ಸೆಣಬಿಗೆ ಬೆಂಬಲ ಬೆಲೆ ಹೆಚ್ಚಳ; ಕ್ವಿಂಟಾಲ್ಗೆ ಈಗ 5,650 ರೂ; ಬೇರೆ ಬೆಳೆಗಳಿಗಿರುವ ಬೆಲೆಪಟ್ಟಿ
Raw Jute MSP rised: ಕಚ್ಚಾ ಸೆಣಬಿಗೆ ಕನಿಷ್ಠ ಬೆಂಬಲ ಬೆಲೆಯನ್ನು ಶೇ. 6ರಷ್ಟು ಹೆಚ್ಚಿಸಲು ಕೇಂದ್ರ ಸಂಪುಟದಿಂದ ಅನುಮೋದನೆ ಸಿಕ್ಕಿದೆ. ಒಂದು ಕ್ವಿಂಟಾಲ್ ಸೆಣಬಿಗೆ 5,335 ರೂ ಇದ್ದ ಎಂಎಸ್ಪಿಯನ್ನು 5,650 ರೂಗೆ ಏರಿಸಲಾಗಿದೆ. ಸೆಣಬು ಬೆಳೆಗಾರರಿಗೆ ಸರಾಸರಿ ವೆಚ್ಚಕ್ಕಿಂತ ಶೇ. 66.8ರಷ್ಟು ಹೆಚ್ಚು ಲಾಭ ಸಿಗುತ್ತದೆ ಎಂದು ಎಂಎಸ್ಪಿ ಏರಿಕೆ ಬಗ್ಗೆ ಕೇಂದ್ರ ಸಚಿವ ಪೀಯೂಶ್ ಗೋಯಲ್ ವಿವರಿಸಿದ್ದಾರೆ.
Updated on: Jan 22, 2025 | 6:06 PM
ನವದೆಹಲಿ, ಜನವರಿ 22: ಕಚ್ಚಾ ಸೆಣಬಿಗೆ ಈ ಸೀಸನ್ನಲ್ಲಿ ಸರ್ಕಾರದಿಂದ ನೀಡಲಾಗುವ ಕನಿಷ್ಠ ಬೆಂಬಲ ಬೆಲೆ ಅಥವಾ ಎಂಎಸ್ಪಿ ದರವನ್ನು ಹೆಚ್ಚಿಸಲಾಗಿದೆ. 2025-26ರ ಮಾರುಕಟ್ಟೆ ಋತುವಿನಲ್ಲಿ ಕಚ್ಚಾ ಸೆಣಬಿಗೆ ಕನಿಷ್ಠ ಬೆಂಬಲ ಬೆಲೆಯನ್ನು ಪ್ರತೀ ಕ್ವಿಂಟಾಲ್ಗೆ 5,650 ರೂಗಳಿಗೆ ಏರಿಸಲಾಗಿದೆ. ಹಿಂದಿನ ವರ್ಷದಲ್ಲಿ ಸೆಣಬಿಗೆ ಎಂಎಸ್ಪಿ 5,335 ರೂ ಇತ್ತು. ಕ್ವಿಂಟಾಲ್ಗೆ 315 ರೂ ಅಥವಾ ಶೇ. 6ರಷ್ಟು ಎಂಎಸ್ಪಿ ಏರಿಕೆ ಆಗಿದೆ. ಕೇಂದ್ರ ಸಂಪುಟದಲ್ಲಿ ಈ ಕ್ರಮಕ್ಕೆ ಇಂದು ಅನುಮೋದನೆ ಸಿಕ್ಕಿದೆ. ಕೇಂದ್ರ ಸಚಿವ ಪೀಯುಶ್ ಗೋಯಲ್ ಇಂದು ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ಈ ಸಂಗತಿಯನ್ನು ತಿಳಿಸಿದ್ದಾರೆ.
ಸೆಣಬು ಬೆಳೆಯಲು ಆಗುವ ಸರಾಸರಿ ವೆಚ್ಚಕ್ಕಿಂತ ಶೇ. 66.8ರಷ್ಟು ಹೆಚ್ಚು ಲಾಭ ರೈತರಿಗೆ ಸಿಗಲಿದೆ. ಸೆಣಬು ಬೆಳೆಗಾರರಿಗೆ ಆದಾಯ ಹೆಚ್ಚಳ ಸಾಧ್ಯವಾಗಲಿದೆ ಎಂದು ಸಚಿವರು ಹೇಳಿದ್ದಾರೆ.
ಕಳೆದ ಹತ್ತು ವರ್ಷಗಳಿಂದ ಸೆಣಬಿಗೆ ಬೆಂಬಲ ಬೆಲೆ ಸಾಕಷ್ಟು ಏರಿಕೆ ಆಗುತ್ತಾ ಬಂದಿದೆ. 2014-15ರಲ್ಲಿ ಒಂದು ಕ್ವಿಂಟಾಲ್ ಸೆಣಬಿಗೆ 2,400 ರೂ ಎಂಎಸ್ಪಿ ಇತ್ತು. ಹತ್ತು ವರ್ಷದಲ್ಲಿ 2.35 ಪಟ್ಟು ಹೆಚ್ಚು ಏರಿಕೆ ಮಾಡಲಾಗಿದೆ. ಕೇಂದ್ರ ಸಂಪುಟ ಇಂದು ಎಂಎಸ್ಪಿ ಏರಿಕೆ ಜೊತೆಗೆ ಮತ್ತೊಂದು ನಡೆಗೂ ಅನುಮೋದನೆ ನೀಡಿದೆ. ರಾಷ್ಟ್ರೀಯ ಹೆಲ್ತ್ ಮಿಷನ್ ಅನ್ನು ಮತ್ತಷ್ಟು ಐದು ವರ್ಷಕ್ಕೆ ವಿಸ್ತರಿಸುವ ಕ್ರಮಕ್ಕೆ ಸಂಪುಟದ ಒಪ್ಪಿಗೆ ಸಿಕ್ಕಿದೆ.
ಇದನ್ನೂ ಓದಿ: ಭಾರತೀಯ ಜಿನೋಮ್ ಡಾಟಾಬೇಸ್, ಐಬಿಡಿಸಿ ಪೋರ್ಟಲ್ ಆರಂಭ; ಬಯೋಟೆಕ್ ಸೂಪರ್ಪವರ್ ದೇಶವಾಗುವತ್ತ ಭಾರತದ ಹೆಜ್ಜೆ
ವಿವಿಧ ಬೆಳೆಗಳಿಗೆ ಹಾಲಿ ಇರುವ ಎಂಎಸ್ಪಿ ದರಗಳು… (ಕ್ವಿಂಟಾಲ್ಗೆ)
- ಭತ್ತ: 2,300 ರೂ
- ಜೋಳ: 2,320 ರೂ
- ರಾಗಿ: 4,290
- ತೊಗರಿ ಬೇಳೆ: 7,550 ರೂ
- ಹೆಸರುಕಾಳು: 8,682 ರೂ
- ಉದ್ದಿನಬೇಳೆ: 7,400 ರೂ
- ಹತ್ತಿ: 7,121 ರೂ
- ಸೂರ್ಯಕಾಂತಿ ಬೀಜ: 7,280 ರೂ
- ಸೋಯಾ: 4,892 ರೂ
- ಗೋಧಿ: 2,425 ರೂ
- ಬಾರ್ಲೀ: 1,980 ರೂ
- ಕಡಲೆ: 5,650 ರೂ
- ಕೊಬ್ಬರಿ: 11,160 ರೂ
- ಕಬ್ಬು: 340 ರೂ
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
