Rejection: ಆಸ್ಟ್ರೇಲಿಯಾ ಯೂನಿವರ್ಸಿಟಿಗಳಲ್ಲಿ ಭಾರತದ ಈ 5 ರಾಜ್ಯಗಳ ವಿದ್ಯಾರ್ಥಿಗಳಿಗೆ ಪ್ರವೇಶ ಇಲ್ಲವಾ? ಏನು ಕಾರಣ?
Students Of 5 Indian States Not Allowed In Australia: ಇತ್ತೀಚಿನ ವರ್ಷಗಳಿಂದ ಆಸ್ಟ್ರೇಲಿಯನ್ ಯೂನಿವರ್ಸಿಟಿಗಳು ಭಾರತೀಯ ವಿದ್ಯಾರ್ಥಿಗಳ ಅರ್ಜಿಗಳನ್ನು ಅವಲೋಕಿಸಿ ಫಿಲ್ಟರ್ ಮಾಡುತ್ತಿವೆ. ಕೆಲ ನಿರ್ದಿಷ್ಟ ರಾಜ್ಯಗಳ ವಿದ್ಯಾರ್ಥಿಗಳಿಗೆ ಪ್ರವೇಶ ಕೊಡದಿರಲು ನಿರ್ಧರಿಸುತ್ತಿವೆ ಎಂಬಂತಹ ಸುದ್ದಿ ದಟ್ಟವಾಗಿ ಕೇಳಿಬರುತ್ತಿದೆ.
Updated on: Jun 06, 2023 | 5:37 PM
ನವದೆಹಲಿ: ವಿದೇಶಗಳಲ್ಲಿ ಉನ್ನತ ವ್ಯಾಸಂಗ (Higher Education) ಮಾಡಬಯಸುವ ಭಾರತೀಯರ ಮನಸಿಗೆ ಬರುವ ಮೊದಲ ಹೆಸರುಗಳಲ್ಲಿ ಅಮೆರಿಕ, ಬ್ರಿಟನ್ ಮತ್ತು ಆಸ್ಟ್ರೇಲಿಯಾ ಇರುತ್ತವೆ. ಇಲ್ಲಿ ಸುಲಭವಾಗಿ ಅಡ್ಮಿಶನ್ ಸಿಗುತ್ತದೆ ಎಂಬುದು ಹಾಗೂ ಭಾರತೀಯ ಸುಮುದಾಯದವರು ಬಹಳ ಮಂದಿ ಇಲ್ಲಿದ್ದಾರೆ ಎಂಬುದು ಭಾರತೀಯ ವಿದ್ಯಾರ್ಥಿಗಳ ಸಹಜ ಆಯ್ಕೆಗಳಲ್ಲಿ ಆಸ್ಟ್ರೇಲಿಯಾ ಇರುತ್ತದೆ. ಆದರೆ, ಇತ್ತೀಚಿನ ವರ್ಷಗಳಿಂದ ಅಲ್ಲಿನ ಯೂನಿವರ್ಸಿಟಿಗಳು ಭಾರತೀಯ ವಿದ್ಯಾರ್ಥಿಗಳ ಅರ್ಜಿಗಳನ್ನು ಅವಲೋಕಿಸಿ ಫಿಲ್ಟರ್ ಮಾಡುತ್ತಿವೆ. ಕೆಲ ನಿರ್ದಿಷ್ಟ ರಾಜ್ಯಗಳ ವಿದ್ಯಾರ್ಥಿಗಳಿಗೆ ಪ್ರವೇಶ ಕೊಡದಿರಲು ನಿರ್ಧರಿಸುತ್ತಿವೆ ಎಂಬಂತಹ ಸುದ್ದಿ ದಟ್ಟವಾಗಿ ಕೇಳಿಬರುತ್ತಿದೆ. ಎಲ್ಲ ಯೂನಿವರ್ಸಿಟಿಗಳು ಅಲ್ಲವಾದರೂ ಅನೇಕ ವಿವಿಗಳು ಇಂಥ ಕ್ರಮ ಅನುಸರಿಸುತ್ತಿರುವುದು ತಿಳಿದುಬಂದಿದೆ.
ಮೂಲಗಳ ಪ್ರಕಾರ ಭಾರತದ ಐದು ರಾಜ್ಯಗಳ ವಿದ್ಯಾರ್ಥಿಗಳ ಅರ್ಜಿಗಳನ್ನು ಯಾವುದೇ ಪರಿಶೀಲನೆ ಇಲ್ಲದೇ ಕಣ್ಮುಚ್ಚಿ ತಿರಸ್ಕರಿಸಲಾಗುತ್ತಿದೆಯಂತೆ. ಪಂಜಾಬ್, ಹರ್ಯಾಣ, ಉತ್ತರಪ್ರದೇಶ, ಉತ್ತರಾಖಂಡ್ ಮತ್ತು ಗುಜರಾತ್, ಈ ಐದು ರಾಜ್ಯಗಳಾಗಿವೆ. ಇದರ ಜೊತೆಗೆ ಜಮ್ಮು ಮತ್ತು ಕಾಶ್ಮೀರದ ಕೆಲ ಪ್ರದೇಶಗಳೂ ಪಟ್ಟಿಯಲ್ಲಿವೆ. ಇಲ್ಲಿಂದ ಬರುವ ವಿದ್ಯಾರ್ಥಿಗಳು ನಕಲಿ ದಾಖಲೆಗಳನ್ನು ಹೊಂದಿರುತ್ತಾರೆ ಎಂದು ಆಸ್ಟ್ರೇಲಿಯನ್ ಯೂನಿವರ್ಸಿಟಿಗಳು ಸಾಮಾನ್ಯೀಕರಿಸುತ್ತಿವೆ. ಇದಕ್ಕೆ ಇಂಬು ಕೊಡುವಂತೆ ಈ ರಾಜ್ಯಗಳಿಂದ ಬರುವ ವಿದ್ಯಾರ್ಥಿಗಳಿಂದಲೇ ಹೆಚ್ಚಿನ ವಂಚನೆಗಳಾಗುತ್ತಿವೆ. ಓದು ಪೂರ್ಣಗೊಳ್ಳುವ ಮುನ್ನವೇ ಕೋರ್ಸ್ನಿಂದ ಡ್ರಾಪ್ ಔಟ್ ಆಗುವ ಸಂಖ್ಯೆ ಹೆಚ್ಚಿದೆಯಂತೆ. ಅದರಲ್ಲೂ ಪಂಜಾಬ್ ಮತ್ತು ಹರ್ಯಾಣ ರಾಜ್ಯದ ವಿದ್ಯಾರ್ಥಿಗಳನ್ನು ನೊಟೋರಿಯಸ್ ಎಂಬಂತೆ ಕಾಣಲಾಗುತ್ತಿದೆ.
