ನೊಂದಾಯಿತ ಸ್ಟಾರ್ಟಪ್​ಗಳ ಸಂಖ್ಯೆ 10 ಲಕ್ಷಕ್ಕೆ ಏರಿಸುವ ಗುರಿ: ಪಿಯೂಶ್ ಗೋಯಲ್

Follow us on

ನವದೆಹಲಿ, ಫೆಬ್ರುವರಿ 11: ಸರ್ಕಾರಿ ನೊಂದಾಯಿತ ನವೋದ್ಯಮಗಳ ಸಂಖ್ಯೆ ಮುಂದಿನ ಹತ್ತು ವರ್ಷದಲ್ಲಿ ಹತ್ತು ಲಕ್ಷಕ್ಕೆ ಏರಬಹುದು ಎಂದು ಕೇಂದ್ರ ವಾಣಿಜ್ಯ ಮತ್ತು ಉದ್ಯಮ ಸಚಿವ ಪೀಯುಶ್ ಗೋಯಲ್ ಆಶಯ ವ್ಯಕ್ತಪಡಿಸಿದ್ದಾರೆ. ದೇಶದಲ್ಲಿ ಉದ್ದಿಮೆದಾರರ ಬೆಳವಣಿಗೆಗೆ ಪೂರಕವಾಗುವ ಕ್ರಮಗಳನ್ನು ಸರ್ಕಾರ ತೆಗೆದುಕೊಂಡಿದ್ದರ ಫಲವಾಗಿ ಈ ಹತ್ತು ಲಕ್ಷ ಸ್ಟಾರ್ಟಪ್​ಗಳ ಸ್ಥಾಪನೆಯ ಕನಸು ಸಾಕಾರಗೊಳ್ಳಬಹುದು ಎಂಬುದು ಅವರ ವಿಶ್ವಾಸ.

2016ರಲ್ಲಿ ನೊಂದಾಯಿತ ಸ್ಟಾರ್ಟಪ್​ಗಳ ಸಂಖ್ಯೆ 450 ಮಾತ್ರ ಇತ್ತು. 2016ರ ಜನವರಿ 16ರಂದು ಸರ್ಕಾರವು ಸ್ಟಾರ್ಟಪ್ ಇಂಡಿಯಾ ಯೋಜನೆ ಆರಂಭಿಸಿತು. ದೇಶದಲ್ಲಿ ಉದ್ಯಮ ವಲಯದಲ್ಲಿ ನಾವೀನ್ಯತೆಗೆ ಆದ್ಯತೆ ಕೊಡಲು ಮತ್ತು ಸ್ಟಾರ್ಟಪ್​ಗಳಿಗೆ ಉತ್ತೇಜಿಸಲು ಸರ್ಕಾರ ಪ್ರಬಲ ಸ್ಟಾರ್ಟಪ್ ಇಕೋಸಿಸ್ಟಂ ನಿರ್ಮಿಸಲು ಆರಂಭಿಸಿತು. ಇದರ ಫಲವಾಗಿ ಇವತ್ತು ನೊಂದಾಯಿತ ಸ್ಟಾರ್ಟಪ್​ಗಳ ಸಂಖ್ಯೆ ಒಂದೂವರೆ ಲಕ್ಷಕ್ಕಿಂತಲೂ ಹೆಚ್ಚಿದೆ. ಇಕೋಸಿಸ್ಟಂ ಪ್ರಬಲಗೊಳ್ಳುತ್ತಿರುವಂತೆಯೇ ದೇಶದಲ್ಲಿ ಮತ್ತಷ್ಟು ಸ್ಟಾರ್ಟಪ್​ಗಳು ಗಣನೀಯ ಸಂಖ್ಯೆಯಲ್ಲಿ ಆರಂಭವಾಗುವ ಸಾಧ್ಯತೆ ಇಲ್ಲದಿಲ್ಲ.

