ಎರಡನೇ ದಿನ ಗಳಿಕೆ ಹೆಚ್ಚಿಸಿಕೊಂಡ ‘ಆಪನ್​ಹೈಮರ್’ ಶನಿವಾರ ಗಳಿಸಿದ್ದೆಷ್ಟು

ಕ್ರಿಸ್ಟೊಫರ್ ನೋಲನ್ (Christopher Nolan) ನಿರ್ದೇಶನದ ‘ಆಪನ್​ಹೈಮರ್‘ (Oppenheimer) ಸಿನಿಮಾ ಭಾರತ ಸೇರಿದಂತೆ ವಿಶ್ವದಾದ್ಯಂತ ಜುಲೈ 21 ರಂದು ತೆರೆಗೆ ಬಂದಿದೆ. ಈ ಸಿನಿಮಾ ಭಾರತದಲ್ಲಿ ಬಿಡುಗಡೆ ಆಗುವ ಒಂದು ದಿನ ಮೊದಲೇ 1.68 ಲಕ್ಷ ಟಿಕೆಟ್​ಗಳು ಮುಂಗಡವಾಗಿ ಮಾರಾಟವಾಗಿದ್ದವೂ ಅದೂ ಮಲ್ಟಿಪ್ಲೆಕ್ಸ್​ಗಳಲ್ಲಿ (Multiplex) ಮಾತ್ರ. ಹಾಗಾಗಿ ಸಿನಿಮಾದ ಮೇಲೆ ಹಾಗೂ ಅದು ಮಾಡಲಿರುವ ಗಳಿಕೆ ಮೇಲೆ ಭಾರತೀಯ ಚಿತ್ರರಂಗದ ಮಾರುಕಟ್ಟೆ ವಿಶ್ಲೇಷಕರೂ ಕಣ್ಣಿಟ್ಟಿದ್ದರು. ಅಂತೆಯೇ ‘ಆಪನ್​ಹೈಮರ್’ ಸಿನಿಮಾ ಭಾರತದಲ್ಲಿ ಒಳ್ಳೆಯ ಕಲೆಕ್ಷನ್ ಮಾಡಿದೆ.

ಜುಲೈ 21 ರ ಶುಕ್ರವಾರ ಬಿಡುಗಡೆ ಆದ ‘ಆಪನ್​ಹೈಮರ್’ ಸಿನಿಮಾ ಮೊದಲ ದಿನ ಭಾರತದಲ್ಲಿ 13.70 ಕೋಟಿ ರೂಪಾಯಿ ಗಳಿಸಿತು. ಆ ಮೂಲಕ ಈ ವರ್ಷ ಭಾರತದಲ್ಲಿ ಬಿಡುಗಡೆ ಆದ ಹಾಲಿವುಡ್ ಸಿನಿಮಾಗಳ ಮೊದಲ ದಿನದ ದಾಖಲೆಯನ್ನು ಮೀರಿತು. ದಾಖಲೆಯ ಮೊತ್ತವೇ ಆದರೂ ಇದು ಬಹಳ ದೊಡ್ಡ ಮೊತ್ತವೇನೂ ಆಗಿರಲಿಲ್ಲ. ಹಾಗಾಗಿ ವಾರಾಂತ್ಯದ ಮೊದಲ ದಿನ ಶನಿವಾರ ಎಷ್ಟು ಕಲೆಕ್ಷನ್ ಆಗಲಿದ ಎಂಬ ಕುತೂಹಲವಿತ್ತು. ಇದೀಗ ಎರಡನೇ ದಿನದ ಕಲೆಕ್ಷನ್ ಲೆಕ್ಕಾಚಾರ ಸಹ ಹೊರಬಂದಿದೆ.

ಶನಿವಾರ ಒಂದೇ ದಿನ ‘ಆಪನ್​ಹೈಮರ್’ ಸಿನಿಮಾ ಭಾರತದಲ್ಲಿ 20 ಕೋಟಿ ರೂಪಾಯಿ ಹಣ ಗಳಿಸಿದೆ. ಮೊದಲ ದಿನದ ಗಳಿಕೆಗಿಂತಲೂ 50% ಹೆಚ್ಚಿನ ಗಳಿಕೆಯನ್ನು ಶನಿವಾರ ಮಾಡಿದೆ ಆಪನ್​ಹೈಮರ್. ಮಾತ್ರವೇ ಅಲ್ಲದೆ ಭಾನುವಾರ ಸಹ ಈ ಸಿನಿಮಾ ಬಹಳ ಒಳ್ಳೆಯ ಕಲೆಕ್ಷನ್ ಮಾಡುವ ನಿರೀಕ್ಷೆ ಮೂಡಿಸಿದೆ. ಭಾನುವಾರ ಆಪನ್​ಹೈಮರ್ ಸಿನಿಮಾ ಸುಮಾರು 25 ಕೋಟಿ ಹಣ ಗಳಿಸಬಹುದು ಎನ್ನಲಾಗುತ್ತಿದೆ.

