ಎಂಪಿಸಿ ಸಭೆ ಬಳಿಕ ಆರ್​ಬಿಐನ ಎಸ್​ಡಿಎಫ್, ರಿಪೋ, ಎಸ್​ಎಲ್​ಆರ್ ಇತ್ಯಾದಿ ಎಷ್ಟಿವೆ? ಇಲ್ಲಿದೆ ಇತ್ತೀಚಿನ ದರಗಳ ವಿವರ

ನವದೆಹಲಿ, ಫೆಬ್ರುವರಿ 7: ಆರ್​​ಬಿಐ ಮಾನಿಟರಿ ಪಾಲಿಸಿ ಸಮಿತಿಯ ಸಭೆ ಮುಗಿದಿದ್ದು, ಆರ್​ಬಿಐ ಗವರ್ನರ್ ಸಂಜಯ್ ಮಲ್ಹೋತ್ರಾ ಪತ್ರಿಕಾ ಹೇಳಿಕೆಯಲ್ಲಿ ಪ್ರಮುಖ ಅಂಶಗಳನ್ನು ತಿಳಿಸಿದ್ದಾರೆ. ರಿಪೋ ದರವನ್ನು 25 ಬೇಸಿಸ್ ಪಾಯಿಂಟ್​ಗಳಷ್ಟು ಇಳಿಕೆ ಮಾಡಿದ್ದಾರೆ. ಶೇ. 6.50ರಷ್ಟಿದ್ದ ರಿಪೋ ದರ ಶೇ. 6.25ಕ್ಕೆಇಳಿದಿದೆ. ಪಾಲಿಸಿ ನಿಲುವನ್ನು ನ್ಯೂಟ್ರಲ್​ನಲ್ಲೇ ಮುಂದುವರಿಸುವ ನಿರ್ಧಾರ ಮಾಡಿರುವುದಾಗಿ ತಿಳಿಸಿದ್ದಾರೆ. ಎಂಎಸ್​ಎಫ್, ಎಸ್​ಡಿಎಫ್, ರಿವರ್ಸ್ ರಿಪೋ, ಸಿಆರ್​ಆರ್, ಎಂಎಲ್​ಆರ್ ಇತ್ಯಾದಿ ಹಲವು ದರಗಳು ಯಥಾಸ್ಥಿತಿಯಲ್ಲೇ ಮುಂದುವರಿಯಲಿವೆ.

ಆರ್​ಬಿಐ ದರಗಳು (ಫೆ. 7ಕ್ಕೆ)

• ರಿಪೋ ದರ: ಶೇ. 6.25 (25 ಮೂಲಾಂಕಗಳಷ್ಟು ಇಳಿಕೆ)
• ಸ್ಟ್ಯಾಂಡಿಂಗ್ ಡೆಪಾಸಿಟ್ ಫೆಸಿಲಿಟಿ (ಎಸ್​ಡಿಎಫ್) ದರ: ಶೇ. 6
• ಮಾರ್ಜಿನಲ್ ಸ್ಟ್ಯಾಂಡಿಂಗ್ ಫೆಸಿಲಿಟಿ (ಎಂಎಸ್​ಎಫ್) ದರ: ಶೇ. 6.50
• ಬ್ಯಾಂಕ್ ದರ: ಶೇ. 6.50
• ರಿವರ್ಸ್ ರಿಪೋ ದರ: ಶೇ. 3.35
• ಕ್ಯಾಷ್ ರಿಸರ್ವ್ ರೇಶಿಯೋ (ಸಿಆರ್​ಆರ್): ಶೇ. 4
• ಎಸ್​ಎಲ್​ಆರ್: ಶೇ. 18
• ಮೂಲ ದರ: ಶೇ. 9.10ರಿಂದ ಶೇ. 10.40
• ಎಂಸಿಎಲ್​ಆರ್: ಶೇ. 8.15ರಿಂದ ಶೇ. 8.45
• ಸೇವಿಂಗ್ಸ್ ಡೆಪಾಸಿಟ್ ರೇಟ್: ಶೇ. 6
• ಟರ್ಮ್ ಡೆಪಾಸಿಟ್ ರೇಟ್: ಶೇ. 6ರಿಂದ 7.125

ಇದನ್ನೂ ಓದಿ: RBI MPC Updates: ರಿಪೋದರ ಶೇ. 6.25ಕ್ಕೆ ಇಳಿಸಿದ ಆರ್​ಬಿಐ; ಕಡಿಮೆ ಆಗಲಿವೆ ಬ್ಯಾಂಕ್ ಸಾಲಗಳ ಬಡ್ಡಿ

