Byju’s Layoff Employees: ವೆಚ್ಚ ಕಡಿತಕ್ಕಾಗಿ ವಿಶ್ವದ ಅತಿ ಹೆಚ್ಚು ಮೌಲ್ಯದ ಎಜುಟೆಕ್ ಕಂಪೆನಿ ಬೈಜೂಸ್ನಿಂದ 2500 ಉದ್ಯೋಗಿಗಳ ವಜಾ
ಬೈಜೂಸ್ನಿಂದ 2500 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯಲಾಗಿದೆ. ವಿಶ್ವದ ಅತ್ಯಂತ ಮೌಲ್ಯಯುತ ಎಜುಟೆಕ್ ಕಂಪೆನಿ ಇದು. ಇಂಥದ್ದೊಂದು ಬೆಳವಣಿಗೆ ಆಗುತ್ತಿರುವ ಕಾರಣ ಏನು ಎಂಬ ಮಾಹಿತಿ ಇಲ್ಲಿದೆ.
Updated on:Jun 30, 2022 | 12:35 PM
ವಿಶ್ವದ ಅತಿ ಹೆಚ್ಚು ಮೌಲ್ಯದ ಎಜುಟೆಕ್ ಕಂಪೆನಿಯಾದ ಬೈಜೂಸ್ನಲ್ಲಿ (Byju’s) ಎಲ್ಲವೂ ಸರಿ ಇಲ್ಲ ಎಂಬಂತೆ ಕಾಣುತ್ತಿದೆ. ಇದೀಗ ಕಂಪೆನಿಯು 2500 ಉದ್ಯೋಗಿಗಳನ್ನು ತನ್ನ ಸಮೂಹ ಕಂಪೆನಿಗಳಿಂದ ವಜಾ ಮಾಡಿದೆ. ಸದ್ಯಕ್ಕೆ ಈ ಕಂಪೆನಿಯ ಮೌಲ್ಯ 2200 ಕೋಟಿ ಅಮೆರಿಕನ್ ಡಾಲರ್. ಬೈಜೂ ರವೀಂದ್ರನ್ ನೇತೃತ್ವದ ಈ ಯುನಿಕಾರ್ನ್ ಆಕ್ರಮಣಕಾರಿಯಾಗಿ ವೆಚ್ಚ ಕಡಿತದ ಹಾದಿಯಲ್ಲಿದೆ. ಸತತ ಎರಡು ವರ್ಷ- ಕೊರೊನಾ ಕಾಲದಲ್ಲಿ ಹುಚ್ಚಾಪಟ್ಟೆ ಬೇಡಿಕೆ ಪಡೆದಿದ್ದ ಎಜುಟೆಕ್ ಕಂಪೆನಿಗಳಿಗೆ ಈಗ ಬೇಡಿಕೆ ಕಡಿಮೆ ಆಗುತ್ತಾ ಬರುತ್ತಿರುವುದು ಸಮಸ್ಯೆಯಾಗಿ ಪರಿಣಮಿಸಿದೆ. ಬೈಜೂಸ್ನಿಂದ ಪೂರ್ಣಾವಧಿ, ಗುತ್ತಿಗೆ ಉದ್ಯೋಗಿಗಳನ್ನು ವಜಾ ಮಾಡಲಾಗಿದೆ. ಅದರಲ್ಲಿ ಟಾಪರ್, ವೈಟ್ಹ್ಯಾಟ್ ಜೂನಿಯರ್ನಲ್ಲಿಯ ಸಿಬ್ಬಂದಿಯೂ ಸೇರಿದ್ದಾರೆ.
