3ಡಿ ವರ್ಷನ್ನಲ್ಲಿ ಬರಲಿದೆ ಹೃತಿಕ್ ರೋಷನ್ ನಟನೆಯ ‘ಫೈಟರ್’ ಸಿನಿಮಾ
‘ಫೈಟರ್’ ಸಿನಿಮಾದ ಪ್ರಚಾರಕ್ಕೆ ನಿರ್ದೇಶಕ ಸಿದ್ದಾರ್ಥ್ ಆನಂದ್ ಅವರು ಬೇರೆ ಬೇರೆ ಪ್ಲ್ಯಾನ್ಗಳನ್ನು ಮಾಡಿಕೊಂಡಿದ್ದಾರೆ. ಬರೋಬ್ಬರಿ 50 ದಿನಗಳ ಕಾಲ ಒಂದರ ಹಿಂದೊಂದು ಅಪ್ಡೇಟ್ ನೀಡಲು ಅವರು ನಿರ್ಧರಿಸಿದ್ದಾರೆ. ಹೃತಿಕ್ ರೋಷನ್ ಅಭಿನಯದ ಈ ಸಿನಿಮಾ 3ಡಿ ವರ್ಷನ್ನಲ್ಲಿ ತೆರೆಕಂಡು ಧೂಳೆಬ್ಬಿಸಲಿದೆ.
Updated on: Dec 05, 2023 | 3:24 PM
2024ರಲ್ಲಿ ಬಿಡುಗಡೆ ಆಗಲಿರುವ ಕೆಲವು ಸಿನಿಮಾಗಳ ಬಗ್ಗೆ ಈಗಲೇ ಸಾಕಷ್ಟು ನಿರೀಕ್ಷೆ ಸೃಷ್ಟಿ ಆಗಿದೆ. ಅಂಥ ಸಿನಿಮಾಗಳ ಸಾಲಿನಲ್ಲಿ ‘ಫೈಟರ್’ (Fighter Movie) ಕೂಡ ಇದೆ. ಭರ್ಜರಿ ಆ್ಯಕ್ಷನ್ ಹೊಂದಿರಲಿರುವ ಈ ಸಿನಿಮಾಗೆ ‘ಜವಾನ್’ ಖ್ಯಾತಿಯ ಸಿದ್ದಾರ್ಥ್ ಆನಂದ್ ಅವರು ನಿರ್ದೇಶನ ಮಾಡುತ್ತಿದ್ದಾರೆ. ಅದ್ದೂರಿ ಬಜೆಟ್ನಲ್ಲಿ ಈ ಸಿನಿಮಾ ನಿರ್ಮಾಣ ಆಗುತ್ತಿದೆ. ಈ ಚಿತ್ರದಲ್ಲಿ ಹೃತಿಕ್ ರೋಷನ್ (Hrithik Roshan) ಅವರಿಗೆ ಜೋಡಿಯಾಗಿ ದೀಪಿಕಾ ಪಡುಕೋಣೆ ನಟಿಸುತ್ತಿದ್ದಾರೆ. ವಿಶೇಷ ಏನೆಂದರೆ, ‘ಫೈಟರ್’ ಸಿನಿಮಾ 3ಡಿ (IMAX 3D) ವರ್ಷನ್ನಲ್ಲಿ ಬಿಡುಗಡೆ ಆಗಲಿದೆ.
