪ್ರಿಲ್ನಿಂದ ಸೆಪ್ಟೆಂಬರ್ವರೆಗಿನ ಅವಧಿಯಲ್ಲಿ 29.79 ಬಿಲಿಯನ್ ಡಾಲರ್ನಷ್ಟಿವೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಆಗಿದ್ದ ಎಫ್ಡಿಐ ಮೊತ್ತ 20.5 ಬಿಲಿಯನ್ ಡಾಲರ್. ಈ ಬಾರಿ ಬರೋಬ್ಬರಿ ಶೇ. 45ರಷ್ಟು ಹೆಚ್ಚು ವಿದೇಶೀ ಹೂಡಿಕೆಗಳು ಭಾರತಕ್ಕೆ ಹರಿದುಬಂದಿರುವುದು ಸರ್ಕಾರ ಬಿಡುಗಡೆ ಮಾಡಿದ ದತ್ತಾಂಶದಿಂದ ತಿಳಿದುಬಂದಿದೆ.
ಇನ್ನು, ಜುಲೈನಿಂದ ಸೆಪ್ಟೆಂಬರ್ವರೆಗಿನ ಕ್ವಾರ್ಟರ್ನಲ್ಲಿ ಫಾರೀನ್ ಡಿರೆಕ್ಟ್ ಇನ್ವೆಸ್ಟ್ಮೆಂಟ್ 13.6 ಬಿಲಿಯನ್ ಡಾಲರ್ನಷ್ಟಿದೆ. ಕಳೆದ ವರ್ಷದ ಇದೇ ತ್ರೈಮಾಸಿಕ ಅವಧಿಯಲ್ಲಿ 9.52 ಬಿಲಿಯನ್ ಡಾಲರ್ ಎಫ್ಡಿಐ ಭಾರತಕ್ಕೆ ಬಂದಿತ್ತು.
ಅದಕ್ಕೂ ಹಿಂದಿನ ಕ್ವಾರ್ಟರ್ ಆದ ಏಪ್ರಿಲ್ನಿಂದ ಜೂನ್ವರೆಗಿನ ಅವಧಿಯಲ್ಲಿ ಶೇ. 47ರಷ್ಟು ಹೆಚ್ಚಾಗಿದ್ದ ಎಫ್ಡಿಐ ಒಳಹರಿವು 16.17 ಬಿಲಿಯನ್ ಡಾಲರ್ ಗಡಿ ಮುಟ್ಟಿತ್ತು.
ಇದನ್ನೂ ಓದಿ: ನವೆಂಬರ್ನಲ್ಲಿ ಭಾರತದಲ್ಲಿ ಕಲ್ಲಿದ್ದಲು ಉತ್ಪಾದನೆ 90.62 ಮಿಲಿಯನ್ ಟನ್; ಶೇ. 7.2ರಷ್ಟು ಉತ್ಪಾದನೆ ಹೆಚ್ಚಳ
ಈಕ್ವಿಟಿ ಒಳಹರಿವು, ಆದಾಯದ ಮರುಹೂಡಿಕೆ ಮತ್ತಿತರ ಬಂಡವಾಳಗಳೆಲ್ಲವನ್ನೂ ಒಳಗೊಂಡ ಒಟ್ಟು ಎಫ್ಡಿಐ ಹೂಡಿಕೆ ಏಪ್ರಿಲ್ನಿಂದ ಸೆಪ್ಟೆಂಬರ್ನಲ್ಲಿ 42.1 ಬಿಲಿಯನ್ ಡಾಲರ್ನಷ್ಟಾಗುತ್ತದೆ. ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಇದು ಶೇ. 28ರಷ್ಟು ಹೆಚ್ಚಳ ಆದಂತಾಗಿದೆ ಎಂದು ಡಿಪಿಐಐಟಿ ದತ್ತಾಂಶದಿಂದ ತಿಳಿದುಬರುತ್ತದೆ.
ಎಫ್ಡಿಐನ ಈಕ್ವಿಟಿ ಒಳಹರಿವಿನ ವಿಚಾರಕ್ಕೆ ಬಂದರೆ, ಮಾರಿಷಸ್, ಸಿಂಗಾಪುರ್, ಅಮೆರಿಕ, ನೆದರ್ಲ್ಯಾಂಡ್ಸ್, ಯುಎಐ, ಕೇಮ್ಯಾನ್ ಐಲ್ಯಾಂಡ್ಸ್, ಸೈಪ್ರಸ್ ದೇಶಗಳಿಂದ ಹೆಚ್ಚುವರಿ ಹರಿವು ಸಿಕ್ಕಿದೆ. ಜಪಾನ್ ಮತ್ತು ಬ್ರಿಟನ್ನಿಂದ ಎಫ್ಡಿಐಗಳ ಈಕ್ವಿಟಿ ಒಳಹರಿವು ಮೈನಸ್ನಲ್ಲಿದೆ.
ಇದನ್ನೂ ಓದಿ: ಭಾರತವನ್ನು ಪ್ರಯೋಗಶಾಲೆ ಎಂದ ಬಿಲ್ ಗೇಟ್ಸ್; ಸೋಷಿಯಲ್ ಮೀಡಿಯಾದಲ್ಲಿ ಟೀಕೆಗಳ ಸುರಿಮಳೆ
ಎಫ್ಡಿಐ ಪಡೆದ ರಾಜ್ಯಗಳಲ್ಲಿ ಕರ್ನಾಟಕ ಎರಡನೇ ಸ್ಥಾನ
2024ರ ಏಪ್ರಿಲ್ನಿಂದ ಸೆಪ್ಟೆಂಬರ್ನಲ್ಲಿ ಮಹಾರಾಷ್ಟ್ರ ರಾಜ್ಯಕ್ಕೆ ಅತಿಹೆಚ್ಚು ಎಫ್ಡಿಐ ಸಿಕ್ಕಿದೆ. 13.55 ಬಿಲಿಯನ್ ಡಾಲರ್ನಷ್ಟು ಬಂಡವಾಳವು ಆ ರಾಜ್ಯಕ್ಕೆ ಹೋಗಿದೆ. ಇನ್ನು ಕರ್ನಾಟಕಕ್ಕೆ ಸಿಕ್ಕಿರುವ ಎಫ್ಡಿಐ 3.54 ಬಿಲಿಯನ್ ಡಾಲರ್. ತೆಲಂಗಾಣ ರಾಜ್ಯಕ್ಕೆ 1.54 ಬಿಲಿಯನ್ ಡಾಲರ್ ಎಫ್ಡಿಐ ಸಿಕ್ಕಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
