175 ಕೋಟಿ ರೂಪಾಯಿಗೆ ‘ಕಿಂಗ್’ ಸಿನಿಮಾದ ವಿದೇಶಿ ವಿತರಣಾ ಹಕ್ಕುಗಳು ಸೇಲ್

ಬಾಲಿವುಡ್‌ ನಟ ಶಾರುಖ್ ಖಾನ್ ಅಭಿನಯದ, ತೀವ್ರ ನಿರೀಕ್ಷೆ ಮೂಡಿಸಿರುವ ‘ಕಿಂಗ್’ ಸಿನಿಮಾ ಬಿಡುಗಡೆಗೂ ಮುನ್ನವೇ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಹೊಸ ದಾಖಲೆ ಬರೆದಿದೆ. ಈ ಚಿತ್ರದ ವಿದೇಶಿ ವಿತರಣೆಯ ಹಕ್ಕುಗಳು ಭಾರಿ ಮೊತ್ತಕ್ಕೆ ಮಾರಾಟವಾಗಿದ್ದು, ಇಡೀ ಚಿತ್ರರಂಗವೇ ಹುಬ್ಬೇರಿಸುವಂತೆ ಮಾಡಿದೆ. ಬಾಲಿವುಡ್ ವರದಿಗಳ ಪ್ರಕಾರ, ಖ್ಯಾತ ವಿತರಣಾ ಸಂಸ್ಥೆಯಾದ ‘ಫಾರ್ಸ್ ಫಿಲ್ಮ್ಸ್’ ಈ ಸಿನಿಮಾದ ವಿದೇಶಿ ವಿತರಣಾ ಹಕ್ಕುಗಳನ್ನು ಬರೋಬ್ಬರಿ 175 ಕೋಟಿ ರೂಪಾಯಿಗೆ ಖರೀದಿಸಿದೆ.

ಆರಂಭದಲ್ಲಿ ‘ಕಿಂಗ್’ ಚಿತ್ರದ ವಿದೇಶಿ ವಿತರಣೆಯನ್ನು ‘ಯಶ್ ರಾಜ್ ಫಿಲ್ಮ್ಸ್’ ಸಂಸ್ಥೆ ವಹಿಸಿಕೊಳ್ಳಲಿದೆ ಎಂದು ವರದಿಯಾಗಿತ್ತು. ಆದರೆ ‘ಫಾರ್ಸ್ ಫಿಲ್ಮ್ಸ್’ ಸಂಸ್ಥೆಯು ನಿರ್ಮಾಪಕರಿಗೆ ನಿರಾಕರಿಸಲಾಗದ ಭಾರಿ ಆಫರ್ ನೀಡಿದ್ದರಿಂದ ಈ ಐತಿಹಾಸಿಕ ಒಪ್ಪಂದ ಕುದುರಿದೆ. ಇಲ್ಲಿಯವರೆಗೆ ಯಾವುದೇ ಭಾರತೀಯ ಸಿನಿಮಾದ ಸಾಗರೋತ್ತರ ಹಕ್ಕುಗಳು 100 ಕೋಟಿ ರೂಪಾಯಿಗೂ ಮಾರಾಟವಾಗಿರಲಿಲ್ಲ. ಇದೀಗ 175 ಕೋಟಿ ರೂ. ಬಾಚಿಕೊಳ್ಳುವ ಮೂಲಕ ‘ಕಿಂಗ್’ ಸಾರ್ವಕಾಲಿಕ ದಾಖಲೆ ಬರೆದಿದೆ.

