‘ನೀನು ಡೈಪರ್​ ಹಾಕ್ಕೋ’; ಪುರುಷ ಸ್ಪರ್ಧಿಗೆ ಖಡಕ್​ ಆದೇಶ ನೀಡಿದ ಶಮಿತಾ ಶೆಟ್ಟಿ

ಇದೇ ಮೊದಲ ಬಾರಿಗೆ ‘ಬಿಗ್​ ಬಾಸ್​ ಓಟಿಟಿ’ ಕಾರ್ಯಕ್ರಮ ನಡೆಯುತ್ತಿದ್ದು, ಇದರ ರೀತಿ-ನೀತಿ ಬೇರೆಯೇ ಆಗಿದೆ. ಖ್ಯಾತ ನಿರ್ಮಾಪಕ ಕರಣ್​ ಜೋಹರ್​ ಅವರು ಈ ಶೋ ನಿರೂಪಣೆ ಮಾಡುತ್ತಿದ್ದಾರೆ. ಶಿಲ್ಪಾ ಶೆಟ್ಟಿ ತಂಗಿ ಶಮಿತಾ ಶೆಟ್ಟಿ ಅವರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಿರುವುದು ಮಾತ್ರವಲ್ಲದೆ ಎಲ್ಲರ ಗಮನ ಸೆಳೆಯುತ್ತಿದ್ದಾರೆ. ಹತ್ತು ಹಲವು ಕಾರಣಗಳಿಂದಾಗಿ ಅವರು ದೊಡ್ಮನೆಯಲ್ಲಿ ಹೈಲೈಟ್​ ಆಗುತ್ತಿದ್ದಾರೆ. ಇತ್ತೀಚೆಗೆ ಅವರು ಪುರುಷ ಸ್ಪರ್ಧಿಯೊಬ್ಬರಿಗೆ ಖಡಕ್​ ಆದೇಶ ನೀಡಿದ್ದಾರೆ. ‘ನೀನು ಡೈಪರ್​ ಹಾಕ್ಕೋ’ ಎಂದು ನೇರವಾಗಿ ಹೇಳಿದ್ದಾರೆ. ಏನಿದು ಘಟನೆ? ಇಲ್ಲಿದೆ ವಿವರ.

ಬಿಗ್ ಬಾಸ್​ ಓಟಿಟಿ ಕಾರ್ಯಕ್ರಮವನ್ನು ಶಮಿತಾ ಶೆಟ್ಟಿ ತುಂಬ ಗಂಭೀರವಾಗಿ ಪರಿಗಣಿಸಿದ್ದಾರೆ. ಹಾಗಾಗಿ ಅವರು ಎಲ್ಲ ಟಾಸ್ಕ್​ನಲ್ಲಿಯೂ ಆ್ಯಕ್ಟೀವ್​ ಆಗಿ ಪಾಲ್ಗೊಳ್ಳುತ್ತಿದ್ದಾರೆ. ತಮ್ಮ ಬಗ್ಗೆ ಯಾರಾದರೂ ಇಲ್ಲಸಲ್ಲದ ಆರೋಪ ಮಾಡಲು ಬಂದರೆ ನೇರವಾಗಿ ಜಗಳಕ್ಕೆ ಇಳಿಯುತ್ತಿದ್ದಾರೆ. ಇದೆಲ್ಲದರ ನಡುವೆ ತಮ್ಮ ಟೀಮ್​ನವರ ಕಾರಣದಿಂದ ಟಾಸ್ಕ್​ನಲ್ಲಿ ಹಿನ್ನಡೆ ಉಂಟಾದರೆ ಅವರು ಅದನ್ನು ಕಿಂಚಿತ್ತೂ ಸಹಿಸುತ್ತಿಲ್ಲ. ಇದೇ ವಿಚಾರವಾಗಿ ಅವರು ಸಹ-ಸ್ಪರ್ಧಿ ರಾಕೇಶ್​ ಬಾಪಟ್​ಗೆ ಎಚ್ಚರಿಕೆ ನೀಡಿದ್ದಾರೆ. ಆ ವಿಡಿಯೋ ಈಗ ವೈರಲ್​ ಆಗುತ್ತಿದೆ.

