ಈ ವಾರ ಒಟಿಟಿಗೆ ಬಂದಿವೆ ಹಲವು ಸೂಪರ್ ಹಿಟ್ ಸಿನಿಮಾಗಳು: ನಿಮ್ಮ ಆಯ್ಕೆ ಯಾವುದು?

ಚಿತ್ರಮಂದಿರಗಳಲ್ಲಿ (Theater) ಒಳ್ಳೆಯ ಸಿನಿಮಾಗಳು ಸಾಲು-ಸಾಲಾಗಿ ಬರುತ್ತಿವೆ. ಕನ್ನಡ, ಹಿಂದಿ, ತಮಿಳು ಸಿನಿಮಾಗಳು ಸಾಲಾಗಿ ಹಿಟ್ ಆಗುತ್ತಿವೆ. ‘ಸಪ್ತಸಾಗರದಾಚೆ ಎಲ್ಲೋ’, ‘ಜವಾನ್‘ (Jawan), ‘ಜೈಲರ್’ ಇನ್ನು ಕೆಲವು ಹಿಟ್ ಸಿನಿಮಾಗಳು ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಅದರ ಜೊತೆಗೆ ಈ ವಾರ ಒಟಿಟಿಗೂ ಸಹ ಭರ್ಜರಿ ಹಿಟ್ ಸಿನಿಮಾಗಳು ಎಂಟ್ರಿ ಆಗಿವೆ. ಅದರಲ್ಲಿ ಕನ್ನಡದ ಇತ್ತೀಚಿನ ಹಿಟ್ ಸಿನಿಮಾಗಳು ಸಹ ಸೇರಿವೆ.

‘ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ’

ಸೂಪರ್ ಹಿಟ್ ಆಗಿದ್ದ ಕನ್ನಡದ ‘ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ’ ಸಿನಿಮಾ ಇದೇ ವಾರ ಜೀ5 ನಲ್ಲಿ ಸ್ಟ್ರೀಮಿಂಗ್ ಆರಂಭಿಸಿದೆ. ಜುಲೈ 21ಕ್ಕೆ ಬಿಡುಗಡೆ ಆಗಿದ್ದ ಈ ಸಿನಿಮಾ ಸೂಪರ್ ಹಿಟ್ ಎನಿಸಿಕೊಂಡಿತು. ಹೊಸ ಹುಡುಗರು, ಭಿನ್ನವಾಗಿ ಹೆಣೆದು, ಪ್ರಸ್ತುತ ಪಡಿಸಿದ ಈ ಸಿನಿಮಾ ಯುವಕರನ್ನು ಬಹುವಾಗಿ ಸೆಳೆದಿತ್ತು. ಇತ್ತೀಚೆಗಷ್ಟೆ ಸಿನಿಮಾ 50 ದಿನ ಪೂರೈಸಿದೆ.

‘ಕೌಸಲ್ಯ ಸುಪ್ರಜಾ ರಾಮ’

ಡಾರ್ಲಿಂಗ್ ಕೃಷ್ಣ ಮುಖ್ಯ ಪಾತ್ರದಲ್ಲಿ ನಟಿಸಿರುವ ‘ಕೌಸಲ್ಯ ಸುಪ್ರಜಾ ರಾಮ’ ಸಿನಿಮಾ ಸಹ ಇದೇ ವಾರ ಒಟಿಟಿಗೆ ಬಂದಿದೆ. ಸೆಪ್ಟೆಂಬರ್ 14ರ ರಾತ್ರಿಯಿಂದಲೇ ‘ಕೌಸಲ್ಯ ಸುಪ್ರಜಾ ರಾಮ’ ಸಿನಿಮಾ ಅಮೆಜಾನ್ ಪ್ರೈಂನಲ್ಲಿ ಸ್ಟ್ರೀಮಿಂಗ್ ಆರಂಭಿಸಲಿದೆ. ಶಶಾಂಕ್ ನಿರ್ದೇಶಿಸಿರುವ ಈ ಸಿನಿಮಾ ಫ್ಯಾಮಿಲಿ ಆಡಿಯೆನ್ಸ್​ ಅನ್ನು ಚಿತ್ರಮಂದಿರಕ್ಕೆ ಕರೆತರುವಲ್ಲಿ ಯಶಸ್ವಿಯಾಗಿತ್ತು. ಈಗ ಒಟಿಟಿ ಮೂಲಕ ಇನ್ನೂ ಹೆಚ್ಚು ಜನರಿಗೆ ಸಿನಿಮಾ ತಲುಪಲಿದೆ.

