ನೋಡುವಷ್ಟು ನೋಡಿ ಹನುಮಂತನ ಮುಖವಾಡ ಕಳಚಿದ ಕಿಚ್ಚ ಸುದೀಪ್

ಹನುಮಂತ ಅವರು ಬಿಗ್ ಬಾಸ್​ನಲ್ಲಿ ಗೆಲ್ಲುವ ಕುದುರೆ ಆಗಿದ್ದರು. ಆದರೆ, ಈಗ ಆ ಕುದುರೆಯ ಚಾರ್ಮ್ ಹೋಗಿದೆ. ಓಟದಲ್ಲಿ ಕೊನೆಯಲ್ಲಿ ನಿಲ್ಲುತ್ತಿದೆ. ಕಿಚ್ಚ ಸುದೀಪ್ ಅವರ ನೆಚ್ಚಿನ ಸ್ಪರ್ಧಿಗಳಲ್ಲಿ ಹನುಮಂತ ಕೂಡ ಒಬ್ಬರಾಗಿದ್ದರು. ಏನೇ ಇದ್ದರೂ ನೇರವಾಗಿ ಹೇಳುತ್ತಿದ್ದರು. ಬುದ್ಧಿವಂತ ಎನಿಸಿಕೊಂಡಿದ್ದರು. ಈಗ ಸುದೀಪ್ ಅವರಿಗೆ ಹನುಮಂತನ ಬಗ್ಗೆ ಬೇಸರ ಮೂಡಿದೆ. ಹನುಮಂತ ಅವರ ಮುಖವಾಡವನ್ನು ಸುದೀಪ್ ಕಳಚಿದ್ದಾರೆ. ಖಡಕ್ ಮಾತಿನಲ್ಲಿ ಹನುಮಂತಗೆ ಎಚ್ಚರಿಕೆ ನೀಡಿದ್ದಾರೆ.

ಶನಿವಾರ ಕ್ಲಾಸ್ ತೆಗೆದುಕೊಂಡರೆ ಭಾನುವಾರ ಫನ್ ಆ್ಯಕ್ಟಿವಿಟಿ ಇರುತ್ತದೆ. ಎರಡೂ ಎಪಿಸೋಡ್​ನಲ್ಲಿ ಹನುಮಂತಗೆ ಎಚ್ಚರಿಕೆ ನೀಡುವ ಕೆಲಸ ಆಗಿದೆ. ಯಾವುದೇ ನೆಗೆಟಿವ್ ವಿಚಾರ ಬಂದರೂ ಎಲ್ಲರೂ ಚೈತ್ರಾ ಅವರ ಹೆಸರನ್ನು ತೆಗೆದುಕೊಳ್ಳುತ್ತಿದ್ದರು. ಇದಕ್ಕೆ ಹನುಮಂತ ಕೂಡ ಹೊರತಾಗಿರಲಿಲ್ಲ. ಈ ಕಾರಣಕ್ಕೆ ಸುದೀಪ್ ಅವರು ಹನುಮಂತಗೆ ಕ್ಲಾಸ್ ತೆಗೆದುಕೊಂಡರು. ಆ ಬಳಿಕ ಚೈತ್ರಾ ಬಿಟ್ಟು ಮತ್ಯಾರ ಹೆಸರು ತೆಗೆದುಕೊಳ್ಳುತ್ತೀರಿ ಎಂದಾಗ ಅವರು ಧನರಾಜ್ ಅವರ ಹೆಸರನ್ನು ಹೇಳಿದರು.

ಏನಾದರೂ ಆರೋಪ ಮಾಡುವ ವಿಚಾರ ಬಂದಾಗ ಹನುಮಂತ ಅವರು ಧನರಾಜ್ ಮೇಲೆ, ಧನರಾಜ್ ಅವರು ಹನುಮಂತ ಮೇಲೆ ಆರೋಪಿಸುತ್ತಾರೆ. ಈ ಮೂಲಕ ಬೇರೆಯವರ ಬಾಯಿಗೆ ಆಹಾರ ಆಗುವುದರಿಂದ ತಪ್ಪಿಸಿಕೊಳ್ಳುತ್ತಿದ್ದಾರೆ. ಇದಕ್ಕೂ ಸುದೀಪ್ ಅವರು ಪಾಠ ಮಾಡಿದರು. ಆ ಬಳಿಕ ಹನುಮಂತ ಮಂಕಾದರು. ನಂತರ ಅಪ್ಸೆಟ್ ಆದಂತೆ ಕಂಡು ಬಂತು.

ಭಾನುವಾರದ ಎಪಿಸೋಡ್​ನಲ್ಲಿ ಸುದೀಪ್ ಅವರು ಏನನ್ನೋ ಹೇಳ ಹೊರಟರು. ಆಗ ಹನುಮಂತ ಅವರ ಮುಖದಲ್ಲಿ ಯಾವುದೇ ನಗು ಬಂದಿಲ್ಲ. ‘ನಗುತ್ತಾ ಹೇಳಬಹುದಲ್ಲ ಹನುಮಂತ’ ಎಂದರು ಸುದೀಪ್. ಮುಂದುವರಿದು, ‘ನೀವು ಹಾಗೂ ಧನರಾಜ್​ ಅವರು ಏನೇನು ಮಾತಾಡುತ್ತೀರಾ ಎಂಬುದನ್ನು ಜೂಮ್​ ಹಾಕಿ ಕೇಳಿಸಿಕೊಳ್ಳುತ್ತಾ ಇರುತ್ತೇನೆ. ಈ ಜಾಗದಲ್ಲಿ ಮಾತ್ರ ಮಾತು ಕಡಿಮೆ ಆಯಿತು ಎಂದರೆ ನಾನು ನಂಬುವವನಲ್ಲ’ ಎಂದರು ಸುದೀಪ್. ಈ ಮೂಲಕ ಹನುಮಂತ ಅವರು ನಾಟಕ ಮಾಡುತ್ತಿದ್ದಾರೆ ಎಂಬುದನ್ನು ನೇರವಾಗಿ ಹೇಳಿದರು.

ಇದನ್ನೂ ಓದಿ: ಬಿಗ್ ಬಾಸ್ ಮನೆಯಿಂದ ಹೊರಬರಲು ಹನುಮಂತ ನಿರ್ಧಾರ; ಧನರಾಜ್ ಪ್ರತಿಕ್ರಿಯೆ ಏನು?

ಹನುಮಂತ ಅವರು ಈಗ ದೊಡ್ಮನೆಯಿಂದ ಹೊರ ಹೋಗುವ ನಿರ್ಧಾರಕ್ಕೆ ಬಂದಿದ್ದಾರೆ. ‘ನನಗೆ ಈ ಆಟ ಸಾಕಾಗಿದೆ’ ಎಂದು ಹೇಳಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.