ಸೈಬರ್ ವಂಚನೆ ತಡೆಯಲು ಆರ್​ಬಿಐ ಕ್ರಮ; ಬ್ಯಾಂಕುಗಳಿಗೆ ಬೇರೆ ಡೊಮೇನ್, ಅಂತಾರಾಷ್ಟ್ರೀಯ ಪಾವತಿಗೆ ಹೆಚ್ಚುವರಿ ಸೆಕ್ಯುರಿಟಿ

RBI measures to bring safety in internet banking: ಇಂಟರ್ನೆಟ್ ಬ್ಯಾಂಕಿಂಗ್​ನಲ್ಲಿ ವಂಚನೆ ತಡೆಯಲು ಆರ್​ಬಿಐ ಕೆಲ ಕ್ರಮಗಳನ್ನು ಅವಲೋಕಿಸಿದೆ. ಬ್ಯಾಂಕುಗಳಿಗೆ ಮತ್ತು ಎನ್​ಬಿಎಫ್​ಸಿಗಳಿಗೆ ಪ್ರತ್ಯೇಕ ಇಂಟರ್ನೆಟ್ ಡೊಮೇನ್ ಅಳವಡಿಕೆಯನ್ನು ಜಾರಿಗೊಳಿಸಲಾಗುತ್ತಿದೆ. ಏಪ್ರಿಲ್​ನಿಂದ ಈ ಕ್ರಮ ಬರಬಹುದು. ಹಾಗೆಯೇ, ಭಾರತದೊಳಗಿನ ಡಿಜಿಟಲ್ ಪಾವತಿಗಳಿಗೆ ಇರುವಂತೆ ಅಂತಾರಾಷ್ಟ್ರೀಯ ಆನ್​ಲೈನ್ ಹಣ ಪಾವತಿಗೆ ಹೆಚ್ಚುವರಿ ದೃಢೀಕರಣ ವ್ಯವಸ್ಥೆಯನ್ನು ಜಾರಿಗೆ ತರಲು ಆರ್​ಬಿಐ ನಿರ್ಧರಿಸಿದೆ.

ಸೈಬರ್ ವಂಚನೆ ತಡೆಯಲು ಆರ್​ಬಿಐ ಕ್ರಮ; ಬ್ಯಾಂಕುಗಳಿಗೆ ಬೇರೆ ಡೊಮೇನ್, ಅಂತಾರಾಷ್ಟ್ರೀಯ ಪಾವತಿಗೆ ಹೆಚ್ಚುವರಿ ಸೆಕ್ಯುರಿಟಿ
ಬ್ಯಾಂಕಿಂಗ್

Updated on: Feb 07, 2025 | 12:40 PM

ನವದೆಹಲಿ, ಫೆಬ್ರುವರಿ 7: ರಸ್ತೆಯಲ್ಲಿ ಹೋಗುವಾಗ ಅಪಘಾತವಾಗುವ ರಿಸ್ಕ್ ಇರುವಂತೆ ಅಂತರ್ಜಾಲದಲ್ಲಿರುವಾಗ ವಂಚನೆಗೊಳಗಾಗುವ ರಿಸ್ಕ್ ಇರಬಹುದು. ಆನ್​ಲೈನ್​ನಲ್ಲಿ ಹಣಕಾಸು ವಂಚನೆ ನಿಗ್ರಹಿಸಲು ಸರ್ಕಾರ ನಿರಂತರವಾಗಿ ಒಂದಿಲ್ಲೊಂದು ಕ್ರಮ ತೆಗೆದುಕೊಳ್ಳುತ್ತಿರುತ್ತದೆ. ಆರ್​ಬಿಐ ಇದೀಗ ಇಂಟರ್ನೆಟ್ ಬ್ಯಾಂಕಿಂಗ್​ನ ಸುರಕ್ಷತೆ ಹೆಚ್ಚಿಸಲು ಕೆಲ ಹೊಸ ಕ್ರಮಗಳನ್ನು ಜಾರಿ ಮಾಡುತ್ತಿದೆ. ಆರ್​​ಬಿಐನ ನೂತನ ಗವರ್ನರ್ ಸಂಜಯ್ ಮಲ್ಹೋತ್ರಾ ಅವರು ಎಂಪಿಸಿ ಸಭೆ ಬಳಿಕ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಭಾರತೀಯ ಬ್ಯಾಂಕುಗಳಿಗೆ ಮತ್ತು ಹಣಕಾಸು ವಲಯಕ್ಕೆ ಬೇರೆ ಬೇರೆ ಡೊಮೈನ್​ಗಳನ್ನು ನೀಡುವುದೂ ಕೂಡ ಈ ಕ್ರಮಗಳಲ್ಲಿ ಒಂದು.

