Passport For Newborn Baby: ನವಜಾತ ಶಿಶುವಿನ ಪಾಸ್​ಪೋರ್ಟ್​ಗೆ ಅರ್ಜಿ ಸಲ್ಲಿಸುವುದು ಹೇಗೆ? ಇಲ್ಲಿದೆ ಮಾಹಿತಿ

ಅಂತಾರಾಷ್ಟ್ರೀಯ ಪ್ರಯಾಣಕ್ಕೆ ಪಾಸ್​ಪೋರ್ಟ್​ (Passport) ಬಹು ಅಗತ್ಯ. ಗುರುತಿನ ಚೀಟಿಯಾಗಿಯೂ ವಿಳಾಸ ದೃಢೀಕರಣದ ಗುರುತಾಗಿಯೂ ಪಾಸ್​ಪೋರ್ಟ್​ ಅನ್ನು ಬಳಸಲಾಗುತ್ತಿದೆ. ಪ್ರತಿಯೊಬ್ಬ ನಾಗರಿಕನೂ ಪಾಸ್​ಪೋರ್ಟ್​ಗೆ ಅರ್ಜಿ ಸಲ್ಲಿಸಲು ಕೇಂದ್ರ ಸರ್ಕಾರ ಅವಕಾಶ ಮಾಡಿಕೊಟ್ಟಿದೆ. ಅಂತಾರಾಷ್ಟ್ರೀಯ ಪ್ರಯಾಣ (International Travel) ಮಾಡುವ ಚಿಕ್ಕ ಮಕ್ಕಳು ಮತ್ತು ನವಜಾತ ಶಿಶುಗಳ ಹೆಸರಿನಲ್ಲಿಯೂ ಪಾಸ್​​ಪೋರ್ಟ್​ಗೆ​ ಅರ್ಜಿ ಸಲ್ಲಿಸಬಹುದಾಗಿದೆ. ಆದರೆ, ನವಜಾತ ಶಿಶುವಿಗೆ ಪಾಸ್​ಪೋರ್ಟ್ ಅರ್ಜಿ ಸಲ್ಲಿಸುವ ವಿಧಾನ ವಯಸ್ಕರ ಅರ್ಜಿ ಸಲ್ಲಿಕೆ ವಿಧಾನಕ್ಕಿಂತ ತುಸು ಭಿನ್ನವಾಗಿದೆ. ಇಲ್ಲಿ ಪಾಲಕರು ಅಥವಾ ಪೋಷಕರು ಪ್ರಮುಖ ಪಾತ್ರ ವಹಿಸುತ್ತಾರೆ. ಇವರು ‘ಅನುಬಂಧ ಡಿ’ಯಲ್ಲಿ ಉಲ್ಲೇಖಿಸಿರುವ ಪ್ರಕಾರ, ಶಿಶುವಿನ ವಿವರಗಳನ್ನು ದೃಢೀಕರಿಸುವ ಘೋಷಣಾ ಪತ್ರವನ್ನು ಅರ್ಜಿ ಜತೆ ಸಲ್ಲಿಸಬೇಕಾಗುತ್ತದೆ.

ನವಜಾತ ಶಿಶುಗಳ ಪಾಸ್​ಪೋರ್ಟ್​ಗೆ ಅರ್ಜಿ ಸಲ್ಲಿಸುವ ಹಂತ ಹಂತದ ವಿವರಣೆ ಇಲ್ಲಿದೆ;

