‘ನಮ್ಮ 25 ಕೋಟಿ ನಮಗೆ ಹಿಂದಿರುಗಿಸಿ’; ನಯನತಾರಾ-ವಿಘ್ನೇಶ್​ಗೆ ಗಂಟುಬಿದ್ದ ನೆಟ್​ಫ್ಲಿಕ್ಸ್

ನಟಿ ನಯನಾತಾರಾ (Nayanthara) ಹಾಗೂ ನಿರ್ದೇಶಕ ವಿಘ್ನೇಶ್​ ಶಿವನ್​ಗೆ (Vignesh Shivan) ನೆಟ್​ಫ್ಲಿಕ್ಸ್ ಗಂಟು ಬಿದ್ದಿದೆ. ಒಟಿಟಿ ಸಂಸ್ಥೆ ಈ ದಂಪತಿಗೆ ಒಂದಲ್ಲ, ಎರಡಲ್ಲ ಬರೋಬ್ಬರಿ 25 ಕೋಟಿ ರೂಪಾಯಿ ಪಾವತಿಸಿತ್ತು. ಇದನ್ನು ಹಿಂದಿರುಗಿಸಿ ಎಂದು ನೆಟ್​ಫ್ಲಿಕ್ಸ್ ಇವರಿಗೆ ನೋಟಿಸ್ ನೀಡಿದೆ ಎನ್ನಲಾಗುತ್ತಿದೆ. ಇದು ಸದ್ಯದ ಮಟ್ಟಿಗೆ ಅಂತೆ-ಕಂತೆಯೇ. ಈ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆ ಆಗುತ್ತಿದೆ.

ನಯನತಾರಾ ಹಾಗೂ ವಿಘ್ನೇಶ್ ಶಿವನ್ ಜೂನ್ ತಿಂಗಳಲ್ಲಿ ಮದುವೆ ಆದರು. ತಿರುಪತಿಯಲ್ಲಿ ಮದುವೆ ಆಗಬೇಕು ಎಂಬುದು ಇವರ ಆಸೆ ಆಗಿತ್ತು. ಆದರೆ, ಇದಕ್ಕೆ ಅವಕಾಶ ಸಿಕ್ಕಿರಲಿಲ್ಲ. ಈ ಕಾರಣಕ್ಕೆ ಈ ಜೋಡಿ ತಮಿಳುನಾಡಿನ ಮಹಾಬಲಿಪುರಂನಲ್ಲಿ ವಿವಾಹ ಆಗಿತ್ತು. ಇವರ ಮದುವೆಯ ಸುಂದರ ಕ್ಷಣಗಳನ್ನು ನೆಟ್​ಫ್ಲಿಕ್ಸ್ ಸೆರೆ ಹಿಡಿದಿತ್ತು. ಇದನ್ನು ಎಕ್ಸ್​​ಕ್ಲೂಸಿವ್ ಆಗಿ ಪ್ರಸಾರ ಮಾಡಲು ದಂಪತಿಗೆ 25 ಕೋಟಿ ರೂಪಾಯಿ ನೀಡಿತ್ತು ಎನ್ನಲಾಗಿದೆ.

ಶೂಟಿಂಗ್​ಗೆ ಸಹಕಾರಿ ಆಗಲಿ ಎಂಬ ಕಾರಣಕ್ಕೆ ನಯನತಾರಾ ಮದುವೆಯಲ್ಲಿ ನೆಟ್​ಫ್ಲಿಕ್ಸ್ ಹಲವು ಅರೇಜ್​ಮೆಂಟ್ಸ್​ಗಳನ್ನು ಮಾಡಿತ್ತು. ಇದಲ್ಲದೆ, ಊಟದ ಖರ್ಚನ್ನು ನೆಟ್​ಫ್ಲಿಕ್ಸ್ ನೋಡಿಕೊಂಡಿದೆ ಎನ್ನಲಾಗಿದೆ. ಪ್ರತಿ ಪ್ಲೇಟ್​ಗೆ ಒಟಿಟಿ ದಿಗ್ಗಜ 3500 ರೂಪಾಯಿ ಪಾವತಿ ಮಾಡಿತ್ತು ಎನ್ನಲಾಗಿದೆ. ಆದರೆ, ಈಗ ನೆಟ್​ಫ್ಲಿಕ್ಸ್ ಈ ಡೀಲ್​ಅನ್ನು ರದ್ದು ಮಾಡಿದೆ.

