ರುದ್ರನಾಗಿ ಡಿಜಿಟಲ್ ಲೋಕಕ್ಕೆ ಕಾಲಿಟ್ಟ ಅಜಯ್ ದೇವಗನ್; ಇದು ಯಾವುದರ ರಿಮೇಕ್?

ವೆಬ್​ ಸಿರೀಸ್​ ಲೋಕ ದಿನದಿಂದ ದಿನಕ್ಕೆ ದೊಡ್ಡದಾಗುತ್ತಿದೆ. ಓಟಿಟಿ ಪ್ಲಾಟ್​ಫಾರ್ಮ್​ಗಳಲ್ಲಿ ಹಲವಾರು ಬಗೆಯ ವೆಬ್​ ಸರಣಿಗಳು ಮೂಡಿಬರುತ್ತಿವೆ. ಅನೇಕ ಸ್ಟಾರ್​ ಕಲಾವಿದರು ಇವುಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ಇಷ್ಟು ದಿನ ಬರೀ ಸಿನಿಮಾಗಳನ್ನೇ ನಂಬಿಕೊಂಡಿದ್ದ ದೊಡ್ಡ ದೊಡ್ಡ ನಟ-ನಟಿಯರಿಗೆ ಈಗ ವೆಬ್​ ಸಿರೀಸ್​ ಲೋಕ ಕೈ ಬೀಸಿ ಕರೆಯುತ್ತಿದೆ. ಬಾಲಿವುಡ್​ನ ಸ್ಟಾರ್​ ನಟ ಅಜಯ್​ ದೇವಗನ್​ ಅವರು ಇದೇ ಮೊದಲ ಬಾರಿಗೆ ಡಿಜಿಟಲ್​ ದುನಿಯಾಗೆ ಎಂಟ್ರಿ ನೀಡುತ್ತಿದ್ದಾರೆ.

ಮುಂಚೂಣಿ ಓಟಿಟಿ ಪ್ಲಾಟ್​ಫಾರ್ಮ್​ಗಳಲ್ಲಿ ಒಂದಾಗಿರುವ ಡಿಸ್ನಿ ಪ್ಲಸ್​ ಹಾಟ್​ಸ್ಟಾರ್​​ನಲ್ಲಿ ಹೊಸದೊಂದು ವೆಬ್​ ಸಿರೀಸ್​ ಘೋಷಣೆ ಮಾಡಲಾಗಿದೆ. ಅದಕ್ಕೆ ‘ರುದ್ರ’ ಎಂದು ಹೆಸರಿಡಲಾಗಿದೆ. ದಿ ಎಡ್ಜ್​ ಆಫ್​ ಡಾರ್ಕ್​ನೆಸ್​ ಎಂಬುದು ಇದರ ಟ್ಯಾಗ್​​ ಲೈನ್​. ಈ ವೆಬ್​ ಸಿರೀಸ್​ನಲ್ಲಿ ಅಜಯ್​ ದೇವಗನ್​ ಮುಖ್ಯಭೂಮಿಕೆ ನಿಭಾಯಿಸಲಿದ್ದಾರೆ. ಟೈಟಲ್​ ಜೊತೆಗೆ ಅಜಯ್​ ದೇವಗನ್​ ಅವರ ಫಸ್ಟ್​ಲುಕ್​ ಪೋಸ್ಟರ್​ ಕೂಡ ಬಿಡುಗಡೆ ಮಾಡಲಾಗಿದೆ.

ಇದೇ ಮೊದಲ ಬಾರಿಗೆ ವೆಬ್​ ಸಿರೀಸ್​ನಲ್ಲಿ ನಟಿಸುತ್ತಿರುವುದಕ್ಕೆ ಅಜಯ್​ ದೇವಗನ್​ ಸಿಕ್ಕಾಪಟ್ಟೆ ಉತ್ಸುಕರಾಗಿದ್ದಾರೆ. ಈ ಬಗ್ಗೆ ಅವರು ಸೋಶಿಯಲ್ ಮೀಡಿಯಾದಲ್ಲಿ ಅಭಿಮಾನಿಗಳಿಗೆ ಮಾಹಿತಿ ನೀಡಿದ್ದಾರೆ. ‘ಯಾವಾಗಲೂ ವಿಶೇಷವಾದ ಕಥೆಗಳನ್ನು ಹೇಳಬೇಕು ಮತ್ತು ಪ್ರತಿಭಾವಂತರ ಜೊತೆ ಕೆಲಸ ಮಾಡಬೇಕು ಎಂಬುದೇ ನನ್ನ ಪ್ರಯತ್ನ ಆಗಿರುತ್ತದೆ. ಈ ವೆಬ್​ ಸಿರೀಸ್​ ಮೂಲಕ ಭಾರತದಲ್ಲಿ ಮನರಂಜನೆಯನ್ನು ಇನ್ನೊಂದು ಮಟ್ಟಕ್ಕೆ ಕೊಂಡೊಯ್ಯುವ ಆಲೋಚನೆ ಇದೆ’ ಎಂದು ಅಜಯ್​ ದೇವಗನ್​ ಹೇಳಿದ್ದಾರೆ.

