Russia Oil To India: ಉಕ್ರೇನ್ ಯುದ್ಧಕ್ಕೂ ಮುಂಚೆ ಇದ್ದ ದರಕ್ಕೆ ಭಾರೀ ರಿಯಾಯಿತಿಯಲ್ಲಿ ಭಾರತಕ್ಕೆ ರಷ್ಯಾ ತೈಲ
ರಷ್ಯಾದಿಂದ ಭಾರತಕ್ಕೆ ಭಾರೀ ರಿಯಾಯಿತಿ ದರದಲ್ಲಿ ತೈಲವನ್ನು ಮಾರಾಟ ಮಾಡಲಾಗುತ್ತಿದೆ. ಒಂದು ಬ್ಯಾರೆಲ್ಗೆ 35 ಡಾಲರ್ ರಿಯಾಯಿತಿ. ಆದರೆ ಅದು ಕೂಡ ಇವತ್ತಿನ ದರಕ್ಕೆ ಅಲ್ಲ.
Updated on: Mar 31, 2022 | 11:43 AM
ರಷ್ಯಾದಿಂದ ಭಾರತಕ್ಕೆ ಭಾರೀ ರಿಯಾಯಿತಿಯಲ್ಲಿ ತೈಲದ (Oil) ಆಫರ್ ನೀಡಲಾಗುತ್ತಿದೆ. ಪ್ರತಿ ಬ್ಯಾರೆಲ್ಗೆ 35 ಯುಎಸ್ಡಿಯಷ್ಟು ಭರ್ಜರಿ ರಿಯಾಯಿತಿ. ಇದು ಈಗಿನ ದರದ ಮೇಲಲ್ಲ ಎಂಬುದು ಅಡಿಗೆರೆ ಹಾಕಿ ತಿಳಿಸಬೇಕಾದ ಸಂಗತಿ. ರಷ್ಯಾ- ಉಕ್ರೇನ್ ಯುದ್ಧ ಆರಂಭಕ್ಕೂ ಮುನ್ನ ಇದ್ದಂಥ ಬೆಲೆಯ ಮೇಲಿನ ರಿಯಾಯಿತಿ ಇದು. ಯುರಲ್ಸ್ ಗ್ರೇಡ್ ಅನ್ನು ರಷ್ಯಾವು ಭಾರತಕ್ಕೆ ಪ್ರತಿ ಬ್ಯಾರೆಲ್ಗೆ 35 ಯುಎಸ್ಡಿ ರಿಯಾಯಿತಿಯಲ್ಲಿ ನೀಡುತ್ತಿದೆ ಅಂದರೆ, ಅದರರ್ಥ ನಾನಾ ನಿರ್ಬಂಧಗಳನ್ನು ಹೇರಿರುವ ದೇಶಕ್ಕೆ ಈಗ ಭಾರತವು ಹೆಚ್ಚಿನ ತೈಲ ಆಮದು ಮಾಡಿಕೊಳ್ಳಲಿ ಎಂಬ ಇರಾದೆ ಇದೆ. ಅದರಲ್ಲೂ ರಷ್ಯಾ- ಉಕ್ರೇನ್ ಯುದ್ಧದ ಆರಂಭಕ್ಕೂ ಮುನ್ನ ಇದ್ದ ತೈಲ ದರದ ಮೇಲೆ ನೀಡುತ್ತಿರುವ ರಿಯಾಯಿತಿ ಎಂದು ಬ್ಲೂಮ್ಬರ್ಗ್ ವರದಿ ಮಾಡಿದೆ.
