SBI vs Post Office FD: ಪೋಸ್ಟ್ ಆಫೀಸ್​ಗಿಂತ ಉತ್ತಮವಾಗಿದೆಯಾ ಎಸ್​ಬಿಐ ಎಫ್​ಡಿ ಯೋಜನೆ? ಇಲ್ಲಿದೆ ಒಂದು ಹೋಲಿಕೆ

ನಿಶ್ಚಿತ ಠೇವಣಿ ಅಥವಾ ಫಿಕ್ಸೆಡ್ ಡೆಪಾಸಿಟ್​ಗಳು (Term Deposits) ಹಣ ಉಳಿತಾಯಕ್ಕೆ ಪ್ರಮುಖ ಸಾಧನಗಳೆನಿಸಿವೆ. ಈಗಂತೂ ವರ್ಷಕ್ಕೆ ಶೇ. 8ರವರೆಗೂ ವಾರ್ಷಿಕ ಬಡ್ಡಿ ತಂದುಕೊಡುತ್ತವೆ ಬಹುತೇಕ ಎಫ್​ಡಿ ಯೋಜನೆಗಳು. ಕಮರ್ಷಿಯಲ್ ಬ್ಯಾಂಕುಗಳು, ಸಹಕಾರಿ ಬ್ಯಾಂಕುಗಳಲ್ಲಿ ನಿಶ್ಚಿತ ಠೇವಣಿಗಳನ್ನು ಜನರು ಇರಿಸುವುದು ಸಾಮಾನ್ಯ. ಆರ್​ಬಿಐ ರೆಪೋ ದರಗಳನ್ನು (Repo Rate) ಏರಿಕೆ ಮಾಡಿದ ಬಳಿಕ ಬ್ಯಾಂಕುಗಳು ಎಫ್​ಡಿ ದರಗಳನ್ನು ಗಮನಾರ್ಹ ಎನಿಸುವ ಮಟ್ಟಕ್ಕೆ ಹೆಚ್ಚಿಸಿವೆ. ಹಾಗೆಯೇ, ಅಂಚೆ ಕಚೇರಿಯ ಎಫ್​ಡಿ ಯೋಜನೆಗಳೂ (Post Office FD Schemes) ಈಗ ಜನಪ್ರಿಯವಾಗತೊಡಗಿವೆ. ಬ್ಯಾಂಕುಗಳ ಎಫ್​ಡಿ ದರಗಳಿಗೆ ಪೋಸ್ಟ್ ಆಫೀಸ್ ಎಫ್​ಡಿಗಳು ಪೈಪೋಟಿ ನಡೆಸುವಷ್ಟು ಆಕರ್ಷಕ ಎನಿಸಿವೆ. ಅಂಚೆ ಕಚೇರಿಯಲ್ಲಿನ ಎಫ್​ಡಿ ಯೋಜನೆಗಳಿಂದ ಇನ್ನೂ ಹಲವು ಹೆಚ್ಚುವರಿ ಪ್ರಯೋಜನಗಳುಂಟು. ಹೀಗಾಗಿ, ಬಹಳ ಮಂದಿ ಎಫ್​ಡಿ ಇಡಲು ಅಂಚೆ ಕಚೇರಿ ಬಳಿ ಎಡತಾಕುವುದಿದೆ. ಇದೇ ವೇಳೆ, ಎಸ್​ಬಿಐನ ಎಫ್​ಡಿ ಸ್ಕೀಮ್​ಗಳು (SBI FD Schemes) ಬಹಳ ಬೇಡಿಕೆ ಪಡೆದುಕೊಳ್ಳುತ್ತಿವೆ.

ಎಫ್​ಡಿಗೆ ಅಂಚೆ ಕಚೇರಿಯೋ, ಎಸ್​ಬಿಐಯೋ?

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಲ್ಲಿ 10 ವರ್ಷದವರೆಗೂ ನಿಶ್ಚಿತ ಠೇವಣಿ ಇರಿಸಬಹುದು. ವಾರ್ಷಿಕ ಶೇ. 7ರವರೆಗೂ ಬಡ್ಡಿ ನೀಡಲಾಗುತ್ತದೆ. ಹಿರಿಯ ನಾಗರಿಕರಿಗೆ ಶೇ. 7.5ರವರೆಗೂ ಬಡ್ಡಿ ಸಿಗುತ್ತದೆ. ಅಮೃತ ಕಳಶ ಸ್ಕೀಮ್​ನಲ್ಲಿ 400 ದಿನಗಳ ನಿಶ್ಚಿತ ಠೇವಣಿಗೆ ಶೇ. 7.6ರಷ್ಟು ಬಡ್ಡಿ ಸಿಗುತ್ತದೆ.

