ಪರ್ಸನಲ್ ಲೋನ್: ಮೇಲ್ನೋಟಕ್ಕೆ ಗೊತ್ತಾಗದ ಶುಲ್ಕಗಳು ಹಲವು; ನೀವು ತಿಳಿದಿರಬೇಕಾದ ಸಂಗತಿಗಳಿವು..
Personal Loan, know about hidden charges: ಪರ್ಸನಲ್ ಲೋನ್ ಯಾವ ಅಡಮಾನ ಇಲ್ಲದೇ ಕೊಡಲಾಗುವುದರಿಂದ ಹೆಚ್ಚಿನ ಬಡ್ಡಿ ವಿಧಿಸಲಾಗುತ್ತದೆ. ಅದರ ಜೊತೆಗೆ ಹೆಚ್ಚಿನ ಜನರ ಅರಿವಿಗೆ ಇಲ್ಲದೇ ಇರುವ ಹಲವು ಶುಲ್ಕಗಳೂ ಇರುತ್ತವೆ. ಇಎಂಐ ದಿನಾಂಕ ಬದಲಿಸುವುದರಿಂದ ಹಿಡಿದು ಡೂಪ್ಲಿಕೇಟ್ ಸ್ಟೇಟ್ಮೆಂಟ್ವರೆಗೂ ಪ್ರತಿಯೊಂದಕ್ಕೂ ಪ್ರತ್ಯೇಕ ಶುಲ್ಕಗಳನ್ನು ಹಾಕಲಾಗುತ್ತದೆ. ಸಾಲ ತೆಗೆದುಕೊಳ್ಳುವ ಮುನ್ನ ತಿಳಿದಿರುವುದು ಉತ್ತಮ.
Updated on: May 15, 2025 | 3:02 PM
ವೈಯಕ್ತಿಕ ಸಾಲ ಅಥವಾ ಪರ್ಸನಲ್ ಲೋನ್ (Personal Loan) ಬಹಳ ಹೆಚ್ಚು ತೆಗೆದುಕೊಳ್ಳಲಾಗುವ ಸಾಲ ಎನಿಸಿದೆ. ತಾತ್ಕಾಲಿಕವಾಗಿ ಹಾಗೂ ತುರ್ತಾಗಿ ಹಣದ ಅಗತ್ಯ ಬಿದ್ದಾಗ ಸಾಮಾನ್ಯವಾಗಿ ಜನರು ಪರ್ಸನಲ್ ಲೋನ್ನ ಮೊರೆ ಬೀಳುತ್ತಾರೆ. ಬಡ್ಡಿ ತುಸು ಅಧಿಕ ಇದ್ದರೂ ಇಎಂಐ ಎನ್ನುವ ಸುಲಭ ಮಾರ್ಗ ಇದ್ದೇ ಇರುವುದರಿಂದ ಮಧ್ಯಮ ವರ್ಗದವರಿಗೆ ಇದು ಫೇವರಿಟ್ ಲೋನ್ ಎನಿಸಬಹುದು. ಆದರೆ, ಈ ಸಾಲಕ್ಕೆ ಅಧಿಕ ಬಡ್ಡಿ ಇರುವುದರ ಜೊತೆಗೆ ಮೇಲ್ನೋಟಕ್ಕೆ ಅಷ್ಟಾಗಿ ಗಮನಕ್ಕೆ ಬಾರದ ಹಲವು ಶುಲ್ಕಗಳೂ ಇರುತ್ತವೆ. ಅಂತಿಮವಾಗಿ ಇವು ವ್ಯಕ್ತಿಯ ಸಾಲದ ಹೊರೆಯನ್ನು ಮತ್ತಷ್ಟು ಹೆಚ್ಚಿಸಬಹುದು. ಹೀಗಾಗಿ, ವೈಯಕ್ತಿಕ ಸಾಲದ ಜೊತೆ ಇರುವ ಇತರ ಕೆಲ ಶುಲ್ಕಗಳ ಬಗ್ಗೆ ಮಾಹಿತಿ ಇಲ್ಲಿದೆ…
ಪರ್ಸನಲ್ ಲೋನ್: ಪ್ರೋಸಸಿಂಗ್ ಫೀಸ್
