‘ಪಠಾಣ್’ ನಿರ್ದೇಶಕನ ಜತೆ ನಟ ಪ್ರಭಾಸ್ ಸಿನಿಮಾ; ಮಾಸ್ ಆ್ಯಕ್ಷನ್ನಲ್ಲಿ ಡಾರ್ಲಿಂಗ್
ಸಿದ್ದಾರ್ಥ್ ಆನಂದ್ ಅವರ ಸಿನಿಮಾಗಳು ಸಾಕಷ್ಟು ಮಾಸ್ ಆಗಿರುತ್ತವೆ. ಈಗ ಅವರು ಟಾಲಿವುಡ್ ನಟ ಪ್ರಭಾಸ್ ಜತೆ ಕೈ ಜೋಡಿಸಿದ್ದಾರೆ.
Updated on: Jan 16, 2023 | 10:50 AM
‘ಬಾಹುಬಲಿ 2’ ಸಿನಿಮಾ ತೆರೆಗೆ ಬಂದು ಹಲವು ವರ್ಷಗಳೇ ಕಳೆದಿವೆ. ಈ ಚಿತ್ರದ ಬಳಿಕ ಪ್ರಭಾಸ್ಗೆ (Actor Prabhas) ದೊಡ್ಡ ಮಟ್ಟದ ಯಶಸ್ಸು ಸಿಕ್ಕಿಲ್ಲ. ಈ ಬಗ್ಗೆ ಅಭಿಮಾನಿಗಳಿಗೆ ಬೇಸರವಂತೂ ಇದೆ. ಆದರೆ, ಅವರು ಸಾಲು ಸಾಲು ಸಿನಿಮಾ ಒಪ್ಪಿಕೊಂಡಿರುವುದರಿಂದ ಯಾವುದಾದರೂ ಒಂದು ಚಿತ್ರವಾದರೂ ಹಿಟ್ ಆಗಬಹುದು ಎನ್ನುವ ನಿರೀಕ್ಷೆ ಅಭಿಮಾನಿಗಳದ್ದು. ಹೀಗಿರುವಾಗಲೇ ಪ್ರಭಾಸ್ ಮತ್ತೊಂದು ಸಿನಿಮಾಗೆ ಸಹಿ ಹಾಕಿದ್ದಾರೆ. ಅದೂ ‘ಪಠಾಣ್’ ಚಿತ್ರದ ನಿರ್ದೇಶಕ ಸಿದ್ದಾರ್ಥ್ ಆನಂದ್ ಜತೆ ಎಂಬುದು ವಿಶೇಷ.
ಸಿದ್ದಾರ್ಥ್ ಆನಂದ್ ಅವರ ಸಿನಿಮಾಗಳು ಸಾಕಷ್ಟು ಮಾಸ್ ಆಗಿರುತ್ತವೆ. ಅವರ ನಿರ್ದೇಶನದ ಸಿನಿಮಾಗಳಲ್ಲಿ ಹೊಡಿಬಡಿ ದೃಶ್ಯಗಳಂತೂ ಮಿತಿಮೀರಿ ಇರುತ್ತವೆ. ಈಗ ಸಿದ್ದಾರ್ಥ್ ಆನಂದ್ ನಿರ್ದೇಶನ ಮಾಡುತ್ತಿರುವ ‘ಪಠಾಣ್’ ಚಿತ್ರದಲ್ಲೂ ಮಾಸ್ ಅಂಶ ಇದೆ. ಇದು ಟ್ರೇಲರ್ ಮೂಲಕ ಸಾಬೀತಾಗಿದೆ. ಈ ಮೊದಲು ತೆರೆಗೆ ಬಂದ ‘ವಾರ್’ ಚಿತ್ರದಲ್ಲೂ ಆ್ಯಕ್ಷನ್ ಇತ್ತು. ಈಗ ಅವರು ಟಾಲಿವುಡ್ ನಟ ಪ್ರಭಾಸ್ ಜತೆ ಕೈ ಜೋಡಿಸಿದ್ದಾರೆ.
ಮೈತ್ರಿ ಮೂವಿ ಮೇಕರ್ಸ್ನ ನವೀನ್ ಯೆರ್ನೇನಿ ಅವರು ಇತ್ತೀಚೆಗೆ ‘ಎನ್ಬಿಕೆ ಸೀಸನ್ 2’ರಲ್ಲಿ ಭಾಗಿ ಆಗಿದ್ದರು. ಈ ವೇಳೆ ಅವರಿಗೆ ಪ್ರಭಾಸ್ ಜತೆಗಿನ ಹೊಸ ಸಿನಿಮಾ ಬಗ್ಗೆ ಪ್ರಶ್ನೆ ಮಾಡಲಾಯಿತು. ಇದನ್ನು ನವೀನ್ ಒಪ್ಪಿದ್ದಾರೆ. ಜತೆಗೆ ಈ ಸಿನಿಮಾಗೆ ಬಾಲಿವುಡ್ ನಿರ್ದೇಶಕ ಸಿದ್ದಾರ್ಥ್ ಆನಂದ್ ನಿರ್ದೇಶನ ಮಾಡುತ್ತಿದ್ದಾರೆ ಎನ್ನುವ ವಿಚಾರವನ್ನು ರಿವೀಲ್ ಮಾಡಿದ್ದಾರೆ.
ಸಿದ್ದಾರ್ಥ್ ಆನಂದ್ ಜತೆಗಿನ ಚಿತ್ರದಲ್ಲಿ ಪ್ರಭಾಸ್ ಮಾಸ್ ಅವತಾರ ತಾಳಲಿದ್ದಾರೆ ಎಂಬುದು ಖಚಿತವಾಗಿದೆ. ಇದನ್ನು ಕೇಳಿ ಪ್ರಭಾಸ್ ಫ್ಯಾನ್ಸ್ ಖುಷಿಯಾಗಿದ್ದಾರೆ. ‘ರಾಧೆ ಶ್ಯಾಮ್’ ಚಿತ್ರದಲ್ಲಿ ಪ್ರಭಾಸ್ ಯಾವುದೇ ಪೈಟ್ ಮಾಡಿರಲಿಲ್ಲ. ಹೀಗಾಗಿ, ಪ್ರಭಾಸ್ ಮಾಸ್ ಅವತಾರ ತಾಳಲಿ ಎಂದು ಫ್ಯಾನ್ಸ್ ಕಾದಿದ್ದಾರೆ.
ಇದನ್ನೂ ಓದಿ: Prabhas: ‘ಸಲ್ಮಾನ್ ಖಾನ್ ಮದುವೆ ಆದ ನಂತರವೇ ನನ್ನ ವಿವಾಹ’: ಎಲ್ಲರೆದುರು ಘೋಷಿಸಿದ ಪ್ರಭಾಸ್
ಪ್ರಭಾಸ್ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾರೆ. ‘ಆದಿಪುರುಷ್’, ‘ಪ್ರಾಜೆಕ್ಟ್ ಕೆ’, ‘ಸಲಾರ್’ ಮೊದಲಾದ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಪ್ರಶಾಂತ್ ನೀಲ್ ನಿರ್ದೇಶನದ ‘ಸಲಾರ್’ ಸಿನಿಮಾ ಬಗ್ಗೆ ಅಭಿಮಾನಿಗಳಿಗೆ ಸಾಕಷ್ಟು ನಿರೀಕ್ಷೆ ಇದೆ.
ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
