ಗುಟ್ಟಾಗಿ 2ನೇ ಮದುವೆ ಆಗಿದ್ದಾರಾ ರವಿ ಕಿಶನ್? ನಟ, ಬಿಜೆಪಿ ಅಭ್ಯರ್ಥಿ ವಿರುದ್ಧ ಮಹಿಳೆ ಆರೋಪ
ಹಿಂದಿ, ಭೋಜ್ಪುರಿ, ಕನ್ನಡ, ತೆಲುಗು ಮತ್ತು ತಮಿಳು ಸಿನಿಮಾಗಳಲ್ಲಿ ನಟಿಸಿ ರವಿ ಕಿಶನ್ ಫೇಮಸ್ ಆಗಿದ್ದಾರೆ. ರಾಜಕಾರಣಿ ಆಗಿಯೂ ಅವರು ಯಶಸ್ಸು ಕಂಡಿದ್ದಾರೆ. ಲೋಕಸಭಾ ಚುನಾವಣೆಯಲ್ಲಿ ಅವರು ಬಿಜೆಪಿ ಅಭ್ಯರ್ಥಿಯಾಗಿ ಗೋರಕ್ಪುರ ಕ್ಷೇತ್ರದಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಚುನಾವಣೆ ಸಮೀಪಿಸಿರುವ ಈ ಸಂದರ್ಭದಲ್ಲಿ ಅವರ ಮೇಲೆ ಆರೋಪ ಕೇಳಿಬಂದಿದೆ.
Updated on:Apr 18, 2024 | 3:10 PM
ಖ್ಯಾತ ನಟ ಹಾಗೂ ರಾಜಕಾರಣಿ ರವಿ ಕಿಶನ್ (Ravi Kishan) ವಿರುದ್ಧ ಒಂದು ಗಂಭೀರ ಆರೋಪ ಕೇಳಿಬಂದಿದೆ. ಅಪರ್ಣಾ ಠಾಕೂರ್ (Aparna Thakur) ಎಂಬ ಮಹಿಳೆ ಸುದ್ದಿಗೋಷ್ಠಿ ನಡೆಸಿ, ‘ರವಿ ಕಿಶನ್ ನನ್ನ ಗಂಡ. ನಾನು ಅವರ 2ನೇ ಹೆಂಡತಿ’ ಎಂದು ಹೇಳಿದ್ದಾರೆ. ತಮಗೆ 25 ವರ್ಷದ ಮಗಳು ಇದ್ದು, ಆಕೆಯನ್ನು ಪುತ್ರಿ ಎಂದು ರವಿ ಕಿಶನ್ ಒಪ್ಪಿಕೊಳ್ಳುತ್ತಿಲ್ಲ. ಆದ್ದರಿಂದ ತಾವು ಕಾನೂನಿನ ಮೊರೆ ಹೋಗಿರುವುದಾಗಿ ಅಪರ್ಣಾ ರಾಕೂರ್ ತಿಳಿಸಿದ್ದಾರೆ. ಇದರಿಂದಾಗಿ ವಿವಾದ ಸೃಷ್ಟಿ ಆಗಿದೆ. ಅಪರ್ಣಾ ಠಾಕೂರ್ ವಿರುದ್ಧ ರವಿ ಕಿಶನ್ ಪತ್ನಿ ಪ್ರೀತಿ ಶುಕ್ಲಾ (Preeti Shukla) ದೂರು ನೀಡಿದ್ದಾರೆ.
ಲಖನೌನಲ್ಲಿ ಅಪರ್ಣಾ ಮತ್ತು ಅವರ ಪುತ್ರಿ ಶೆನೋವಾ ಸುದ್ದಿಗೋಷ್ಠಿ ನಡೆಸಿದ್ದಾರೆ. ‘ನನ್ನ ಮಗಳ ಹಕ್ಕಿಗಾಗಿ ನಾನು ಈ ಸುದ್ದಿಗೋಷ್ಠಿ ಕರೆದಿದ್ದೇನೆ. ನಾನು ನ್ಯಾಯಾಲದ ಮೆಟ್ಟಿಲು ಏರುತ್ತಿದ್ದೇನೆ. ಕಾನೂನಿನ ಮೇಲೆ ನನಗೆ ನಂಬಿಕೆ ಇದೆ. ನನ್ನ ಜೊತೆ ಇದ್ದಾಗ ಮಗಳು ಎಂದು ಒಪ್ಪಿಕೊಳ್ಳುತ್ತಾರೆ. ಆದರೆ ಸಾರ್ವಜನಿಕವಾಗಿ ಅವರು ಒಪ್ಪಿಕೊಳ್ಳುತ್ತಿಲ್ಲ’ ಎಂದು ಅಪರ್ಣಾ ಠಾಕೂರ್ ಆರೋಪಿಸಿದ್ದಾರೆ.