ಪ್ರೋಸಸಿಂಗ್ ಫೀ ಎಂಬುದು ಪರ್ಸನಲ್ ಲೋನ್ ಮಾತ್ರವಲ್ಲ, ಬಹುತೇಕ ಎಲ್ಲಾ ವಿಧದ ಸಾಲಗಳಿಗೂ ವಿಧಿಸಲಾಗುವ ಶುಲ್ಕ. ಸಾಮಾನ್ಯವಾಗಿ ಸಾಲದ ಶೇ. 2ರಿಂದ 6ರವರೆಗಿನ ಮೊತ್ತವನ್ನು ಶುಲ್ಕವಾಗಿ ಪಡೆಯಲಾಗುತ್ತದೆ. ಶೇ. 5ರಷ್ಟು ಪ್ರೋಸಸಿಂಗ್ ಫೀ ಇದ್ದಲ್ಲಿ ನೀವು ಒಂದು ಲಕ್ಷ ರೂ ಸಾಲ ಪಡೆದಾಗ 5,000 ರೂ ಅನ್ನು ಶುಲ್ಕವಾಗಿ ಮುರಿದುಕೊಳ್ಳಲಾಗುತ್ತದೆ. ಇದರ ಜೊತೆಗೆ ಸ್ಟ್ಯಾಂಪ್ ಡ್ಯೂಟಿ ಇತ್ಯಾದಿ ವೆಚ್ಚಗಳನ್ನೂ ನಿಮ್ಮಿಂದಲೇ ಭರಿಸಲಾಗುತ್ತದೆ. ನಿಮ್ಮ ಕ್ರೆಡಿಟ್ ಸ್ಕೋರ್ ಉತ್ತಮವಾಗಿದ್ದರೆ ಪ್ರೋಸಸಿಂಗ್ ಫೀ ಕೈಬಿಡುವಂತೆ ಬ್ಯಾಂಕ್ಗೆ ಮನವಿ ಮಾಡಬಹುದು.
ಪರ್ಸನಲ್ ಲೋನ್: ವೆರಿಫಿಕೇಶನ್ ಶುಲ್ಕ
ನೀವು ಪರ್ಸನಲ್ ಲೋನ್ಗೆ ಅರ್ಜಿ ಹಾಕಿದಾಗ ಬ್ಯಾಂಕ್ನವರು ನಿಮ್ಮ ಕ್ರೆಡಿಟ್ ರೇಟಿಂಗ್ ಪರಿಶೀಲಿಸಲು ಏಜೆನ್ಸಿಗಳ ನೆರವು ಪಡೆಯುತ್ತವೆ. ಇದಕ್ಕೆ ಬ್ಯಾಂಕ್ಗೆ ತುಸು ವೆಚ್ಚವಾಗುತ್ತದೆ. ಆ ಹೊರೆಯನ್ನು ಗ್ರಾಹಕರಾದ ನಿಮಗೆ ವರ್ಗಾಯಿಸಲಾಗುತ್ತದೆ. ಅದನ್ನೇ ವೆರಿಫಿಕೇಶನ್ ಚಾರ್ಜಸ್ ಎನ್ನುವುದು.
ಇದನ್ನೂ ಓದಿ: ಆಸ್ತಿ ಮಾರಲ್ಲ, ಸಾಲ ಬಿಡಲ್ಲ… ಶ್ರೀಮಂತರ ಟ್ರಿಕ್ಸ್ ಹೀಗಿರುತ್ತೆ ನೋಡಿ
ಪರ್ಸನಲ್ ಲೋನ್: ಕಲೆಕ್ಷನ್ ಚಾರ್ಜಸ್
ನೀವು ಸಾಲದ ಕಂತುಗಳನ್ನು ಚೆಕ್ ರೂಪದಲ್ಲಿ ಕಟ್ಟುತ್ತಿದ್ದರೆ, ನಿಮ್ಮ ನಿವಾಸದಿಂದ ಚೆಕ್ ಪಿಕಪ್ ಮಾಡಿಕೊಳ್ಳುವ ಅವಕಾಶವನ್ನು ಬ್ಯಾಂಕ್ ನೀಡಬಹುದು. ಆದರೆ, ಇದಕ್ಕೆ ಕಲೆಕ್ಷನ್ ಅಥವಾ ಇಎಂಐ ಪಿಕಪ್ ಶುಲ್ಕ ವಿಧಿಸಲಾಗುತ್ತದೆ.
