6G India: ಭಾರತದಲ್ಲಿ 6G ಸೇವೆ ಯಾವಾಗ ಆರಂಭ? ಶೀಘ್ರದಲ್ಲೇ ಜಿಯೋದಿಂದ ಬಿಡುಗಡೆ

ಭಾರತದಲ್ಲಿ 5G ಸೇವೆ ಬಳಕೆಯಲ್ಲಿರುವ ಬೆನ್ನಲ್ಲೇ, ಮುಂದಿನ ತಲೆಮಾರಿನ ಮೊಬೈಲ್ ಸಂಪರ್ಕ ತಂತ್ರಜ್ಞಾನವಾದ 6G ಕುರಿತು ಚರ್ಚೆ ಆರಂಭವಾಗಿದೆ. ರಿಲಯನ್ಸ್ ಜಿಯೋ (Reliance Jio) ಪ್ರಕಾರ, ಜಾಗತಿಕ ಮಟ್ಟದಲ್ಲಿ 6G ತಂತ್ರಜ್ಞಾನದ ಮಾನದಂಡಗಳು ಅಂತಿಮಗೊಂಡ ಬಳಿಕ ಭಾರತವು ವಾಣಿಜ್ಯ 6G ಸೇವೆ ಆರಂಭಿಸುವ ಮೊದಲ ರಾಷ್ಟ್ರಗಳ ಸಾಲಿನಲ್ಲಿ ಸ್ಥಾನ ಪಡೆಯಬಹುದು. 2030ರ ವೇಳೆಗೆ ಈ ತಂತ್ರಜ್ಞಾನದ ಜಾಗತಿಕ ಮಾನದಂಡಗಳು ಅಂತಿಮಗೊಳ್ಳುವ ನಿರೀಕ್ಷೆಯಿದೆ.

ನವದೆಹಲಿಯಲ್ಲಿ ನಡೆದ ಇಂಡಿಯಾ ಮೊಬೈಲ್ ಕಾಂಗ್ರೆಸ್‌ (IMC) 2026ರಲ್ಲಿ ಜಿಯೋ ತನ್ನ 6G ಸಿದ್ಧತೆಗಳನ್ನು ಪ್ರದರ್ಶಿಸಿದೆ. ಕಂಪನಿಯು ಮುಂದಿನ ತಲೆಮಾರಿನ ಜಾಲಕ್ಕೆ ಸಂಬಂಧಿಸಿದ ತಂತ್ರಜ್ಞಾನಗಳಾದ ಪ್ರಿ-6G ಸ್ಟ್ಯಾಕ್‌ ಮತ್ತು ಗಿಗಾ ಮಿಮೋ ರೇಡಿಯೊವನ್ನು ಪರಿಚಯಿಸಿದೆ. ಆದರೆ, ಭಾರತದಲ್ಲಿ 6G ಸೇವೆ ಆರಂಭಿಸುವ ನಿಖರ ದಿನಾಂಕವನ್ನು ಇನ್ನೂ ಘೋಷಿಸಲಾಗಿಲ್ಲ.

5Gಗಿಂತ 6G ಎಷ್ಟು ಉತ್ತಮವಾಗಿರಲಿದೆ?

ಜಿಯೋ ಹೇಳುವ ಪ್ರಕಾರ, 6G ಜಾಲವು ಈಗಿನ 5G ಜಾಲಕ್ಕಿಂತ ಐದು ಪಟ್ಟು ಹೆಚ್ಚಿನ ಸಾಮರ್ಥ್ಯ ಹೊಂದಿರಲಿದೆ. ಜಾಲದ ಪ್ರತಿಕ್ರಿಯೆ ನೀಡುವ ವಿಳಂಬದ ಸಮಯವೂ ಸುಮಾರು ಹತ್ತು ಪಟ್ಟು ಕಡಿಮೆಯಾಗಬಹುದು. ಅಂದರೆ, ಬಳಕೆದಾರರು ಕಳುಹಿಸುವ ಆದೇಶ ಅಥವಾ ವಿನಂತಿಗೆ ಜಾಲವು ಹೆಚ್ಚು ವೇಗವಾಗಿ ಪ್ರತಿಕ್ರಿಯಿಸಲು ಸಾಧ್ಯವಾಗಬಹುದು.

