ಇನಾಪರೇಟಿವ್ ಇಪಿಎಫ್ ಅಕೌಂಟ್ಗಳಲ್ಲಿ ಕೊಳೆಯುತ್ತಿದೆ 9,330 ಕೋಟಿ ರೂ.; ಏನು ಮಾಡಬೇಕು?
Rs 9,330 crore lying in inoperative EPF accounts on 2026 March 31st, says Shobha Karandlaje: ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ನೀಡಿರುವ ಮಾಹಿತಿ ಪ್ರಕಾರ 2026ರ ಮಾರ್ಚ್ 31ರವರೆಗೂ ಇನಾಪರೇಟಿವ್ ಅಕೌಂಟ್ಗಳಲ್ಲಿರುವ ಹಣ 9,330 ಕೋಟಿ ರೂ. ಮೂರು ವರ್ಷ ಕಾಲ ಉದ್ಯೋಗಿ ವತಿಯಿಂದ ಯಾವುದೇ ಕೊಡುಗೆ ಇಲ್ಲದ ಇಪಿಎಫ್ ಅಕೌಂಟ್ಗಳನ್ನು ಇನಾಪರೇಟಿವ್ ಎಂದು ಪರಿಗಣಿಸಲಾಗುತ್ತದೆ. ಇಂಥ ಖಾತೆಗಳಲ್ಲಿರುವ ಹಣವನ್ನು ಸಕ್ರಿಯ ಖಾತೆಗೆ ವರ್ಗಾವಣೆ ಮಾಡಬೇಕು, ಇಲ್ಲದಿದ್ದರೆ ವಿತ್ಡ್ರಾ ಮಾಡಬೇಕು.
ಮುಖ್ಯಾಂಶಗಳು
- 2026ರ ಮಾರ್ಚ್ 31ರವರೆಗೂ ಇನಾಪರೇಟಿವ್ ಅಕೌಂಟ್ಗಳಲ್ಲಿರುವ ಹಣ 9,330 ಕೋಟಿ ರೂ.
- 3 ವರ್ಷ ಕಾಲ ಕೊಡುಗೆ ಇಲ್ಲದ ಇಪಿಎಫ್ ಅಕೌಂಟ್ಗಳನ್ನು ಇನಾಪರೇಟಿವ್ ಎಂದು ಪರಿಗಣಿಸಲಾಗುತ್ತದೆ.
- ಇಂಥ ಖಾತೆಗಳಲ್ಲಿರುವ ಹಣವನ್ನು ಸಕ್ರಿಯ ಖಾತೆಗೆ ವರ್ಗಾವಣೆ ಮಾಡಬೇಕು, ಇಲ್ಲದಿದ್ದರೆ ವಿತ್ಡ್ರಾ ಮಾಡಬೇಕು.
ನವದೆಹಲಿ, ಜುಲೈ 24: ನೌಕರರ ಭವಿಷ್ಯ ನಿಧಿ ಸಂಸ್ಥೆಯ (EPFO) ಸಕ್ರಿಯವಿಲ್ಲದ (Inoperative/Unclaimed) ಇಪಿಎಫ್ ಖಾತೆಗಳಲ್ಲಿ ಬರೋಬ್ಬರಿ 9,330 ಕೋಟಿ ರೂ ಮೊತ್ತದಷ್ಟು ಹಣ ಯಾರೂ ಹಿಂಪಡೆಯದೆ ಹಾಗೇ ಕೊಳೆಯುತ್ತಿದೆ. 2026ರ ಮಾರ್ಚ್ 31ರವರೆಗಿನ ಈ ಮಾಹಿತಿಯನ್ನು ಸರ್ಕಾರ ಹಂಚಿಕೊಂಡಿದೆ. ಕಾರ್ಮಿಕ ಮತ್ತು ಉದ್ಯೋಗ ರಾಜ್ಯ ಸಚಿವೆ ಶೋಭಾ ಕರಂದ್ಲಾಜೆ ರಾಜ್ಯಸಭೆಗೆ ನೀಡಿದ ಲಿಖಿತ ಉತ್ತರದಲ್ಲಿ ಇನಾಪರೇಟಿವ್ ಇಪಿಎಫ್ ಅಕೌಂಟ್ಗಳಲ್ಲಿರುವ ಹಣದ ಬಗ್ಗೆ ಮಾಹಿತಿ ನೀಡಿದ್ದಾರೆ.
