‘ಫ್ಯಾಮಿಲಿ ಮ್ಯಾನ್ 3’ ಬಗ್ಗೆ ಸಿಕ್ಕಿದೆ ದೊಡ್ಡ ಅಪ್​ಡೇಟ್; ಇಲ್ಲಿದೆ ವಿವರ

ಮನೋಜ್ ಬಾಜ್​ಪಾಯಿ, ಪ್ರಿಯಾಮಣಿ (Priyamani) ಮೊದಲಾದವರು ನಟಿಸಿರೋ ‘ದಿ ಫ್ಯಾಮಿಲಿ ಮ್ಯಾನ್’ ಸರಣಿ ಪ್ರೇಕ್ಷಕರಿಗೆ ಸಖತ್ ಇಷ್ಟ. ಈಗಾಗಲೇ ಇದು ಎರಡು ಸೀಸನ್ ಪೂರ್ಣಗೊಳಿಸಿದೆ. ಮೂರನೇ ಸೀಸನ್​ಗೆ ಸಿದ್ಧತೆ ನಡೆಯುತ್ತಿದೆ. ಈ ಬಾರಿ ಯಾವ ಕಥೆಯ ಜೊತೆ ರಾಜ್ ಹಾಗೂ ಡಿಕೆ ಬರುತ್ತಾರೆ ಎನ್ನುವ ಕುತೂಹಲ ಪ್ರೇಕ್ಷಕರಿಗೆ ಇತ್ತು. ಅದಕ್ಕೆ ಉತ್ತರ ಸಿಕ್ಕಿದೆ. ಮನೋಜ್ ಬಾಜ್​ಪಾಯಿ ಅವರು ಈ ಸರಣಿ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಕಥೆ ಯಾವ ರೀತಿಯಲ್ಲಿ ಇರಲಿದೆ ಎಂಬುದನ್ನು ವಿವರಿಸಿದ್ದಾರೆ.

‘ದಿ ಫ್ಯಾಮಿಲಿ ಮ್ಯಾನ್ 3’ ಸೀಸನ್​ಗೆ ಈಗಾಗಲೇ ಶೂಟಿಂಗ್ ಶುರುವಾಗಿದೆ. ‘ದಿ ಫ್ಯಾಮಿ ಮ್ಯಾನ್ 2’ ಸರಣಿಯ ಕೊನೆಯಲ್ಲಿ ಮೂರನೇ ಸರಣಿ ಬರಲಿದೆ ಎನ್ನುವ ಸೂಚನೆಯನ್ನು ಕೊಡಲಾಗಿತ್ತು. ಈ ಬಾರಿ ವೈರಸ್ ಕುರಿತು ತೋರಿಸಲಾಗುತ್ತಿದೆ ಎಂಬ ಬಗ್ಗೆ ಹೇಳಲಾಗಿತ್ತು. ಅದಕ್ಕೆ ಪೂರಕವಾಗಿ ಮನೋಜ್ ಬಾಜ್​ಪಾಯಿ ಅವರು ಮಾತನಾಡಿದ್ದಾರೆ.