ಬಿಗ್​ ಬಾಸ್​ ಮನೆಯಲ್ಲಿ ವೈಯಕ್ತಿಕ ಟಾಸ್ಕ್​ ಮಾತ್ರವಲ್ಲದೇ ಕೆಲವು ಸಲ ಎರಡು ಟೀಮ್​ಗಳ ನಡುವೆ ಪೈಪೋಟಿ ಬೀಳುತ್ತದೆ. ಆಗ ಒಬ್ಬರು ಮಾಡುವ ತಪ್ಪಿನಿಂದಾಗಿ ಅದೇ ತಂಡದ ಇನ್ನೊಬ್ಬರು ಸೋಲಬೇಕಾಗುತ್ತದೆ. ಶಮಿತಾ ಶೆಟ್ಟಿಗೆ ಇತ್ತೀಚೆಗಿನ ಟಾಸ್ಕ್​ನಲ್ಲಿ ಹೀಗೆಯೇ ಆಗಿದೆ. ಟಾಸ್ಕ್​ ಮಧ್ಯೆ ರಾಕೇಶ್ ಬಾಪಟ್​ ಅವರು ಪದೇಪದೇ ಶೌಚಾಲಯಕ್ಕೆ ಹೋಗಿ ಬಂದಿರುವುದನ್ನು ಶಮಿತಾ ವಿರೋಧಿಸಿದ್ದಾರೆ. ಈ ಬಗ್ಗೆ ತಮ್ಮ ಅಭಿಪ್ರಾಯವನ್ನು ತಿಳಿಸುವಾಗ ಅವರು ಕೊಂಚ ಖಾರವಾಗಿಯೇ ಮಾತನಾಡಿದ್ದಾರೆ.

‘ನನ್ನ ಮತ್ತು ನಿನ್ನ ನಡುವೆ ಕಮ್ಯೂನಿಕೇಷನ್​ ಗ್ಯಾಪ್​ ಇದೆ. ಟಾಸ್ಕ್​ ಮಧ್ಯೆದಲ್ಲಿ ನೀನು ಶೌಚಾಲಯಕ್ಕೆ ಹೋದರೆ ಹುಷಾರ್​! ನೀನು ಇಲ್ಲಿಗೆ ಯಾಕೆ ಬಂದಿದ್ದೀಯಾ? ಊಟ-ನಿದ್ರೆ ಮಾಡಿ, ಶೌಚಾಲಯಕ್ಕೆ ಹೋಗುತ್ತ ಟೈಮ್​ ಪಾಸ್​ ಮಾಡೋಕಾ? ಎಲ್ಲವನ್ನೂ ಕಂಟ್ರೋಲ್​ ಮಾಡಿಕೋ ಅಥವಾ ಡೈಪರ್​ ಬೇಕಾದ್ರೆ ಹಾಕ್ಕೋ. ಐ ಡೋಂಟ್​​ ಕೇರ್​’ ಎಂದು ಶಮಿತಾ ಕೂಗಾಡಿದ್ದಾರೆ. ‘ಡೈಪರ್​ ಇದ್ದಿದ್ದರೆ ನಾನು ಖಂಡಿತಾ ಧರಿಸುತ್ತಿದ್ದೆ. ಬಿಗ್​ ಬಾಸ್​ ನನಗೆ ದಯವಿಟ್ಟು ಡೈಪರ್​ ಕಳಿಸಿಕೊಡಿ’ ಎಂದು ರಾಕೇಶ್​ ಪ್ರತಿಕ್ರಿಯೆ ನೀಡಿದ್ದಾರೆ.

ಇದನ್ನೂ ಓದಿ:

‘ರಾಜ್ ಕುಂದ್ರಾ ರಾತ್ರಿಯ ಯೋಗ ಪೋಸ್​ ಕಲಿಸುತ್ತಾರೆ’; ಶಿಲ್ಪಾ ಶೆಟ್ಟಿ ತಂಗಿಗೆ ನೆಟ್ಟಿಗರಿಂದ ಹಿಗ್ಗಾಮುಗ್ಗಾ ಟ್ರೋಲ್​

ಶಿಲ್ಪಾ ಶೆಟ್ಟಿಯಿಂದಾಗಿ ತಾವು ಅನುಭವಿಸಿದ ಹಿಂಸೆ ಬಗ್ಗೆ ವಿವರಿಸಿ ಗಳಗಳನೆ ಅತ್ತ ತಂಗಿ ಶಮಿತಾ ಶೆಟ್ಟಿ