ಸೀಕ್ವೆಲ್​​ನಲ್ಲಿ ನಟಿಸಬಾರದೆಂಬ ನಿರ್ಧಾರವನ್ನು ರಜನಿ ಬದಲಿಸಿದ್ದು ಏಕೆ?

ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ಬಹುನಿರೀಕ್ಷಿತ ‘ಜೈಲರ್ 2’ (Jailer 2) ಸಿನಿಮಾ ಅಕ್ಟೋಬರ್ 15ರಂದು ತೆರೆಕಾಣಲು ಸಜ್ಜಾಗಿದೆ. 2023ರ ಬ್ಲಾಕ್‌ಬಸ್ಟರ್ ಹಿಟ್ ಚಿತ್ರ ‘ಜೈಲರ್’ ನ ಮುಂದುವರಿದ ಭಾಗವಾಗಿರುವ ಈ ಸಿನಿಮಾದಲ್ಲಿ ರಜನಿಕಾಂತ್ ಮತ್ತೊಮ್ಮೆ ‘ಮುತ್ತುವೇಲ್ ಪಾಂಡಿಯನ್’ ಪಾತ್ರದಲ್ಲಿ ಅಬ್ಬರಿಸಿದ್ದಾರೆ. ಚಿತ್ರದ ಪ್ರಚಾರ ಕಾರ್ಯಕ್ರಮದಲ್ಲಿ ಮಾತನಾಡಿರು ರಜನಿಕಾಂತ್, ತಾವು, ತಮ್ಮ ಸಿನಿಮಾದ ಸೀಕ್ವೆಲ್​​ಗಳಲ್ಲಿ ನಟಿಸದೇ ಇರಲು ನಿರ್ಧರಿಸಿದ್ದಾಗಿ, ಆದರೆ ‘ಜೈಲರ್ 2’ ಸಿನಿಮಾಕ್ಕಾಗಿ ಆ ನಿರ್ಧಾರ ಬದಲಾವಣೆ ಮಾಡಿದ್ದಕ್ಕೆ ಕಾರಣ ವಿವರಿಸಿದ್ದಾರೆ.

ಹಿಂದೆ ತಮ್ಮ ಹಲವು ಬ್ಲಾಕ್‌ಬಸ್ಟರ್ ಚಿತ್ರಗಳಿಗೆ ಸೀಕ್ವೆಲ್ ಮಾಡಲು ಬಂದ ಆಫರ್‌ಗಳನ್ನು ರಜನಿಕಾಂತ್ ತಿರಸ್ಕರಿಸಿದ್ದರು. ವಿಶೇಷವಾಗಿ, ಬ್ಲಾಕ್ ಬಸ್ಟರ್, ಕಲ್ಟ್ ಸಿನಿಮಾ ‘ಭಾಷಾ 2’ ಹಾಗೂ ‘ಪೇಟ 2’ ಚಿತ್ರಗಳಿಗೆ ಬಂದ ಆಫರ್​​ಗಳಿಗೆ ಅವರು ನೋ ಎಂದಿದ್ದರು. ‘ಸಾಮಾನ್ಯವಾಗಿ ಸೀಕ್ವೆಲ್‌ಗಳ ಬಗ್ಗೆ ನನಗೆ ಆಸಕ್ತಿ ಇಲ್ಲ. ಏಕೆಂದರೆ ಮೊದಲ ಭಾಗದ ಕಥೆಗೆ ಸ್ವಲ್ಪ ಹೆಚ್ಚು ಮಸಾಲೆ ಸೇರಿಸಿ ಮತ್ತೊಂದು ಸಿನಿಮಾ ಮಾಡಿದಂತೆ ಭಾಸವಾಗುತ್ತದೆ. ಕಾರ್ತಿಕ್ ಸುಬ್ಬರಾಜ್ ವಿಜಯ್ ಸೇತುಪತಿ ಪಾತ್ರವನ್ನು ವಿಸ್ತರಿಸಿ ‘ಪೇಟ 2’ ಮಾಡೋಣ ಎಂದಾಗಲೂ ನಾನು ಬೇಡ ಎಂದಿದ್ದೆ’ ಎಂದು ತಿಳಿಸಿದರು.