• ಪಾಸ್​ಪೋರ್ಟ್ ಸೇವಾ ಆನ್​ಲೈನ್ ಪೋರ್ಟಲ್​ನಲ್ಲಿ ನೋಂದಣಿ ಮಾಡಿ
• ನೋಂದಾಯಿತ ಲಾಗಿನ್ ಐಡಿ ಮೂಲಕ ಪಾಸ್​ಪೋರ್ಟ್ ಸೇವಾ ಆನ್​ಲೈನ್ ಪೋರ್ಟಲ್​​ಗೆ ಲಾಗಿನ್ ಆಗಿ
• ‘ಅಪ್ಲೈ ಫಾರ್ ಫ್ರೆಷ್ ಪಾಸ್​ಪೋರ್ಟ್/ರಿ-ಇಶ್ಯೂ ಆಫ್ ಪಾಸ್​ಪೋರ್ಟ್’ ಲಿಂಕ್ ಮೇಲೆ ಕ್ಲಿಕ್ ಮಾಡಿ
• ಅರ್ಜಿಯಲ್ಲಿ ಅಗತ್ಯ ವಿವರಗಳನ್ನು ಭರ್ತಿ ಮಾಡಿ ಸಬ್​ಮಿಟ್ ಮಾಡಿ
• ‘ವಿವ್ ಸೇವ್ಡ್ / ಸಬ್​ಮಿಟ್ಟೆಡ್ ಅಪ್ಲಿಕೇಷನ್ಸ್’ ಸ್ಕ್ರೀನ್ ಮೇಲೆ ಕಾಣಿಸುವ ‘ಪೇ ಆ್ಯಂಡ್ ಶೆಡ್ಯೂಲ್ ಅಪಾಯಿಂಟ್​ಮೆಂಟ್’ ಮೇಲೆ ಕ್ಲಿಕ್ ಮಾಡಿ
• ಇದು ನಿಮಗೆ ಅಪಾಯಿಂಟ್​ಮೆಂಟ್ ನಿಗದಿಪಡಿಸಲು ಅನುಮತಿಸುತ್ತದೆ
• ಆನ್​ಲೈನ್ ಪಾವತಿ ಮಾಡಿ (ಇದು ಎಲ್ಲ ಪಿಎಸ್​ಕೆ/ಪಿಒಪಿಎಸ್​ಕೆ/ಪಿಒ ಅಪಾಯಿಂಟ್​ಮೆಂಟ್​ಗಳಿಗೆ ಕಡ್ಡಾಯವಾಗಿದೆ)
• ‘ಪ್ರಿಂಟ್ ಅಪ್ಲಿಕೇಷನ್ ರಿಸಿಪ್ಟ್’ ಲಿಂಕ್ ಮೇಲೆ ಕ್ಲಿಕ್ ಮಾಡಿ ಅಪ್ಲಿಕೇಷನ್ ರೆಫೆರೆನ್ಸ್ ನಂಬರ್ / ಅಪಾಯಿಂಟ್​​ಮೆಂಟ್ ನಂಬರ್ ಇರುವ ರಿಸಿಟ್ ಪ್ರಿಂಟ್ ತೆಗೆದುಕೊಳ್ಳಿ.
• ನೀವು ಅಪಾಯಿಂಟ್​ಮೆಂಟ್ ಪಡೆದಿರುವ ಪಾಸ್​ಪೋರ್ಟ್ ಸೇವಾ ಕೇಂದ್ರದ ಪ್ರಾದೇಶಿಕ ಕಚೇರಿಗೆ ಭೇಟಿ ನೀಡಿ
• ಪಾಸ್​ಪೋರ್ಟ್ ಸೇವಾ ಕೇಂದ್ರಕ್ಕೆ ತೆರಳುವಾಗ ದಾಖಲೆಗಳ ಮೂಲ ಪ್ರತಿಗಳನ್ನು ಕೊಂಡೊಯ್ಯಿರಿ. 4 ವರ್ಷಕ್ಕಿಂತ ಕೆಳಗಿನವರ ಅರ್ಜಿಗಳ ಜತೆ ಇತ್ತೀಚೆಗೆ ತೆಗೆದ ಬಿಳಿ ಬ್ಯಾಕ್​​ಗ್ರೌಂಡ್​ನ ಪಾಸ್​ಪೋರ್ಟ್ ಸೈಜ್ (4.5 X 3.5 ಸೆಂ.ಮೀ.) ಫೋಟೊ ನಿಮ್ಮ ಜತೆಗಿರಲಿ. ಹಿರಿಯರ ಫೋಟೊ ತೆಗೆದಂತೆ ಮಕ್ಕಳ ಫೋಟೊವನ್ನು ಪಾಸ್​ಪೋರ್ಟ್ ಸೇವಾ ಕೇಂದ್ರದಲ್ಲಿ ತೆಗೆಯುವುದಿಲ್ಲ.
• ಅಪ್ರಾಪ್ತರ ಅರ್ಜಿಗಳಿಗೆ ಸಬಂಧಪಟ್ಟ ದಾಖಲೆಗಳನ್ನು ಪಾಲಕರೇ ದೃಢೀಕರಿಸಿರಬೇಕು.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 2:59 pm, Fri, 23 December 22