Business loan: ಉದ್ಯಮಕ್ಕೆ ಕಡಿಮೆ ಬಡ್ಡಿ ದರದಲ್ಲಿ ಸಾಲ ಒದಗಿಸುವ ಟಾಪ್ 10 ಬ್ಯಾಂಕ್ಗಳಿವು
ಉದ್ಯಮದ ಅಗತ್ಯಗಳಿಗೆ ಸಾಲ ಪಡೆಯುವುದು ಹೇಗೆ, ಯಾವ ಬ್ಯಾಂಕ್ ಅಥವಾ ಬ್ಯಾಂಕಿಂಗೇತರ ಸಂಸ್ಥೆ ಕಡಿಮೆ ಬಡ್ಡಿಗೆ ಬಿಜಿನೆಸ್ ಲೋನ್ ನೀಡುತ್ತಿವೆ ಎಂಬುದರ ವಿವರ ಈ ಲೇಖನದಲ್ಲಿ ಇದೆ.
ಉದ್ಯಮಗಳಿಗೆ ಹಣಕಾಸಿನ ಅಗತ್ಯ ಬಾರದೆ ಇರುವುದಕ್ಕೆ ಸಾಧ್ಯವಾ? ಹಲವು ಬ್ಯಾಂಕ್ಗಳು ಯಾವುದೇ ಅಡಮಾನ ಇಟ್ಟುಕೊಳ್ಳದೆ (ಅನ್ಸೆಕ್ಯೂರ್ಡ್) ಸಾಲ ನೀಡುತ್ತಿವೆ. ಹೊಸ ಪ್ರಾಜೆಕ್ಟ್ ಶುರು ಮಾಡುವುದಕ್ಕೆ, ಈಗಿರುವ ಉದ್ಯಮದ ವಿಸ್ತರಣೆಗೆ, ಹೊಸ ಸಲಕರಣೆ- ಸಾಧನಗಳ ಖರೀದಿಗೆ, ಕಚೇರಿ ಸ್ಥಳದ ಅಡ್ವಾನ್ಸ್ ಮತ್ತು ಇತರ ಯಾವುದೇ ಉದ್ದೇಶಕ್ಕೆ ಈ ಸಾಲದ ಹಣವನ್ನು ಬಳಸಿಕೊಳ್ಳಬಹುದು. ಆದರೆ ಸಾಲಕ್ಕೆ ಅರ್ಜಿ ಹಾಕಿಕೊಳ್ಳುವ ಮುನ್ನ ಬಡ್ಡಿ ದರ, ಮರುಪಾವತಿ ಅವಧಿ, ಪ್ರೊಸೆಸಿಂಗ್ ಫೀ ಇತರ ಸಂಗತಿಗಳ ಬಗ್ಗೆ ಸರಿಯಾಗಿ ವಿಚಾರಿಸಿಕೊಳ್ಳಬೇಕು.
ಇನ್ನು ಬ್ಯಾಂಕ್ಗಳಿಂದ ಸಹ ಸಾಲ ಪಡೆಯುವವರ ಅರ್ಹತೆಯನ್ನು ನೋಡಿಯೋ ಹಣ ನೀಡಲಾಗುತ್ತದೆ. ನೀವು ಈಗಿನ್ನೂ ಉದ್ಯಮ ಆರಂಭಿಸಿದ್ದೀರಿ ಎಂದಾದಲ್ಲಿ ಸ್ವಲ್ಪ ಪ್ರಮಾಣದ ಸಾಲ ತೆಗೆದುಕೊಂಡು, ಅದನ್ನು ವಾಪಸ್ ಮಾಡಿ. ಹೀಗೆ ನಿಯಮಿತವಾಗಿ ಮಾಡುವ ಮೂಲಕ ಕ್ರೆಡಿಟ್ ಪ್ರೊಫೈಲ್ ರೂಪಿಸಿಕೊಳ್ಳಿ. ಮುಂದೆ ದೊಡ್ಡ ಪ್ರಮಾಣದಲ್ಲಿ ಸಾಲ ಬೇಕಾದಾಗ ಇದರಿಂದ ಸಹಾಯ ಆಗುತ್ತದೆ.
