5ಜಿ ನೆಟ್ವರ್ಕ್ ಅಳವಡಿಕೆ; ಜಿಯೋ ವೇಗಕ್ಕೆ ಇಲ್ಲ ಸಾಟಿ: ಆಕಾಶ್ ಅಂಬಾನಿ

ಮುಂಬೈ, ಅಕ್ಟೋಬರ್ 15: ರಿಲಯನ್ಸ್ ಜಿಯೋ ಇನ್ಫೋಕಾಮ್ ಅಧ್ಯಕ್ಷ ಆಕಾಶ್ ಅಂಬಾನಿ (Akash Ambani) ಅವರು ಜಿಯೋದ ಇತ್ತೀಚಿನ ಬೆಳವಣಿಗೆ ಹಾಗೂ ಗ್ರಾಹಕರ ವಿಸ್ತರಣೆಯ ಕುರಿತು ಪ್ರಮುಖ ಅಂಕಿಅಂಶಗಳನ್ನು ಹಂಚಿಕೊಂಡಿದ್ದಾರೆ. ಜಿಯೋ ನೆಟ್‌ವರ್ಕ್ ಅಡಿಯಲ್ಲಿ ಬೃಹತ್ ಪ್ರಮಾಣದಲ್ಲಿ ಹೊಸ ಮೊಬಿಲಿಟಿ ಬಳಕೆದಾರರು ಸೇರ್ಪಡೆಗೊಳ್ಳುತ್ತಿದ್ದಾರೆ. ಮುಂದಿನ ಐದು ವರ್ಷದಲ್ಲಿ ಬಳಕೆದಾರರ ಸಂಖ್ಯೆ 31.4 ಕೋಟಿಗೂ ಸೇರ್ಪಡೆಯಾಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಜಿಯೋ ಪ್ಲಾಟ್​ಫಾರ್ಮ್ಸ್ ಐಪಿಒ ಸಂಬಂಧಿ ಕಾರ್ಯಕ್ರಮದಲ್ಲಿ ಮಾತನಾಡುತ್ತಿದ್ದ ಆಕಾಶ್ ಅಂಬಾನಿ, ಭಾರತದಾದ್ಯಂತ ಡಿಜಿಟಲ್ ಸಂಪರ್ಕವು ಮಹಾನಗರಗಳಷ್ಟೇ ಅಲ್ಲದೆ, ಮೂಲೆಮೂಲೆಗಳಿಗೂ ತಲುಪುತ್ತಿರುವುದಕ್ಕೆ ಇದು ಸಾಕ್ಷಿಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ದೂರದೃಷ್ಟಿ ಮತ್ತು ಆರ್ಥಿಕ ಶಿಸ್ತಿನಿಂದಲೇ ರಿಲಯನ್ಸ್ ಸಂಸ್ಥೆ ಬೃಹತ್ ಯಶಸ್ಸು ಸಾಧಿಸಿದೆ: ಇಶಾ ಅಂಬಾನಿ

ಸಣ್ಣ ನಗರಗಳಿಂದ ಬ್ರಾಂಡ್‌ಬ್ಯಾಂಡ್‌ ಬೇಡಿಕೆ

ಕೇವಲ ದೊಡ್ಡ ನಗರಗಳಿಗೆ ಮಾತ್ರ ಸೀಮಿತವಾಗದೆ, ಜಿಯೋದ ಒಟ್ಟು ಹೊಸ ಬ್ರಾಂಡ್‌ಬ್ಯಾಂಡ್‌ ಸೇರ್ಪಡೆಗಳ ಪೈಕಿ ಶೇ. 40ರಷ್ಟು ಪಾಲು ಸಣ್ಣ ಪಟ್ಟಣಗಳು ಹಾಗೂ ಗ್ರಾಮೀಣ ಪ್ರದೇಶಗಳಿಂದ ಬಂದಿರುವುದು ವಿಶೇಷ. ಇದು ಭಾರತದಾದ್ಯಂತ ಡಿಜಿಟಲ್ ಕ್ರಾಂತಿಯ ವ್ಯಾಪ್ತಿ ಎಷ್ಟು ಆಳಕ್ಕಿದೆ ಎಂಬುದನ್ನು ತೋರಿಸುತ್ತದೆ ಎಂದು ಆಕಾಶ್ ಅಂಬಾನಿ ತಿಳಿಸಿದ್ದಾರೆ.