ಈ ಖಾತೆಗಳು ಯಾವುವು, ನಿಮ್ಮ ಖಾತೆಯೂ ಇದರಲ್ಲಿ ಇದೆಯೇ ಮತ್ತು ಈ ಹಣವನ್ನು ಮರಳಿ ಪಡೆಯುವುದು (Claim) ಹೇಗೆ ಎಂಬುದರ ವಿವರಗಳು ಕೆಳಗಿನಂತಿವೆ:
‘ಇಪಿಎಫ್ ಇನ್ಆಪರೇಟಿವ್ ಅಕೌಂಟ್’ ಎಂದರೆ ಏನು?
ಈ ಕೆಳಗೆ ನಮೂದಿಸಲಾಗಿರುವ ಸನ್ನಿವೇಶದಲ್ಲಿ ಇಪಿಎಫ್ ಖಾತೆಯನ್ನು ಸಕ್ರಿಯವಿಲ್ಲದ (Inoperative) ಖಾತೆ ಎಂದು ಪರಿಗಣಿಸಲಾಗುತ್ತದೆ:
- ಕೆಲಸ ಬದಲಾಯಿಸಿದಾಗ ಅಥವಾ ಕೆಲಸ ತೊರೆದಾಗ ಹಳೆಯ ಖಾತೆಯಿಂದ ಹೊಸ ಖಾತೆಗೆ ಹಣವನ್ನು ವರ್ಗಾಯಿಸದಿದ್ದಲ್ಲಿ (No Transfer) ಹಳೆಯ ಇಪಿಎಫ್ ಖಾತೆಯನ್ನು ಇನಾಪರೇಟಿವ್ ಅಕೌಂಟ್ ಎಂದು ಪರಿಗಣಿಸಲಾಗುತ್ತದೆ.
- ನಿವೃತ್ತಿಯ ನಂತರ ಅಥವಾ ಕೆಲಸ ತೊರೆದ ನಂತರ ಸತತ 36 ತಿಂಗಳುಗಳ ಕಾಲ (3 ವರ್ಷಗಳು) ಖಾತೆಗೆ ಯಾವುದೇ ಹೊಸ ಕೊಡುಗೆ ಜಮೆಯಾಗದಿದ್ದಲ್ಲಿ, ಅದು ಇನಾಪರೇಟಿವ್ ಅಕೌಂಟ್ ಎನಿಸುತ್ತದೆ.
- 55 ವರ್ಷ ವಯಸ್ಸಿನ ನಂತರವೂ ಖಾತೆಯಲ್ಲಿರುವ ಹಣವನ್ನು ಹಿಂಪಡೆಯದಿದ್ದಲ್ಲಿ.