ನೀವು ಉದ್ಯಮಕ್ಕಾಗಿ ಸಾಲ ಪಡೆಯುವುದಕ್ಕೆ ತೆರಳಿದಾಗ ಮುಖ್ಯವಾಗುವ ಅಂಶಗಳು ಹೀಗಿವೆ: 1. ಕ್ರೆಡಿಟ್ ಸ್ಕೋರ್ 2. ಉದ್ಯಮದಲ್ಲಿ ನಿಮ್ಮ ಅನುಭವ 3. ವಾರ್ಷಿಕ ವಹಿವಾಟು 4. ಯಾವ ರೀತಿಯ ಸಾಲ (ಸೆಕ್ಯೂರ್ಡ್ ಅಥವಾ ಅನ್ಸೆಕ್ಯೂರ್ಡ್) 5. ಬ್ಯಾಂಕ್ನಿಂದ ಸಾಲ ಪಡೆಯುತ್ತಿದ್ದೀರೋ ಅಥವಾ ಬ್ಯಾಂಕಿಂಗೇತರ ಹಣಕಾಸು ಸಂಸ್ಥೆಯೋ?
ಉದ್ಯಮದ ಸಾಲ ಪಡೆಯಲು ಒದಗಿಸಬೇಕಾದ ದಾಖಲೆ ಮತ್ತು ಅರ್ಹತೆಗಳು 1. 25ರಿಂದ 55 ವರ್ಷದೊಳಗಿನವರನ್ನು ಸಾಲ ಪಡೆಯುವುದಕ್ಕೆ ಪರಿಗಣಿಸಲಾಗುತ್ತದೆ 2. ಕಳೆದ 1 ವರ್ಷದ ಆದಾಯ ತೆರಿಗೆ ರಿಟರ್ನ್ಸ್ 3. ಕಳೆದ ಮೂರು ವರ್ಷದ ಲೆಕ್ಕಪರಿಶೋಧನೆಯಾದ ಅಥವಾ ಪ್ರಾವಿಷನಲ್ ಲೆಕ್ಕಪತ್ರ 4. ಕಳೆದ ಆರು ತಿಂಗಳ ಬ್ಯಾಂಕ್ ಸ್ಟೇಟ್ಮೆಂಟ್ 5. ಪ್ರಸಕ್ತ ವರ್ಷದ ಸ್ಥಿತಿಗತಿ ಮತ್ತು ಅಂದಾಜು ವಹಿವಾಟು 6. ಏಕವ್ಯಕ್ತಿ ವ್ಯಾಪಾರಿ ಸಂಸ್ಥೆ ಆಗಿದ್ದಲ್ಲಿ ಆ ಬಗ್ಗೆ ಘೋಷಣಾ ಪತ್ರ ಅಥವಾ ಪಾಲುದಾರ ಸಂಸ್ಥೆಯಾಗಿದ್ದಲ್ಲಿ ಒಪ್ಪಂದ ಪತ್ರ 7. ಮೆಮೊರಂಡಂ ಮತ್ತು ಆರ್ಟಿಕಲ್ಸ್ ಆಫ್ ಅಸೋಸಿಯೇಷನ್ ದೃಢೀಕೃತ ನಕಲು 8. ಕಂಪೆನಿ, ಸಂಸ್ಥೆ ಅಥವಾ ವೈಯಕ್ತಿಕ ಪ್ಯಾನ್ ಕಾರ್ಡ್ 9. ಗುರುತು ದೃಢೀಕರಣ 10. ವಿಳಾಸ ದೃಢೀಕರಣ
ಗಮನಿಸಬೇಕಾದ ಇತರ ಮುಖ್ಯ ಅಂಶಗಳು: 1. ಅಡಮಾನ ಮಾಡಿ ಪಡೆಯುವ ಸೆಕ್ಯೂರ್ಡ್ ಸಾಲಕ್ಕೆ ಬಡ್ಡಿ ದರವು ಸ್ವಲ್ಪ ಕಡಿಮೆ ಇರುತ್ತದೆ. 2. ಯಾವುದೇ ಅಡಮಾನ ಇಲ್ಲದ ಸಾಲಕ್ಕೆ ಅನ್ಸೆಕ್ಯೂರ್ಡ್ ಲೋನ್ ಎನ್ನಲಾಗುತ್ತದೆ. ಇಂಥ ಸನ್ನಿವೇಶದಲ್ಲಿ ಬ್ಯಾಂಕ್ಗಳಿಗೆ ಅಪಾಯ ಜಾಸ್ತಿಯಾದ್ದರಿಂದ ಬಡ್ಡಿ ದರವೂ ಜಾಸ್ತಿ ಇರುತ್ತದೆ. 