ಅಂದಹಾಗೆ, ಇದು ಬ್ರಿಟಿಷ್​ ವೆಬ್​ ಸಿರೀಸ್​ ‘ಲೂಥರ್​’ನ ಹಿಂದಿ ರಿಮೇಕ್​ ಆಗಿರಲಿದೆ. ಇದರಲ್ಲಿ ಅಜಯ್​ ದೇವಗನ್​ ಪೊಲೀಸ್ ಅಧಿಕಾರಿ​ ಪಾತ್ರ ಮಾಡಲಿದ್ದಾರೆ. ರಾಜೇಶ್​ ಮಪುಸ್ಕರ್​ ನಿರ್ದೇಶನ ಮಾಡಲಿದ್ದಾರೆ. ಅಪ್ಲಾಸ್​ ಎಂಟರ್​ಟೇನ್​ಮೆಂಟ್​ ಮತ್ತು ಬಿಬಿಸಿ ಸ್ಟುಡಿಯೂ ಇಂಡಿಯಾ ಜೊತೆಯಾಗಿ ಇದನ್ನು ನಿರ್ಮಾಣ ಮಾಡಲಿವೆ. ಅಜಯ್​ ದೇವಗನ್​ ಜೊತೆಯಲ್ಲಿ ಇನ್ನೂ ಯಾರೆಲ್ಲ ನಟಿಸಲಿದ್ದಾರೆ ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ. ಮುಂಬೈನಲ್ಲಿ ಇದರ ಶೂಟಿಂಗ್​ ನಡೆಯಲಿದೆ.

‘ಬೇಗ ಶೂಟಿಂಗ್​ ಶುರುವಾಗಲಿ ಎಂದು ನಾನು ಕಾಯುತ್ತಿದ್ದೇನೆ. ಪೊಲೀಸ್​ ಪಾತ್ರ ಮಾಡುವುದು ನನಗೆ ಹೊಸದೇನೂ ಅಲ್ಲ. ಆದರೆ ಈ ಬಾರಿ ನಾನು ಮಾಡುತ್ತಿರುವ ಪಾತ್ರ ಹೆಚ್ಚು ತೀಕ್ಷ್ಣ, ಕಠಿಣ ಮತ್ತು ಗಾಢವಾಗಿದೆ’ ಎಂದು ತಮ್ಮ ಪಾತ್ರದ ಬಗ್ಗೆ ಅಜಯ್​ ದೇವಗನ್​ ಬರೆದುಕೊಂಡಿದ್ದಾರೆ. ಕೆಲವೇ ದಿನಗಳ ಹಿಂದೆ ಅಜಯ್​ ದೇವಗನ್​ ನಿರ್ಮಾಪಕನಾಗಿ ಓಟಿಟಿಗೆ ಕಾಲಿಟ್ಟಿದ್ದರು. ಅವರು ನಿರ್ಮಾಣ ಮಾಡಿದ ‘ದಿ ಬಿಗ್​ ಬುಲ್​’ ಸಿನಿಮಾ ಕೂಡ ಡಿಸ್ನಿ ಪ್ಲಸ್​ ಹಾಟ್​ಸ್ಟಾರ್​ನಲ್ಲಿ ಬಿಡುಗಡೆ ಆಗಿತ್ತು.

ಇದನ್ನೂ ಓದಿ: ಕುಡಿದ ಮತ್ತಿನಲ್ಲಿ ಜಗಳ ಮಾಡಿ ಹೊಡೆತ ತಿಂದ್ರಾ ಅಜಯ್​ ದೇವಗನ್​? ವಿಡಿಯೋ ವೈರಲ್​!