‘ಇದು ಒಂಭತ್ತನೇ ಸೀಸನ್ ಅಲ್ಲ, ಒಂದನೇ ಸೀಸನ್’​; ‘ಬಿಗ್ ಬಾಸ್ ಒಟಿಟಿ’ ಪ್ರೀಮಿಯರ್ ದಿನಾಂಕ ಪ್ರಕಟ

‘ಬಿಗ್ ಬಾಸ್​ ಕನ್ನಡ ಸೀಸನ್ 9’ (Bigg Boss Kannada) ಯಾವಾಗ ಆರಂಭ ಆಗಲಿದೆ ಎಂದು ವೀಕ್ಷಕರು ಕಾದು ಕೂತಿದ್ದರು. ಆದರೆ, ಈಗ ಕಲರ್ಸ್ ಕನ್ನಡ ವಾಹಿನಿ ಇದಕ್ಕೆ ಟ್ವಿಸ್ಟ್​ ನೀಡಿದೆ. ‘ಬಿಗ್​ ಬಾಸ್ ಒಟಿಟಿ’ಯ (Bigg Boss OTT) ಮೊದಲ ಸೀಸನ್ ಆರಂಭಿಸುತ್ತಿದೆ. ಈ ಬಗ್ಗೆ ಅಧಿಕೃತ ಘೋಷಣೆ ಆಗಿದೆ. ಆಗಸ್ಟ್ 6 ಹಾಗೂ 7ರಂದು ಈ ಶೋ ಪ್ರೀಮಿಯರ್ ಆಗಲಿದೆ. ಒಟಿಟಿಯಲ್ಲಿ ಮಾತ್ರ ಈ ಶೋ ಪ್ರಸಾರ ಕಾಣಲಿದೆ.

ಮೊದಲು ‘ಬಿಗ್​ ಬಾಸ್ ಒಟಿಟಿ’ ಪ್ರಸಾರ ಕಂಡಿದ್ದು ಹಿಂದಿಯಲ್ಲಿ. ಅಲ್ಲಿ ಇದಕ್ಕೆ ಮೆಚ್ಚುಗೆ ವ್ಯಕ್ತವಾಯಿತು. ಈ ಕಾರಣಕ್ಕೆ ಈ ಪ್ರಯೋಗವನ್ನು ಈಗ ಕನ್ನಡದಲ್ಲೂ ಮಾಡಲಾಗುತ್ತಿದೆ. ವೂಟ್​ ಮೂಲಕ ಈ ಶೋ ಪ್ರಸಾರ ಕಾಣಲಿದೆ ಅನ್ನೋದು ವಿಶೇಷ. ಇಂದು (ಜುಲೈ 23) ‘ಬಿಗ್ ಬಾಸ್ ಒಟಿಟಿ’  ಪ್ರೋಮೋ ರಿಲೀಸ್ ಮಾಡಲಾಗಿದೆ.

ಎಲ್ಲರೂ ಸುದೀಪ್​ಗಾಗಿ ಕಾಯುತ್ತಾ ಇರುತ್ತಾರೆ. ಸುದೀಪ್ ಆಗಮಿಸುತ್ತಿದ್ದಂತೆ ‘9ನೇ ಸೀಸನ್​ಗೆ ಆಲ್​ ದಿ ಬೆಸ್ಟ್​’ ಎನ್ನುತ್ತಾರೆ. ‘ಇದು ಒಂಭತ್ತಲ್ಲ, ಒಂದು’ ಎನ್ನುತ್ತಾರೆ ಕಿಚ್ಚ. ಆಗ ಎಲ್ಲರೂ ಒಮ್ಮೆ ಕನ್​ಫ್ಯೂಸ್ ಆಗುತ್ತಾರೆ. ‘ಒಟಿಟಿಯಲ್ಲಿ ಮಾತ್ರ ಈ ಶೋ ಪ್ರಸಾರ ಕಾಣಲಿದೆ’ ಎಂದು ಗೊಂದಲ ಬಗೆಹರಿಸುತ್ತಾರೆ ಸುದೀಪ್​. ಅದ್ದೂರಿಯಾಗಿ ಮೂಡಿ ಬಂದ ಈ ಪ್ರೋಮೋ ಸಾಕಷ್ಟು ವೈರಲ್ ಆಗುತ್ತಿದೆ.  ‘ಫಸ್ಟ್ ಟೈಮ್ ಟಿವಿಗೆ ಮೊದಲು ಒಂದು ಒಟಿಟಿ ಸೀಸನ್! ವಾರ ಆರು, ಮಜಾ ನೂರಕ್ಕೆ ನೂರು. ಗ್ರ್ಯಾಂಡ್ ಪ್ರೀಮಿಯರ್ ಆಗಸ್ಟ್ 6, ಸಂಜೆ 7’ ಎಂದು  ಕಲರ್ಸ್​ ಕನ್ನಡ ವಾಹಿನಿ ಪ್ರೋಮೋಗೆ ಕ್ಯಾಪ್ಶನ್ ನೀಡಿದೆ.

ಇದನ್ನೂ ಓದಿ: ನೀವು ಬಿಗ್ ಬಾಸ್ ಆಕಾಂಕ್ಷಿಗಳೇ?; ಹಾಗಿದ್ದರೆ ಕಲರ್ಸ್ ಕನ್ನಡ ನೀಡಿದೆ ವಿಶೇಷ ಸೂಚನೆ

ಕಿಚ್ಚ ಸುದೀಪ್ ಅವರು ‘ವಿಕ್ರಾಂತ್ ರೋಣ’ ಸಿನಿಮಾ ಕೆಲಸಗಳಲ್ಲಿ ಬ್ಯುಸಿ ಇದ್ದಾರೆ. ನಾನಾ ಕಡೆಗಳಲ್ಲಿ ತೆರಳಿ ಈ ಸಿನಿಮಾ ಪ್ರಚಾರ ಮಾಡುತ್ತಿದ್ದಾರೆ. ಈ ಸಿನಿಮಾ ಜುಲೈ 28ರಂದು ತೆರೆಗೆ ಬರುತ್ತಿದೆ. ಆ ಬಳಿಕ ಅವರು ಕಿರುತೆರೆಯಲ್ಲಿ ಬ್ಯುಸಿ ಆಗಲಿದ್ದಾರೆ. ಒಟಿಟಿ ಸೀಸನ್ ಮುಗಿದ ಬಳಿಕ ‘ಕನ್ನಡ ಬಿಗ್ ಬಾಸ್​ ಸೀಸನ್ 9’ ಆರಂಭ ಆಗಲಿದೆ.