ನೆಟ್​ಫ್ಲಿಕ್ಸ್ ಈ ದಂಪತಿಗೆ ಕೆಲ ಷರತ್ತುಗಳನ್ನು ವಿಧಿಸಿತ್ತು. ‘ಮದುವೆಯ ಫೋಟೋ ಹಾಗೂ ವಿಡಿಯೋಗಳನ್ನು ನಾವೇ ಪ್ರಸಾರ ಮಾಡುತ್ತೇವೆ, ನೀವು ಎಲ್ಲಿಯೂ ಅದನ್ನು ಪೋಸ್ಟ್ ಮಾಡಬಾರದು’ ಎಂಬುದು ಕೂಡ ಷರತ್ತಿನಲ್ಲಿತ್ತು ಎನ್ನಲಾಗಿದೆ. ಆದರೆ, ಈ ಷರತ್ತನ್ನು ವಿಘ್ನೇಶ್ ಶಿವನ್ ಮುರಿದಿದ್ದಾರೆ. ಮದುವೆ ಆಗುತ್ತಿದ್ದಂತೆ ಇನ್​ಸ್ಟಾಗ್ರಾಮ್​ನಲ್ಲಿ ಹಲವು ಫೋಟೋಗಳನ್ನು ಶೇರ್ ಮಾಡಿಕೊಂಡಿದ್ದರು. ಈ ಬಗ್ಗೆ ದಂಪತಿಗೆ ನೆಟ್​ಫ್ಲಿಕ್ಸ್ ಎಚ್ಚರಿಕೆ ನೀಡಿತ್ತು. ಆದಾಗ್ಯೂ, ವಿಘ್ನೇಶ್ ಶಿವನ್ ನಿರಂತರವಾಗಿ ಫೋಟೋ ಪೋಸ್ಟ್ ಮಾಡುತ್ತಲೇ ಬಂದರು. ಹೀಗಾಗಿ, ಈ ಡೀಲ್ ಕ್ಯಾನ್ಸಲ್ ಆಗಿದೆ ಎಂದು ವರದಿ ಆಗಿದೆ.

ಇದನ್ನೂ ಓದಿ: ನವ ದಂಪತಿ ನಯನತಾರಾ-ವಿಘ್ನೇಶ್​ ಶಿವನ್​ ನಡುವೆ ಮಲೈಕಾ ಅರೋರಾಗೆ ಏನು ಕೆಲಸ? ಫೋಟೋ ವೈರಲ್​

ಈ ಮದುವೆಗೆ ಶಾರುಖ್ ಖಾನ್, ಅಟ್ಲೀ, ರಜನಿಕಾಂತ್ ಸೇರಿ ಅನೇಕ ಸೆಲೆಬ್ರಿಟಿಗಳು ಬಂದಿದ್ದರು. ಈ ಕಾರಣಕ್ಕೂ ಈ ಸ್ಟಾರ್ ದಂಪತಿಯ ವಿವಾಹ ದೃಶ್ಯಗಳನ್ನು ಪ್ರಸಾರ ಮಾಡಲು ನೆಟ್​ಫ್ಲಿಕ್ಸ್ ಆಸಕ್ತಿ ತೋರಿತ್ತು. ಈ ಕಾರಣಕ್ಕೆ ಈಗ ಈ ದಂಪತಿ 25 ಕೋಟಿ ರೂಪಾಯಿ ಹಿಂದಿರುಗಿಸಬೇಕಿದೆ.