Prabhas Birthday: ‘ಬಾಹುಬಲಿ’ಗೂ ಮುನ್ನವೇ ಆಕ್ಷನ್ ಸಿನಿಮಾಗಳಲ್ಲಿ ಧೂಳೆಬ್ಬಿಸಿದ್ದ ಪ್ರಭಾಸ್; ಯಾವುವು ಆ ಚಿತ್ರಗಳು?
Prabhas Action Movies: ಇಂದು ಟಾಲಿವುಡ್ ನಟ ಪ್ರಭಾಸ್ ಜನ್ಮದಿನ. ಈ ಹಿನ್ನೆಲೆಯಲ್ಲಿ ಅವರು ಬಾಹುಬಲಿ ಚಿತ್ರಕ್ಕಿಂತ ಮುನ್ನ ನಟಿಸಿರುವ ಸೂಪರ್ ಹಿಟ್ ಆಕ್ಷನ್ ಚಿತ್ರಗಳ ಪಟ್ಟಿಯನ್ನು ಇಲ್ಲಿ ನೀಡಲಾಗಿದೆ.
ಟಾಲಿವುಡ್ ನಟ ಪ್ರಭಾಸ್ ಜನ್ಮದಿನವಿಂದು. ಅವರು ‘ಬಾಹುಬಲಿ’ ಹಾಗೂ ‘ಸಾಹೋ’ ಚಿತ್ರದ ನಂತರ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಬದಲಾದರು. ಪ್ರಸ್ತುತ ಅವರ ಮುಂದಿನ ಎಲ್ಲಾ ಚಿತ್ರಗಳೂ ಬಹುದೊಡ್ಡ ಕ್ಯಾನ್ವಾಸ್ನಲ್ಲಿ ತಯಾರಾಗುತ್ತಿರುವ ಚಿತ್ರಗಳು. ಆದರೆ ಬಾಹುಬಲಿ ಚಿತ್ರಕ್ಕೂ ಮುನ್ನ ಅವರ ಚಿತ್ರಗಳು ಹೇಗಿದ್ದವು? ಅಭಿಮಾನಿಗಳು ಅವರನ್ನು ನೆಚ್ಚಿನಿಂದ ರೆಬೆಲ್ ಸ್ಟಾರ್ ಎಂದು ಕರೆಯುತ್ತಿದ್ದರು. ಅದಕ್ಕೆ ತಕ್ಕಂತೆ ಪ್ರಭಾಸ್ ಆಕ್ಷನ್ ಮಾದರಿಯ ಚಿತ್ರಗಳಲ್ಲಿ ಸಖತ್ ಮಿಂಚುತ್ತಿದ್ದರು. ಅವರು ಬಾಹುಬಲಿ ಚಿತ್ರಕ್ಕೂ ಮುಂಚೆ ನಟಿಸಿದ, ಸೂಪರ್ ಹಿಟ್ ಆಕ್ಷನ್ ಚಿತ್ರಗಳ ಪಟ್ಟಿ ಇಲ್ಲಿದೆ.
1. ಮಿರ್ಚಿ: ಕೊರಟಾಲ ಶಿವ ನಿರ್ದೇಶನದ ಮೊದಲ ಚಿತ್ರವಿದು. ಈ ಚಿತ್ರದಲ್ಲಿನ ಪ್ರಭಾಸ್ ನಟನೆಯನ್ನು ಇಂದಿಗೂ ಅಭಿಮಾನಿಗಳು ನೆನಪಿಸಿಕೊಳ್ಳುತ್ತಾರೆ. ಈ ಚಿತ್ರವನ್ನು ಕನ್ನಡದಲ್ಲಿ ‘ಮಾಣಿಕ್ಯ’ ಎಂಬ ಹೆಸರಿನಲ್ಲಿ ಕಿಚ್ಚ ಸುದೀಪ್ ರಿಮೇಕ್ ಮಾಡಿದ್ದರು. ಈ ಚಿತ್ರ ಯೂಟ್ಯೂಬ್ನಲ್ಲಿ ಉಚಿತವಾಗಿ ನೋಡಲು ಲಭ್ಯವಿದೆ. ಹಾಗೆಯೇ ಡಿಸ್ನೆ+ ಹಾಟ್ಸ್ಟಾರ್ ಆಪ್ನಲ್ಲೂ ನೋಡಬಹುದು.