ಇದನ್ನೂ ಓದಿ: ಶೇರುಪೇಟೆಗೆ ಈ ವಾರ ರಕ್ತದೋಕುಳಿ; ಸೆನ್ಸೆಕ್ಸ್ನಿಂದ 2,092, ನಿಫ್ಟಿಯಿಂದ 567 ಅಂಕಗಳು ಕುಸಿತ
ಆದರೆ, ಸಕ್ರಿಯವಿಲ್ಲದ ಖಾತೆಗಳಿಗೆ 36 ತಿಂಗಳ ನಂತರ ಬಡ್ಡಿ ಜಮೆಯಾಗುವುದು ನಿಲ್ಲುತ್ತದಾ ಎನ್ನುವ ಪ್ರಶ್ನೆ ಇದೆ. ಸದ್ಯದ ಮಟ್ಟಿಗೆ ಎಲ್ಲಾ ಇಪಿಎಫ್ ಅಕೌಂಟ್ಗಳಿಗೂ ಸರ್ಕಾರ ಬಡ್ಡಿ ಹಣ ಭರ್ತಿ ಮಾಡುತ್ತಿದೆ. ಮುಂದೆ ಇದು ಬದಲಾದರೂ ಆಗಬಹುದು. ಹೀಗಾಗಿ, ಇನಾಪರೇಟಿವ್ ಇರುವ ಅಕೌಂಟ್ಗಳಿದ್ದಲ್ಲಿ ಹೊಸ ಸಕ್ರಿಯ ಅಕೌಂಟ್ನೊಂದಿಗೆ ವಿಲೀನ ಮಾಡಬೇಕು. ಕೆಲಸದಲ್ಲಿ ಇಲ್ಲದಿದ್ದರೆ ಆ ಅಕೌಂಟ್ನಲ್ಲಿರುವ ಹಣವನ್ನು ಹಿಂಪಡೆಯುವುದಾದರೂ ಮಾಡಬೇಕು.
ನಿಮ್ಮ ಖಾತೆಯಲ್ಲಿ ಹಣವಿದೆಯೇ ಎಂದು ತಿಳಿಯುವುದು ಹೇಗೆ?
ನಿಮ್ಮ ಬಳಿ ಹಳೆಯ UAN (Universal Account Number) ಅಥವಾ PF ಖಾತೆ ಸಂಖ್ಯೆ ಇದ್ದರೆ, ಅದನ್ನು ಈ ಕೆಳಗಿನ ವಿಧಾನಗಳ ಮೂಲಕ ಪರೀಕ್ಷಿಸಬಹುದು, ಒಂದು ಅನ್ಕ್ಲೇಮ್ಡ್ ಅಕೌಂಟ್ನ ಹೆಲ್ಪ್ ಡೆಸ್ಕ್, ಮತ್ತೊಂದು, ಉಮಾಂಗ್ ಆ್ಯಪ್ ಅಥವಾ ಇಪಿಎಫ್ಒ ವೆಬ್ಸೈಟ್ ಮೂಲಕ ಪರೀಕ್ಷಿಸಬಹುದು.
1. EPFO ನ ‘Unclaimed A/C Helpdesk’ ಮಾರ್ಗ
- EPFO ನ ಅಧಿಕೃತ ಪೋರ್ಟಲ್ಗೆ ಭೇಟಿ ನೀಡಿ: epfindia.gov.in
- ‘Services’ ವಿಭಾಗದಲ್ಲಿ ‘Inoperative A/C Helpdesk’ ಆಯ್ಕೆಯನ್ನು ಕ್ಲಿಕ್ ಮಾಡಿ.
- ನಿಮ್ಮ ವೈಯಕ್ತಿಕ ವಿವರಗಳು (ಹೆಸರು, ಮೊಬೈಲ್ ಸಂಖ್ಯೆ, ಆಧಾರ್, ಹಳೆಯ ಕಂಪನಿಯ ಹೆಸರು, ಇತ್ಯಾದಿ) ನೀಡಿ ವಿನಂತಿ ಸಲ್ಲಿಸಿದರೆ EPFO ಅಧಿಕಾರಿಗಳು ಸಹಾಯ ಮಾಡುತ್ತಾರೆ.
2. Umang App ಅಥವಾ EPFO Member Portal
- ಈ ಆ್ಯಪ್ ಅಥವಾ ಜಾಲತಾಣದಲ್ಲಿ UAN ಮತ್ತು ಪಾಸ್ವರ್ಡ್ ಬಳಸಿ ಲಾಗಿನ್ ಆಗಿ Passbook ವಿಭಾಗದಲ್ಲಿ ಹಳೆಯ ಕಂಪನಿಗಳ PF ಖಾತೆಯ ಬ್ಯಾಲೆನ್ಸ್ ಪರಿಶೀಲಿಸಬಹುದು.
