ಸಲ್ಮಾನ್ ಖಾನ್ ಒಬ್ಬ ಸುಳ್ಳುಗಾರ: ಬಾಲಿವುಡ್ ಹಿರಿಯ ನಟ

ಸಲ್ಮಾನ್ ಖಾನ್ (Salman Khan) ಬಾಲಿವುಡ್​ನಲ್ಲಿ ಗೆಳೆಯರನ್ನು ಹೊಂದಿರುವಷ್ಟೆ ವಿರೋಧಿಗಳನ್ನು ಸಹ ಹೊಂದಿದ್ದಾರೆ. ಸಲ್ಮಾನ್ ಖಾನ್ ಬಗ್ಗೆ ಆಗಾಗ್ಗೆ ಒಬ್ಬರಲ್ಲ ಒಬ್ಬರು ಋಣಾತ್ಮಕವಾಗಿ ಮಾತನಾಡುತ್ತಲೇ ಇರುತ್ತಾರೆ. ಇದೀಗ ಬಾಲಿವುಡ್​ನ ಮಾಜಿ ನಾಯಕ ನಟರೊಬ್ಬರು, ಸಲ್ಮಾನ್ ಖಾನ್ ಒಬ್ಬ ಸುಳ್ಳುಗಾರ ಎಂದು ಕರೆದಿದ್ದಾರೆ. ‘ಕುಚ್​ ಕುಚ್ ಹೋತಾ ಹೈ’ ಸಿನಿಮಾದ ಬಗ್ಗೆ ಮಾತನಾಡುತ್ತಾ ಸಲ್ಮಾನ್ ಖಾನ್ ಹೇಳಿದ ಮಾತುಗಳ ಬಗ್ಗೆ ಆ ಹಿರಿಯ ನಟ ಆಕ್ಷೇಪ ಎತ್ತಿದ್ದಾರೆ.

‘ಕುಚ್​ ಕುಚ್ ಹೋತಾ ಹೈ’ ಸಿನಿಮಾ ಬಿಡುಗಡೆ ಆಗಿ 25 ವರ್ಷಗಳಾಗಿವೆ. ಸಿನಿಮಾದಲ್ಲಿ ಸಲ್ಮಾನ್ ಖಾನ್ ಸಹ ನಟಿಸಿದ್ದು, ಸಿನಿಮಾ ಬಗ್ಗೆ ಸಲ್ಮಾನ್ ಖಾನ್ ಈ ಹಿಂದೆ ಕಾಫಿ ವಿತ್ ಕರಣ್ ಶೋನಲ್ಲಿ ಆಡಿದ್ದ ಮಾತುಗಳು ಇದೀಗ ಮತ್ತೆ ವೈರಲ್ ಆಗಿವೆ. ಅಂದು ಸಲ್ಮಾನ್ ಖಾನ್ ಆಡಿದ್ದ ಮಾತುಗಳ ಬಗ್ಗೆ ಬಾಲಿವುಡ್​ನ ಮಾಜಿ ನಾಯಕ ನಟ ಚಂದ್ರಚೂರ್ ಸಿಂಗ್ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಮಾತ್ರವಲ್ಲದೆ ಸಲ್ಮಾನ್ ಖಾನ್ ಒಬ್ಬ ಸುಳ್ಳುಗಾರ ಎಂದಿದ್ದಾರೆ.

ಕಾಫಿ ವಿತ್ ಕರಣ್​ನಲ್ಲಿ ಈ ಹಿಂದೆ ಮಾತನಾಡಿದ್ದ ಸಲ್ಮಾನ್ ಖಾನ್, ”ಕುಚ್​ ಕುಚ್ ಹೋತಾ ಹೈ ಸಿನಿಮಾದ ಅಮನ್ ಪಾತ್ರವನ್ನು ಯಾರೂ ಮಾಡಲು ತಯಾರಿರಲಿಲ್ಲ, ಕೆಲವರನ್ನು ಕೇಳಿ ಇಲ್ಲ ಅನಿಸಿಕೊಂಡ ಬಳಿಕ ನನ್ನ ಬಳಿ ನೀನು (ಕರಣ್ ಜೋಹರ್) ಬಂದೆ. ಸೈಫ್ ಅನ್ನು ಕೇಳಿದ್ದೆ, ಚಂದ್ರಚೂಡ್ ಸಿಂಗ್ ಅನ್ನು ಕೇಳಿದ್ದೆ. ಅವರಿಬ್ಬರೂ ಆ ಸಮಯದಲ್ಲಿ ಯಾವ ಸಿನಿಮಾ ಮಾಡದಿದ್ದರೂ ಸಹ ನಿನ್ನ (ಕರಣ್) ಸಿನಿಮಾದಲ್ಲಿ ನಟಿಸಲು ಒಪ್ಪಿರಲಿಲ್ಲ. ಆದರೆ ಕರಣ್ ಪ್ರತಿಭೆಯ ಬಗ್ಗೆ ನನಗೆ ನಂಬಿಕೆ ಇತ್ತು ಹಾಗಾಗಿ ಅಮನ್ ಪಾತ್ರದಲ್ಲಿ ನಟಿಸಲು ಒಪ್ಪಿಕೊಂಡೆ” ಎಂದಿದ್ದಾರೆ ಸಲ್ಮಾನ್ ಖಾನ್.

