Salaga Movie Review: ‘ಸಲಗ’ ತುಂಬಾ ರಗಡ್​ ಆಗಿದೆ ಎಚ್ಚರಿಕೆ! ದುನಿಯಾ ವಿಜಯ್​ಗೆ ಮಾಸ್​ ಪ್ರೇಕ್ಷಕರೇ ಟಾರ್ಗೆಟ್​

ಸಲಗ ಚಿತ್ರ ವಿಮರ್ಶೆ: ಈ ಚಿತ್ರಕ್ಕೆ ದುನಿಯಾ ವಿಜಯ್​ ಹೀರೋ ಆಗಿದ್ದರೂ ಕೂಡ, ಅವರು ಬೇರೆ ಎಲ್ಲ ಕಲಾವಿದರಿಗೂ ಸೂಕ್ತ ಮನ್ನಣೆ ನೀಡಿದ್ದಾರೆ. ಪ್ರಮುಖವಾದ ಎಲ್ಲ ಪಾತ್ರಗಳಿಗೆ ಅಗತ್ಯ ಸ್ಕ್ರೀನ್​ ಸ್ಪೇಸ್​ ನೀಡಿದ್ದಾರೆ. ಒಟ್ಟಾರೆ ಸಿನಿಮಾ ಮಾಸ್​ ಆಗಿ ಮೂಡಿಬಂದಿದೆ.

Salaga Movie Review: ‘ಸಲಗ’ ತುಂಬಾ ರಗಡ್​ ಆಗಿದೆ ಎಚ್ಚರಿಕೆ! ದುನಿಯಾ ವಿಜಯ್​ಗೆ ಮಾಸ್​ ಪ್ರೇಕ್ಷಕರೇ ಟಾರ್ಗೆಟ್​
ಧನಂಜಯ, ದುನಿಯಾ ವಿಜಯ್​

ಚಿತ್ರ: ಸಲಗ
ನಿರ್ಮಾಣ: ಕೆಪಿ ಶ್ರೀಕಾಂತ್​
ನಿರ್ದೇಶನ: ದುನಿಯಾ ವಿಜಯ್​
ಪಾತ್ರವರ್ಗ: ದುನಿಯಾ ವಿಜಯ್​, ಸಂಜನಾ ಆನಂದ್​, ಡಾಲಿ ಧನಂಜಯ, ಶ್ರೀಧರ್​ ಮುಂತಾದವರು.
ಸ್ಟಾರ್​: 3.5 / 5

‘ಸಲಗ’ ಸಿನಿಮಾ ಮೇಲೆ ದುನಿಯಾ ವಿಜಯ್​ ಅಭಿಮಾನಿಗಳು ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದರು. ಆ ನಿರೀಕ್ಷೆಯನ್ನು ವಿಜಯ್​ ಹುಸಿಯಾಗಿಸಿಲ್ಲ. ತಮ್ಮ ಅಭಿಮಾನಿಗಳು ಏನು ಬಯಸುತ್ತಾರೋ ಅದನ್ನು ಅವರು ಅಚ್ಚುಕಟ್ಟಾಗಿ ತೆರೆಮೇಲೆ ತಂದಿದ್ದಾರೆ. ಇಷ್ಟು ದಿನ ಕೇವಲ ಹೀರೋ ಆಗಿ ಜನಮೆಚ್ಚುಗೆ ಗಳಿಸಿದ್ದ ಅವರು ‘ಸಲಗ’ ಸಿನಿಮಾದಿಂದ ತಾವೊಬ್ಬ ಉತ್ತಮ ನಿರ್ದೇಶಕ ಎಂಬುದನ್ನು ಕೂಡ ಸಾಬೀತುಪಡಿಸಿದ್ದಾರೆ.

