‘ವೂಟ್ ಸೆಲೆಕ್ಟ್​’ ಮೂಲಕ ನೇರವಾಗಿ ರಿಲೀಸ್​ ಆಗಲಿದೆ ‘ಡಿಯರ್​ ವಿಕ್ರಮ್​’; ಗಮನ ಸೆಳೆದ ಟ್ರೇಲರ್​

ನಟ ಸತೀಶ್​ ನೀನಾಸಂ (Sathish Ninasam) ಅವರು ಮೊದಲಿನಿಂದಲೂ ಭಿನ್ನವಾದ ಕಥಾಹಂದರಗಳ ಸಿನಿಮಾ ಒಪ್ಪಿಕೊಳ್ಳುತ್ತಲೇ ಬರುತ್ತಿದ್ದಾರೆ. ಅದೇ ಪ್ರಕಾರಕ್ಕೆ ಸೇರುವ ಚಿತ್ರ ‘ಡಿಯರ್​ ವಿಕ್ರಮ್​’. ಈ ಮೊದಲು ‘ಗೋದ್ರಾ’ ಎಂದಿದ್ದ ಈ ಸಿನಿಮಾದ ಶೀರ್ಷಿಕೆಯನ್ನು ಇತ್ತೀಚೆಗೆ ‘ಡಿಯರ್​ ವಿಕ್ರಮ್​’ (Dear Vikram) ಎಂದು ಬದಲಾಯಿಸಲಾಯಿತು. ಇನ್ನೇನು ಕೆಲವೇ ದಿನಗಳಲ್ಲಿ ಈ ಸಿನಿಮಾವನ್ನು ಪ್ರೇಕ್ಷಕರು ಕಣ್ತುಂಬಿಕೊಳ್ಳಬಹುದು. ಆದರೆ ಚಿತ್ರಮಂದಿರದಲ್ಲಿ ಅಲ್ಲ. ಬದಲಿಗೆ, ನೇರವಾಗಿ ಒಟಿಟಿ ಮೂಲಕ ರಿಲೀಸ್​ ಮಾಡಲು ನಿರ್ಧರಿಸಲಾಗಿದೆ. ಜೂನ್​ 30ರಿಂದ ಈ ಸಿನಿಮಾ ‘ವೂಟ್​ ಸೆಲೆಕ್ಟ್​’ನಲ್ಲಿ (Voot Select) ವೀಕ್ಷಣೆಗೆ ಲಭ್ಯವಾಗಲಿದೆ. ಈ ಕುರಿತು ಮಾಹಿತಿ ನೀಡಲು ಚಿತ್ರತಂಡ ಸುದ್ದಿಗೋಷ್ಠಿ ಆಯೋಜಿಸಿತ್ತು. ಈ ಸಿನಿಮಾಗೆ ಶ್ರದ್ಧಾ ಶ್ರೀನಾಥ್​ ನಾಯಕಿ.

ಒಂದಷ್ಟು ದಿನಗಳ ಹಿಂದೆ ‘ಡಿಯರ್ ವಿಕ್ರಮ್​’ ಸಿನಿಮಾ ಟೀಸರ್​ ಮೂಲಕ ಗಮನ ಸೆಳೆದಿತ್ತು. ಈಗ ಟ್ರೇಲರ್ ಕೂಡ ಅನಾವರಣ ಆಗಿದ್ದು, ಚಿತ್ರದ ಬಗ್ಗೆ ಇನ್ನಷ್ಟು ವಿವರಗಳು ತೆರೆದುಕೊಂಡಿವೆ. ಸಿನಿಮಾದ ಬಗ್ಗೆ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸುವಲ್ಲಿ ಈ ಟ್ರೇಲರ್​ ಯಶಸ್ವಿ ಆಗಿದೆ. ಇದು ಮಾಮೂಲಿ ನಾಯಕ-ನಾಯಕಿ ನಡುವಿನ ಲವ್​ ಸ್ಟೋರಿ ಅಲ್ಲ. ಕೇವಲ ವಿಲನ್​ ಜೊತೆಗಿನ ನಾಯಕನ ಹೊಡಿಬಡಿ ಕಹಾನಿ ಅಲ್ಲ. ಸಮಾಜದ ಕೆಲವು ಗಂಭೀರ ವಿಚಾರಗಳ ಕುರಿತಾದ ಸಿನಿಮಾ ಎಂಬುದು ಟ್ರೇಲರ್​ನಿಂದ ತಿಳಿದುಬಂದಿದೆ.