ಅಲ್ಲಿನ ಕೋರ್ ಟೀಮ್ ಮಾರಾಟ ಮತ್ತು ಮಾರ್ಕೆಟಿಂಗ್, ಆಪರೇಷನ್ಸ್, ಕಂಟೆಂಟ್ ಮತ್ತು ಡಿಸೈನ್ ಟೀಮ್ನಿಂದ ಉದ್ಯೋಗಿಗಳನ್ನು ವಜಾ ಮಾಡಿರುವುದಾಗಿ ಮೂಲಗಳು ತಿಳಿಸಿವೆ ಎಂದು ತನ್ನ ಎಕ್ಸ್ಕ್ಲೂಸಿವ್ ವರದಿಯಲ್ಲಿ ಮನಿಕಂಟ್ರೋಲ್ ತಿಳಿಸಿದೆ. ಜೂನ್ 27 ಮತ್ತು 28ರಂದು ಟಾಪರ್ ಮತ್ತು ವೈಟ್ಹ್ಯಾಟ್ ಜೂನಿಯರ್ನಿಂದ 1500 ಸಿಬ್ಬಂದಿಯನ್ನು ವಜಾ ಮಾಡಲಾಗಿದೆ. ಹತ್ತಿರ ಹತ್ತಿರ 1000 ಮಂದಿಗೆ ಇ-ಮೇಲ್ ಕಳುಹಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಕಂಟೆಂಟ್ ಮತ್ತು ಡಿಸೈನ್ ತಂಡದ ಉದ್ಯೋಗಿಗಳ ಮೇಲೆ ಈ ಕ್ರಮದಿಂದ ಹೆಚ್ಚಿನ ಪರಿಣಾಮ ಆಗಿದೆ ಎಂದು ತಿಳಿದುಬಂದಿದೆ. ಟಾಪರ್ ಒಂದರಿಂದಲೇ 1200 ಮಂದಿ ಉದ್ಯೋಗಗಳನ್ನು ಕೆಲಸದಿಂದ ತೆಗೆಯಲಾಗಿದೆ. 300ರಿಂದ 350 ಕಾಯಂ ಉದ್ಯೋಗಿಗಳನ್ನು ಟಾಪರ್ನಿಂದ ವಜಾ ಮಾಡಲಾಗಿದೆ. ಮತ್ತೆ 300 ಸಿಬ್ಬಂದಿಗೆ ರಾಜೀನಾಮೆ ನೀಡುವಂತೆ ಕೇಳಲಾಗಿದೆ. ಮತ್ತು ಹಾಗೊಂದು ವೇಳೆ ಮಾಡದಿದ್ದರೆ ಒಂದು- ಒಂದೂವರೆ ತಿಂಗಳಿಗೆ ಸಂಬಳ ಬರುವುದಿಲ್ಲ ಎಂದು ತಿಳಿಸಿರುವುದಾಗಿ ಕೇಳಿಬಂದಿದೆ. ಇನ್ನು 600 ಗುತ್ತಿಗೆ ಸಿಬ್ಬಂದಿಯನ್ನು ವಜಾ ಮಾಡಲಾಗಿದ್ದು, ಇವರ ಅವಧಿ ಈ ವರ್ಷದ ಅಕ್ಟೋಬರ್ ಅಥವಾ ನವೆಂಬರ್ನಲ್ಲಿ ಪೂರ್ಣಗೊಳ್ಳಬೇಕಿತ್ತು.
ಈ ವರ್ಷದ ಶುರುವಿನಲ್ಲಿ ಬೈಜೂಸ್ 22 ಬಿಲಿಯನ್ ಯುಎಸ್ಡಿ ಮೌಲ್ಯದಲ್ಲಿ 800 ಮಿಲಿಯನ್ ಡಾಲರ್ ಸಂಗ್ರಹಿಸಿತ್ತು. ಜತೆಗೆ ವಿದೇಶದಿಂದ 100 ಕೋಟಿ ಅಮೆರಿಕನ್ ಡಾಲರ್ ಹಣ ಸಾಲವಾಗಿ ಪಡೆಯುವ ಬಗ್ಗೆ ಮಾತುಕತೆ ನಡೆಸಿತ್ತು. ಮಾಧ್ಯಮ ವರದಿ ಪ್ರಕಾರ, ಮೃಣಾಲ್ ಮೋಹಿತ್ ಅವರು ಚೀಫ್ ಆಪರೇಟಿಂಗ್ ಆಫೀಸರ್ ಆಗಿ ಪದೋನ್ನತಿ ಪಡೆಯಬಹುದು. ಈ ಮಧ್ಯೆ ಕಂಪೆನಿಯ ಸಂಸ್ಥಾಪಕರು ರವೀಂದ್ರನ್ ಅವರು ಬೈಜೂಸ್ ಕಂಪೆನಿಯ ಜಾಗತಿಕ ಆಪರೇಷನ್ಸ್ ನೋಡಿಕೊಳ್ಳಲಿದ್ದಾರೆ.
ಇನ್ನು ಆಕಾಶ್ ಎಜುಕೇಷನಲ್ ಸರ್ವೀಸಸ್ ಷೇರುದಾರರಿಗೆ ಮಿಲಿಯನ್ಗಟ್ಟಲೆ ಡಾಲರ್ ಪಾವತಿಸಬೇಕಿದೆ. ಆಕಾಶ್ ಅನ್ನು ಬೈಜೂಸ್ನಿಂದ 2021ರಿಂದ 100 ಕೋಟಿ ಡಾಲರ್ಗೆ ಸ್ವಾಧೀನ ಮಾಡಿಕೊಂಡಿತ್ತು.
ಇದನ್ನೂ ಓದಿ: Unacademy: ವೆಚ್ಚ ಕಡಿತಕ್ಕಾಗಿ 600 ಉದ್ಯೋಗಿಗಳನ್ನು ವಜಾ ಮಾಡಿದ ಎಜುಟೆಕ್ ಕಂಪನಿ ಅನ್ಅಕಾಡೆಮಿ
Published On - 12:34 pm, Thu, 30 June 22