3. ಉದ್ಯಮದ ಸಾಲಕ್ಕೆ ಪ್ರೊಸೆಸಿಂಗ್ ಶುಲ್ಕ ಶೇಕಡಾ 2ರಿಂದ 6ರ ತನಕ ಮಂಜೂರು ಆಗುವ ಮೊತ್ತವನ್ನು ಅವಲಂಬಿಸುತ್ತದೆ. 4. ಬ್ಯಾಂಕ್ಗಳು ಅಥವಾ ಹಣಕಾಸು ಸಂಸ್ಥೆಗಳು ಕೆಲವು ಕಂಪೆನಿಗಳಿಗೆ ಪ್ರೊಸೆಸಿಂಗ್ ಫೀ ಎಂದು ಒಂದಷ್ಟು ಶುಲ್ಕ ವಿಧಿಸುತ್ತವೆ. 5. ಬಡ್ಡಿ ದರ, ಪ್ರೊಸೆಸಿಂಗ್ ಫೀ, ಅವಧಿಪೂರ್ವ ಪಾವತಿ ಶುಲ್ಕ, ಕಾಗದಪತ್ರಗಳಿಗೆ ಶುಲ್ಕ, ಭಾಗಶಃ ಪಾವತಿಗೆ ಶುಲ್ಕ, ಪಾವತಿಯನ್ನು ತಪ್ಪಿಸಿದಾಗಿನ ಶುಲ್ಕ, ಉದ್ಯಮದ ಸಾಲದ ಮೇಲಿನ ಇತರ ಶುಲ್ಕವನ್ನು ಗಮನಿಸಬೇಕು. 6. ಬ್ಯಾಂಕ್ಗಳು ಉದ್ಯಮಕ್ಕೆ ಅಗತ್ಯ ಇರುವ ಪೂರ್ಣ ಮೊತ್ತವನ್ನು ನೀಡುವುದಿಲ್ಲ. ಶೇಕಡಾ 10ರಿಂದ ಶೇ 30ರ ತನಕ ಹಣವನ್ನು ಇಟ್ಟುಕೊಳ್ಳಬೇಕಾಗುತ್ತದೆ.
ಕಡಿಮೆ ಬಡ್ಡಿ ದರಕ್ಕೆ ಉದ್ಯಮಗಳಿಗೆ ಸಾಲ ಒದಗಿಸುವ ಬ್ಯಾಂಕ್ಗಳ ಪಟ್ಟಿ 1. ಎಸ್ಬಿಐ ಶೇ 11.20- ಶೇ 16.30 (ಎಂಸಿಎಲ್ಆರ್ಗೆ ಜೋಡಣೆಯಾದಂತೆ) 2. ಬ್ಯಾಂಕ್ ಆಫ್ ಮಹಾರಾಷ್ಟ್ರ ಶೇ 14.50 ಮೇಲ್ಪಟ್ಟು 3. ಎಚ್ಡಿಎಫ್ಸಿ ಬ್ಯಾಂಕ್ ಶೇ 15ರಿಂದ ಶೇ 21.35 4. ಆಕ್ಸಿಸ್ ಬ್ಯಾಂಕ್ ಶೇ 15.5 ಮೇಲ್ಪಟ್ಟು 5. ಐಸಿಐಸಿಐ ಬ್ಯಾಂಕ್ ಶೇ 16 ಮೇಲ್ಪಟ್ಟು 6. ಕೊಟಕ್ ಬ್ಯಾಂಕ್ ಶೇ 16 7. ಕಾರ್ಪೊರೇಷನ್ ಬ್ಯಾಂಕ್ ಶೇ 13.55 ಮೇಲ್ಪಟ್ಟು 8. ಧನ್ಲಕ್ಷ್ಮಿ ಬ್ಯಾಂಕ್ ಶೇ 12.90 ಮೇಲ್ಪಟ್ಟು 9. ಆರ್ಬಿಎಲ್ ಬ್ಯಾಂಕ್ ಶೇ 16.25 10. ಇಂಡಸ್ ಇಂಡ್ ಬ್ಯಾಂಕ್ ಶೇ 14
ಇದನ್ನೂ ಓದಿ: Housing loan: ಶೇ 7ರೊಳಗೆ ಇಳಿಯಿತು ಈ ಬ್ಯಾಂಕ್ಗಳ ಗೃಹ ಸಾಲ ಬಡ್ಡಿ ದರ