ಇದನ್ನು ಕ್ರಾಂತಿಕಾರಿಯೊಬ್ಬನ ಪ್ರೇಮಕತೆಯನ್ನು ಒಳಗೊಂಡ ಸಿನಿಮಾ ಎನ್ನಬಹುದು. ಸತೀಶ್​ ನೀನಾಸಂ ಅವರ ವೃತ್ತಿಜೀವನದಲ್ಲಿ ನೇರವಾಗಿ ಒಟಿಟಿಯಲ್ಲಿ ತೆರೆಕಾಣುತ್ತಿರುವ ಮೊದಲ ಸಿನಿಮಾ ಇದು. ಜೇಕಬ್ ವರ್ಗೀಸ್ ಜೊತೆ ಸಹ ನಿರ್ದೇಶಕರಾಗಿ ಕೆಲಸ ಮಾಡಿದ ಅನುಭವ ಹೊಂದಿರುವ ಕೆ.ಎಸ್. ನಂದೀಶ್ ಅವರು ‘ಡಿಯರ್ ವಿಕ್ರಮ್’ ಸಿನಿಮಾಗೆ ನಿರ್ದೇಶನ ಮಾಡಿದ್ದಾರೆ. ಕುಕ್ಕೆ ಸುಬ್ರಹ್ಮಣ್ಯ, ಹಾಸನ, ಭಟ್ಕಳ, ಕರ್ನೂಲ್ ಹಾಗೂ ಮಲೇಷ್ಯಾದಲ್ಲಿ ಚಿತ್ರೀಕರಣ ಮಾಡಲಾಗಿದೆ.

ಸತೀಶ್​ ನೀನಾಸಂ ಮತ್ತು ಶ್ರದ್ಧಾ ಶ್ರೀನಾಥ್​ ಮಾತ್ರವಲ್ಲದೇ ವಸಿಷ್ಠ ಸಿಂಹ, ಸೋನು ಗೌಡ, ಅಚ್ಯುತ್ ಕುಮಾರ್ ಮುಂತಾದವರು ಕೂಡ ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಇವರೆಲ್ಲರ ನಟನೆಯಿಂದಾಗಿ ಸಿನಿಮಾದ ಪಾತ್ರವರ್ಗ ಬಲವಾಗಿದೆ. ‘ವಾಸ್ತವವನ್ನು ಬಣ್ಣದ ಕನ್ನಡಕದೊಳಗಿನಿಂದ ಮಾತ್ರ ನೋಡಿ ಬೆಳೆದ ಹುಡುಗಿಯ ಪಾತ್ರ ನನ್ನದು. ಇಂಥ ಡಿಫರೆಂಟ್​ ಪಾತ್ರವನ್ನು ಮರೆಯಲು ಸಾಧ್ಯವಿಲ್ಲ’ ಎಂದು ಹೇಳಿದ್ದಾರೆ ಶ್ರದ್ಧಾ ಶ್ರೀನಾಥ್​.

ಇದನ್ನೂ ಓದಿ: ಕೆಲವೊಮ್ಮೆ ರೈತರ ಪರವಾಗಿ ನಿಂತರೂ ವಿಲನ್​ ಆಗುತ್ತೇವೆ; ಸತೀಶ್​ ನೀನಾಸಂ ನೇರ ಮಾತು

ಹೇಗಿದೆ ಸತೀಶ್​ ನೀನಾಸಂ ತಮಿಳು ಸಿನಿಮಾ ಲುಕ್​?; ರಮ್ಯಾ ರಿಲೀಸ್​ ಮಾಡಿದ್ರು ಪೋಸ್ಟರ್​