2. ರೆಬೆಲ್: ರಾಘವ ಲಾರೆನ್ಸ್ ನಿರ್ದೇಶನಕ್ಕೆ ಎಂಟ್ರಿ ಕೊಟ್ಟಿದ್ದು ‘ರೆಬೆಲ್’ ಚಿತ್ರದ ಮೂಲಕ. ಈ ಚಿತ್ರದಲ್ಲಿ ಪ್ರಭಾಸ್ ಹಾಗೂ ತಮನ್ನಾ ಕಾಣಿಸಿಕೊಂಡಿದ್ದರು. ಸಖತ್ ಸ್ಟೈಲಿಶ್ ಆಗಿ ಮೂಡಿಬಂದಿದ್ದ ಈ ಚಿತ್ರ ಗಲ್ಲಾ ಪೆಟ್ಟಿಗೆಯಲ್ಲಿ ಅಂತಹ ಯಶಸ್ಸು ಗಳಿಸದಿದ್ದರೂ, ಈಗಲೂ ಫ್ಯಾನ್ಸ್ ಈ ಚಿತ್ರದ ಆಕ್ಷನ್ ದೃಶ್ಯಗಳನ್ನು ನೋಡಿ ಸಂತಸಪಡುತ್ತಾರೆ. ಈ ಚಿತ್ರ ಯೂಟ್ಯೂಬ್ನಲ್ಲಿ ಹಾಗೂ ಸನ್ ನೆಕ್ಸ್ಟ್ ಆಪ್ನಲ್ಲಿ ಲಭ್ಯವಿದೆ.
3. ಬಿಲ್ಲಾ: ಹಿಂದಿಯ ‘ಡಾನ್’ ಚಿತ್ರದ ರಿಮೇಕ್ ಆದ ಈ ಚಿತ್ರವನ್ನು ಮೆಹೆರ್ ರಮೇಶ್ ನಿರ್ದೇಶಿಸಿದ್ದರು. ಪ್ರಭಾಸ್ ಈ ಚಿತ್ರದಲ್ಲಿ ಡಬಲ್ ರೋಲ್ ಮಾಡಿದ್ದರು. ರಂಗ ಎಂಬ ಕಳ್ಳನ ಪಾತ್ರದಲ್ಲಿ ಹಾಗೂ ಬಿಲ್ಲಾ ಎಂಬ ಡಾನ್ ಪಾತ್ರದಲ್ಲಿ ನಟಿಸಿದ್ದ ಪ್ರಭಾಸ್ಗೆ ಅನುಷ್ಕಾ ಶೆಟ್ಟಿ ಸಾಥ್ ನೀಡಿದ್ದರು. ಈ ಚಿತ್ರವನ್ನು ಯೂಟ್ಯೂಬ್ನಲ್ಲಿ ಹಾಗೂ ಸನ್ ನೆಕ್ಸ್ಟ್ ಆಪ್ನಲ್ಲಿ ನೋಡಬಹುದು.