‘ಕುಟುಂಬದವರು ಮತ್ತು ಸ್ನೇಹಿತರ ಎದುರಿನಲ್ಲಿ ರವಿ ಕಿಶನ್ ನನಗೆ ಸಿಂಧೂರ ಇಟ್ಟಿದ್ದಾರೆ ಹಾಗೂ ತಾಳಿ ಕಟ್ಟಿದ್ದಾರೆ. ಮುಂಬೈನಲ್ಲಿ 1996ರಲ್ಲೇ ನಮ್ಮ ಮದುವೆ ಆಗಿತ್ತು. ನಾನು, ಅವರು ಮತ್ತು ಮಗಳು ಜೊತೆಯಾಗಿ ಇರುವ ಫೋಟೋಗಳು ಇವೆ. ಅವರ ತಂದೆ-ತಾಯಿ ಜೊತೆಗಿನ ವಿಡಿಯೋ ಕೂಡ ಇದೆ. ಮಗಳನ್ನು ಈಗ ಅವರು ದೂರ ಇಟ್ಟಿದ್ದಾರೆ. ಅವರಿಂದ ಯಾವುದೇ ಸಹಾಯ ಸಿಗುತ್ತಿಲ್ಲ. ಜಗತ್ತಿನ ಮುಂದೆ ಮಗಳು ಎಂದು ಒಪ್ಪಿಕೊಳ್ಳಬೇಕು ಅಥವಾ ಕಾನೂನಿನ ಪ್ರಕಾರ ದತ್ತು ಪಡೆಯಬೇಕು’ ಎಂದು ಅಪರ್ಣಾ ಠಾಕೂರ್ ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ: ನಾನು ನಾಲ್ಕು ಮಕ್ಕಳನ್ನು ಹೊಂದಿರುವುದಕ್ಕೆ ಕಾಂಗ್ರೆಸ್ ಕಾರಣ: ಬಿಜೆಪಿ ಸಂಸದ ರವಿ ಕಿಶನ್ ನೀಡಿದ ವಿವರಣೆ, ಕಾರಣ ಇಲ್ಲಿದೆ
ದೂರು ನೀಡಿದ ರವಿ ಕಿಶನ್ ಪತ್ನಿ:
2ನೇ ಹೆಂಡತಿ ಎಂದು ಹೇಳಿಕೊಂಡು ಬಂದಿರುವ ಅಪರ್ಣಾ ಠಾಕೂರ್ ವಿರುದ್ಧ ರವಿ ಕಿಶನ್ ಪತ್ನಿ ಪ್ರೀತಿ ಶುಕ್ಲಾ ಅವರು ದೂರು ನೀಡಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಪರ್ಣಾ ಮಾತ್ರವಲ್ಲದೇ ಅವರ ಕುಟುಂಬದ ಕೆಲವು ಸದಸ್ಯರು, ಸಮಾಜವಾದಿ ಪಕ್ಷದ ಮುಖಂಡ ವಿವೇಕ್ ಕುಮಾರ್, ಪತ್ರಕರ್ತ ಖುರ್ಷಿದ್ ಖಾನ್ ಅವರ ವಿರುದ್ಧವೂ ದೂರು ನೀಡಲಾಗಿದೆ. ‘ಅಪರ್ಣಾ ಅವರು 20 ಕೋಟಿ ರೂಪಾಯಿ ಸುಲಿಗೆ ಮಾಡುವ ಉದ್ದೇಶ ಹೊಂದಿದ್ದಾರೆ. ರವಿ ಕಿಶನ್ ಅವರ ವಿರುದ್ಧ ಸುಳ್ಳು ರೇಪ್ ಕೇಸ್ ಹಾಕುವುದಾಗಿ ಬೆದರಿಸಿದ್ದಾರೆ’ ಎಂದು ದೂರಿನಲ್ಲಿ ಪ್ರೀತಿ ಶುಕ್ಲಾ ತಿಳಿಸಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
Published On - 3:10 pm, Thu, 18 April 24