ಭಾರತೀ ಬ್ಯಾಂಕುಗಳಿಗೆ ಪ್ರತ್ಯೇಕವಾದ ‘bank.in’ ಎನ್ನುವ ಇಂಟರ್ನೆಟ್ ಡೊಮೈನ್ ಅನ್ನು ನಿಗದಿ ಮಾಡಲಾಗುತ್ತದೆ. ಈ ವರ್ಷದ ಏಪ್ರಿಲ್​ನಿಂದ ಈ ಡೊಮೈನ್ ಹೆಸರಿನ ನೊಂದಣಿ ಶುರುವಾಗುತ್ತದೆ ಎಂದು ಸಂಜಯ್ ಮಲ್ಹೋತ್ರಾ ತಿಳಿಸಿದ್ದಾರೆ.

ಇದನ್ನೂ ಓದಿ: ಎಂಪಿಸಿ ಸಭೆ ಬಳಿಕ ಆರ್​ಬಿಐನ ಎಸ್​ಡಿಎಫ್, ರಿಪೋ, ಎಸ್​ಎಲ್​ಆರ್ ಇತ್ಯಾದಿ ಎಷ್ಟಿವೆ? ಇಲ್ಲಿದೆ ಇತ್ತೀಚಿನ ದರಗಳ ವಿವರ

ಈ ಡೊಮೈನ್ ಬದಲಾವಣೆಯಿಂದ ಬ್ಯಾಂಕಿಂಗ್ ವಂಚನೆಗಳು ತಡೆಯಲು ನೆರವಾಗಬಹುದು ಎಂದು ನಿರೀಕ್ಷಿಸಿರುವ ಅವರು, ಬ್ಯಾಂಕ್ ಡೊಮೈನ್ ಬದಲಾವಣೆ ಬಳಿಕ ಹಣಕಾಸು ವಲಯದ ಸಂಸ್ಥೆಗಳ (ಎನ್​ಬಿಎಫ್​ಸಿ) ವೆಬ್​​ಸೈಟುಗಳಿಗೆ ಪ್ರತ್ಯೇಕವಾದ ‘fin.in’ ಎನ್ನುವ ಡೊಮೈನ್ ಅನ್ನು ಅಳವಡಿಸಲಾಗುವುದು ಎಂದಿದ್ದಾರೆ.

ಅಡಿಶನಲ್ ಫ್ಯಾಕ್ಟರ್ ಅಥೆಂಟಿಕೇಶನ್

ಡಿಜಿಟಲ್ ಫ್ರಾಡ್​ಗಳನ್ನು ನಿಗ್ರಹಿಸಲು ಆರ್​ಬಿಐ ಈಗಾಗಲೇ ವಿವಿಧ ಕ್ರಮಗಳನ್ನು ಕೈಗೊಂಡಿದೆ. ಅದರಲ್ಲಿ ಅಡಿಶನಲ್ ಫ್ಯಾಕ್ಟರ್ ಆಫ್ ಅಥೆಂಟಿಕೇಶನ್ ಅಥವಾ ಎಎಫ್​ಎ ಒಂದು. ಪಾಸ್ವರ್ಡ್ ಜೊತೆಗೆ ಒಟಿಪಿ ಮೂಲಕ ಪಡೆಯಲಾಗುವ ಹೆಚ್ಚುವರಿ ದೃಢೀಕರಣ. ಭಾರತದೊಳಗೆ ಡಿಜಿಟಲ್ ಪಾವತಿಗೆ ಇದು ಜಾರಿಯಲ್ಲಿದೆ. ಈಗ ಇದನ್ನು ಅಂತಾರಾಷ್ಟ್ರೀಯ ಡಿಜಿಟಲ್ ಪಾವತಿಗಳಿಗೂ ವಿಸ್ತರಿಸಲಾಗುತ್ತದೆ.

ಇದನ್ನೂ ಓದಿ: ಮುಂದಿನ ವರ್ಷ ಜಿಡಿಪಿ ದರ ಶೇ. 6.7; ಹಣದುಬ್ಬರ ಶೇ. 4.2; ಆರ್​ಬಿಐ ಅಂದಾಜು

ಬ್ಯಾಂಕುಗಳು ಮತ್ತು ಎನ್​ಬಿಎಫ್​ಸಿಗಳು ಸೈಬರ್ ಅಪಾಯಗಳನ್ನು ನಿಗ್ರಹಿಸಲು ನಿರಂತರವಾಗಿ ಮುನ್ನೆಚ್ಚರಿಕೆ ಕ್ರಮಗಳನ್ನು ಅವಲೋಕಿಸುತ್ತಿರಬೇಕು. ವಂಚನೆ ಘಟನೆ ನಡೆದ ನಂತರದ ಕ್ಷಿಪ್ರ ಸ್ಪಂದನೆ ಇತ್ಯಾದಿ ಕ್ರಮಗಳಿರುವ ಪ್ರಬಲ ವ್ಯವಸ್ಥೆಯನ್ನು ರೂಪಿಸಬೇಕು ಎಂದು ಆರ್​ಬಿಐ ಗವರ್ನರ್ ಅವರು ಹೇಳಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