ಇದನ್ನೂ ಓದಿ: ಗೂಗಲ್ ಅಕೌಂಟ್ಗೆ ಸೈನ್ ಇನ್ ಆಗಲು, ರಿಕವರಿ ಮಾಡಲು ಸೆಲ್ಫಿ ವಿಡಿಯೊ
ಈ ಹಣವನ್ನು ಪಡೆಯುವುದು (Claim) ಹೇಗೆ?
ಹಳೆಯ ಖಾತೆಯಲ್ಲಿರುವ ಹಣವನ್ನು ಹಿಂಪಡೆಯಲು 2 ಪ್ರಮುಖ ಮಾರ್ಗಗಳಿವೆ:
- ಹೊಸ PF ಖಾತೆಗೆ ವರ್ಗಾವಣೆ: ನೀವು ಪ್ರಸ್ತುತ ಬೇರೆ ಎಲ್ಲಾದರೂ ಕೆಲಸ ಮಾಡುತ್ತಿದ್ದರೆ, ಹಳೆಯ ಇನ್ಆಪರೇಟಿವ್ ಖಾತೆಯಲ್ಲಿರುವ ಹಣವನ್ನು ಪ್ರಸ್ತುತ ಸಕ್ರಿಯವಾಗಿರುವ UAN/PF ಖಾತೆಗೆ ಆನ್ಲೈನ್ನಲ್ಲೇ (Online Transfer Request) ವರ್ಗಾಯಿಸಿಕೊಳ್ಳುವುದು ಅತ್ಯಂತ ಉತ್ತಮ ಹಾಗೂ ಸುರಕ್ಷಿತ ಮಾರ್ಗ.
- ನೇರವಾಗಿ ಹಣ ಹಿಂಪಡೆಯುವುದು: ನೀವು ಈಗ ಯಾವುದೇ ಉದ್ಯೋಗದಲ್ಲಿ ಇಲ್ಲದಿದ್ದರೆ, ಅಥವಾ ನಿವೃತ್ತರಾಗಿದ್ದರೆ ನೇರವಾಗಿ ಹಣ ವಿತ್ಡ್ರಾ ಮಾಡಬಹುದು. EPFO ಆನ್ಲೈನ್ ಪೋರ್ಟಲ್ನಲ್ಲಿ ಲಾಗಿನ್ ಆಗಿ Claim Form (Form 19) ಸಲ್ಲಿಸುವ ಮೂಲಕ ಹಣವನ್ನು ನೇರವಾಗಿ ನಿಮ್ಮ ಬ್ಯಾಂಕ್ ಖಾತೆಗೆ ಜಮೆ ಮಾಡಿಸಿಕೊಳ್ಳಬಹುದು. ನಿಮ್ಮ KYC (ಆಧಾರ್, ಪಾನ್ ಕಾರ್ಡ್, ಬ್ಯಾಂಕ್ ವಿವರಗಳು) UAN ಗೆ ಸಂಪೂರ್ಣವಾಗಿ ಲಿಂಕ್ ಆಗಿರಬೇಕು.
ನಿಮ್ಮ ಬಳಿ ಹಳೆಯ ಪಿಎಫ್ ವಿವರಗಳಿದ್ದರೆ ವಿಳಂಬ ಮಾಡದೆ ಉಮಾಂಗ್ (Umang App) ಅಥವಾ EPFO ಪೋರ್ಟಲ್ನಲ್ಲಿ ಪರಿಶೀಲಿಸಿ ಹಣ ವರ್ಗಾವಣೆ ಅಥವಾ ವಿತ್ಡ್ರಾಯಲ್ಗೆ ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸಬಹುದು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 7:15 pm, Fri, 24 July 26