Green Bond: ಗ್ರೀನ್ ಬಾಂಡ್ ಎಂದರೇನು? ಇದರ ಜನಪ್ರಿಯತೆ ಹೆಚ್ಚುತ್ತಿರುವುದೇಕೆ? ಇದರಿಂದ ಏನು ಅನುಕೂಲ?
Investments For Environmental Projects: ಪರಿಸರಸ್ನೇಹಿ ಯೋಜನೆಗಳಿಗೆ ಬಂಡವಾಳ ಸಂಗ್ರಹಿಸಲು ನೀಡಲಾಗುವ ಗ್ರೀನ್ ಬಾಂಡ್ ಭಾರತದಲ್ಲೂ ಜನಪ್ರಿಯವಾಗುತ್ತಿದೆ. ಉತ್ತಮ ಬಡ್ಡಿ ಜೊತೆಗೆ ತೆರಿಗೆ ಲಾಭಗಳನ್ನೂ ಗ್ರೀನ್ ಬಾಂಡ್ ತಂದುಕೊಡುತ್ತದೆ. ಈ ಗ್ರೀನ್ ಬಾಂಡ್ ಬಗ್ಗೆ ಇನ್ನೂ ಹೆಚ್ಚಿನ ಮಾಹಿತಿ ಇಲ್ಲಿದೆ....
ಹಣಕಾಸು ವಲಯದಲ್ಲಿ ಗ್ರೀನ್ ಬಾಂಡ್ಗಳ (Green Bonds) ಜನಪ್ರಿಯತೆ ಹೆಚ್ಚುತ್ತಿದೆ. ಬಹಳಷ್ಟು ಜನರು ಗ್ರೀನ್ ಬಾಂಡ್ಗಳ ಮೇಲೆ ಹೂಡಿಕೆ ಹಾಕುತ್ತಿದ್ದಾರೆ. ಇದೇ ಮಾರ್ಚ್ ತಿಂಗಳಲ್ಲಿ ಸೋವರೀನ್ ಗ್ರೀನ್ ಬಾಂಡ್ಗಳ (Sovereign Green Bond) ಮೆಚ್ಯೂರಿಟಿ ಫಂಡ್ಗಳಿಗಾಗಿ ಎಚ್ಡಿಎಫ್ಸಿ ಅಸೆಟ್ ಮ್ಯಾನೇಜ್ಮೆಂಟ್ ಕಂಪನಿ ಅರ್ಜಿ ಕೂಡ ಸಲ್ಲಿಸಿದೆ. ಇಷ್ಟೆಲ್ಲಾ ಸದ್ದು ಮಾಡುತ್ತಿರುವ ಹಸಿರು ಬಾಂಡ್ ಎಂದರೇನು? ಹಸಿರು ಬಾಂಡ್ಗಳಿಂದ ಏನು ಪ್ರಯೋಜನ? ಈ ಗ್ರೀನ್ ಬಾಂಡ್ ಎಷ್ಟು ರಿಟರ್ನ್ ಕೊಡುತ್ತದೆ? ಜನರು ಯಾಕೆ ಗ್ರೀನ್ ಬಾಂಡ್ಗಳತ್ತ ಮುಗಿಬೀಳುತ್ತಿದ್ದಾರೆ? ಗ್ರೀನ್ ಬಾಂಡ್ಗಳ ಹಿಂದೆ ಸರ್ಕಾರದ ಪಾತ್ರ ಏನು? ಇವುಗಳ ಬಗ್ಗೆ ಉತ್ತರ ನೀಡುವ ವರದಿ ಇಲ್ಲಿದೆ.
ಗ್ರೀನ್ ಬಾಂಡ್ಗಳೆಂದರೆ ಏನು?
ಗ್ರೀನ್ ಬಾಂಡ್ ಎಂದರೆ ಪರಿಸರಸ್ನೇಹಿ ಕಾರ್ಯ ಮತ್ತು ಯೋಜನೆಗಳಿಗೆ ಹೂಡಿಕೆ ಪಡೆಯಲು ವಿತರಣೆ ಆಗುವ ಬಾಂಡ್. ಇದನ್ನು ಕ್ಲೈಮೇಟ್ ಬಾಂಡ್ ಎಂತಲೂ ಕರೆಯುತ್ತಾರೆ. ಪರಿಸರ ಸಂಸ್ಥೆಗಳು, ಕಾರ್ಪೊರೇಟ್ ಕಂಪನಿಗಳು ಅಥವಾ ಸರ್ಕಾರಗಳು ಗ್ರೀನ್ ಬಾಂಡ್ ವಿತರಿಸುತ್ತವೆ. ಸರ್ಕಾರದಿಂದ ವಿತರಿಸಲಾಗುವ ಗ್ರೀನ್ ಬಾಂಡ್ಗಳನ್ನು ಸೋವರೀನ್ ಗ್ರೀನ್ ಬಾಂಡ್ ಎಂದೂ ಕರೆಯಲಾಗುತ್ತದೆ.