ಇದನ್ನೂ ಓದಿ:ಸಲ್ಮಾನ್ ಖಾನ್​ಗೆ ಹೆದರಿದ್ರಾ ಕಂಗನಾ? ‘ಎಮರ್ಜೆನ್ಸಿ’ ಸಿನಿಮಾ ರಿಲೀಸ್ ದಿನಾಂಕ ಮುಂದಕ್ಕೆ

ಸಲ್ಮಾನ್​ ಖಾನ್​ರ ಈ ಮಾತುಗಳನ್ನು ಖಂಡಿಸಿರುವ ಚಂದ್ರಚೂಡ್ ಸಿಂಗ್ ಆತ ಒಬ್ಬ ಸುಳ್ಳುಗಾರ ಎಂದಿದ್ದಾರೆ. ರೆಡಿಟ್ ಸಾಮಾಜಿಕ ಜಾಲತಾಣದಲ್ಲಿ ‘ಸಲ್ಮಾನ್ ಖಾನ್ ಒಬ್ಬ ಸುಳ್ಳುಗಾರ’ ಎಂದು ಚಂದ್ರಚೂಡ್ ಸಿಂಗ್ ಬರೆದಿದ್ದಾರೆ. ಬಳಿಕ ಬಳೆಕಾರರೊಬ್ಬರ ಕಮೆಂಟ್​ಗೆ ಪ್ರತಿಕ್ರಿಯೆ ನೀಡಿ, ”ನನ್ನ ಬಳಿ ‘ಜೋಶ್’, ‘ದಾಗ್; ದಿ ಫೈರ್’, ‘ಕ್ಯಾ ಕೆಹನಾ’, ‘ಸಿಲ್​ ಸಿಲಾ ಹೈ ಪ್ಯಾರ್ ಕಾ’ ಇನ್ನೂ ಕೆಲವು ಸಿನಿಮಾಗಳು ಇದ್ದವು. ‘ಕುಚ್ ಕುಚ್ ಹೋತಾ ಹೈ’ ಸಿನಿಮಾದಲ್ಲಿ ನಟಿಸಲು ಇಷ್ಟವಿಲ್ಲದೆ ಬಿಟ್ಟೆ” ಎಂದಿದ್ದಾರೆ. ಆ ಮೂಲಕ ತಮ್ಮ ಬಳಿ ಆ ಸಮಯದಲ್ಲಿ ಸಿನಿಮಾಗಳು ಇರಲಿಲ್ಲ ಎಂಬುದು ಸುಳ್ಳು ಎಂದಿದ್ದಾರೆ.

ಸೈಫ್ ಅಲಿ ಖಾನ್ ಬಳಿ ಸಹ ಆ ಸಮಯದಲ್ಲಿ ಸಿನಿಮಾಗಳು ಇರಲಿಲ್ಲ ಎಂಬರ್ಥದ ಮಾತುಗಳನ್ನು ಸಲ್ಮಾನ್ ಖಾನ್ ಆಡಿದ್ದರು. ಆದರೆ ‘ಕುಚ್ ಕುಚ್ ಹೋತಾ ಹೈ’ ಸಿನಿಮಾ ಬಿಡುಗಡೆ ಆದ ವರ್ಷ ಸೈಫ್ ಅಲಿ ಖಾನ್​ ನಟನೆಯ ನಾಲ್ಕು ಸಿನಿಮಾಗಳು ಬಿಡುಗಡೆ ಆಗಿದ್ದವು. ‘ಕುಚ್​ ಕುಚ್ ಹೋತಾ ಹೈ’ ಸಿನಿಮಾ ಕರಣ್ ಜೋಹರ್ ನಿರ್ದೇಶನದ ಮೊದಲ ಸಿನಿಮಾ. ಆ ಸಿನಿಮಾದಲ್ಲಿ ಶಾರುಖ್ ಖಾನ್, ಕಾಜಲ್, ರಾಣಿ ಮುಖರ್ಜಿ ನಟಿಸಿದ್ದರು. ಸಲ್ಮಾನ್ ಖಾನ್ ಪೋಷಕ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