ಬೆಂಗಳೂರಿನ ಹೊಸಕೋಟೆಯಲ್ಲಿ ಬಿಸಿಡಿ ಟೌನ್​ಶಿಪ್; ಮಹಿಳಾ ಫಾಕ್ಸ್​ಕಾನ್ ಉದ್ಯೋಗಿಗಳಿಗೆ 900 ಅಪಾರ್ಟ್ಮೆಂಟ್ಸ್

ಬೆಂಗಳೂರು, ಸೆಪ್ಟೆಂಬರ್ 12: ಇಲ್ಲಿಯ ಹೊಸಕೋಟೆಯಲ್ಲಿ ಬಿಸಿಡಿ ಗ್ರೂಪ್​ನಿಂದ ನಿರ್ಮಾಣವಾಗುತ್ತಿರುವ ಟೌನ್​ಶಿಪ್​ನಲ್ಲಿ 900 ಅಪಾರ್ಟ್ಮೆಂಟ್​​ಗಳನ್ನು ಫಾಕ್ಸ್​ಕಾನ್ ಬುಕ್ ಮಾಡುತ್ತಿದೆ ಎನ್ನುವಂತಹ ಸುದ್ದಿ ಇದೆ. ಹಿಂದೂಸ್ತಾನ್ ಟೈಮ್ಸ್ ವರದಿ ಪ್ರಕಾರ ಈ ಅಪಾರ್ಟ್ಮೆಂಟ್​ಗಳನ್ನು ಮೂರು ವರ್ಷದ ಗುತ್ತಿಗೆಗೆ ಪಡೆಯಲಾಗುತ್ತಿದೆ. ಇದರಲ್ಲಿ ಫಾಕ್ಸ್​ಕಾನ್​ನ ಮಹಿಳಾ ಉದ್ಯೋಗಿಗಳಿಗೆ ಹಂಚಿಕೆ ಮಾಡುವ ಸಾಧ್ಯತೆ ಇದೆ. ಫಾಕ್ಸ್​ಕಾನ್​ನ ಎಂಜಿನಿಯರಿಂಗ್, ಟೆಕ್ನಿಕಲ್ ಮತ್ತು ಸಪೋರ್ಟ್ ಸ್ಟಾಫ್ ಇರಲಿದ್ದಾರೆ. ಹಾಗೆಯೇ, ಫ್ಯಾಕ್ಟರಿಯ ಮಹಿಳಾ ಕಾರ್ಮಿಕರಿಗೂ ಇಲ್ಲಿಯೇ ವ್ಯವಸ್ಥೆ ಮಾಡಬಹುದು.

ದೇವನಹಳ್ಳಿಯ ಕೆಂಪೇಗೌಡ ಏರ್ಪೋರ್ಟ್ ಬಳಿಯ 300 ಎಕರೆ ಜಾಗದಲ್ಲಿ ಫಾಕ್ಸ್​ಕಾನ್ ಸಂಸ್ಥೆ ಐಫೋನ್ ಅಸೆಂಬ್ಲಿಂಗ್ ಘಟಕ ಸ್ಥಾಪಿಸುತ್ತಿದೆ. ಫಾಕ್ಸ್​ಕಾನ್​ನ ಐಫೋನ್ ಫ್ಯಾಕ್ಟರಿ ಸ್ಥಳವು ಈ ಟೌನ್​ಶಿಪ್​ನಿಂದ ಕೆಲ ಕಿಮೀ ದೂರ ಮಾತ್ರವೇ ಇದೆ. 25 ನಿಮಿಷಗಳ ಡ್ರೈವಿಂಗ್​ನಷ್ಟು ದೂರ ಇದೆ.

ಇದನ್ನೂ ಓದಿ: ಐದು ಲಕ್ಷ ಕವರೇಜ್ ನೀಡುವ ಆಯುಷ್ಮಾನ್ ಭಾರತ್ ಹೆಲ್ತ್ ಇನ್ಷೂರೆನ್ಸ್ ಸ್ಕೀಮ್​ಗೆ ಅರ್ಜಿ ಸಲ್ಲಿಕೆ, ಅರ್ಹತೆ, ದಾಖಲೆ ಇತ್ಯಾದಿ ವಿವರ