ಈ ಒಪ್ಪಂದದ ಪ್ರಕಾರ, ‘ಫಾರ್ಸ್ ಫಿಲ್ಮ್ಸ್’ ಸಂಸ್ಥೆಯು ಮಧ್ಯಪ್ರಾಚ್ಯ ಮಾರುಕಟ್ಟೆಯನ್ನು ನೇರವಾಗಿ ನಿರ್ವಹಿಸಲಿದ್ದು, ಉತ್ತರ ಅಮೆರಿಕ ಮತ್ತು ಯುಕೆ ಸೇರಿದಂತೆ ಇತರ ದೇಶಗಳ ವಿತರಣಾ ಹಕ್ಕುಗಳನ್ನು ಪ್ರಾದೇಶಿಕ ಸಬ್-ಡಿಸ್ಟ್ರಿಬ್ಯೂಟರ್ಸ್‌ಗೆ ಮಾರಾಟ ಮಾಡಲಿದೆ. ವಿದೇಶಿ ಮಾರುಕಟ್ಟೆಯಲ್ಲಿ ಈ ಸಿನಿಮಾ ಎಷ್ಟು ಕಲೆಕ್ಷನ್ ಮಾಡಲಿದೆ ಎಂಬುದನ್ನು ತಿಳಿಯುವ ಕೌತುಕ ನಿರ್ಮಾಣ ಆಗಿದೆ.

ಈ ಭಾರಿ ಹೂಡಿಕೆಯನ್ನು ಮರಳಿ ಪಡೆಯಲು ‘ಕಿಂಗ್’ ಸಿನಿಮಾ ವಿದೇಶದಲ್ಲಿ ಅಂದಾಜು 400 ಕೋಟಿ ರೂಪಾಯಿಗೂ ಅಧಿಕ ಗಳಿಕೆ ಮಾಡಬೇಕಾಗಿದೆ. ಕ್ರಿಸ್ಮಸ್ ಹಬ್ಬದ ರಜಾದಿನಗಳಲ್ಲಿ ಈ ಸಿನಿಮಾ ತೆರೆಕಾಣುತ್ತಿದ್ದು, ಅದೇ ಸಮಯದಲ್ಲಿ ಹಾಲಿವುಡ್‌ನ ಬೃಹತ್ ಸಿನಿಮಾಗಳಾದ ‘ಅವೆಂಜರ್ಸ್: ಡೂಮ್ಸ್‌ಡೇ’, ‘ಡ್ಯೂನ್: ಪಾರ್ಟ್ 3’ ಮತ್ತು ‘ಜುಮಾಂಜಿ’ ಚಿತ್ರಗಳು ಪೈಪೋಟಿಗೆ ಇಳಿಯುತ್ತಿರುವುದರಿಂದ ಇದು ಸುಲಭದ ಸವಾಲಾಗಿರುವುದಿಲ್ಲ.

ಇದನ್ನೂ ಓದಿ: ‘ನಾನು ಕೊಲೆಗಾರನಲ್ಲ, ಪ್ರೇಮಿ’; ಗಮನಸೆಳೆದ ಶಾರುಖ್ ‘ಕಿಂಗ್’ ಹೊಸ ಪೋಸ್ಟರ್

ಶಾರುಖ್ ಖಾನ್ ಅವರಿಗೆ ವಿದೇಶಗಳಲ್ಲಿ ಇರುವ ಭಾರಿ ಕ್ರೇಜ್ ಅನ್ನು ಈ ಬ್ಯುಸಿನೆಸ್ ಡೀಲ್ ಮತ್ತೊಮ್ಮೆ ಸಾಬೀತುಪಡಿಸಿದೆ. ಈ ಮಧ್ಯೆ, ನವೆಂಬರ್ 2ರಂದು ಶಾರುಖ್ ಖಾನ್ ಅವರ 61ನೇ ಜನ್ಮದಿನದ ಅಂಗವಾಗಿ ‘ಕಿಂಗ್’ ಸಿನಿಮಾದಿಂದ ವಿಶೇಷ ಪ್ರಚಾರದ ಝಲಕ್ ಅಥವಾ ಟೀಸರ್ ಬಿಡುಗಡೆಯಾಗುವ ನಿರೀಕ್ಷೆಯಿದ್ದು, ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಈ ಚಿತ್ರವು ಡಿಸೆಂಬರ್ 24ರಂದು ವಿಶ್ವದಾದ್ಯಂತ ಅದ್ಧೂರಿಯಾಗಿ ಬಿಡುಗಡೆಯಾಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.