ಇದನ್ನೂ ಓದಿ: Elon Musk vs Sam Altman: ನನ್ನ ನೀನು ‘ಕೊಳ್ಳ’ಲಾರೆ… ಎಕ್ಸ್ ಮ್ಯಾನ್ vs ಆಲ್ಟ್​ಮ್ಯಾನ್ ‘ಓಪನ್’ ವಾರ್; ಎಕ್ಸ್ ಹಿಂದಿಕ್ಕಿದ ಚ್ಯಾಟ್​ಜಿಪಿಟಿ

ಭಾರತ ಇಸ್ರೇಲ್ ಬಿಸಿನೆಸ್ ಫೋರಂ ಸಭೆಯಲ್ಲಿ ಮಾತನಾಡುತ್ತಿದ್ದ ಸಚಿವ ಪೀಯೂಶ್ ಗೋಯಲ್, ಮುಂದಿನ ಹತ್ತು ವರ್ಷದಲ್ಲಿ 10 ಲಕ್ಷ ಸ್ಟಾರ್ಟಪ್​ಗಳ ಗುರಿಯನ್ನು ತೆರೆದಿಟ್ಟಿದ್ದಾರೆ.

‘9 ವರ್ಷಗಳ ಹಿಂದೆ ನೊಂದಾಯಿತ ಸ್ಟಾರ್ಟಪ್​ಗಳ ಸಂಖ್ಯೆ 450 ಇತ್ತು. ಈಗ 1,57,000 ಆಗಿದೆ. ವಿಶ್ವದಲ್ಲಿ ಮೂರನೇ ಅತಿದೊಡ್ಡ ಸ್ಟಾರ್ಟಪ್ ಇಕೋಸಿಸ್ಟಂ ಹೊಂದಿದ್ದೇವೆ. ಮುಂದಿನ 10 ವರ್ಷದಲ್ಲಿ ಸ್ಟಾರ್ಟಪ್​ಗಳ ಸಂಖ್ಯೆಯನ್ನು 10 ಲಕ್ಷಕ್ಕೆ ತೆಗೆದುಕೊಂಡು ಹೋಗುವ ಭರವಸೆಯಲ್ಲಿ ಇದ್ದೇವೆ’ ಎಂದು ಕೇಂದ್ರ ವಾಣಿಜ್ಯ ಮತ್ತು ಉದ್ಯಮ ಸಚಿವರು ಹೇಳಿದ್ದಾರೆ.

ಇದನ್ನೂ ಓದಿ: ಇಂದಿನಿಂದ 3 ದಿನ ಇನ್ವೆಸ್ಟ್ ಕರ್ನಾಟಕ ಸಮ್ಮಿಟ್: ಈ ಬಾರಿಯ ವಿಶೇಷವೇನು? ಇಲ್ಲಿದೆ ವಿವರ

ಭಾರತ ಇಸ್ರೇಲ್ ಬ್ಯುಸಿನೆಸ್ ಫೋರಂ ಮತ್ತು ಭಾರತ ಇಸ್ರೇಲ್ ಸಿಇಒ ಫೋರಂ ಸಭೆಗಳಲ್ಲಿ ಪಾಲ್ಗೊಳ್ಳಲು ಇಸ್ರೇಲ್​ನ ನಿಯೋಗವೊಂದು ಬಂದಿದೆ. ಇಸ್ರೇಲ್​ನ ಆರ್ಥಿಕ ಮತ್ತು ಉದ್ಯಮ ಸಚಿವ ನಿರ್ ಎಂ ಬರ್ಕತ್ (Nir M Barkat) ನೇತೃತ್ವದ ಉನ್ನತ ಮಟ್ಟದ ಬಿಸಿನೆಸ್ ನಿಯೋಗ ಇದಾಗಿದೆ. ಭಾರತ ಮತ್ತು ಇಸ್ರೇಲ್​ನ ನಿಯೋಗಗಳು ಎರಡೂ ದೇಶಗಳ ನಡುವೆ ಹೂಡಿಕೆ ಮತ್ತು ವ್ಯಾಪಾರಗಳಿಗೆ ಉತ್ತೇಜನ ನೀಡಬಹುದಾದ ಮಾರ್ಗಗಳ ಕುರಿತು ಚರ್ಚೆಗಳನ್ನು ನಡೆಸುತ್ತಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