ನಟನ ಪತ್ನಿಯ ಪ್ರಯತ್ನದಿಂದ ಸಿಕ್ಕಿಬಿದ್ದ Tamil Rockers ಏಜೆಂಟ್; ಹೊರಬೀಳಲಿದೆ ಕಿಂಗ್​ಪಿನ್ ಹೆಸರು?

ಯಾವುದೇ ಸಿನಿಮಾ ರಿಲೀಸ್ ಆದರೂ ಕೆಲವೇ ಗಂಟೆಗಳಲ್ಲಿ ಅದು ಆನ್​ಲೈನ್​ನಲ್ಲಿ ಲಭ್ಯವಾಗುತ್ತದೆ. ಈ ಮೊದಲು ಬಿಗ್ ಬಜೆಟ್ ಸಿನಿಮಾಗಳಿಗೆ ಮಾತ್ರ ಈ ಕಾಟ ಇತ್ತು. ಈಗ ರಿಲೀಸ್ ಆಗುವ ಪ್ರತಿ ಸಿನಿಮಾಗೂ ಇದೇ ಸಮಸ್ಯೆ ಉಂಟಾಗುತ್ತಿದೆ. ಇದನ್ನು ತಡೆಯುವ ಪ್ರಯತ್ನ ನಡೆಯುತ್ತಿದೆಯಾದರೂ ಸಾಧ್ಯವಾಗಿಲ್ಲ. ಈ ಮಧ್ಯೆ ಕೇರಳ ಸೈಬರ್ ಕ್ರೈಮ್ ಪೊಲೀಸರು ಪೈರಸಿ ವೆಬ್​ಸೈಟ್​ನಲ್ಲಿ ಸಾಕಷ್ಟು ಕುಖ್ಯಾತಿ ಗಳಿಸಿರುವ Tamil Rockers ಏಜೆಂಟ್​ನ ಬಂಧಿಸಿದ್ದಾರೆ. ಈತ ಮಧುರೈನಲ್ಲಿ ಧನುಷ್ ನಟನೆಯ ‘ರಾಯನ್’ ಸಿನಿಮಾ ರೆಕಾರ್ಡ್​ ಮಾಡುತ್ತಿದ್ದ. ಈತನ ವಿಚಾರಣೆ ವೇಳೆ Tamil Rockers ಸೈಟ್​ನ ಕಿಂಗ್​ಪಿನ್ ಹೆಸರು ಹೊರ ಬೀಳಲಿದೆಯೇ ಎನ್ನುವ ಪ್ರಶ್ನೆ ಮೂಡಿದೆ.

Tamil Rockers ಮೊದಲಿನಿಂದಲೂ ಸಿನಿಮಾನ ಪೈರಸಿ ಮಾಡುತ್ತಾ ಬರುತ್ತಿದೆ. ಸಿನಿಮಾ ರಿಲೀಸ್ ಆದ ದಿನವೇ ಈ ವೆಬ್​ಸೈಟ್​ನಲ್ಲಿ ಅಪ್​ಲೋಡ್ ಆದ ಉದಾಹರಣೆ ಇದೆ. ಇತ್ತೀಚೆಗೆ ಮಲಯಾಳಂನಲ್ಲಿ ಪೃಥ್ವಿರಾಜ್ ನಟನೆಯ ‘ಗುರವಾಯುರಪ್ಪನ್ ಅಂಬಲನಾದೈ’ ಸಿನಿಮಾ ರಿಲೀಸ್ ಆಗಿತ್ತು. ಈ ಚಿತ್ರದ ಪೈರಸಿ ಕಾಪಿ ತಮಿಳ್ ರಾಕರ್ಸ್​ ಸೈಟ್​ನಲ್ಲಿ ಲಭ್ಯವಾಗಿತ್ತು. ಇದು ನಿರ್ಮಾಪಕಿ ಹಾಗೂ ಸ್ಟಾರ್ ಹೀರೋ ಪೃಥ್ವಿರಾಜ್​ ಸುಕುಮಾರನ್ ಅವರ ಪತ್ನಿ ಸುಪ್ರಿಯಾ ಮೆನನ್ ಕೋಪಕ್ಕೆ ಕಾರಣ ಆಗಿತ್ತು. ಈ ಬಗ್ಗೆ ಅವರು ದೂರು ನೀಡಿ ವಿಚಾರಣೆ ನಡೆಸಲು ಕೋರಿದ್ದರು.

ಪೊಲೀಸರು ತನಿಖೆ ನಡೆಸಿ ಸ್ಟೀಫನ್ ರಾಜ್​ನ ಬಂಧಿಸಿದ್ದಾರೆ. ಇತ್ತೀಚೆಗೆ ರಿಲೀಸ್ ಆದ ಸಿನಿಮಾಗಳ ಪೈರೇಟೆಡ್ ಕಾಪಿಗಳು ಈತನ ಬಳಿ ಇದ್ದವು. ಸ್ಟೀಫನ್ ರಾಜ್ ಸಿನಿಮಾನ ಶೂಟ್ ಮಾಡಲು ಸಾಕಷ್ಟು ಮೆಥಡ್​ಗಳನ್ನು ಬಳಕೆ ಮಾಡಿಕೊಳ್ಳುತ್ತಿದ್ದ. ಥಿಯೇಟರ್ ಸೀಟ್ ಮೇಲೆ ಇರುವ ಕಪ್ ಹೋಲ್ಡರ್ ಮೇಲೆ ಮೊಬೈಲ್ ಇಟ್ಟು ಸಿನಿಮಾ ರೆಕಾರ್ಡ್ ಮಾಡುತ್ತಿದ್ದ. ಈತನಿಗೆ ತಮಿಳ್ ರಾಕರ್ಸ್​ ಕಡೆಯಿಂದ ಪ್ರತಿ ಸಿನಿಮಾಗೆ 5 ಸಾವಿರ ರೂಪಾಯಿ ಸಿಗುತ್ತಿತ್ತು ಎನ್ನಲಾಗಿದೆ.

ಇದನ್ನೂ ಓದಿ: ‘ಬಡೇ ಮಿಯಾ ಚೋಟೆ ಮಿಯಾ’ ಟ್ವಿಟರ್ ವಿಮರ್ಶೆ; ಅಕ್ಷಯ್, ಟೈಗರ್​ಗಿಂತ ಪೃಥ್ವಿರಾಜ್​ಗೆ ಹೆಚ್ಚು ಅಂಕ

ಸ್ಟೀಫನ್ ರಾಜ್ ತಿರುವನಂತಪುರದ ಗೆಸ್ಟ್​ಹೌಸ್​ನಲ್ಲಿ ವರ್ಷದಿಂದ ಈಚೆಗೆ ವಾಸವಾಗಿದ್ದಾನೆ. ತಮಿಳ್ ರಾಕರ್ಸ್​ ಗ್ರೂಪ್ ಜೊತೆ ಈತನಿಗೆ ನಂಟಿದೆ ಎನ್ನಲಾಗಿದೆ. ಈತನ ಮೊಬೈಲ್ ಬೆಲೆ ಲಕ್ಷದ ಮೇಲಿದೆ. ಈತನಿಂದ ತಮಿಳ್ ರಾಕರ್ಸ್ ಕಿಂಗ್​ಪಿನ್ ಅರೆಸ್ಟ್ ಆಗುತ್ತಾನಾ ಎಂಬುದನ್ನು ಕಾದು ನೋಡಬೇಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 7:02 am, Tue, 30 July 24