ಮುಂದಿನ ಐದು ವರ್ಷದಲ್ಲಿ 31 ಕೋಟಿ ಹೊಸ ಗ್ರಾಹಕರನ್ನು ಹೇಗೆ ಸಿಗಬಹುದು ಎನ್ನುವುದಕ್ಕೆ ಅವರು ಒಂದು ತಾರ್ಕಿಕ ವಿವರಣೆ ಕೊಟ್ಟಿದ್ದಾರೆ. 10 ಕೋಟಿ ಸಂಖ್ಯೆಯಷ್ಟು ಜನರು ಅಗತ್ಯ ವಯಸ್ಕ ಹಂತಕ್ಕೆ ಬರುವುದರಿಂದ ಅವರೆಲ್ಲರೂ ಮೊದಲ ಬಾರಿಗೆ ಸಿಮ್ ಕಾರ್ಡ್ ಪಡೆಯುವ ನಿರೀಕ್ಷೆ ಇದೆ. ಹಾಗೆಯೇ, 24 ಕೋಟಿ ಜನರು 2ಜಿ ನೆಟ್ವರ್ಕ್​ಗಳಲ್ಲೇ ಇದ್ದಾರೆ. ಅವರು 4ಜಿ ಅಥವಾ 5ಜಿ ಸೇವೆಗಳಿಗೆ ಬರಬಹುದು ಎಂದು ತಮ್ಮ ಲೆಕ್ಕಾಚಾರವನ್ನು ಆಕಾಶ್ ಅಂಬಾನಿ ಬಹಿರಂಗಪಡಿಸಿದ್ದಾರೆ.

ಇದನ್ನೂ ಓದಿ: ಜಿಯೋ ಐಪಿಒ ಭಾರತದ ಡಿಜಿಟಲ್ ಪರಿವರ್ತನೆಯ ಐತಿಹಾಸಿಕ ಕ್ಷಣ: ಉದಯ್ ಕೋಟಕ್

5ಜಿ ನೆಟ್ವರ್ಕ್ ಅಳವಡಿಕೆ: ಜಿಯೋ ವೇಗಕ್ಕೆ ಇಲ್ಲ ಸಾಟಿ

ರಿಲಯನ್ಸ್ ಜಿಯೋ ಭಾರತದಲ್ಲಿ 5ಜಿ ನೆಟ್ವರ್ಕ್ ಅನ್ನು ಅದ್ವಿತೀಯ ವೇಗದಲ್ಲಿ ಅಳವಡಿಸಿದೆ. ಕೇವಲ 19 ತಿಂಗಳಲ್ಲಿ ಶೇ. 99ರಷ್ಟು ಜನಸಂಖ್ಯೆಯನ್ನು ವ್ಯಾಪಿಸಿದೆ. ಇಷ್ಟು ವೇಗವಾಗಿ ಇಷ್ಟು ವ್ಯಾಪಕವಾಗಿ ಮೂಲಸೌಕರ್ಯ ಅಳವಡಿಕೆಯನ್ನು ಬೇರೆಯವರು ಸಾಧಿಸುವುದು ಕಷ್ಟ. ಕೇವಲ ಮೂರು ವರ್ಷಗಳ ಹಿಂದೆ 5ಜಿ ಸೇವೆ ಅಳವಡಿಕೆ ಆರಂಭಿಸಿದ ಜಿಯೋ ಇವತ್ತು ಚೀನಾದಿಂದ ಆಚೆ ವಿಶ್ವದಲ್ಲೇ ಅತಿಹೆಚ್ಚು 5ಜಿ ಬಳಕೆದಾರರ ಬಳಗ ಹೊಂದಿದೆ ಎಂದು ಆಕಾಶ್ ಅಂಬಾನಿ ವಿವರಿಸಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