ಚಿರಂಜೀವಿಯ ‘ಭೋಲಾ ಶಂಕರ್’

ಚಿರಂಜೀವಿ ನಟನೆಯ ‘ಭೋಲಾ ಶಂಕರ್’ ಸಿನಿಮಾ ಆಗಸ್ಟ್ 11 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಿತ್ತು. ಚಿತ್ರಮಂದಿರದಲ್ಲಿ ಈ ಸಿನಿಮಾ ಹೀನಾಯ ಸೋಲು ಕಂಡಿತು. ಪ್ರೇಕ್ಷಕರು ಚಿರಂಜೀವಿಯ ಕತೆಯ ಆಯ್ಕೆಯ ಬಗ್ಗೆಯೇ ಅಸಮಾಧಾನ ವ್ಯಕ್ತಪಡಿಸಿದ್ದರು. ಕೆಲವೇ ದಿನಗಳಲ್ಲಿ ಚಿತ್ರಮಂದಿರಗಳಿಂದ ಎತ್ತಂಗಡಿಯಾದ ಈ ಸಿನಿಮಾ ಇದೀಗ ‘ನೆಟ್​ಫ್ಲಿಕ್ಸ್​’ ನಲ್ಲಿ ಸೆಪ್ಟೆಂಬರ್ 15ರಿಂದ ಲಭ್ಯವಾಗಲಿದೆ.

‘ರಾಮಬಾಣಂ’

ತೆಲುಗಿನ ನಟ ಗೋಪಿಚಂದ್ ನಟನೆಯ ‘ರಾಮಬಾಣಂ’ ಸಿನಿಮಾ ಸೆಪ್ಟೆಂಬರ್ 15ರಿಂದಲೇ ನೆಟ್​ಫ್ಲಿಕ್ಸ್​ನಲ್ಲಿ ಲಭ್ಯವಾಗಲಿದೆ. ಈ ಸಿನಿಮಾ ಕಳೆದ ತಿಂಗಳ ಆರಂಭದಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಿತ್ತು. ಸಿನಿಮಾದ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿದ್ದವು. ಇದೀಗ ಸಿನಿಮಾ ನೆಟ್​ಫ್ಲಿಕ್ಸ್​ನಲ್ಲಿ ಬಿಡುಗಡೆ ಆಗುತ್ತಿದೆ.

‘ಬಾರ್ಬಿ’

ಕಳೆದ ತಿಂಗಳು ಭಾರತದಲ್ಲಿ ದೊಡ್ಡ ಹವಾ ಎಬ್ಬಿಸಿತ್ತು ‘ಬಾರ್ಬಿ’ ಹಾಲಿವುಡ್ ಸಿನಿಮಾ. ಹಾಲಿವುಡ್​ನ ‘ಆಪನ್​ಹೈಮರ್’ ಸಿನಿಮಾ ಬಿಡುಗಡೆ ಆದ ದಿನವೇ ಬಾರ್ಬಿ ಸಿನಿಮಾ ಸಹ ಬಿಡುಗಡೆ ಆಗಿತ್ತು. ‘ಆಪನ್​ಹೈಮರ್​’ಗಿಂತಲೂ ಹೆಚ್ಚು ಮೊತ್ತವನ್ನು ಕಲೆ ಹಾಕಿತ್ತು ಸಹ. ಇದೀಗ ಈ ಸಿನಿಮಾ ಅಮೆಜಾನ್ ಪ್ರೈಂನಲ್ಲಿ ಸ್ಟ್ರೀಂ ಆಗುತ್ತಿದೆ. ಆದರೆ ಈ ಸಿನಿಮಾ ನೋಡಲು ಚಂದಾದಾರರು ಹೆಚ್ಚಿನ ಮೊತ್ತವನ್ನು ಪಾವತಿಸಬೇಕಿದೆ.

ಈ ಸಿನಿಮಾಗಳ ಜೊತೆಗೆ ಇನ್ನೂ ಹಲವು ಇಂಗ್ಲೀಷ್ ವೆಬ್ ಸರಣಿ, ಸಿನಿಮಾಗಳು, ತೆಲುಗು ವೆಬ್ ಸರಣಿ ‘ಅತಿಥಿ’, ‘ಮೈತ್ರಿ’ ಇನ್ನೂ ಹಲವು ವಿವಿಧ ಭಾಷೆಯ ಸಿನಿಮಾಗಳು, ವೆಬ್ ಸರಣಿಗಳು ಬಿಡುಗಡೆ ಆಗುತ್ತಿವೆ.