ಅಂಡರ್​ವರ್ಲ್ಡ್​ ಲೋಕದ ಕಥೆ

ಇದು ಪಕ್ಕಾ ಭೂಗತಲೋಕದ ಕಥೆಯುಳ್ಳ ಸಿನಿಮಾ. ಇದರಲ್ಲೊಂದು ಸೇಡಿನ ಕಥೆ ಇದೆ. ಇಂಥ ಎಳೆ ಇಟ್ಟುಕೊಂಡು ಈಗಾಗಲೇ ಅನೇಕ ಸಿನಿಮಾಗಳು ಬಂದಿದ್ದರೂ ಕೂಡ ಅದ್ದೂರಿ ಮೇಕಿಂಗ್​ನಿಂದಾಗಿ ದುನಿಯಾ ವಿಜಯ್​ ಗಮನ ಸೆಳೆಯುತ್ತಾರೆ. ಚಿತ್ರದ ಒನ್​ ಲೈನ್ ಕಥೆ ಬಗ್ಗೆ ಹೇಳೋದಾದರೆ; ವಿಜಯ್​ ಅಲಿಯಾಸ್​ ಸಲಗ ಎಂಬುವವನು ನಟೋರಿಸ್​ ರೌಡಿ. ಯಾರನ್ನು ಕೊಲೆ ಮಾಡಲೂ ಆತ ಹೇಸುವುದಿಲ್ಲ. ಅಷ್ಟಕ್ಕೂ ಅವನು ಯಾಕೆ ಅಂಥ ರೌಡಿ ಆದ? ಊರ ತುಂಬೆಲ್ಲ ಅವನಿಗೆ ಯಾಕೆ ದುಶ್ಮನ್​ಗಳು ಇದ್ದಾರೆ? ಅವರನ್ನೆಲ್ಲ ಆತ ಹೇಗೆ ಮಟ್ಟ ಹಾಕುತ್ತಾನೆ? ಸಲಗನ ಎದೆಯೊಳಗೆ ಹೊತ್ತಿಕೊಂಡಿರುವ ಸೇಡಿನ ಬೆಂಕಿಗೆ ಕಾರಣ ಏನು? ಇದನ್ನೆಲ್ಲ ತಿಳಿಯಲು ಪೂರ್ತಿ ಚಿತ್ರ ನೋಡಬೇಕು.

ಮಾಸ್​ ಪ್ರೇಕ್ಷಕರಿಗೆ ಹಬ್ಬ

ಮಾಸ್​ ಸಿನಿಮಾವನ್ನು ಎಂಜಾಯ್​ ಮಾಡುವ ಪ್ರೇಕ್ಷಕರಿಗೆ ಈ ಚಿತ್ರದಿಂದ ಭರ್ಜರಿ ಮನರಂಜನೆ ಸಿಗಲಿದೆ. ಮೈನವಿರೇಳಿಸುವ ಸಾಹಸ ದೃಶ್ಯಗಳು, ಕಣ್ಣೀರು ತರಿಸುವ ಫ್ಯಾಮಿಲಿ ಸೆಂಟಿಮೆಂಟ್​, ಅಪರೂಪಕ್ಕೊಮ್ಮೆ ಕಚಗುಳಿ ಇಟ್ಟು ರಿಲ್ಯಾಕ್ಸ್​ ಮಾಡಿಸುವ ಕಾಮಿಡಿ ದೃಶ್ಯಗಳನ್ನು ಪಕ್ಕಾ ಕಮರ್ಷಿಯಲ್​ ಹದದಲ್ಲಿ ವಿಜಯ್​ ಹೆಣೆದಿದ್ದಾರೆ. ಯಾವ ಸನ್ನಿವೇಶವನ್ನೂ ಎಳೆದಾಡದೇ 2 ಗಂಟೆ 8 ನಿಮಿಷದಲ್ಲಿ ಅವರು ಸಿನಿಮಾ ಪೂರ್ಣಗೊಳಿಸಿದ್ದಾರೆ.

ಖಾರದ ಡೈಲಾಗ್​ಗಳಿವೆ ಹುಷಾರ್​!

