Independence Day: ಶಾರುಖ್ ಖಾನ್ ಮನೆ ಮೇಲೆ ರಾರಾಜಿಸಿತು ರಾಷ್ಟ್ರ ಧ್ವಜ; ಸ್ವಾತಂತ್ರ್ಯ ದಿನಾಚರಣೆಗೆ ಶುಭ ಕೋರಿದ ಕುಟುಂಬ
Shah Rukh Khan Mannat: ಹರ್ ಘರ್ ತಿರಂಗ ಅಭಿಯಾನದಲ್ಲಿ ಶಾರುಖ್ ಖಾನ್ ಭಾಗಿ ಆಗಿದ್ದಾರೆ. ಆರ್ಯನ್ ಖಾನ್, ಅಬ್ರಾಮ್, ಗೌರಿ ಖಾನ್ ಜೊತೆಗೂಡಿ ಅವರು ‘ಮನ್ನತ್’ ನಿವಾಸದಲ್ಲಿ ತ್ರಿವರ್ಣ ಧ್ವಜ ಹಾರಿಸಿದ್ದಾರೆ.
Updated on: Aug 15, 2022 | 8:35 AM
75ನೇ ವರ್ಷದ ಸ್ವಾತಂತ್ರ್ಯ ದಿನಾಚರಣೆಯನ್ನು ಸಂಭ್ರಮದಿಂದ ಆಚರಿಸಲಾಗುತ್ತಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಕರೆ ನೀಡಿದ ಹರ್ ಘರ್ ತಿರಂಗ (Har Ghar Tiranga) ಅಭಿಯಾನಕ್ಕೆ ದೇಶದ ಜನತೆ ಸಾಥ್ ನೀಡಿದ್ದಾರೆ. ರಾಷ್ಟ್ರದ ಕೋಟ್ಯಂತರ ಮನೆ, ಮಳಿಗೆಗಳ ಮೇಲೆ ತ್ರಿವರ್ಣ ಧ್ವಜ ಹಾರಾಡುತ್ತಿದೆ. ಚಿತ್ರರಂಗದ ಅನೇಕ ಸೆಲೆಬ್ರಿಟಿಗಳು ಕೂಡ ಹರ್ ಘರ್ ತಿರಂಗ ಅಭಿಯಾನದಲ್ಲಿ ಭಾಗಿ ಆಗಿದ್ದಾರೆ. ಬಾಲಿವುಡ್ ನಟ-ನಟಿಯರ ಮನೆಯಲ್ಲಿ ರಾಷ್ಟ್ರ ಧ್ವಜ ರಾರಾಜಿಸುತ್ತಿದೆ. ಆಮಿರ್ ಖಾನ್, ಶಾರುಖ್ ಖಾನ್ (Shah Rukh Khan), ಸಲ್ಮಾನ್ ಖಾನ್ ಮುಂತಾದ ನಟರು ತ್ರಿವರ್ಣ ಧ್ವಜ(National Flag) ಹಾರಿಸಿದ್ದಾರೆ. ಆ ಫೋಟೋ ಮತ್ತು ವಿಡಿಯೋಗಳನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಲಾಗಿದೆ. ಆ ಮೂಲಕ ನಾಡಿನ ಜನತೆಗೆ ಸ್ವಾತಂತ್ರೋತ್ಸವದ ಶುಭಾಶಯ ತಿಳಿಸಲಾಗುತ್ತಿದೆ.
ಶಾರುಖ್ ಖಾನ್ ಅವರ ಸುಂದರವಾದ ಬಂಗಲೆ ಮುಂಬೈನಲ್ಲಿ ಇದೆ. ಇದಕ್ಕೆ ‘ಮನ್ನತ್’ ಎಂದು ಹೆಸರು ಇಡಲಾಗಿದೆ. ಹಲವು ವಿಶೇಷ ಸಂದರ್ಭಗಳಿಗೆ ಈ ಮನೆ ಸಾಕ್ಷಿ ಆಗುತ್ತದೆ. ಶಾರುಖ್ ಅವರನ್ನು ನೋಡಬೇಕು ಎಂದು ಈ ಮನೆಯ ಮುಂದೆ ಸಾವಿರಾರು ಜನರು ಜಮಾಯಿಸುತ್ತಾರೆ. ‘ಮನ್ನತ್’ನಲ್ಲಿ ಆಗಾಗ ಸೆಲೆಬ್ರಿಟಿಗಳಿಗಾಗಿ ಔತಣಕೂಟ ನಡೆಯುತ್ತದೆ. ಈಗ ಈ ಬಂಗಲೆ ಮೇಲೆ ರಾಷ್ಟ್ರ ಧ್ವಜ ಹಾರಾಡುತ್ತಿದೆ.
ಹರ್ ಘರ್ ತಿರಂಗ ಅಭಿಯಾನದಲ್ಲಿ ಶಾರುಖ್ ಖಾನ್ ಕುಟುಂಬ ಭಾಗಿ ಆಗಿದೆ. ಪುತ್ರರಾದ ಆರ್ಯನ್ ಖಾನ್, ಅಬ್ರಾಮ್, ಪತ್ನಿ ಗೌರಿ ಖಾನ್ ಅವರ ಜೊತೆಗೂಡಿ ಶಾರುಖ್ ಖಾನ್ ತ್ರಿವರ್ಣ ಧ್ವಜ ಹಾರಿಸಿದ್ದಾರೆ. ಈ ಫೋಟೋವನ್ನು ಗೌರಿ ಖಾನ್ ಅವರು ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಇದಕ್ಕೆ ಅಭಿಮಾನಿಗಳು ಹಲವು ಬಗೆಯಲ್ಲಿ ಕಮೆಂಟ್ ಮಾಡುತ್ತಿದ್ದಾರೆ.
View this post on Instagram
ದೇಶಭಕ್ತಿ ಸಿನಿಮಾ ಮಾಡುವಲ್ಲಿಯೂ ಶಾರುಖ್ ಖಾನ್ ಹಿಂದೆ ಬಿದ್ದಿಲ್ಲ. ‘ಸ್ವದೇಸ್’, ‘ಚಕ್ ದೇ ಇಂಡಿಯಾ’ ಮುಂತಾದ ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. ಪ್ರಸ್ತುತ ಅವರ ಅನೇಕ ಸಿನಿಮಾದ ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ. ಬಾಕ್ಸ್ ಆಫೀಸ್ನಲ್ಲಿ ಅವರು ಗೆಲುವು ಕಾಣದೇ ಹಲವು ವರ್ಷ ಕಳೆದಿದೆ. ಹಾಗಾಗಿ ತುರ್ತಾಗಿ ಅವರಿಗೊಂದು ಹಿಟ್ ಬೇಕಿದೆ. ‘ಪಠಾಣ್’, ‘ಜವಾನ್’ ‘ಡಂಕಿ’ ಮುಂತಾದ ಸಿನಿಮಾಗಳಲ್ಲಿ ಅವರು ಅಭಿನಯಿಸುತ್ತಿದ್ದಾರೆ. ಘಟಾನುಘಟಿ ನಿರ್ದೇಶಕರ ಜೊತೆ ಶಾರುಖ್ ಕೈ ಜೋಡಿಸಿದ್ದು, ಭರ್ಜರಿ ಕಮ್ ಬ್ಯಾಕ್ ಮಾಡಲು ಸೂಚನೆ ನೀಡಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
