ಒಂದೇ ದಿನ ಬಾಲಿವುಡ್ನಲ್ಲಿ 3 ಸಾವು; ಆಘಾತದ ಸುದ್ದಿ ಕೇಳಿ ಕಂಬನಿ ಮಿಡಿದ ಸೆಲೆಬ್ರಿಟಿಗಳು
ನೃತ್ಯ ನಿರ್ದೇಶಕ ರೆಮೋ ಡಿಸೋಜಾ ಅವರ ಭಾವ, ಗಾಯಕ ಶಾನ್ ಅವರ ತಾಯಿ ಹಾಗೂ ಬಾಲಿವುಡ್ ನಟ ಅರುಣ್ ವರ್ಮಾ ನಿಧನರಾಗಿದ್ದಾರೆ. ಒಂದೇ ದಿನ ಈ ಮೂವರ ಸಾವು ಸಂಭವಿಸಿದೆ.
Updated on: Jan 21, 2022 | 12:08 PM
2022ರ ಆರಂಭದಲ್ಲಿ ಸಾಲು ಸಾಲು ಸಾವಿನ ಸುದ್ದಿ ಕೇಳಿಬರುತ್ತಿದೆ. ಇದು ಚಿತ್ರರಂಗಕ್ಕೆ ಆಘಾತ ಉಂಟು ಮಾಡಿದೆ. ಕಳೆದೆರಡು ವರ್ಷಗಳಿಂದ ಕೊವಿಡ್ ಕಾರಣಕ್ಕೆ ಸಾವು-ನೋವಿನ ಪ್ರಕರಣಗಳು ಹೆಚ್ಚು ವರದಿ ಆಗುತ್ತಿದ್ದವು. 2022ರ ವರ್ಷದಲ್ಲಾದರೂ ನೆಮ್ಮದಿ ಕಾಣಬೇಕು ಎಂದುಕೊಳ್ಳಲಾಗಿತ್ತು. ಆದರೆ ಈ ವರ್ಷಾರಂಭದಲ್ಲೇ ಕಹಿ ಸುದ್ದಿ ಕೇಳಿಬಂದಿದೆ. ‘ಮಹಾಭಾರತ’ ಸೀರಿಯಲ್ನಲ್ಲಿ ಅರ್ಜುನನ ಪಾತ್ರ ಮಾಡಿ ಫೇಮಸ್ ಆಗಿದ್ದ ಶಾಹೀರ್ ಶೇಖ್ ಅವರ ತಂದೆ ಇತ್ತೀಚೆಗಷ್ಟೇ ಕೊವಿಡ್ನಿಂದ ಮೃತರಾದರು. ಅದರ ಬೆನ್ನಲ್ಲೇ ಇನ್ನೂ ಮೂವರು ಕೊನೆಯುಸಿರೆಳೆದಿರುವುದು ವರದಿ ಆಗಿದೆ. ಖ್ಯಾತ ನೃತ್ಯ ನಿರ್ದೇಶಕ ರೆಮೋ ಡಿಸೋಜಾ (Ramo Dsouza) ಅವರ ಭಾವ ಜೇಸನ್ ವಾಟ್ಕಿನ್ಸ್, ಗಾಯಕ ಶಾನ್ (Singer Shaan) ಅವರ ತಾಯಿ ಸೊನಾಲಿ ಮುಖರ್ಜಿ ಹಾಗೂ ಬಾಲಿವುಡ್ (Bollywood) ನಟ ಅರುಣ್ ವರ್ಮಾ ಅವರು ನಿಧನರಾಗಿದ್ದಾರೆ. ಒಂದೇ ದಿನ (ಜ.20) ಈ ಮೂವರ ಸಾವು ಸಂಭವಿಸಿದೆ ಎಂಬುದು ಆಘಾತಕಾರಿ ಸಂಗತಿ. ಅರುಣ್ ವರ್ಮಾ ಮತ್ತು ಸೊನಾಲಿ ಮುಖರ್ಜಿ ಅವರು ಅನಾರೋಗ್ಯದಿಂದ ನಿಧನರಾಗಿದ್ದರೆ, ಜೇಸನ್ ವಾಟ್ಕಿನ್ಸ್ ಅವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಆತ್ಮಹತ್ಯೆಗೆ ಶರಣಾದ ಜೇಸನ್ ವಾಟ್ಕಿನ್ಸ್:
ಗುರುವಾರ (ಜ.20) ಮುಂಬೈನ ನಿವಾಸದಲ್ಲಿ ಜೇಸನ್ ವಾಟ್ಕಿನ್ಸ್ ಅವರ ಶವ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆ ಆಗಿದೆ. ಈ ಘಟನೆ ನಡೆದಾಗ ರೆಮೋ ಡಿಸೋಜಾ ಮತ್ತು ಅವರ ಪತ್ನಿ ಲಿಸೆಲ್ಲೆ ಅವರು ಗೋವಾದಲ್ಲಿದ್ದರು. ಜೇಸನ್ ವಾಟ್ಕಿನ್ಸ್ ಅವರು ಕೆಲವು ಅನಾರೋಗ್ಯದ ಸಮಸ್ಯೆಗಳಿಂದ ಬೇಸತ್ತಿದ್ದರು ಎನ್ನಲಾಗಿದೆ. ಆ ಕಾರಣದಿಂದಲೇ ಅವರು ಆತ್ಮಹತ್ಯೆ ಮಾಡಿಕೊಳ್ಳುವ ನಿರ್ಧಾರಕ್ಕೆ ಬಂದಿರಬಹುದು ಎಂದು ಊಹಿಸಲಾಗಿದೆ. ಆದರೆ ಯಾವುದೇ ಸೂಸೈಡ್ ನೋಟ್ ಪತ್ತೆ ಆಗಿಲ್ಲ.
