ನೆಟ್​ಫ್ಲಿಕ್ಸ್ ವಾರ್ನರ್ ಬ್ರೋಸ್ ಡೀಲ್​ನಿಂದ ಭಾರತೀಯ ಚಿತ್ರೋದ್ಯಮ ಕಂಗಾಲು; ಸಿನಿಮಾ ರಂಗದ ಆತಂಕವೇನು?

ನವದೆಹಲಿ, ಡಿಸೆಂಬರ್ 8: ವಿಶ್ವದ ನಂಬರ್ ಒನ್ ಸ್ಟ್ರೀಮಿಂಗ್ ಕಂಪನಿ ಎನಿಸಿದ ನೆಟ್​ಫ್ಲಿಕ್ಸ್ (Netflix) ಇದೀಗ ಜಾಗತಿಕ ಚಿತ್ರೋದ್ಯಮ ದೈತ್ಯ ವಾರ್ನರ್ ಬ್ರೋಸ್ ಡಿಸ್ಕವರಿಯನ್ನು (Warner Bros. Discovery) 83 ಬಿಲಿಯನ್ ಡಾಲರ್ ಹಣಕ್ಕೆ ಖರೀದಿಸುತ್ತಿರುವುದಾಗಿ ಡೀಲ್ (Netflix Warner Bros deal) ಘೋಷಿಸಿದೆ. ವಾರ್ನರ್ ಬ್ರೋಸ್​ನ ಹಿರಿತೆರೆ ಮತ್ತು ಕಿರುತೆರೆ ಸ್ಟುಡಿಯೋಗಳು ನೆಟ್​ಫ್ಲಿಕ್ಸ್ ತೆಕ್ಕೆಗೆ ಜಾರಲಿವೆ. ಬರೋಬ್ಬರಿ ಏಳೂವರೆ ಲಕ್ಷ ಕೋಟಿ ರೂ ಮೊತ್ತದ ಈ ಡೀಲ್ ಅನ್ನು ಭಾರತೀಯ ಸಿನಿಮಾ ರಂಗ ಕಳವಳದಿಂದ ನೋಡುತ್ತಿದೆ. ಭಾರತದ ಚಿತ್ರಮಂದಿರಗಳ ಒಕ್ಕೂಟಗಳಲ್ಲಿ ಪ್ರಮುಖವಾಗಿರುವ ಮಲ್ಟಿಪ್ಲೆಕ್ಸ್ ಅಸೋಸಿಯೇಶನ್ (MAI- Multiplex Association of India) ಮೊನ್ನೆ ಬಹಿರಂಗವಾಗಿಯೇ ತನ್ನ ದುಗುಡವನ್ನು ಹೊರಹಾಕಿದೆ.

ನೆಟ್​ಫ್ಲಿಕ್ಸ್ ವಾರ್ನರ್ ಬ್ರೋಸ್ ಡೀಲ್​ನಿಂದ ಭಾರತದ ಚಿತ್ರಮಂದಿರಗಳಿಗೆ ಏನು ಹಿನ್ನಡೆ?

ವಾರ್ನರ್ ಬ್ರೋಸ್ ವಿಶ್ವದ ಅತ್ಯಂತ ಪ್ರತಿಷ್ಠಿತ ಫಿಲಂ ಸ್ಟುಡಿಯೋ ಎನಿಸಿದೆ. ಹಾಲಿವುಡ್​ನ ಅದ್ಭುತ ಸಿನಿಮಾಗಳನ್ನು ತೆರೆಗೆ ಕೊಟ್ಟ ಖ್ಯಾತಿ ಅದರದ್ದು. ಹ್ಯಾರಿ ಪಾಟರ್ ಸರಣಿಯ ಸಿನಿಮಾಗಳು, ದಿ ಲಾರ್ಡ್ ಆಫ್ ದಿ ರಿಂಗ್ಸ್, ಬ್ಯಾಟ್​ಮ್ಯಾನ್, ಸೂಪರ್​ಮ್ಯಾನ್ ಇತ್ಯಾದಿ ಸರಣಿಯ ಸಿನಿಮಾಗಳು, ಕೆಸಬ್ಲಾಂಕಾ (Casablanca), ಸಿಟಿಜನ್ ಕೇನ್, ಬಾರ್ಬೀ ಇತ್ಯಾದಿ ಕ್ಲಾಸಿಕ್ ಸಿನಿಮಾಗಳು ವಾರ್ನರ್ ಬ್ರೋಸ್ ಸ್ಟುಡಿಯೋದಿಂದ ನಿರ್ಮಾಣವಾಗಿವೆ.

ಭಾರತೀಯ ಚಿತ್ರರಂಗದಲ್ಲೂ ವಾರ್ನರ್ ಬ್ರೋಸ್ ಛಾಪು ಇದೆ. ಹಲವು ಬಾಲಿವುಡ್ ಸಿನಿಮಾಗಳನ್ನು ಈ ಸ್ಟುಡಿಯೋ ಬಿಡುಗಡೆ ಮಾಡಿದೆ. ವಾರ್ನರ್ ಬ್ರೋಸ್​ನಂತಹ ಬ್ಯಾನರ್ ಅಡಿಯಲ್ಲಿ ನಿರ್ಮಾಣವಾಗುವ ದೊಡ್ಡ ಹಾಲಿವಡ್ ಸಿನಿಮಾಗಳು ಭಾರತದ ಮಲ್ಟಿಪ್ಲೆಕ್ಸ್ ಚಿತ್ರಮಂದಿರಗಳಿಗೆ ಒಳ್ಳೆಯ ಸರಕಾಗಿರುತ್ತವೆ.