ಈ ಗ್ರೀನ್ ಬಾಂಡ್ ಮೂಲಕ ಸಂಗ್ರಹಿಸಲಾಗುವ ಹಣವನ್ನು ಪರಿಸರ ಪೂರ್ವಕ ಯೋಜನೆ ಮತ್ತು ಕಾರ್ಯಗಳಿಗೆ ಮಾತ್ರ ಬಳಸಬೇಕೆಂಬ ನಿಯಮ ಇದೆ. ಉದಾಹರಣೆಗೆ, ಮರುಬಳಕೆ ಶಕ್ತಿ (ರಿವಿವಬಲ್ ಎನರ್ಜಿ), ತ್ಯಾಜ್ಯ ನಿರ್ವಹಣೆ, ಜಲ ಯೋಜನೆ, ಮಾಲಿನ್ಯ ನಿಯಂತ್ರಣ, ಗ್ರೀನ್ ಮೊಬಿಲಿಟಿ (ಎಲೆಕ್ಟ್ರಿಕ್ ವಾಹನ) ಇತ್ಯಾದಿ ಕಾರ್ಯಗಳಿಗೆ ಗ್ರೀನ್ ಬಾಂಡ್ನ ಹಣವನ್ನು ಬಳಸಬೇಕು.
ಗ್ರೀನ್ ಬಾಂಡ್ ಯಾಕೆ ಮುಖ್ಯ?
ಗ್ರೀನ್ ಬಾಂಡ್ ಖರೀದಿಸುವ ಮೂಲಕ ಪರಿಸರಸ್ನೇಹ ಕಾರ್ಯಗಳನ್ನು ಬೆಂಬಲಿಸುವ ಮತ್ತು ನೆರವಾಗುವ ಅವಕಾಶ ಜನರಿಗೆ ಇದ್ದೇ ಇದೆ. ಪರಿಸರಸ್ನೇಹಿ ಕಾರ್ಯಗಳಿಗೆ ಬಂಡವಾಳ ಸಿಗುವುದು ಅಷ್ಟು ಸುಲಭವಲ್ಲ. ಗ್ರೀನ್ ಬಾಂಡ್ ಇಂತಹದ್ದೊಂದು ಅವಕಾಶವನ್ನು ಸಂಘ ಸಂಸ್ಥೆಗಳಿಗೆ ಒದಗಿಸುತ್ತದೆ. ಈ ಪರಿಸರಸ್ನೇಹಿ ಯೋಜನೆಗಳು ದಿಢೀರ್ ವಾಣಿಜ್ಯಾತ್ಮಕ ಲಾಭ ತರದೇ ಹೋದರೂ ದೀರ್ಘಾವಧಿಯ ದೃಷ್ಟಿಯಲ್ಲಿ ಇವು ಮಹತ್ತರ ಎನಿಸುವ ಯೋಜನೆಗಳಾಗಿರುತ್ತವೆ. ಅದಕ್ಕಾಗಿ, ಪರಿಸರ ಕಾಳಜಿ ಇರುವ ಜನರು ಗ್ರೀನ್ ಬಾಂಡ್ಗಳನ್ನು ಖರೀದಿಸುವ ಮೂಲಕ ಪರಿಸರಸ್ನೇಹಿ ಯೋಜನೆಗಳಿಗೆ ಬೆಂಬಲಿಸುತ್ತಾರೆ.
ಹೂಡಿಕೆಯಾಗಿ ಗ್ರೀನ್ ಬಾಂಡ್ನಿಂದ ಏನು ಲಾಭ?
ಸರ್ಕಾರಿ ಬಾಂಡ್ಗಳಂತೆ ಗ್ರೀನ್ ಬಾಂಡ್ ಕೂಡ ನಿರ್ದಿಷ್ಟ ಅವಧಿಯದ್ದಾಗಿರುತ್ತದೆ. ಇದು ವಾರ್ಷಿಕ ಶೇ. 7ರ ಆಸುಪಾಸಿನಲ್ಲಿ ದರದಲ್ಲಿ ಬಡ್ಡಿಯನ್ನು ಹೂಡಿಕೆದಾರರಿಗೆ ಒದಗಿಸುತ್ತದೆ. ಬಡ್ಡಿ ಹಣ ತೀರಾ ಹೆಚ್ಚಲ್ಲದಿದ್ದರೂ ಗ್ರೀನ್ ಬಾಂಡ್ ಹಲವು ತೆರಿಗೆ ಲಾಭಗಳ ಅವಕಾಶ ನೀಡುತ್ತದೆ.
ಸರ್ಕಾರಕ್ಕೆ ಶಕ್ತಿಯಾಗಿದೆ ಗ್ರೀನ್ ಬಾಂಡ್:
ಸರ್ಕಾರ ಹವಾಮಾನ ಬದಲಾವಣೆ ವಿರುದ್ಧ ಬಹಳಷ್ಟು ಪರಿಸರಸ್ನೇಹಿ ಯೋಜನೆಗಳನ್ನು ಕೈಗೊಂಡಿದೆ. ಪೆಟ್ರೋಲಿಯಂ ಉತ್ಪನ್ನಗಳ ಬಳಕೆ ತಗ್ಗಿಸಿ, ಪರ್ಯಾಯ ಶಕ್ತಿಗಳಿಗೆ ಉತ್ತೇಜನ ಕೊಡುವ ಯೋಜನೆಗಳನ್ನು ನಡೆಸುತ್ತಿದೆ. ಈ ಕಾರ್ಯಗಳಿಗೆ ಬೇಕಾದ ಬಂಡವಾಳವನ್ನು ಕಲೆಹಾಕಲು ಸರ್ಕಾರಕ್ಕೆ ಗ್ರೀನ್ ಬಾಂಡ್ ಅನುಕೂಲ ಮಾಡಿಕೊಟ್ಟಿದೆ. ಸರ್ಕಾರದ ಸೋವರೀನ್ ಗ್ರೀನ್ ಬಾಂಡ್ಗಳಿಗೆ ಜನರಿಂದಲೂ ಉತ್ತಮ ಸ್ಪಂದನೆ ಸಿಕ್ಕಿದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 5:06 pm, Sun, 23 April 23
