‘ರಾಧೆ ಶ್ಯಾಮ್’ ಸೋಲಿಗೆ 2 ಮುಖ್ಯ ಕಾರಣ ತಿಳಿಸಿದ ಪ್ರಭಾಸ್; ಪ್ರೇಕ್ಷಕರು ಈ ನೆಪವನ್ನೆಲ್ಲ ಒಪ್ಪುತ್ತಾರಾ?
Prabhas | Radhe Shyam: ನಟ ಪ್ರಭಾಸ್ ಅವರ ವೃತ್ತಿಜೀವನ ಈಗ ಸ್ವಲ್ಪ ಹಳಿ ತಪ್ಪಿದೆ. ‘ರಾಧೆ ಶ್ಯಾಮ್’ ಚಿತ್ರವು ಜನರ ನಿರೀಕ್ಷೆಯ ಮಟ್ಟ ತಲುಪಲು ವಿಫಲ ಆಗಿದ್ದೆಲ್ಲಿ ಎಂಬ ಬಗ್ಗೆ ಪ್ರಭಾಸ್ ಮಾತನಾಡಿದ್ದಾರೆ.
ನಟ ಪ್ರಭಾಸ್ (Prabhas) ಮೇಲೆ ಅಭಿಮಾನಿಗಳ ಬಹಳ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಆದರೆ ಅವರು ಯಾಕೋ ಪದೇ ಪದೇ ಆ ನಿರೀಕ್ಷೆಯನ್ನು ಹುಸಿಗೊಳಿಸುತ್ತಿದ್ದಾರೆ. ‘ಬಾಹುಬಲಿ’ ಸಿನಿಮಾದಿಂದ ಅವರಿಗೆ ಪ್ಯಾನ್ ಇಂಡಿಯಾ ಮಟ್ಟದ ಜನಪ್ರಿಯತೆ ಸಿಕ್ಕಿತು. ಆದರೆ ಆ ಬಳಿಕ ಬಂದ ಸಿನಿಮಾಗಳು ಹಿಟ್ ಆಗಲಿಲ್ಲ. ‘ಬಾಹುಬಲಿ 2’ (Bahubali 2) ನಂತರ ಪ್ರಭಾಸ್ ನಟಿಸಿದ ‘ಸಾಹೋ’ ಚಿತ್ರ ವಿಫಲವಾಯಿತು. ಅದೇ ರೀತಿ, ಇತ್ತೀಚೆಗೆ ತೆರೆಕಂಡ ‘ರಾಧೆ ಶ್ಯಾಮ್’ ಸಿನಿಮಾ ಸಹ ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ಮಾಡಲಿಲ್ಲ. ಈ ಎಲ್ಲ ಸೋಲುಗಳ ಬಗ್ಗೆ ಪ್ರಭಾಸ್ ಅವರು ಆತ್ಮಾವಲೋಕನ ಮಾಡಿಕೊಂಡಿದ್ದಾರೆ. ‘ರಾಧೆ ಶ್ಯಾಮ್’ ಸಿನಿಮಾ (Radhe Shyam Movie) ಯಾಕೆ ಸೋತಿರಬಹುದು ಎಂಬುದಕ್ಕೆ ಅವರು ಎರಡು ಕಾರಣ ನೀಡಿದ್ದಾರೆ. ಕೊವಿಡ್ ಮತ್ತು ಸ್ಕ್ರಿಪ್ಟ್ನಲ್ಲಿನ ಲೋಪದ ಕಡೆಗೆ ಅವರು ಕೈ ತೋರಿಸಿದ್ದಾರೆ. ‘ರಾಧೆ ಶ್ಯಾಮ್’ ಚಿತ್ರದಲ್ಲಿ ಪ್ರಭಾಸ್ಗೆ ಜೋಡಿಯಾಗಿ ಪೂಜಾ ಹೆಗ್ಡೆ ನಟಿಸಿದ್ದರು. ಅವರಿಗೂ ಕೂಡ ಬ್ಯಾಕ್ ಟು ಬ್ಯಾಕ್ ಸೋಲು ಎದುರಾಗಿದೆ.
‘ಬಾಹುಬಲಿ’ ರೀತಿಯ ಬ್ಲಾಕ್ ಬಸ್ಟರ್ ಹಿಟ್ ಸಿನಿಮಾ ನೀಡಿದ ಬಳಿಕ ಪ್ರಭಾಸ್ ಅವರ ಮೇಲೆ ಒತ್ತಡ ಹೆಚ್ಚಿತು. ಎಲ್ಲ ಸಿನಿಮಾಗಳು ಕೂಡ ‘ಬಾಹುಬಲಿ’ ರೀತಿ ಯಶಸ್ವಿ ಆಗಲು ಸಾಧ್ಯವಿಲ್ಲ. ಪ್ರಭಾಸ್ ನಟಿಸುವ ಚಿತ್ರಕ್ಕೆ ನಿರ್ದೇಶನ ಮಾಡುವವರು ಮತ್ತು ಹಣ ಹೂಡುವವರ ಮೇಲೂ ಆ ರೀತಿಯ ಒತ್ತಡ ಇರುತ್ತದೆ. ‘ಬಾಹುಬಲಿ’ಗಿಂತಲೂ ಹೆಚ್ಚಿನ ಮನರಂಜನೆ ನೀಡಬೇಕು ಎಂಬ ಉದ್ದೇಶ ಇಟ್ಟುಕೊಂಡೇ ಸಿನಿಮಾ ಶುರು ಮಾಡಲಾಗುತ್ತದೆ. ಆದರೆ ಎಲ್ಲೋ ಒಂದು ಕಡೆ ತಂಡ ಎಡವುತ್ತದೆ.