ಇದನ್ನೂ ಓದಿ: ಹಾಲಿವುಡ್ ಫೇಮಸ್ ಸ್ಟುಡಿಯೋನ 7.4 ಲಕ್ಷ ಕೋಟಿ ರೂಪಾಯಿಗೆ ಖರೀದಿಸಿದ ನೆಟ್​ಫ್ಲಿಕ್ಸ್

ಭಾರತೀಯ ಮಲ್ಟಿಪ್ಲೆಕ್ಸ್​ಗಳಿಗೆ ಆತಂಕ ಹುಟ್ಟಿರುವುದು ಇಲ್ಲೇ. ನೆಟ್​ಫ್ಲಿಕ್ಸ್ ವಿಶ್ವದ ಅತಿದೊಡ್ಡ ಸ್ಟ್ರೀಮಿಂಗ್ ಪ್ಲಾಟ್​ಫಾರ್ಮ್. ಒಟಿಟಿಯಲ್ಲಿ ಇದು ನಂಬರ್ ಒನ್. ಇದರ ವೆಬ್ ಸೀರೀಸ್​ಗಳು ಸಿನಿಮಾ ಕಂಟೆಂಟ್ ಅನ್ನೇ ಮೀರಿಸುವಂತಿರುತ್ತವೆ. ಸಿನಿಮಾಗಳನ್ನು ನಿರ್ಮಾಣ ಮಾಡಿ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡದೆಯೇ ನೇರವಾಗಿ ಒಟಿಟಿಗೆ ರಿಲೀಸ್ ಮಾಡುವುದುಂಟು. ನೆಟ್​ಫ್ಲಿಕ್ಸ್ ಅನೇಕ ಬಾರಿ ಇದನ್ನು ಹೇಳಿದ್ದಿದೆ. ಸಿನಿಮಾ ಮಾದರಿಯಲ್ಲಿ ತನಗೆ ನಂಬಿಕೆ ಇಲ್ಲ. ಥಿಯೇಟರ್​ನಲ್ಲೇ ಕಂಟೆಂಟ್ ರಿಲೀಸ್ ಮಾಡುವ ಆಸೆ ಇಲ್ಲ ಎಂದು ಬಾರಿ ಬಾರಿ ಹೇಳಿದೆ.

ನೆಟ್​ಫ್ಲಿಕ್ಸ್​ನ ಈ ನಿಲುವೇ ಭಾರತದ ಮಲ್ಟಿಪ್ಲೆಕ್ಸ್​ಗಳನ್ನು ಆತಂಕಕ್ಕೆ ನೂಕಿರುವುದು. ಥಿಯೇಟರ್​ಗಳಿಗೆ ಬೇಕಾಗುವ ಸರಕುಗಳು ವಾರ್ನರ್ ಬ್ರೋಸ್​ನಿಂದ ನಿರ್ಮಾಣ ಆಗುವುದು ನಿಂತು ಹೋದರೆ ತಮ್ಮ ಚಿತ್ರಮಂದಿರಗಳ ಗತಿ ಏನು ಎಂಬುದು ಇವರ ದುಗುಡಕ್ಕೆ ಇರುವ ಕಾರಣ.

ಡೀಲ್​ನಿಂದ ಏನೂ ಬದಲಾಗಲ್ಲ: ನೆಟ್​ಫ್ಲಿಕ್ಸ್ ಸಮಜಾಯಿಷಿ

ವಾರ್ನರ್ ಬ್ರೋಸ್ ಖರೀದಿಸುವ ಡೀಲ್​ನಿಂದ ಯಾವ ಕಾರ್ಯಚಟುವಟಿಕೆ ಬದಲಾಗಲ್ಲ ಎಂದು ನೆಟ್​ಫ್ಲಿಕ್ಸ್ ಸ್ಪಷ್ಟಪಡಿಸಿದೆ. ನೆಟ್​ಫ್ಲಿಕ್ಸ್ ಮತ್ತು ವಾರ್ನರ್ ಬ್ರೋಸ್ ಎರಡೂ ಕೂಡ ಈಗಿರುವ ರೀತಿಯಲ್ಲೇ ಪ್ರತ್ಯೇಕವಾಗಿ ಚಟುವಟಿಕೆ ಮುಂದುವರಿಸುತ್ತವೆ ಎಂದು ನೆಟ್​ಫ್ಲಿಕ್ಸ್ ಹೇಳಿದೆ.

ಇದನ್ನೂ ಓದಿ: ಚಾಟ್​ಜಿಪಿಟಿ ಬಳಸಿ ವಂಚಕನಿಗೇ ಮಂಕುಬೂದಿ ಎರಚಿದ ವ್ಯಕ್ತಿ; ಹೀಗೊಂದು ಮಾದರಿ ಪ್ರಕರಣ

ಈ ಡಿಸೆಂಬರ್​ನೊಳಗೆ ಡೀಲ್ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ. ವಾರ್ನರ್ ಬ್ರೋಸ್​ನ ಫಿಲಂ ಮತ್ತು ಟಿವಿ ಸ್ಟುಡಿಯೋಗಳು ನೆಟ್​ಫ್ಲಿಕ್ಸ್ ಪಾಲಾಗುತ್ತದೆ. ಎಚ್​ಬಿಒದ ಕೇಬಲ್ ನೆಟ್ವರ್ಕ್ ಮತ್ತಿತರ ಕೆಲ ಬ್ಯುಸಿನೆಸ್​ಗಳು ಈ ಡೀಲ್​ನ ಭಾಗವಾಗಿರುವುದಿಲ್ಲ ಎನ್ನಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