ಬಾಲಿವುಡ್ ಸಿನಿಮಾಗಳ ವ್ಯಾಪ್ತಿ ಹಿರಿದಾಗಿದೆ. ಶಾರುಖ್ ಖಾನ್ ನಟನೆಯ ‘ಜವಾನ್’, ‘ಪಠಾಣ್’ ಸಿನಿಮಾಗಳು ವಿಶ್ವ ಬಾಕ್ಸ್ ಆಫೀಸ್ನಲ್ಲಿ ಸಾವಿರಾರು ಕೋಟಿ ರೂಪಾಯಿ ಕಮಾಯಿ ಮಾಡಿದ ಬಳಿಕ ಇನ್ನುಳಿದ ಹೀರೋಗಳಿಗೆ ಹೊಸ ಟಾರ್ಗೆಟ್ ನಿಗದಿ ಆದಂತಾಗಿದೆ. ‘ಫೈಟರ್’ ಸಿನಿಮಾ ಕೂಡ ಸಾವಿರ ಕೋಟಿ ರೂಪಾಯಿ ಬಿಸ್ನೆಸ್ ಮಾಡಲಿದೆಯಾ ಎಂಬುದನ್ನು ಕಾದುನೋಡಬೇಕು. ‘ಅನಿಮಲ್’ ಸಿನಿಮಾದ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿರುವ ಅನಿಲ್ ಕಪೂರ್ ಕೂಡ ‘ಫೈಟರ್’ ಚಿತ್ರದಲ್ಲಿ ನಟಿಸಿದ್ದಾರೆ.
ಇದನ್ನೂ ಓದಿ: ಹೃತಿಕ್ ರೋಷನ್ ಮನೆಯವರ ಜೊತೆ ಪ್ರೇಯಸಿ ಸಬಾ ಆಜಾದ್ ದೀಪಾವಳಿ; ಈಗ ಎಲ್ಲವೂ ಅಧಿಕೃತ
2ಡಿ, 3ಡಿ ಮತ್ತು ಐಮ್ಯಾಕ್ಸ್ 3ಡಿ ವರ್ಷನ್ನಲ್ಲಿ ‘ಫೈಟರ್’ ಸಿನಿಮಾ ಬಿಡುಗಡೆ ಆಗಲಿದೆ. ಮೈನವಿರೇಳಿಸುವಂತಹ ಸಾಹಸ ದೃಶ್ಯಗಳನ್ನು ಈ ಚಿತ್ರ ಹೊಂದಿರಲಿದೆ. ಅದನ್ನು ದೊಡ್ಡ ಪರದೆ ಮೇಲೆ ಆನಂದಿಸಲು ಅಭಿಮಾನಿಗಳು ಕಾದಿದ್ದಾರೆ. ಅಂಥ ಪ್ರೇಕ್ಷಕರಿಗೆ ಸ್ಪೆಷಲ್ ಟ್ರೀಟ್ ನೀಡಬೇಕು ಎಂಬ ಕಾರಣಕ್ಕೆ ಐಮ್ಯಾಕ್ಸ್ 3ಡಿ ಅವತರಣಿಕೆಯಲ್ಲಿ ‘ಫೈಟರ್’ ತೆರೆಕಾಣಲಿದೆ.
View this post on Instagram
2024ರ ಜನವರಿ 25ರಂದು ‘ಫೈಟರ್’ ಚಿತ್ರ ರಿಲೀಸ್ ಆಗಲಿದೆ. ಅದು ಗಣರಾಜ್ಯೋತ್ಸವದ ಸಮಯ. ಆ ಸಂದರ್ಭದಲ್ಲಿ ಬೇರೆ ಬೇರೆ ಭಾಷೆಯಲ್ಲಿ ಅನೇಕ ಸ್ಟಾರ್ ಸಿನಿಮಾಗಳು ಬಿಡುಗಡೆ ಆಗಲಿದೆ. ಹಾಗಾಗಿ ಪೈಪೋಟಿ ಜೋರಾಗಿ ಇರಲಿದೆ. ‘ಫೈಟರ್’ 3ಡಿಯಲ್ಲಿ ಬಿಡುಗಡೆ ಆಗಿದ್ದೇ ಹೌದಾದರೆ, ಇದೇ ಮೊದಲ ಬಾರಿಗೆ ಹೃತಿಕ್ ನಟನೆಯ ಸಿನಿಮಾ 3ಡಿಯಲ್ಲಿ ಬಂದಂತೆ ಆಗಲಿದೆ. ದೀಪಿಕಾ ಪಡುಕೋಣೆ ಅಭಿನಯದ ‘ಪದ್ಮಾವತ್’ ಸಿನಿಮಾ 3ಡಿ ವರ್ಷನ್ನಲ್ಲಿ ಬಿಡುಗಡೆಯಾಗಿ ಯಶಸ್ಸು ಕಂಡಿತ್ತು.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