4. ಬುಜ್ಜಿಗಾಡು: ಪ್ರಭಾಸ್ ಹಾಗೂ ನಿರ್ದೇಶಕ ಪುರಿ ಜಗನ್ನಾಥ್ ಕಾಂಬಿನೇಷನ್ನಲ್ಲಿ ಮೂಡಿಬಂದ ಮೊದಲ ಚಿತ್ರವಿದು. ಈ ಚಿತ್ರದ ಮುಖಾಂತರ ಪ್ರಭಾಸ್ಗೆ ಮಾಸ್ ಅಭಿಮಾನಿಗಳು ಮತ್ತಷ್ಟು ಹೆಚ್ಚಾದರು. ಅಲ್ಲದೇ ಭರ್ಜರಿ ಸಂಭಾಷಣೆಗಳ ಮೂಲಕ ಈ ಚಿತ್ರದಲ್ಲಿ ಮಿಂಚಿದ್ದ ಪ್ರಭಾಸ್, ಆಗಿನ ಕಾಲದಲ್ಲಿ ಟ್ರೆಂಡ್ ಆಗಿದ್ದರು. ಇದರ ಯಶಸ್ಸು ನಿರ್ದೇಶಕ ಪುರಿ ಜಗನ್ನಾಥ್ಗೂ ಸಲ್ಲಬೇಕು. ‘ಬುಜ್ಜಿಗಾಡು’ವಿನಲ್ಲಿ ತ್ರಿಷಾ ಪ್ರಭಾಸ್ಗೆ ಜೋಡಿಯಾಗಿ ನಟಿಸಿದ್ದರು. ಆಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಈ ಚಿತ್ರ ಲಭ್ಯವಿದೆ.
5. ಛತ್ರಪತಿ: ನಿರ್ದೇಶಕ ರಾಜಮೌಳಿ ಹಾಗೂ ಪ್ರಭಾಸ್ ಕಾಂಬಿನೇಷನ್ನಲ್ಲಿ ಮೂಡಿಬಂದ ಮೊದಲ ಚಿತ್ರವಿದು. ಅಲ್ಲದೇ ಪ್ರಭಾಸ್ ವೃತ್ತಿ ಜೀವನದ ಪ್ರಾರಂಭದಲ್ಲಿ ಬಹುದೊಡ್ಡ ಹಿಟ್ ತಂದುಕೊಟ್ಟು, ಜನರಿಗೆ ಮಾಸ್ ನಾಯಕನ ಪರಿಚಯ ಮಾಡಿಸಿದ್ದು ಇದೇ ಚಿತ್ರ. ಈ ಚಿತ್ರದ ಮಾಸ್ ದೃಶ್ಯಗಳನ್ನು ಪೀಟರ್ ಹೈನ್ ಸಂಯೋಜಿಸಿದ್ದು ಅದ್ಭುತವಾಗಿ ಮೂಡಿಬಂದಿದೆ. ಚಿತ್ರವು ಡಿಸ್ನೆ+ ಹಾಟ್ಸ್ಟಾರ್ನಲ್ಲಿ ಲಭ್ಯವಿದೆ.
ಇವುಗಳಲ್ಲದೇ ಪ್ರಭಾಸ್ ಇನ್ನೂ ಹಲವಾರು ಮಾಸ್ ಹಿಟ್ಗಳನ್ನು ನೀಡಿದ್ದಾರೆ. ಕನ್ನಡದ ಕೆಲವು ರಿಮೇಕ್ ಚಿತ್ರಗಳಲ್ಲೂ ಅವರು ನಟಿಸಿದ್ದಾರೆ. ಪ್ರಸ್ತುತ ಪ್ರಭಾಸ್ ಬಹುದೊಡ್ಡ ನಾಯಕರಾಗಿ ಬೆಳೆದಿದ್ದು, ‘ಸಲಾರ್’, ‘ರಾಧೆ ಶ್ಯಾಮ್’, ‘ಆದಿಪುರುಷ್’, ‘ಪ್ರಾಜೆಕ್ಟ್ ಕೆ’ ಮೊದಲಾದ ಬಿಗ್ ಬಜೆಟ್ ಸಿನಿಮಾಗಳಿಗೆ ನಾಯಕರಾಗಿದ್ದಾರೆ.
ಇದನ್ನೂ ಓದಿ:
Prabhas: ‘ಸಲಾರ್’ ವಿಡಿಯೋ ಲೀಕ್: ಕಿಡಿಗೇಡಿಗಳ ಕೆಲಸದಿಂದ ಪ್ರಭಾಸ್ ಅಭಿಮಾನಿಗಳಿಗೆ ಪದೇಪದೇ ನಿರಾಸೆ