ಶಾನ್ ತಾಯಿ ನಿಧನಕ್ಕೆ ಕೈಲಾಶ್ ಖೇರ್ ಸಂತಾಪ:
ಖ್ಯಾತ ಗಾಯಕ ಶಾನ್ ಅವರ ತಾಯಿ ಸೊನಾಲಿ ಮುಖರ್ಜಿ ನಿಧನರಾದ ಸುದ್ದಿಯನ್ನು ಗಾಯಕ ಕೈಲಾಶ್ ಖೇರ್ ಅವರು ಖಚಿತಪಡಿಸಿದ್ದಾರೆ. ‘ಶಾನ್ ತಾಯಿ ಕೊನೆಯುಸಿರೆಳೆದರು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಅಂತ ದೇವರಲ್ಲಿ ಪ್ರಾರ್ಥಿಸುತ್ತೇನೆ. ಶಾನ್ ಕುಟುಂಬಕ್ಕೆ ಈ ನೋವು ಭರಿಸುವ ಶಕ್ತಿಯನ್ನು ಶಿವ ನೀಡಲಿ’ ಎಂದು ಕೈಲಾಶ್ ಖೇರ್ ಟ್ವೀಟ್ ಮಾಡಿದ್ದಾರೆ.
बड़े भाई शान @singer_shaan की माँ का देहावसान हो गया॥ परमेश्वर से दिवंगत आत्मा की सद्गति की प्रार्थनाएँ॥ तीनों लोक के अधिपति भगवान शिव से प्रार्थना है की हमारे शान भैया के परिवार को ये दुःख सहन करने की शक्ति मिले॥ अनन्त प्रार्थना ॐ
— Kailash Kher (@Kailashkher) January 20, 2022
ಅನಾರೋಗ್ಯದಿಂದ ಅರುಣ್ ವರ್ಮಾ ವಿಧಿವಶ:
ಹಿರಿಯ ನಟ ಅರುಣ್ ವರ್ಮಾ ಅವರಿಗೆ 62 ವರ್ಷ ವಯಸ್ಸಾಗಿತ್ತು. ಸಲ್ಮಾನ್ ಖಾನ್ ಅಭಿನಯದ ‘ಕಿಕ್’, ‘ಮುಜ್ಸೆ ಶಾದಿ ಕರೋಗೆ’ ಮುಂತಾದ ಸಿನಿಮಾಗಳಲ್ಲಿ ಅರುಣ್ ವರ್ಮಾ ನಟಿಸಿದ್ದರು. ಅವರಿಗೆ ಬ್ರೇನ್ ಸ್ಟ್ರೋಕ್ ಆಗಿತ್ತು. ಆ ಬಳಿಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತಾದರೂ ಅವರು ಬದುಕುಳಿಯಲಿಲ್ಲ. ಕಿಡ್ನಿ ವೈಫಲ್ಯ ಕೂಡ ಅವರ ನಿಧನಕ್ಕೆ ಕಾರಣ ಎನ್ನಲಾಗಿದೆ.
ಇದನ್ನೂ ಓದಿ:
‘ಮಹಾಭಾರತ’ ಸೀರಿಯಲ್ ಅರ್ಜುನ ಪಾತ್ರಧಾರಿ ಶಾಹೀರ್ ಶೇಖ್ ತಂದೆ ಕೊವಿಡ್ನಿಂದ ನಿಧನ
ಸಲ್ಮಾನ್ ಖಾನ್ ಪರ ಲಾಯರ್ ಶ್ರೀಕಾಂತ್ ಶಿವಡೆ ಕ್ಯಾನ್ಸರ್ನಿಂದ ನಿಧನ; ‘ತಕ್ಕ ಶಿಕ್ಷೆ ಸಿಕ್ತು’ ಎಂದ ನೆಟ್ಟಿಗರು