ಇದನ್ನೂ ಓದಿ:Oppenheimer movie Review: ಆಪನ್​ಹೈಮರ್, ವಿಜ್ಞಾನಿಯೋ? ವಿಧ್ವಂಸಕನೋ, ದೇಶದ್ರೋಹಿಯೊ, ರಾಜಕಾರಣಿಯೋ?

ಮೊದಲ ವೀಕೆಂಡ್​ನಲ್ಲಿ ‘ಆಪನ್​ಹೈಮರ್’ ಸಿನಿಮಾ ಒಟ್ಟು ಸುಮಾರು 50 ಕೋಟಿಗೂ ಹೆಚ್ಚು ಮೊತ್ತ ಗಳಿಸಲಿದ್ದು, ಎರಡನೇ ವಾರಾಂತ್ಯದ ವೇಳೆಗೆ ನೂರು ಕೋಟಿ ಕಲೆಕ್ಷನ್ ಮಾಡಬಹುದು ಎನ್ನಲಾಗುತ್ತಿದೆ. 2021 ರಲ್ಲಿ ಬಿಡುಗಡೆ ಆಗಿದ್ದ ‘ಸ್ಪೈಡರ್​ಮ್ಯಾನ್ ನೋ ವೇ ಹೋಮ್’ ಸಿನಿಮಾ ಭಾರತದಲ್ಲಿ ನೂರು ಕೋಟಿ ಗಳಿಸಿತ್ತು. ಅದಾದ ಬಳಿಕ ಬಿಡುಗಡೆ ಆದ ಇನ್ಯಾವುದೇ ಹಾಲಿವುಡ್ ಸಿನಿಮಾ ಭಾರತದಲ್ಲಿ ನೂರು ಕೋಟಿ ಗಳಿಸಿಲ್ಲ. ಆದರೆ ‘ಆಪನ್​ಹೈಮರ್’ ಸಿನಿಮಾ ಭಾರತದಲ್ಲಿ ನೂರು ಕೋಟಿ ಗಳಿಸುವ ಭರವಸೆ ಮೂಡಿಸಿದೆ.

‘ಆಪನ್​ಹೈಮರ್’ ಸಿನಿಮಾವು ಅಣುಬಾಂಬ್ ಜನಕ, ವಿಜ್ಞಾನಿ ಜೆ ರಾಬರ್ಟ್ ಆಪನ್​ಹೈಮರ್ ಜೀವನ ಆಧರಿಸಿದ ಸಿನಿಮಾ ಆಗಿದೆ. ಸಿನಿಮಾದಲ್ಲಿ ಕಿಲಿಯನ್ ಮರ್ಫಿ, ರಾಬರ್ಟ್ ಆಪನ್​ಹೈಮರ್ ಪಾತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾದಲ್ಲಿ ಮ್ಯಾಟ್ ಡೇಮನ್, ರಾಬರ್ಟ್ ಡೌನಿ ಜೂನಿಯರ್, ಎಮಿಲಿ ಬ್ಲಂಟ್ ಇನ್ನೂ ಹಲವರು ನಟಿಸಿದ್ದಾರೆ. ಸಿನಿಮಾವನ್ನು ಕ್ರಿಸ್ಟೋಪರ್ ನೋಲನ್ ನಿರ್ದೇಶನ ಮಾಡಿದ್ದು, ಸಿನಿಮಾಕ್ಕೆ ಬಹಳ ಒಳ್ಳೆಯ ವಿಮರ್ಶೆಗಳು ಹರಿದುಬರುತ್ತಿವೆ. ಭಾರತದಲ್ಲಿ ಮಾತ್ರವೇ ಅಲ್ಲದೆ ವಿಶ್ವದೆಲ್ಲೆಡೆ ಸಿನಿಮಾ ಒಳ್ಳೆಯ ಗಳಿಕೆ ಮಾಡುತ್ತಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