ಪೇಟಿಎಂ ತ್ರೈಮಾಸಿಕ ಆದಾಯ 1,502 ಕೋಟಿ ರೂ; ಮುಂದಿನ ದಿನಗಳಲ್ಲಿ ಲಾಭದ ಹಳಿಗೆ ಮರಳುವ ತವಕದಲ್ಲಿ ಒನ್97 ಕಮ್ಯೂನಿಕೇಶನ್ಸ್

ನವದೆಹಲಿ, ಜುಲೈ 19: ಒನ್97 ಕಮ್ಯೂನಿಕೇಶನ್ಸ್ ಮಾಲಕತ್ವದ ಪೇಟಿಎಂ ಸಂಸ್ಥೆಯ 2024ರ ಏಪ್ರಿಲ್​ನಿಂದ ಜೂನ್​ವರೆಗಿನ ತ್ರೈಮಾಸಿಕ ಆದಾಯ ವರದಿ ಬಿಡುಗಡೆ ಆಗಿದೆ. ಈ ಮೂರು ತಿಂಗಳಲ್ಲಿ ಅದರ ಆದಾಯ 1,502 ಕೋಟಿ ರೂ ಇದೆ. ಕಳೆದ ವರ್ಷ ಇದೇ ಕ್ವಾರ್ಟರ್​ನಲ್ಲಿ ಅದು 2,342 ಕೋಟಿ ರೂ ಆದಾಯ ಪಡೆದಿತ್ತು. ಆ ಅವಧಿಗೆ ಹೋಲಿಸಿದರೆ ಪೇಟಿಎಂ ಆದಾಯ ಶೇ. 36ರಷ್ಟು ಕಡಿಮೆ ಆಗಿದೆ. ಹಾಗೆಯೇ, ಪೇಟಿಎಂನ ನಿವ್ವಳ ನಷ್ಟ 839 ಕೋಟಿ ರೂಗೆ ಏರಿದೆ. ಹಿಂದಿನ ಅವಧಿಯಲ್ಲಿ 357 ಕೋಟಿ ರೂ ನಷ್ಟ ಹೊಂದಿತ್ತು. ಈ ಬಾರಿ ನಷ್ಟ ಇನ್ನೂ ಅಗಾಧವಾಗಿದೆ. ಇದರ ನಡುವೆ ಪೇಟಿಎಂ ವರದಿಯಲ್ಲಿ ಸಕಾರಾತ್ಮಕ ಸಂಗತಿಗಳೂ ಕೆಲವಿವೆ.

ಪೇಟಿಎಂನ ನೇರ ವೆಚ್ಚದಲ್ಲಿ ಇಳಿಕೆ

ಪೇಟಿಎಂ ಸಂಸ್ಥೆಯ ನೇರ ವೆಚ್ಚಗಳು ವರ್ಷದ ಹಿಂದೆ 1,037 ಕೋಟಿ ರೂ ಇತ್ತು. ಈ ಕ್ವಾರ್ಟರ್​ನಲ್ಲಿ ಅದು 746 ರೂಗೆ ಇಳಿದೆ. ಆದರೆ, ಪರೋಕ್ಷ ವೆಚ್ಚ 1,220 ಕೋಟಿ ರೂನಿಂದ 1,301 ಕೋಟಿ ರೂಗೆ ಏರಿದೆ.

ಇಲ್ಲಿ ಡೈರೆಕ್ಟ್ ಎಕ್ಸ್​ಪೆನ್ಸ್ ಅಥವಾ ನೇರ ವೆಚ್ಚಗಳೆಂದರೆ ಬ್ಯಾಂಕುಗಳ ಪೇಮೆಂಟ್ ಪ್ರೋಸಸಿಂಗ್ ಶುಲ್ಕ, ಕ್ಯಾಷ್​ಬ್ಯಾಕ್ ಇನ್ಸೆಂಟಿವ್​ಗಳ ವೆಚ್ಚ, ವಿವಿಧ ಕಾಂಟೆಸ್ಟ್​ಗಳು, ಫಾಸ್​ಟ್ಯಾಗ್, ಲಾಜಿಸ್ಟಿಕ್ಸ್, ಸಿಮ್ ವೆಚ್ಚ ಇತ್ಯಾದಿಗಳು ಸೇರುತ್ತವೆ.

ಇದನ್ನೂ ಓದಿ: ಅಮೆರಿಕದ ಶ್ರೀಮಂತರಿಂದ ಹಣ ಪಡೆದು ಭಾರತದ ಶ್ರೀಮಂತರನ್ನು ನಿಂದಿಸುತ್ತಾರೆ: ಆಕ್ಸ್​ಫ್ಯಾಮ್, ಪಿಕೆಟ್ಟಿ ವಿರುದ್ಧ ಸಂಜೀವ್ ಸಾನ್ಯಾಲ್ ಗುಡುಗು

ಇನ್​ಡೈರೆಕ್ಟ್ ಎಕ್ಸ್​ಪೆನ್ಸ್ ಅಥವಾ ಪರೋಕ್ಷ ವೆಚ್ಚದಲ್ಲಿ ಮಾರ್ಕೆಟಿಂಗ್, ಉದ್ಯೋಗಿಗಳ ESOP ವೆಚ್ಚ, ಸಾಫ್ಟ್​ವೇರ್, ಕ್ಲೌಡ್, ಡಾಟಾ ಸೆಂಟರ್ ಇತ್ಯಾದಿ ತಂತ್ರಜ್ಞಾನ ವೆಚ್ಚಗಳು ಸೇರುತ್ತವೆ.