ಇದನ್ನೂ ಓದಿ: NIRF Ranking 2023: ಭಾರತದಲ್ಲಿನ ಉನ್ನತ 50 ಎಂಜಿನಿಯರಿಂಗ್ ಸಂಸ್ಥೆಗಳು
ಆಸ್ಟ್ರೇಲಿಯಾದ ಗೃಹ ಇಲಾಖೆ ಪ್ರಕಾರ ಆಸ್ಟ್ರೇಲಿಯಾಗೆ ಬರುವ ನಾಲ್ವರು ವಿದ್ಯಾರ್ಥಿಗಳಲ್ಲಿ ಒಬ್ಬರು ನಕಲಿ ದಾಖಲೆ ಮತ್ತು ಕಾಲೇಜು ಅರ್ಜಿಗಳನ್ನು ಹೊಂದಿರುತ್ತಾರೆ. ಇದೇ ಕಾರಣಕ್ಕೆ ಶೇ. 24ರಷ್ಟು ಭಾರತೀಯರ ಅರ್ಜಿಗಳು ತಿರಸ್ಕೃತವಾಗುತ್ತಿವೆ ಎಂದು ಹೇಳಲಾಗುತ್ತಿದೆ.
ಭಾರತೀಯ ವಿದ್ಯಾರ್ಥಿಗಳೇಕೆ ನಕಲಿ ದಾಖಲಾತಿ ಕೊಡುತ್ತಿದ್ದಾರೆ?
ಆಸ್ಟ್ರೇಲಿಯಾದಲ್ಲಿ ವ್ಯಾಸಂಗ ಮಾಡಬೇಕೆನ್ನುವ ಅಸಕ್ತಿ ಇರುವ ಭಾರತೀಯರು ತಮಗೆ ತಿಳಿದೋ, ತಿಳಿಯದೆಯೋ ಅಕ್ರಮ ಹಾದಿ ಮೂಲಕ ಅದನ್ನು ಸಾಧಿಸಲು ಯತ್ನಿಸುತ್ತಾರೆ. ವಿಶ್ವಸನೀಯವಲ್ಲದ ಏಜೆಂಟ್ಗಳ ಸಲಹೆ ಪಡೆದು ಇಂಥ ನಕಲಿ ದಾಖಲೆಗಳೊಂದಿಗೆ ಯೂನಿವರ್ಸಿಟಿಗಳಲ್ಲಿ ಅರ್ಜಿ ಸಲ್ಲಿಸುವುದುಂಟು. ಇದು ಆಸ್ಟ್ರೇಲಿಯನ್ ಯೂನಿವರ್ಸಿಟಿಗಳು ನೀಡುವ ಕಾರಣ.
ಇದನ್ನೂ ಓದಿ: ಜೂನ್‌ ತಿಂಗಳಿಂದ ಆಗಸ್ಟ್‌ವರೆಗೆ ಈ 3 ವಿದ್ಯಾರ್ಥಿವೇತನ ಮತ್ತು ಫೆಲೋಶಿಪ್ಗೆ ಅರ್ಜಿ ಸಲ್ಲಿಸಲು ಅವಕಾಶ
ಇಲ್ಲಿ ಭಾರತದ ಕೆಲ ರಾಜ್ಯಗಳ ವಿದ್ಯಾರ್ಥಿಗಳನ್ನು ಆಸ್ಟ್ರೇಲಿಯಾ ಸರ್ಕಾರ ನಿಷೇಧ ಮಾಡಿಲ್ಲ ಎಂಬುದು ಗಮನಿಸಬೇಕಾದ ಸಂಗತಿ. ಅಲ್ಲಿಯ ಯೂನಿವರ್ಸಿಟಿಗಳಷ್ಟೇ ಈ ನೀತಿ ಅನುಸರಿಸುತ್ತಿರುವುದು. ಈ ವಿಚಾರದಲ್ಲಿ ಯೂನಿವರ್ಸಿಟಿಗಳಿಗೆ ಆ ಸ್ವಾತಂತ್ರ್ಯವಂತೂ ಇದ್ದೇ ಇದೆ ಎನ್ನುವ ಅಭಿಪ್ರಾಯ ಇದೆ.
ಇನ್ನಷ್ಟು ಶಿಕ್ಷಣ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