ಈ ಸುಧಾರಣೆಗಳು ಕೇವಲ ವೇಗದ ಇಂಟರ್‌ನೆಟ್‌ಗಷ್ಟೇ ಸೀಮಿತವಾಗಿರುವುದಿಲ್ಲ. ನೈಜ ಸಮಯದಲ್ಲಿ ಕಾರ್ಯನಿರ್ವಹಿಸುವ ಕೃತಕ ಬುದ್ಧಿಮತ್ತೆ (ಎಐ) ಸೇವೆಗಳು, ಹೊಲೊಗ್ರಾಫಿಕ್ ವಿಡಿಯೊ ಸಂವಹನ, ದೂರದಲ್ಲಿದ್ದುಕೊಂಡೇ ವೈದ್ಯಕೀಯ ಸೇವೆ ಪಡೆಯುವುದು ಮತ್ತು ಡಿಜಿಟಲ್ ಶಿಕ್ಷಣದಂತಹ ಕ್ಷೇತ್ರಗಳಿಗೂ ನೆರವಾಗಬಹುದು. ಆದರೆ ಇವೆಲ್ಲವೂ ತಂತ್ರಜ್ಞಾನದ ಅಭಿವೃದ್ಧಿ ಮತ್ತು ಅದರ ಪ್ರಾಯೋಗಿಕ ಬಳಕೆಯ ಮೇಲೆ ಅವಲಂಬಿತವಾಗಿವೆ.

Orkut Comeback: ಮತ್ತೆ ಬರಲಿದೆ ಆರ್ಕುಟ್: ಮರುಪ್ರವೇಶಕ್ಕೆ ಸಂಸ್ಥಾಪಕರ ಪ್ರಯತ್ನ, 115 ದೇಶಗಳಿಂದ ಬೆಂಬಲ

ಜಿಯೋ ಪರಿಚಯಿಸಿದ ಗಿಗಾ ಮಿಮೋ ರೇಡಿಯೊ ಎಂದರೇನು?

ಇಂಡಿಯಾ ಮೊಬೈಲ್ ಕಾಂಗ್ರೆಸ್‌ನಲ್ಲಿ ಜಿಯೋ ಗಿಗಾ ಮಿಮೋ ರೇಡಿಯೊ ತಂತ್ರಜ್ಞಾನವನ್ನು ಪ್ರದರ್ಶಿಸಿದೆ. ಇದು ಭಾರತದ ಮೊದಲ ಗಿಗಾ ಮಿಮೋ ರೇಡಿಯೊ ಎಂದು ಕಂಪನಿ ಹೇಳಿಕೊಂಡಿದೆ. ಇದರ ಜೊತೆಗೆ 5G ಮತ್ತು 6G ಎರಡೂ ಜಾಲಗಳನ್ನು ಬೆಂಬಲಿಸಬಲ್ಲ ಸಾಮಾನ್ಯ ಬೇಸ್‌ಬ್ಯಾಂಡ್ ಘಟಕವನ್ನೂ ಪರಿಚಯಿಸಿದೆ.

ಜಿಯೋ ಪ್ರಕಾರ, ಕಂಪನಿಯು 8,000ಕ್ಕೂ ಹೆಚ್ಚು ಪೇಟೆಂಟ್‌ಗಳಿಗೆ ಅರ್ಜಿ ಸಲ್ಲಿಸಿದ್ದು, ಅವುಗಳಲ್ಲಿ ನೂರಾರು ಪೇಟೆಂಟ್‌ಗಳು 6G ತಂತ್ರಜ್ಞಾನಕ್ಕೆ ಸಂಬಂಧಿಸಿವೆ. ಜಾಗತಿಕ ದೂರಸಂಪರ್ಕ ಮಾನದಂಡಗಳ ಅಭಿವೃದ್ಧಿ ಪ್ರಕ್ರಿಯೆಯಲ್ಲಿಯೂ 934ಕ್ಕೂ ಹೆಚ್ಚು ಕೊಡುಗೆಗಳನ್ನು ನೀಡಿರುವುದಾಗಿ ಕಂಪನಿ ತಿಳಿಸಿದೆ.

ರೈತರು, ವೈದ್ಯರು ಮತ್ತು ವಿದ್ಯಾರ್ಥಿಗಳಿಗೆ ಹೇಗೆ ನೆರವಾಗಬಹುದು?

6G ಜಾಲದ ಹೆಚ್ಚಿನ ಸಾಮರ್ಥ್ಯ ಮತ್ತು ಕಡಿಮೆ ವಿಳಂಬದ ಸಮಯದಿಂದ ಎಐ ಆಧಾರಿತ ಸೇವೆಗಳು ಹೆಚ್ಚು ವೇಗವಾಗಿ ಪ್ರತಿಕ್ರಿಯಿಸಲು ಸಾಧ್ಯವಾಗಬಹುದು. ರೈತರಿಗೆ ಕೃಷಿ ಸಂಬಂಧಿತ ಮಾಹಿತಿ ಒದಗಿಸುವುದು, ವೈದ್ಯಕೀಯ ಸೇವೆಗಳನ್ನು ಸುಧಾರಿಸುವುದು ಮತ್ತು ವಿದ್ಯಾರ್ಥಿಗಳಿಗೆ ಡಿಜಿಟಲ್ ಕಲಿಕೆಯನ್ನು ಸುಲಭಗೊಳಿಸುವುದು ಇದರ ಸಂಭಾವ್ಯ ಬಳಕೆಗಳಾಗಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