ಪರ್ಸನಲ್ ಲೋನ್ 2,500 ಕೋಟಿ ರೂ

2025ರ ಹಣಕಾಸು ವರ್ಷದ ಮೊದಲ ಕ್ವಾರ್ಟರ್ ಆದ ಏಪ್ರಿಲ್​ನಿಂದ ಜೂನ್​ವರೆಗಿನ ಅವಧಿಯಲ್ಲಿ ಪೇಟಿಎಂನಿಂದ ವಿತರಿಸಲಾದ ಪರ್ಸನಲ್ ಲೋನ್​ಗಳ ಮೌಲ್ಯ 2,500 ಕೋಟಿ ರೂ ಇದೆ. ಒಂದು ಸಾಲದ ಸರಾಸರಿ ಮೊತ್ತ 1.35 ಲಕ್ಷ ರೂನಷ್ಟಿದೆ. ಹಿಂದಿನ ಅವಧಿಯಲ್ಲೂ ಹೆಚ್ಚೂಕಡಿಮೆ ಇಷ್ಟೇ ಟಿಕೆಟ್ ಸೈಜ್ ಇತ್ತು.

ಮರ್ಚಂಟ್ ಲೋನ್ 2,508 ಕೋಟಿ ರೂ

ಪೇಟಿಎಂಗೆ ಪ್ರಮುಖ ಆದಾಯ ಮೂಲವಾಗಿರುವುದು ವರ್ತಕರು. ಈ ವರ್ತಕರಿಗೆ ವಿತರಿಸಲಾಗಿರುವ ಸಾಲ ಈ ತ್ರೈಮಾಸಿಕ ಅವಧಿಯಲ್ಲಿ 2,508 ಕೋಟಿ ರೂ. ಉನ್ನತ ಗುಣಮಟ್ಟದ ವರ್ತಕರನ್ನು ಗುರುತಿಸಿ ಅವರಿಗೆ ಸಾಲ ನೀಡಲು ತಮ್ಮ ಪಾರ್ಟ್ನರ್ ಸಂಸ್ಥೆಗಳು ಗಮನ ಕೊಡುತ್ತಿವೆ.

ಇದನ್ನೂ ಓದಿ: FASTag: ವಿಂಡ್​ಸ್ಕ್ರೀನಲ್ಲಿ ಫಾಸ್​ಟ್ಯಾಗ್ ಹಾಕದಿದ್ರೆ ಬ್ಲ್ಯಾಕ್​ಲಿಸ್ಟ್ ಸೇರ್ತೀರಾ ಹುಷಾರ್..! ಎನ್​ಎಚ್​ಎಐ ಬಿಗಿನಿಯಮ

ಮತ್ತೊಂದು ಗಮನಾರ್ಹ ಸಂಗತಿ ಎಂದರೆ ಪೇಟಿಎಂನ ಮರ್ಚಂಟ್ ಪೇಮೆಂಟ್ ಆಪರೇಟಿಂಗ್ ಬಿಸಿನೆಸ್ 2024ರ ಜನವರಿಗೆ ಪೂರ್ವದಲ್ಲಿ ಇದ್ದ ಮಟ್ಟಕ್ಕೆ ಮರಳಿದೆ. ಪೇಮೆಂಟ್ ಬ್ಯಾಂಕ್ ಮೇಲೆ ಆರ್​ಬಿಐ ನಿರ್ಬಂಧ ಹಾಕಿದ್ದ ಬಳಿಕ ಬಹಳಷ್ಟು ವರ್ತಕರು ಪೇಟಿಎಂನಿಂದ ದೂರವಾಗಿದ್ದರು. ಈಗ ಅವರು ತೆಕ್ಕೆಗೆ ಮರಳಿದ್ದಾರೆ. ಅಂಗಡಿ ಮುಂಗಟ್ಟುಗಳಲ್ಲಿ ಈಗ ಪೇಟಿಎಂನ ಕ್ಯುಆರ್ ಕೋಡ್​ಗಳು ಮತ್ತು ಸೌಂಡ್​ಬಾಕ್ಸ್​ಗಳು ಮರಳಿ ನಿಲ್ಲತೊಡಗಿವೆ. ಸೌಂಡ್​ಬಾಕ್ಸ್ ಸೇವೆ ಪಡೆದಿರುವ ವರ್ತಕರ ಸಂಖ್ಯೆ 1.09 ಕೋಟಿ ರೂ ಇದೆ. ಇವೂ ಕೂಡ ಪೇಟಿಎಂಗೆ ಭವಿಷ್ಯದಲ್ಲಿ ಆದಾಯ ತಂದುಕೊಡಬಲ್ಲಂಥವು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