ರಿಯಲ್ ಎಸ್ಟೇಟ್ ಕಂಪನಿಯಾದ ಬಿಸಿಡಿ ಗ್ರೂಪ್ ಈ ಟೌನ್​ಶಿಪ್ ಅಭಿವೃದ್ಧಿಪಡಿಸುತ್ತಿದೆ. ಈ ಮೊದಲು ಬೇರೆ ಕಂಪನಿಯಿಂದ ಈ ಟೌನ್​ಶಿಪ್ ನಿರ್ಮಾಣ ಯೋಜನೆ ಕೈಗೆತ್ತಿಕೊಳ್ಳಲಾಗಿತ್ತು. 2021ರಲ್ಲಿ ಬಿಸಿಡಿ ಗ್ರೂಪ್ ಈ ಪ್ರಾಜೆಕ್ಟ್ ಪಡೆದುಕೊಂಡಿತು. 250 ಕೋಟಿ ರೂ ಬಂಡವಾಳ ಹಾಕಿ ಪ್ರಾಜೆಕ್ಟ್ ಪೂರ್ಣಗೊಳಿಸಿದೆ. ಅರ್ಥ ಎಂಪ್ರಾಸ ಎಂದಿದ್ದ ಟೌನ್​ಶಿಪ್ ಹೆಸರನ್ನು ಬಿಸಿಡಿ ಎಂಪ್ರಾಸ ಎಂದು ರೀ ಬ್ರ್ಯಾಂಡಿಂಗ್ ಮಾಡಲಾಗಿದೆ.

ಈ ಇಡೀ ಟೌನ್​ಶಿಪ್ ಅನ್ನು ಐಟಿ ವಲಯದ ಮಹಿಳೆಯರಿಗೆಂದು ಮಾಡಲಾಗಿರುವುದು ಸದ್ಯಕ್ಕೆ ತಿಳಿದುಬಂದಿರುವ ಮಾಹಿತಿ. ಇದೇನಾದರೂ ನಿಜವಾದಲ್ಲಿ ಭಾರತದಲ್ಲಿ ಮೊದಲ ಬಾರಿಗೆ ಕಾರ್ಪೊರೇಟ್ ವಲಯದ ಮಹಿಳಾ ಉದ್ಯೋಗಿಗಳಿಗೆ ಟೌನ್​ಶಿಪ್ ನಿರ್ಮಾಣವಾದಂತಾಗಿದೆ.

ಹೊಸಕೋಟೆ ಬಳಿ 8 ಎಕರೆ ಜಾಗದಲ್ಲಿ ಬಿಸಿಡಿ ಎಂಪ್ರಾಸ ಟೌನ್​ಶಿಪ್ ನಿರ್ಮಾಣವಾಗುತ್ತಿದೆ. ಇದರಲ್ಲಿ ತಲಾ 9 ಫ್ಲೋರ್​ಗಳಿರುವ 9 ಟವರ್​ಗಳಿವೆ. 700ರಿಂದ 800 ಚದರಡಿ ವಿಸ್ತೀರ್ಣದ ಸಣ್ಣ ಅಪಾರ್ಟ್ಮೆಂಟ್​ಗಳು ಇಲ್ಲಿವೆ. ಒಂದೊಂದು ಅಪಾರ್ಟ್ಮೆಂಟ್​ನಲ್ಲೂ 4ರಿಂದ 6 ಜನರು ವಾಸಿಸಬಹುದು.

ಇದನ್ನೂ ಓದಿ: ಅಮೆರಿಕದಲ್ಲಿ ಹಣದುಬ್ಬರ ಇಳಿಕೆ; ಚಿನ್ನ, ಬೆಳ್ಳಿ ಬೆಲೆ ಏರುವ ಸಾಧ್ಯತೆ

ಅಂದಹಾಗೆ, ಈ ಮೇಲಿನ ಪ್ರಾಜೆಕ್ಟ್ 80 ಎಕರೆ ಟೌನ್​ಶಿಪ್ ಪ್ರಾಜೆಕ್ಟ್​ನ ಒಂದು ಭಾಗವಷ್ಟೇ. ಎರಡನೇ ಹಂತದಲ್ಲಿ 15 ಎಕರೆ ಜಾಗದಲ್ಲಿ ವಿಲ್ಲಾ ಮತ್ತಿತರ ವಸತಿಗಳ ನಿರ್ಮಾಣವಾಗಲಿದೆ. ವರ್ಷದ ಕೊನೆಯಲ್ಲಿ ಇದು ಪೂರ್ಣಗೊಳ್ಳುವ ಸಾಧ್ಯತೆ ಇದೆ. ಈ ವಿಚಾರವನ್ನು ಬಿಸಿಡಿ ಗ್ರೂಪ್​ನ ಎಂಡಿ ಮತ್ತು ಛೇರ್ಮನ್ ಆಗಿರುವ ಅಂಗದ್ ಬೇಡಿ ಹೇಳಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