ಆದರೆ ‘ಜೈಲರ್’ ವಿಷಯದಲ್ಲಿ ಹಾಗಾಗಲಿಲ್ಲ ಎಂದಿರುವ ರಜನಿ, ‘ಒಟಿಟಿಯಲ್ಲಿ ಸಿನಿಮಾ ನೋಡುವಾಗ ಕಥೆಯ ಅಂತ್ಯದಲ್ಲಿ ವರ್ಮ (ವಿನಾಯಕನ್) ಪಾತ್ರದ ಬಗ್ಗೆ ನಿರ್ದೇಶಕರು ಕೆಲವು ಸುಳಿವುಗಳು ಸೀಕ್ವೆಲ್‌ಗೆ ಸೂಕ್ತವಾದ ಬುನಾದಿ ಹಾಕಿರುವುದನ್ನು ಗಮನಿಸಿದರು. ವರ್ಮ ಹಿಂದೆ ದೊಡ್ಡ ಕ್ರಿಮಿನಲ್ ನೆಟ್‌ವರ್ಕ್ ಇರುವುದನ್ನು ಹಾಗೂ ನಾಗ್ಪುರ ಜೈಲಿನಲ್ಲಿ ಮುತ್ತುವೇಲ್ ಪಾಂಡಿಯನ್ ಜತೆಗೆ ನಿಷ್ಠಾವಂತ ಡಾನ್‌ಗಳ ಬೆಂಬಲವಿರುವುದನ್ನು ನೆಲ್ಸನ್ ಸೂಚ್ಯವಾಗಿ ತೋರಿಸಿದ್ದರು. ಕಥೆಯಲ್ಲಿ ಸಾವಿರಾರು ಕೋಟಿ ಮೌಲ್ಯದ ಕಂಟೈನರ್‌ಗಳು ಮತ್ತು ದೊಡ್ಡ ಅಪರಾಧ ಜಾಲದ ಕಥೆ ಇದ್ದುದರಿಂದ, ಈ ಚಿತ್ರಕ್ಕೆ ಸೀಕ್ವೆಲ್ ಮಾಡಲು ಅತ್ಯುತ್ತಮ ಅವಕಾಶವಿತ್ತು, ಹಾಗಾಗಿ ನಾನು ಒಪ್ಪಿಕೊಂಡೆ ಎಂದು ರಜನಿ ವಿವರಿಸಿದ್ದಾರೆ.

ಇದನ್ನೂ ಓದಿ:‘ಶ್ರೀರಾಮನನ್ನು ಸಲ್ಮಾನ್, ರಜನಿಕಾಂತ್ ತರ ತೋರಿಸಿದ್ದಾರೆ’: ರಾಮಾಯಣ; ಸಿನಿಮಾ ವಿರುದ್ಧ ಮುಕೇಶ್ ಖನ್ನಾ ಕಿಡಿ

ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ ಹಾಗೂ ಸನ್ ಪಿಕ್ಚರ್ಸ್ ಲಾಂಚ್ ಅಡಿಯಲ್ಲಿ ಕಾನಿಧಿ ಮಾರನ್ ನಿರ್ಮಿಸಿರುವ ‘ಜೈಲರ್ 2’, ಅಕ್ಟೋಬರ್ 15ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿದೆ. ಈ ಸಿನಿಮಾ ರಜನೀ ಅವರಷ್ಟೆ ಸಿನಿಮಾದ ಅತಿಥಿ ಪಾತ್ರಗಳಿಂದಲೂ ಜನಪ್ರಿಯ. ಸಿನಿಮಾನಲ್ಲಿ ರಮ್ಯ ಕೃಷ್ಣ, ಯೋಗಿ ಬಾಬು ಜೊತೆಗೆ ಈ ಬಾರಿ ಎಸ್​​ಜೆ ಸೂರ್ಯ, ಮಿಥುನ್ ಚಕ್ರವರ್ತಿ, ವಿದ್ಯಾ ಬಾಲನ್ ಸೇರಿದಂತೆ ಹಲವು ದಿಗ್ಗಜರು ನಟಿಸಿದ್ದಾರೆ. ಜೊತೆಗೆ ಮೋಹನ್‌ಲಾಲ್, ಶಿವರಾಜ್‌ಕುಮಾರ್, ಜಾಕಿ ಶ್ರಾಫ್, ಹೃತಿಕ್ ರೋಷನ್ ಅವರುಗಳು ವಿಶೇಷ ಅತಿಥಿ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಅನಿರುದ್ಧ್ ರವಿಚಂದ್ರನ್ ಸಿನಿಮಾಕ್ಕೆ ಸಂಗೀತ ನೀಡಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