ಪರ್ಸನಲ್ ಲೋನ್: ಬೌನ್ಸ್ ಚಾರ್ಜಸ್
ನೀವು ಚೆಕ್ ಮೂಲಕ ಇಎಂಐ ಪಾವತಿಸುತ್ತಿದ್ದು, ಆ ಚೆಕ್ ಸರಿಯಾಗಿ ಕ್ರೆಡಿಟ್ ಆಗದೇ ಹೋದರೆ, ಅಥವಾ ಬೌನ್ಸ್ ಆದರೆ ಆಗ ಬ್ಯಾಂಕ್ನವರು ಪೇಮೆಂಟ್ ರಿಟರ್ನ್ ಚಾರ್ಜ್ ವಿಧಿಸಬಹುದು.
ಪರ್ಸನಲ್ ಲೋನ್: ಇಎಂಐ ತಡಪಾವತಿ ದಂಡ
ಇಎಂಐ ಕಟ್ಟಲು ಒಂದು ದಿನಾಂಕವನ್ನು ಗಡುವಾಗಿ ನಿಗದಿ ಮಾಡಲಾಗುತ್ತದೆ. ಈ ದಿನದೊಳಗೆ ಪಾವತಿಸದಿದ್ದರೆ ತಡ ಪಾವತಿ ಎಂದು ಪರಿಗಣಿಸಿ ದಂಡ ವಿಧಿಸಲಾಗುತ್ತದೆ.
ಇದನ್ನೂ ಓದಿ: ನಿಮ್ಮ ಹಣಕಾಸು ಭವಿಷ್ಯ ಭದ್ರವಾ? ಖಾತ್ರಿಪಡಿಸಲು ಬಳಸಿ ಈ 4 ಪರ್ಸೆಂಟ್ ಸೂತ್ರ
ಪರ್ಸನಲ್ ಲೋನ್: ಇಎಂಐ ಪಾವತಿ ವಿಧಾನ ಬದಲಾದರೆ ಶುಲ್ಕ
ನೀವು ಇಎಂಐ ಪಾವತಿಸುವ ವಿಧ ಬದಲಾಯಿಸಿದರೆ ಅದಕ್ಕೆ ಶುಲ್ಕ ಇರುತ್ತದೆ. ಉದಾಹರಣೆಗೆ, ಇಎಂಐ ಸ್ವಯಂಕಡಿತ ಆಗುವ ಬ್ಯಾಂಕ್ ಅಕೌಂಟ್ನಲ್ಲಿ ಬದಲಾವಣೆ, ಅಥವಾ ಇಎಂಐ ದಿನಾಂಕದಲ್ಲಿ ಬದಲಾವಣೆಯೋ ಮಾಡಿದರೆ ಶುಲ್ಕ ವಿಧಿಸಲಾಗುತ್ತದೆ.
ಪರ್ಸನಲ್ ಲೋನ್: ಭಾಗಶಃ ಮರುಪಾವತಿ ಶುಲ್ಕ
ಸಾಲವನ್ನು ಬೇಗ ಮುಗಿಸಲು ರೆಗ್ಯುಲರ್ ಇಎಂಐಗಿಂತ ಒಂದಷ್ಟು ಹೆಚ್ಚುವರಿ ಹಣವನ್ನು ನೀವು ಪಾವತಿಸಿದರೆ ಅದಕ್ಕೆ ಪಾರ್ಶಿಯಲ್ ರೀಪೇಮೆಂಟ್ ಎಂದು ಪ್ರತ್ಯೇಕ ಶುಲ್ಕ ಹಾಕಲಾಗುತ್ತದೆ.
ಪರ್ಸನಲ್ ಲೋನ್: ಮುಂಗಡವಾಗಿ ಸಾಲ ಮುಕ್ತಾಯಕ್ಕೆ ಶುಲ್ಕ
ನೀವು ಸಾಲವನ್ನು ನಿಗದಿತ ತಿಂಗಳುಗಳಿಂತ ಮುಂಚಿತವಾಗಿ ಮುಗಿಸಿದರೆ ಅದನ್ನು ಲೋನ್ ಫೋರ್ಕ್ಲೋಶರ್ ಎನ್ನುತ್ತಾರೆ. ಇದರಿಂದ ಬ್ಯಾಂಕ್ಗೆ ನಿಶ್ಚಿತ ಬಡ್ಡಿ ಆದಾಯ ಕೈತಪ್ಪುವುದರಿಂದ ಅದಕ್ಕೆ ಪರಿಹಾರವಾಗಿ ಶುಲ್ಕ ವಿಧಿಸಬಹುದು.
