Multibagger stock: ಈ ಫಾರ್ಮಾಸ್ಯುಟಿಕಲ್ಸ್​ ಷೇರಿನಲ್ಲಿ ಮಾಡಿದ ರೂ. 1 ಲಕ್ಷ ಹೂಡಿಕೆ 13 ವರ್ಷದಲ್ಲಿ 46 ಲಕ್ಷ ರೂ.

ಷೇರು ಮಾರುಕಟ್ಟೆ (Stock Market) ಹೂಡಿಕೆದಾರರು ಅಂದರೆ ಅವರು ಏರಿಳಿತದ ಕಥೆ. ಕೆಲವರು ಅಲ್ಪಾವಧಿಯಲ್ಲಿ ಎಷ್ಟು ಲಾಭ ಬಂದರೆ ಅಷ್ಟೇ ಸಾಕು ಎಂದು ಯೋಚಿಸಿದರೆ, ಬಹುಪಾಲು ಮಂದಿ ಹೇಗೆಂದರೆ, ಆ ತಕ್ಷಣಕ್ಕೆ ಅಷ್ಟೇನೂ ಆಕರ್ಷಕ ಅಲ್ಲದ, ಆದರೆ ದೀರ್ಘಾವಧಿಯಲ್ಲಿ ಪ್ರಬಲ ಬೆಳವಣಿಗೆಯನ್ನು ನೀಡುವಂಥದ್ದರ ಕಡೆಗೆ ಕಣ್ಣು ನೆಟ್ಟಿರುತ್ತಾರೆ. ಅಂಥ ಹೂಡಿಕೆದಾರರು ಮಲ್ಟಿಬ್ಯಾಗರ್​ ಸ್ಟಾಕ್​ಗಳಿಂದ ಪ್ರಯೋಜನ ಪಡೆಯುತ್ತಾರೆ. ಈ ಲೇಖನದಲ್ಲಿ ಅಂಥದ್ದೇ ಒಂದು ಸ್ಟಾಕ್​ ಬಗ್ಗೆ ತಿಳಿಸಲಾಗುತ್ತಿದೆ. ಕೇವಲ 13 ವರ್ಷದ ಅವಧಿಯಲ್ಲಿ 1 ಲಕ್ಷ ರೂಪಾಯಿಯ ಹೂಡಿಕೆ 46 ಲಕ್ಷ ರೂಪಾಯಿ ಆಗಿ ಬೆಳೆದಿದೆ. ಯಾವುದು ಆ ಷೇರು ಅಂದರೆ ಅರಬಿಂದೋ ಫಾರ್ಮಾ ಲಿಮಿಟೆಡ್​ದು. ಫೆಬ್ರವರಿ 13, 2022ಕ್ಕೆ ಈ ಷೇರಿನ ಬೆಲೆ 691.40 ಇತ್ತು. ಅದೇ ಫೆಬ್ರವರಿ 13, 2009ಕ್ಕೆ ಈ ಕಂಪೆನಿಯ ಸ್ಟಾಕ್ ರೂ. 14.98 ಇತ್ತು. ಇದರರ್ಥ ಏನೆಂದರೆ, ಈ ಮಲ್ಟಿಬ್ಯಾಗರ್ ಸ್ಟಾಕ್ ಇಷ್ಟು ಅವಧಿಯಲ್ಲಿ ಶೇ 4,615.49ರಷ್ಟು ರಿಟರ್ನ್ ನೀಡಿದೆ.

ಈಗೇನೋ ಷೇರಿನ ಬೆಲೆ 691.40 ರೂಪಾಯಿ ಇರಬಹುದು. ಆದರೆ ಕಳೆದ ವರ್ಷ ಮೇ 10, 2021ರಲ್ಲಿ 1047.95 ರೂಪಾಯಿ ಮುಟ್ಟಿತ್ತು. ಈ ಭಾರತೀಯ ಫಾರ್ಮಾಸ್ಯುಟಿಕಲ್ ಕಂಪೆನಿ ಅರಬಿಂದೋ ಫಾರ್ಮಾ ಲಿಮಿಟೆಡ್ ಜೆನೆರಿಕ್ ಫಾರ್ಮಾಸ್ಯುಟಿಕಲ್ಸ್, ಆಕ್ಟಿವ್ ಫಾರ್ಮಾಸ್ಯುಟಿಕಲ್ ಇಂಗ್ರೆಡಿಯೆಂಟ್ಸ್ (APIs) ತಯಾರಿಸುತ್ತದೆ. ಆ್ಯಂಟಿ ಬಯಾಟಿಕ್ಸ್, ಆ್ಯಂಟಿ- ರೆಟ್ರೊವೈರಲ್ಸ್, ಆ್ಯಂಟಿ-ಅಲರ್ಜಿಕ್ಸ್, ಗ್ಯಾಸ್ಟ್ರೋಎಂಟರೋಲಾಜಿಕಲ್ಕ್ಸ್, ಕಾರ್ಡಿಯೋವಾಸ್ಕ್ಯುಲರ್ ಮತ್ತು ಕೇಂದ್ರೀಯ ನರ ವ್ಯವಸ್ಥೆ ಉತ್ಪನ್ನಗಳನ್ನು ಸಹ ಹೊಂದಿದೆ. ಅರಬಿಂದೋ ಫಾರ್ಮಾದ ಮುಖ್ಯಕಚೇರಿ ಹೈದರಾಬಾದ್ ಹೈಟೆಕ್​ ಸಿಟಿಯಲ್ಲಿದೆ. ವಿಶ್ವದಾದ್ಯಂತ 125ಕ್ಕೂ ಹೆಚ್ಚು ದೇಶಗಳಲ್ಲಿ ಅದರ ಉತ್ಪನ್ನಗಳನ್ನು ಮಾರಲಾಗುತ್ತದೆ.

ಫೆಬ್ರವರಿ 16ನೇ ತಾರೀಕಿನ ಬುಧವಾರದಂದು ಷೇರುಪೇಟೆ ಸೂಚ್ಯಂಕಗಳಾದ ಸೆನ್ಸೆಕ್ಸ್ 145.37 ಪಾಯಿಂಟ್ಸ್ ಅಥವಾ ಶೇ 0.25ರಷ್ಟು ಇಳಿಕೆ ಕಂಡು, 57,996.68 ಪಾಯಿಂಟ್ಸ್​ನೊಂದಿಗೆ ದಿನಾಂತ್ಯ ಮುಗಿಸಿದೆ. ಇನ್ನು ನಿಫ್ಟಿ 30.25 ಪಾಯಿಂಟ್ಸ್ ಅಥವಾ ಶೇ 0.17ರಷ್ಟು ಇಳಿಕೆಯಾಗಿ, 17,322.20ರಲ್ಲಿ ವಹಿವಾಟು ಚುಕ್ತಾ ಮಾಡಿದ್ದು, ನಿಫ್ಟಿ ಬ್ಯಾಂಕ್ 30.25 ಪಾಯಿಂಟ್ಸ್ ಕುಸಿದಿದೆ.

ಇದನ್ನೂ ಓದಿ: Stock Market Investment Tips: ಷೇರು ಮಾರುಕಟ್ಟೆ ಹೂಡಿಕೆಯ ಆರಂಭ ಹಂತದಲ್ಲಿ ಇರುವವರಿಗೆ 5 ಟಿಪ್ಸ್