ಮಾಸ್ತಿ ಬರೆದಿರುವ ಡೈಲಾಗ್​ಗಳು ಈ ಸಿನಿಮಾದಲ್ಲಿ ಮಹತ್ವದ ಪಾತ್ರ ವಹಿಸಿವೆ. ಈ ಸಂಭಾಷಣೆಗಳು ಪ್ಲಸ್​ ಮತ್ತು ಮೈನಸ್​ ಎರಡೂ ಆಗಬಹುದು. ಪಂಚಿಂಗ್​ ಡೈಲಾಗ್​ಗಳು ಖುಷಿ ಕೊಡುತ್ತವೆ. ಆದರೆ ಅದರ ನಡುವೆ ಬರುವ ಬೈಗುಳಗಳು ಒಂದು ವರ್ಗದ ಪ್ರೇಕ್ಷಕರಿಗೆ ಕಿರಿಕಿರಿ ಉಂಟು ಮಾಡಬಹುದು. ಸೂ*ಮಗ, ಬೋ*ಮಗ, ಗಾಂ*, ಶಾ* ಇತ್ಯಾದಿ ಬೈಗಳುಗಳು ಆಗಾಗ ಕೇಳಿಸುತ್ತಲೇ ಇರುತ್ತವೆ. ಪ್ರೇಕ್ಷಕರು ಇದನ್ನೆಲ್ಲ ಸಹಿಸಿಕೊಂಡರೆ ಚಿತ್ರ ರುಚಿಸಬಹುದು.

ಮುಲಾಜಿಲ್ಲದ ರಕ್ತಪಾತ

ಈ ಚಿತ್ರಕ್ಕೆ ಸೆನ್ಸಾರ್​ ಮಂಡಳಿಯಿಂದ ‘ಎ’ ಪ್ರಮಾಣಪ್ರತ ಸಿಕ್ಕಿದೆ. ಅಂದರೆ ವಯಸ್ಕರು ಮಾತ್ರ ನೋಡಬಹುದು. ಹಿಂಸೆಯ ದೃಶ್ಯಗಳು ಕಟ್ಟಿಗೆ ರಾಚುತ್ತವೆ. ಹಲವು ಸನ್ನಿವೇಶಗಳಲ್ಲಿ ರಕ್ತಪಾತ ರಾರಾಜಿಸಿದೆ. ಹಾಗಾಗಿ ಕೌಟುಂಬಿಕ ಪ್ರೇಕ್ಷಕರು ಇದನ್ನು ಇಷ್ಟಪಡದೆಯೂ ಇರಬಹುದು. ತುಂಬ ರಾ, ರಗಡ್​ ಮೇಕಿಂಗ್​ ನೋಡಿ ಎಂಜಾಯ್​ ಮಾಡುವವರಿಗೆ ‘ಸಲಗ’ ಚಿತ್ರ ಹೇಳಿ ಮಾಡಿಸಿದಂತಿದೆ.

‘ಸಲಗ’ಕ್ಕೆ ಬಲ ತಂದ ಕಲಾವಿದರು

ಈ ಚಿತ್ರಕ್ಕೆ ವಿಜಯ್​ ಹೀರೋ ಆಗಿದ್ದರೂ ಕೂಡ, ಅವರು ಬೇರೆ ಎಲ್ಲ ಕಲಾವಿದರಿಗೂ ಸೂಕ್ತ ಮನ್ನಣೆ ನೀಡಿದ್ದಾರೆ. ಪ್ರಮುಖವಾದ ಎಲ್ಲ ಪಾತ್ರಗಳಿಗೆ ಅಗತ್ಯ ಸ್ಕ್ರೀನ್​ ಸ್ಪೇಸ್​ ನೀಡಿದ್ದಾರೆ. ಸಾವಿತ್ರಿ (ಕಾಕ್ರೋಚ್​ ಸುಧಿ), ಎಸಿಪಿ ಸಾಮ್ರಾಟ್​ (ಡಾಲಿ ಧನಂಜಯ), ಕೆಂಡ (ಶ್ರೇಷ್ಠ) ಮುಂತಾದ ಪಾತ್ರಗಳು ಪರದೆ ಮೇಲೆ ಮಿಂಚಿವೆ. ಸಲಗನ ಬಾಲ್ಯದ ಪಾತ್ರ ಮಾಡಿರುವ ಹೊಸ ಕಲಾವಿದ ಶ್ರೀಧರ್​ ಅವರು ಸೆಕೆಂಡ್​ ಹೀರೋ ಎಂಬಷ್ಟು ಮಿಂಚಿದ್ದಾರೆ. ಕಥಾನಾಯಕನ ತಂದೆ-ತಾಯಿ ಪಾತ್ರದಲ್ಲಿ ಸಂಪತ್​ ಮತ್ತು ಉಷಾ ಗಮನಾರ್ಹ ಅಭಿನಯ ನೀಡಿದ್ದಾರೆ. ನೀನಾಸಂ ಅಶ್ವಥ್​, ಯಶ್​ ಶೆಟ್ಟಿ, ಚೆನ್ನಕೇಶವ ಮುಂತಾದವರು ವಿಲನ್​ ಆಗಿ ಅಚ್ಚರಿಸಿ ಮೂಡಿಸಿದ್ದಾರೆ. ದುನಿಯಾ ವಿಜಯ್​ ಅವರು ತಮ್ಮ ಹಳೇ ಟ್ರ್ಯಾಕ್​ಗೆ ಮರಳಿದ್ದು, ಅಭಿಮಾನಿಗಳಿದ್ದ ಭರ್ಜರಿ ಶಿಳ್ಳೆ, ಚಪ್ಪಾಳೆ ಗಿಟ್ಟಿಸಿಕೊಳ್ಳುತ್ತಾರೆ. ನಾಯಕಿ ಸಂಜನಾ ಆನಂದ್​ ಪಾತ್ರಕ್ಕೆ ಹೆಚ್ಚು ಸ್ಕ್ರೀನ್​ ಸ್ಪೇಸ್​ ಸಿಕ್ಕಿಲ್ಲ.​ ಸಿಕ್ಕಷ್ಟು ಸಮಯದಲ್ಲೇ ಅವರು ಗಮನ ಸೆಳೆಯುತ್ತಾರೆ.