‘ರಾಧೆ ಶ್ಯಾಮ್ ಚಿತ್ರದ ಸೋಲಿಗೆ ಕೊವಿಡ್ ಕಾರಣ ಆಗಿರಬಹುದು ಅಥವಾ ನಾವು ಸ್ಕ್ರಿಪ್ಟ್ನಲ್ಲಿ ಏನನ್ನೋ ಮಿಸ್ ಮಾಡಿರಬಹುದು. ಈ ಬಗ್ಗೆ ಜನರಿಗೆ ಸರಿಯಾಗಿ ತಿಳಿದಿದೆ. ಆ ರೀತಿ ನನ್ನನ್ನು ನೋಡಲು ಜನರಿಗೆ ಇಷ್ಟ ಇಲ್ಲ ಎನಿಸುತ್ತದೆ. ಒಂದು ವೇಳೆ ಬಯಸಿದರೂ ಕೂಡ ನನ್ನನ್ನು ತುಂಬ ಒಳ್ಳೆಯವನಾಗಿ ನೋಡಲು ಅವರು ಇಷ್ಟಪಡುತ್ತಾರೆ’ ಎಂದು ಪ್ರಭಾಸ್ ಹೇಳಿದ್ದಾರೆ. ‘ಹಿಂದುಸ್ತಾನ್ ಟೈಮ್ಸ್’ಗೆ ನೀಡಿದ ಸಂದರ್ಶನದಲ್ಲಿ ಅವರು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಒಂದು ಸಿನಿಮಾ ಸೋತ ಬಳಿಕ ಹಲವು ಕಾರಣಗಳನ್ನು ನೀಡಬಹುದು. ಆದರೆ ಪ್ರೇಕ್ಷಕರ ತೀರ್ಮಾನವೇ ಅಂತಿಮವಾಗಿರುತ್ತದೆ.
ಸದ್ಯ ಪ್ರಭಾಸ್ ಕೈಯಲ್ಲಿ ಅನೇಕ ಪ್ರಾಜೆಕ್ಟ್ಗಳಿವೆ. ಪ್ರಶಾಂತ್ ನೀಲ್ ನಿರ್ದೇಶನದ ‘ಸಲಾರ್’ ಚಿತ್ರದಲ್ಲಿ ಅವರು ನಟಿಸುತ್ತಿದ್ದು ನಿರೀಕ್ಷೆ ಗರಿಗೆದರಿದೆ. ‘ಕೆಜಿಎಫ್: ಚಾಪ್ಟರ್ 2’ ಸೂಪರ್ ಹಿಟ್ ಆಗಿರುವುದರಿಂದ ‘ಸಲಾರ್’ ಮೇಲಿದ್ದ ಹೈಪ್ ದುಪ್ಪಟ್ಟಾಗಿದೆ. ಇನ್ನು, ‘ಆದಿಪುರುಷ್’ ಚಿತ್ರದಲ್ಲೂ ಪ್ರಭಾಸ್ ನಟಿಸುತ್ತಿದ್ದಾರೆ. ಆ ಸಿನಿಮಾದ ಕೆಲಸಗಳು ಕೂಡ ಭರದಿಂದ ಸಾಗುತ್ತಿವೆ.
ಇದನ್ನೂ ಓದಿ:
‘ನಮ್ಮ ಕೆಲಸ ನಿಲ್ಲಿಸಿ, ಮೊದಲು ಜೇಮ್ಸ್ ಚಿತ್ರದ ಕೆಲಸ ಮಾಡಿ’: ತಂತ್ರಜ್ಞರಿಗೆ ಪ್ರಭಾಸ್ ಹೇಳಿದ ಮಾತಿದು
‘ಬಾಹುಬಲಿ’ ಚಿತ್ರದಿಂದ ಪ್ರಭಾಸ್ಗೆ ಆದ ದೊಡ್ಡ ನಷ್ಟ ಏನು? ಅಂತೂ ಬಾಯ್ಬಿಟ್ಟ ಪ್ಯಾನ್ ಇಂಡಿಯಾ ಸ್ಟಾರ್
Published On - 9:14 am, Tue, 19 April 22