ಬ್ಯಾಂಕ್ ರೇಟ್ ಮತ್ತು ರಿಪೋ ರೇಟ್ ನಡುವೆ ಏನು ವ್ಯತ್ಯಾಸ

ಇಲ್ಲಿ ಆರ್​ಬಿಐನ ಬ್ಯಾಂಕ್ ದರ ಮತ್ತು ರಿಪೋ ದರ ಎಂದು ಎರಡು ಪ್ರತ್ಯೇಕ ಇದೆ. ಎರಡೂ ಕೂಡ ವಾಣಿಜ್ಯ ಬ್ಯಾಂಕುಗಳು ಆರ್​ಬಿಐನಿಂದ ಪಡೆಯುವ ಸಾಲಕ್ಕೆ ವಿಧಿಸಲಾಗುವ ಬಡ್ಡಿದರಗಳೇ ಆಗಿವೆ. ಆದರೆ, ಈ ಎರಡು ರೇಟ್​ಗಳ ಮಧ್ಯೆ ಸಣ್ಣ ವ್ಯತ್ಯಾಸ ಇದೆ. ಬ್ಯಾಂಕ್ ರೇಟ್ ಎನ್ನುವುದು ಅಡಮಾನ ರಹಿತವಾಗಿ ನೀಡಿದ ಸಾಲಕ್ಕೆ ವಿಧಿಸುವ ಬಡ್ಡಿ. ಅದೇ ರಿಪೋ ದರ ಎಂದರೆ ಸೆಕ್ಯೂರಿಟಿಗಳನ್ನು ಖರೀದಿಸಿ ಪಡೆಯುವ ಸಾಲಕ್ಕೆ ವಿಧಿಸುವ ಬಡ್ಡಿಯಾಗಿದೆ.

ಬೇಸ್ ರೇಟ್, ಎಂಸಿಎಲ್​ಆರ್, ಸೇವಿಂಗ್ಸ್ ಡೆಪಾಸಿಟ್, ಟರ್ಮ್ ಡೆಪಾಸಿಟ್ ಇತ್ಯಾದಿ ದರಗಳು ಆರ್​ಬಿಐನ ಬೆಂಚ್​ಮಾರ್ಕ್ ರೇಟ್​ಗಳಾಗಿವೆ. ಅಂದರೆ ಬ್ಯಾಂಕುಗಳಿಗೆ ಸೂಕ್ತವಾದ ಡೆಪಾಸಿಟ್ ಮತ್ತು ಸಾಲಗಳಿಗೆ ಕನಿಷ್ಠ ಬಡ್ಡಿದರವನ್ನು ಆರ್​ಬಿಐ ಶಿಫಾರಸು ಮಾಡುವ ದರಗಳು ಇವು. ಬ್ಯಾಂಕುಗಳು ಈ ಶಿಫಾರಸನ್ನು ಪರಿಗಣಿಸಬೇಕು ಎನ್ನುವ ಕಟ್ಟುಪಾಡು ಇರುವುದಿಲ್ಲ.

ಪಾಲಿಸಿ ನೀತಿ ನ್ಯೂಟ್ರಲ್ ಎಂದಿದ್ದರೆ ಏನು?

ಆರ್​ಬಿಐ ಮೂರು ವಿಧದ ನಿಲುವುಗಳನ್ನು ಹೊಂದಿರಬಹುದು. ಮೊದಲನೆಯದು ಅಕಾಮೊಡೇಟಿವ್, ಎರಡನೆಯದು ನ್ಯೂಟ್ರಲ್. ಮತ್ತು ಮೂರನೆಯದು ಹಾಕಿಶ್ (Hawkish) ನಿಲುವು.

ಇದನ್ನೂ ಓದಿ: ಮುಂದಿನ ವರ್ಷ ಜಿಡಿಪಿ ದರ ಶೇ. 6.7; ಹಣದುಬ್ಬರ ಶೇ. 4.2; ಆರ್​ಬಿಐ ಅಂದಾಜು

ಅಕಾಮೊಡೇಟಿವ್ ನಿಲುವಿನಲ್ಲಿ ಆರ್​ಬಿಐ ತನ್ನ ಪಾಲಿಸಿ ದರಗಳನ್ನು ಇಳಿಸಲು ಆದ್ಯತೆ ಕೊಡುತ್ತದೆ. ಈ ನೀತಿ ಇದ್ದಾಗ, ರಿಪೋ ದರ ಇತ್ಯಾದಿಯ ಇಳಿಕೆ ಸಾಧ್ಯತೆ ಹೆಚ್ಚಿರುತ್ತದೆ.

ನ್ಯೂಟ್ರಲ್ ಸ್ಟ್ಯಾನ್ಸ್ ಅಥವಾ ಮಧ್ಯಮ ಮಾರ್ಗದ ನಿಲುವಿನಲ್ಲಿ ಆರ್​ಬಿಐ ಸಂದರ್ಭಕ್ಕೆ ಅನುಗುಣವಾಗಿ ಪಾಲಿಸಿ ರೇಟ್​ಗಳನ್ನು ನಿರ್ಧರಿಸುತ್ತದೆ. ಹಣದುಬ್ಬರ, ಜಿಡಿಪಿ, ಜಾಗತಿಕ ಆರ್ಥಿಕತೆಯ ಗತಿ ಇತ್ಯಾದಿ ಅಂಶಗಳನ್ನು ಆಧಾರವಾಗಿಟ್ಟುಕೊಂಡು ಅದಕ್ಕೆ ತಕ್ಕದಾಗಿ ಪಾಲಿಸಿ ರೇಟ್​ಗಳನ್ನು ಬದಲಿಸುತ್ತದೆ.