‘ಮೂರನೇ ಸರಣಿಯ ಶೂಟಿಂಗ್ ಈಶಾನ್ಯ ರಾಜ್ಯಗಳಲ್ಲಿ ನಡೆಯಲಿದೆ. ಎಲ್ಲಿ ಕಥೆ ಮುಗಿದಿತ್ತೋ ಅಲ್ಲಿಂದಲೇ ಕಥೆ ಮುಂದುವರಿಯಲಿದೆ. ಈ ಹಿಂದಿನ ಸರಣಿಗಳಿಗಿಂತ ಈಗಿನ ಸೀಸನ್ ಇನ್ನೂ ಉತ್ತಮವಾಗಿ, ಸುಂದರವಾಗಿ ಹಾಗೂ ಭಯಾನಕವಾಗಿ ಮೂಡಿ ಬರಲಿದೆ’ ಎಂದಿದ್ದಾರೆ ಮನೋಜ್​. ಈ ಮೊದಲು ಬಂದ ಸರಣಿಗಳಲ್ಲಿ ಅವರು ಹೇಳಿದ್ದ ಡೈಲಾಗ್​ಗಳು ಮೀಮ್​ಗಳಲ್ಲಿ ಹೆಚ್ಚು ಬಳಕೆ ಆಗಿತ್ತು. ಈ ಬಾರಿಯೂ ಅದೇ ರೀತಿಯ ಡೈಲಾಗ್​ಗಳು ಇರಲಿವೆಯೇ ಎನ್ನುವ ಕುತೂಹಲ ಅಭಿಮಾನಿಗಳಲ್ಲಿ ಇದೆ. ಇದಕ್ಕೆ ಅವರು ಹೌದು ಎನ್ನುವ ಉತ್ತರ ನೀಡಿದ್ದಾರೆ.

‘ಹೊಸ ಪರಿಸ್ಥಿತಿಗಳನ್ನು ಶ್ರೀಕಾಂತ್ ತಿವಾರಿ ಎದುರಿಸುತ್ತಾನೆ. ಮಕ್ಕಳು ದೊಡ್ಡವರಾಗಿದ್ದಾರೆ. ಅವನ ವೈಯಕ್ತಿಕ ಹಾಗೂ ವೃತ್ತಿಜೀವನದಲ್ಲಿ ಎದುರಾಗುವ ಸವಾಲಗಳು ಹೆಚ್ಚುತ್ತವೆ’ ಎಂದಿದ್ದಾರೆ ಮನೋಜ್​. ಇದರಿಂದ ಈ ಸರಣಿ ಯಾವ ರೀತಿಯಲ್ಲಿ ಇರಲಿದೆ ಎನ್ನುವ ಕುತೂಹಲ ಮೂಡಿದೆ. ಈ ಸೀಸನ್ ಬಗ್ಗೆ ಸಾಕಷ್ಟು ನಿರೀಕ್ಷೆ ಮೂಡಿದೆ.

ಇದನ್ನೂ ಓದಿ: ‘ಫ್ಯಾಮಿಲಿ ಮ್ಯಾನ್ 3’ ಸರಣಿಗಾಗಿ ಕಾದು ಕುಳಿತವರಿಗೆ ಬ್ಯಾಡ್ ನ್ಯೂಸ್ ನೀಡಿದ ಮನೋಜ್ ಬಾಜ್​ಪಾಯಿ

ರಾಜ್ ಹಾಗೂ ಡಿಕೆ ‘ದಿ ಫ್ಯಾಮಿಲಿ ಮ್ಯಾನ್ 2’ ಬಳಿಕ ‘ಫರ್ಜಿ’ ಸರಣಿ ಮಾಡಿದರು. ‘ಸಿಟಾಡೆಲ್: ಹನಿ ಬನಿ’ ಸರಣಿಯ ಶೂಟಿಂಗ್ ಈಗಾಗಲೇ ಪೂರ್ಣಗೊಂಡಿದೆ. ಇದು ಹಾಲಿವುಡ್ ಸಿಟಾಡೆಲ್​ನ ಇಂಡಿಯನ್ ವರ್ಷನ್ ಆಗಿದೆ. ಭಾರತದ ವರ್ಷನ್​ನಲ್ಲಿ ಸಮಂತಾ ಹಾಗೂ ವರುಣ್ ಧವನ್ ನಟಿಸಿದ್ದಾರೆ. ಈಗ ಅವರು ‘ದಿ ಫ್ಯಾಮಿಲಿ ಮ್ಯಾನ್ 3’ ಸೀರಿಸ್​ನಲ್ಲಿ ಬ್ಯುಸಿ ಆಗಿದ್ದಾರೆ. ಈ ವಿಚಾರ ಕೇಳಿ ಅವರ ಫ್ಯಾನ್ಸ್ ಸಖತ್ ಖುಷಿಪಟ್ಟಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