ಪರ್ಸನಲ್ ಲೋನ್: ಡೂಪ್ಲಿಕೇಟ್ ಸ್ಟೇಟ್ಮೆಂಟ್ ಶುಲ್ಕ
ಪರ್ಸನಲ್ ಲೋನ್ ವಿವರ ಇರುವ ಡೂಪ್ಲಿಕೇಟ್ ಸ್ಟೇಟ್ಮೆಂಟ್ ಅನ್ನು ಪಡೆಯಲು ನೀವು ನಿರ್ದಿಷ್ಟ ಶುಲ್ಕ ನೀಡಬೇಕಾಗಬಹುದು.
ಇದನ್ನೂ ಓದಿ: 1 ಪರ್ಸೆಂಟ್ ತಂತ್ರ: ಇದು ಹಣಕಾಸು ಭದ್ರತೆಗೆ ನಿತಿನ್ ಕಾಮತ್ ಸೂತ್ರ
ಪರ್ಸನಲ್ ಲೋನ್: ಕ್ಯಾಷ್ ಟ್ರಾನ್ಸಾಕ್ಷನ್ ಚಾರ್ಜಸ್
ನೀವು ಬ್ಯಾಂಕ್ ಕಚೇರಿಗೆ ಹೋಗಿ ಇಎಂಐ ಅನ್ನು ಕ್ಯಾಷ್ನಲ್ಲಿ ಪಾವತಿಸುವಾಗ ಕ್ಯಾಷ್ ಟ್ರಾನ್ಸಾಕ್ಷನ್ ಚಾರ್ಜ್ ವಿಧಿಸಲಾಗುತ್ತದೆ.
ಪರ್ಸನಲ್ ಲೋನ್: ಕ್ಯಾನ್ಸಲೇಶನ್ ಚಾರ್ಜಸ್
ಸಾಲ ಮಂಜೂರಾದ ಬಳಿಕ ನಿಮಗೆ ಅದು ಬೇಕಿಲ್ಲ ಎಂದಾದಲ್ಲಿ ರದ್ದುಮಾಡುವ ಅವಕಾಶ ಇರುತ್ತದೆ. ಆದರೆ, ಇದಕ್ಕೆ ಕ್ಯಾನ್ಸಲೇಶನ್ ಚಾರ್ಜ್ ಹಾಕಲಾಗುತ್ತದೆ. ಸಾಲ ಮಂಜೂರು ಆದ ದಿನದಿಂದ ಹಿಡಿದು ರದ್ದುಗೊಳಿಸಲಾದ ದಿನದವರೆಗೂ ಅಷ್ಟು ದಿನಕ್ಕೆ ಬಡ್ಡಿ ಹಾಕಲಾಗುತ್ತದೆ. ಲೋನ್ ಪ್ರೋಸಸಿಂಗ್ ಫೀ, ಸ್ಟ್ಯಾಂಪ್ ಡ್ಯೂಟಿ ಇತ್ಯಾದಿ ಶುಲ್ಕಗಳನ್ನು ಹಾಕಲಾಗುತ್ತದೆ.
ಮೇಲೆ ತಿಳಿಸಲಾದ ವಿವಿಧ ಶುಲ್ಕಗಳಿಗೆ ಜಿಎಸ್ಟಿ ಅನ್ವಯ ಆಗುತ್ತದೆ. ಇದರಲ್ಲಿ ಹೆಚ್ಚಿನ ಶುಲ್ಕಗಳ ವಿಚಾರ ಹೆಚ್ಚಿನ ಜನರಿಗೆ ತಿಳಿದಿರುವುದಿಲ್ಲ. ಸಾಲದ ಹಣ, ಇಎಂಐ ಮತ್ತು ಬಡ್ಡಿಯಷ್ಟೇ ಎಲ್ಲರ ಚಿತ್ತದಲ್ಲಿರುತ್ತದೆ. ಇಂಥ ಶುಲ್ಕಗಳು ನಮಗೆ ಗೊತ್ತಿಲ್ಲದಂತೆ ಸಾಲದ ಹೊರೆಯನ್ನು ಹೆಚ್ಚಿಸಬಹುದು.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