ಮೂರನೆಯ ನಿಲುವು ತುಸು ನಿರ್ದಾಕ್ಷಿಣ್ಯವಾಗಿರಬಹುದು. ರಿಪೋ ದರ ಇತ್ಯಾದಿ ಪಾಲಿಸಿ ರೇಟ್​ಗಳನ್ನು ಇಳಿಸುವ ಸಾಧ್ಯತೆ ಇರುವುದಿಲ್ಲ.

ರಿವರ್ಸ್ ರಿಪೋ, ಎಸ್​ಡಿಎಫ್, ಎಂಎಸ್​ಎಫ್ ನಡುವೆ ವ್ಯತ್ಯಾಸವೇನು?

ರಿವರ್ಸ್ ರಿಪೋ ಎಂದರೆ ಕಮರ್ಷಿಯಲ್ ಬ್ಯಾಂಕುಗಳು ಆರ್​ಬಿಐನಲ್ಲಿ ಇರಿಸುವ ಹಣಕ್ಕೆ ಸಿಗುವ ಬಡ್ಡಿ. ಸ್ಟ್ಯಾಂಡಿಂಗ್ ಡೆಪಾಸಿಟ್ ಫೆಸಿಲಿಟಿ ಅಥವಾ ಎಸ್​ಡಿಎಫ್​ನಲ್ಲೂ ಕಮರ್ಷಿಯಲ್ ಬ್ಯಾಂಕುಗಳು ಆರ್​​ಬಿಐನಲ್ಲಿ ಇರಿಸುವ ಠೇವಣಿಗೆ ಸಿಗುವ ಬಡ್ಡಿಯಾಗಿದೆ. ಮಾರ್ಜಿನಲ್ ಸ್ಟ್ಯಾಂಡಿಂಗ್ ಫೆಸಿಲಿಟಿಯೂ ಕೂಡ ಇದೇ ತೆರನಾದುದು. ಆದರೆ, ರಿವರ್ಸ್ ರಿಪೋ ಶೇ. 3.35, ಎಸ್​ಡಿಎಫ್ ಶೇ. 6, ಮತ್ತು ಎಂಎಸ್​ಎಫ್ ಶೇ. 6.50 ಇದೆ. ಆದರೆ, ಈ ಮೂರರಲ್ಲಿ ಒಂದು ಸೂಕ್ಷ್ಮ ವ್ಯತ್ಯಾಸ ಇದೆ.

ಇದನ್ನೂ ಓದಿ: ಎನ್​ಬಿಎಫ್​ಸಿಗಳು ಸಾಲಕ್ಕೆ ಗರಿಷ್ಠ ಬಡ್ಡಿ ಎಷ್ಟೆಂದು ನಿರ್ದಿಷ್ಟಪಡಿಸಬೇಕು: ಆರ್​​ಬಿಐ ನಿರ್ದೇಶನ

ರಿವರ್ಸ್ ರಿಪೋದಲ್ಲಿ ವಾಣಿಜ್ಯ ಬ್ಯಾಂಕುಗಳು ತಾವಾಗಿಯೇ ಹೆಚ್ಚುವರಿ ಹಣವನ್ನು ಆರ್​ಬಿಐನಲ್ಲಿ ಇರಿಸಿದರೆ ಸಿಗುವ ಬಡ್ಡಿದರ. ಆದರೆ, ಸ್ಟ್ಯಾಂಡಿಂಗ್ ಡೆಪಾಸಿಟ್ ಫೆಸಿಲಿಟಿಯಲ್ಲಿ ಆರ್​ಬಿಐ ಬ್ಯಾಂಕುಗಳಿಗೆ ನೀಡುವ ಆಫರ್ ಆಗಿರುತ್ತದೆ. ಎಂಎಸ್​ಎಫ್ ಕೂಡ ಆರ್​ಬಿಐ ನೀಡುವ ಡೆಪಾಸಿಟ್ ಆಫರ್. ಹೀಗಾಗಿ, ಇವುಗಳಿಗೆ ಹೆಚ್ಚಿನ ದರ ನೀಡಲಾಗುತ್ತದೆ.

ಹಣಕಾಸು ಮಾರುಕಟ್ಟೆಯಲ್ಲಿ ಹಣದ ಹರಿವು ಅಗತ್ಯಕ್ಕಿಂತ ಹೆಚ್ಚಿದೆ ಎಂದನಿಸಿದಲ್ಲಿ ಆರ್​ಬಿಐ ಎಸ್​ಡಿಎಫ್ ಮತ್ತು ಎಂಎಸ್​ಎಫ್ ಸೌಲಭ್ಯವನ್ನು ಬಳಸಿಕೊಂಡು ಕಮರ್ಷಿಯಲ್ ಬ್ಯಾಂಕುಗಳಲ್ಲಿ ಹೆಚ್ಚುವರಿಯಾಗಿರುವ ಹಣವನ್ನು ಸೆಳೆಯಲು ಯತ್ನಿಸುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