ಇದನ್ನೂ ಓದಿ: EPF vs VPF: ವಾಲಂಟ್ರಿ ಪಿಎಫ್ ಎಂದರೇನು? ಇಪಿಎಫ್​ಗೂ ವಿಪಿಎಫ್​ಗೂ ಏನು ವ್ಯತ್ಯಾಸ? ಇದರ ಅನುಕೂಲಗಳೇನು? ವಿವರ ತಿಳಿದಿರಿ

ಅಂಚೆ ಕಚೇರಿಯ ನಿಶ್ಚಿತ ಠೇವಣಿಗಳಿಗೆ ಶೇ. 6.8ರಿಂದ ಶೇ. 7.5ರಷ್ಟು ಬಡ್ಡಿ ಸಿಗುತ್ತದೆ. ಇಲ್ಲಿ ಹಿರಿಯ ನಾಗರಿಕರಿಗೂ ಇತರರಿಗೂ ಬಡ್ಡಿಯಲ್ಲಿ ವ್ಯತ್ಯಾಸ ಇಲ್ಲ. ಅಂಚೆ ಕಚೇರಿಯ ಎಫ್​ಡಿಗಳ ಅವಧಿಯಲ್ಲಿ ಹೆಚ್ಚು ಅಯ್ಕೆಗಳಿಲ್ಲ. ಬ್ಯಾಂಕುಗಳಲ್ಲಾದರೆ ಎಫ್​ಡಿಯನ್ನು 7 ದಿನಗಳ ಅವಧಿಯಿಂದ ಆರಂಭಿಸಬಹುದು. 10 ವರ್ಷದಲ್ಲಿ ಯಾವ ಅವಧಿಯನ್ನಾದರೂ ಆಯ್ಕೆ ಮಾಡಿಕೊಳ್ಳಬಹುದು. ಆದರೆ, ಬೇರೆ ಬೇರೆ ಅವಧಿಗೆ ಬೇರೆ ಬೇರೆ ಬಡ್ಡಿ ದರಗಳು ಅನ್ವಯ ಆಗುತ್ತವೆ.

ಅಂಚೆ ಕಚೇರಿ ಎಫ್​ಡಿಗಳು 1, 2, 3 ಮತ್ತು 5 ವರ್ಷಗಳ ಅವಧಿಯದ್ದು ಮಾತ್ರವಾಗಿರುತ್ತವೆ. ಆದರೆ, ಠೇವಣಿ ಇರಿಸಿ 6 ತಿಂಗಳ ಬಳಿಕ ಅಂಚೆ ಕಚೇರಿಯಲ್ಲಿ ಠೇವಣಿ ಹಿಂಪಡೆಯಲು ಸಾಧ್ಯ. ಒಂದು ವರ್ಷದೊಳಗೆ ನೀವು ಠೇವಣಿ ಹಿಂಪಡೆದರೆ ದಂಡ ವಿಧಿಸಲಾಗುವುದಿಲ್ಲ. ಬದಲಾಗಿ ಉಳಿತಾಯ ಖಾತೆಗೆ ನೀಡುವ ಬಡ್ಡಿಯನ್ನು ಎಫ್​ಡಿ ಮೊತ್ತಕ್ಕೆ ನೀಡಲಾಗುತ್ತದೆ. ಎಸ್​ಬಿಐನ ಎಫ್​ಡಿಯನ್ನೂ ಅವಧಿಗೆ ಮುನ್ನ ಹಿಂಪಡೆಯಬಹುದು. ಆದರೆ, ದಂಡ ಹಾಕಲಾಗುತ್ತದೆ.

ಇದನ್ನೂ ಓದಿ: FD Schemes: ಬ್ಯಾಂಕಿಗಿಂತ ಪೋಸ್ಟ್ ಆಫೀಸ್​ನಲ್ಲಿ ಎಫ್​ಡಿ ಇಟ್ಟರೆ ಹೆಚ್ಚು ಅನುಕೂಲ ಹೇಗೆ? ವಿವರ ಇಲ್ಲಿದೆ

ಅಲ್ಪಾವಧಿಯ ಠೇವಣಿಯಾದರೆ ಎಸ್​ಬಿಐ ಎಫ್​ಡಿ ಉತ್ತಮ ಆಯ್ಕೆಯಾ?

ಎಫ್​ಡಿ ವಿಚಾರದಲ್ಲಿ ಎಸ್​ಬಿಐ ಮತ್ತು ಅಂಚೆ ಕಚೇರಿ ಸ್ಕೀಮ್​ಗಳೆರಡೂ ಬಹುತೇಕ ಸಮ ನಿಲ್ಲುತ್ತವೆ. ಎರಡೂ ಕೂಡ ಸರ್ಕಾರೀ ಸಂಸ್ಥೆಗಳೇ ಆಗಿವೆ. ಹೀಗಾಗಿ, ಠೇವಣಿ ಹಣ ಮಾಯವಾಗುತ್ತದೆ ಎಂಬ ಭಯ ಪಡುವ ಅಗತ್ಯವಿಲ್ಲ. ಆದರೆ, ತಜ್ಞರ ಲೆಕ್ಕಾಚಾರದ ಪ್ರಕಾರ ನೀವು ಅಲ್ಪಾವಧಿಗೆ ಎಫ್​ಡಿ ಮಾಡುವುದಾದರೆ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಉತ್ತಮ ಆಯ್ಕೆ ಆಗಬಹುದು.

ಹೆಚ್ಚು ವರ್ಷಗಳವರೆಗೆ ಎಫ್​ಡಿ ಇಡುವುದಾದರೆ ಬಡ್ಡಿ ದರಗಳನ್ನು ಲೆಕ್ಕ ಹಾಕಿ ನಿರ್ಧರಿಸಬಹುದು. ಹಾಗೆಯೇ, ಎಸ್​ಬಿಐ ಮತ್ತು ಪೋಸ್ಟ್ ಆಫೀಸ್​ನ ಎಫ್​ಡಿಗಳು ತೆರಿಗೆ ಉಳಿತಾಯಕ್ಕೆ ಸಹಕಾರಿ ಆಗಿವೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