ಆ ನಂತರದಲ್ಲಿ ಹೆಡ್ಲೈನ್ ಬ್ರೆಂಟ್ ದರವು 10 ಯುಎಸ್ಡಿಯಷ್ಟು ಏರಿಕೆ ಆಗಿದ್ದು, ಸದ್ಯದ ಬೆಲೆಗಿಂತ ಭರ್ಜರಿ ರಿಯಾಯಿತಿ ಆಗುತ್ತದೆ. ಭಾರತವು ಈ ವರ್ಷ 15 ಮಿಲಿಯನ್ ಬ್ಯಾರೆಲ್ಗಳಷ್ಟು ಖರೀದಿ ಮಾಡಲಿ ಎಂದು ರಷ್ಯಾ ಬಯಸುತ್ತದೆ. ಇದು ಆರಂಭ. ಮತ್ತು ಸರ್ಕಾರದ ಮಟ್ಟದಲ್ಲಿ ಚರ್ಚೆ ಜಾರಿಯಲ್ಲಿದೆ. ಏಷ್ಯಾದ ಎರಡನೇ ಅತಿದೊಡ್ಡ ತೈಲ ಆಮದುದಾರ ದೇಶ ಭಾರತ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ರಷ್ಯಾದ ಮೇಲೆ ನಿರ್ಬಂಧ ಹೇರಿರುವ ಹೊರತಾಗಿಯೂ ಆ ದೇಶದ ಕಚ್ಚಾ ತೈಲದ ಖರೀದಿಯನ್ನು ಹೆಚ್ಚು ಮಾಡಿರುವ ಬೆರಳೆಣಿಕೆಯ ದೇಶಗಳಲ್ಲಿ ಭಾರತ ಸಹ ಒಂದು.
ಕಚ್ಚಾ ತೈಲ ಬೆಲೆಯ ಏರಿಕೆಯನ್ನು ಸುಧಾರಿಸುವ ನಿಟ್ಟಿನಲ್ಲಿ ಅಮೆರಿಕದಲ್ಲಿನ ಬೈಡನ್ ಆಡಳಿತವು ಸ್ಟ್ರಾಟೆಜಿಕ್ ಮೀಸಲಿನಿಂದ ಹಲವು ತಿಂಗಳ ಕಾಲ ದಿನಕ್ಕೆ 1 ಮಿಲಿಯನ್ ಬ್ಯಾರೆಲ್ನಷ್ಟು ಬಿಡುಗಡೆ ಮಾಡುವ ಬಗ್ಗೆ ಆಲೋಚಿಸುತ್ತಿರುವ ಹಿನ್ನೆಲೆಯಲ್ಲಿ ಗುರುವಾರ ತೈಲ ಫ್ಯೂಚರ್ಸ್ ಬ್ಯಾರೆಲ್ಗೆ 5 ಯುಎಸ್ಡಿಗೂ ಹೆಚ್ಚು ಇಳಿಕೆ ಕಂಡಿತು. ಬ್ರೆಂಟ್ ಫ್ಯೂಚರ್ಸ್ 4.71 ಯುಎಸ್ಡಿ ಅಥವಾ ಶೇ 4.2ರಷ್ಟು ಇಳಿದು, ಬ್ಯಾರೆಲ್ಗೆ 108.58 ಡಾಲರ್ ಮುಟ್ಟಿತು. ಯುಎಸ್ ವೆಸ್ಟ್ ಟೆಕ್ಸಾಸ್ ಇಂಟರ್ಮೀಡಿಯೆಟ್ ಫ್ಯೂಚರ್ಸ್ 5.45 ಯುಎಸ್ಡಿ ಅಥವಾ ಶೇ 5ರಷ್ಟು ಕುಸಿದು, 102.74 ಡಾಲರ್ ಪ್ರತಿ ಬ್ಯಾರೆಲ್ಗೆ ಮುಟ್ಟಿತು.
ಮಾರ್ಚ್ 25ರ ವಾರದಲ್ಲಿ ಅಮೆರಿಕದ ತೈಲ ದಾಸ್ತಾನುಗಳು 3.4 ಮಿಲಿಯನ್ ಬ್ಯಾರೆಲ್ಗಳಷ್ಟು ಕುಸಿದಿದ್ದರಿಂದ ಈ ಹೇಳಿಕೆ ಬಿಡುಗಡೆಯಾಗಿದ್ದು, ಇದು 1 ಮಿಲಿಯನ್ ಬ್ಯಾರೆಲ್ ಕುಸಿತದ ಮುನ್ಸೂಚನೆಗಳನ್ನು ಮೀರಿಸಿದೆ. ಆದರೆ ಗ್ಯಾಸೋಲಿನ್ ಮತ್ತು ಡಿಸ್ಟಿಲೇಟ್ಗಳ ಬೇಡಿಕೆ ಸಹ ಕುಸಿದಿದೆ.
ಇದನ್ನೂ ಓದಿ: ರಿಯಾಯಿತಿ ಬೆಲೆಯಲ್ಲಿ ರಷ್ಯಾ ತೈಲ ಮಾರಾಟ ಮಾಡಲು ಕಾರಣವೇನು?