ಚರಣ್​ ರಾಜ್​ ಕೂಡ ಹೀರೋ

ಸಲಗ ಚಿತ್ರಕ್ಕೆ ಸಂಗೀತ ನಿರ್ದೇಶಕ ಚರಣ್​ ರಾಜ್​ ಅವರು ಇನ್ನೊಬ್ಬ ಹೀರೋ ಇದ್ದಂತೆ. ಅವರು ಸಂಗೀತ ನೀಡಿರುವ ಹಾಡುಗಳಿಂದಾಗಿ ಸಿನಿಮಾದ ಕ್ರೇಜ್​ ಹೆಚ್ಚಿದೆ. ಅದಕ್ಕಿಂತಲೂ ಮುಖ್ಯವಾಗಿ ಅವರು ಹಿನ್ನಲೆ ಸಂಗೀತದ ಮೂಲಕ ಪ್ರೇಕ್ಷಕರನ್ನು ಸೆಳೆದುಕೊಂಡಿದ್ದಾರೆ. ಒಂದು ಮಾಸ್​ ಚಿತ್ರಕ್ಕೆ ಬೇಕಾದಂತಹ ಕಸುಬುದಾರಿಕೆಯನ್ನು ಅವರು ತೋರಿದ್ದಾರೆ. ಛಾಯಾಗ್ರಹಣ (ಶಿವ ಸೇನಾ), ಸಂಕಲನ (ದೀಪು ಎಸ್​. ಕುಮಾರ್​) ಸೇರಿ ಎಲ್ಲ ವಿಭಾಗದಲೂ ‘ಸಲಗ’ ತಾಂತ್ರಿಕ ಶ್ರೀಮಂತಿಕೆ ಮೆರೆದಿದೆ.

ಇದನ್ನೂ ಓದಿ:

‘ಚರಂಡಿ ಕ್ಲೀನ್​ ಮಾಡುವವನ ಪಾತ್ರ ಮಾಡ್ತೀನಿ’: ದುನಿಯಾ ವಿಜಯ್​ ನಿರ್ದೇಶನದಲ್ಲಿ ಶಿವಣ್ಣನಿಗೆ ನಟಿಸುವ ಆಸೆ

‘ಯಾರಿಂದ ತೊಂದರೆ ಆಗಿದೆ ಅನ್ನೋದು ಗೊತ್ತು’; ‘ಕೋಟಿಗೊಬ್ಬ 3’ ರದ್ದಾಗಿದ್ದಕ್ಕೆ ಸುದೀಪ್​ ವಿಡಿಯೋ ಸಂದೇಶ

Read Full Article

Click on your DTH Provider to Add TV9 Kannada