‘ಆರ್ಆರ್ಆರ್’ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ಲೇಸರ್ ಶೋ ಝಗಮಗ; ಏನಿದರ ವಿಶೇಷ?
RRR Movie Pre-Release event: ‘ಆರ್ಆರ್ಆರ್’ ಸಿನಿಮಾದ ಪ್ರೀ-ರಿಲೀಸ್ ಇವೆಂಟ್ನಲ್ಲಿ ಲೇಸರ್ ಶೋ ಹೈಲೈಟ್ ಆಗಲಿದೆ. ಇದರ ತಂತ್ರಜ್ಞರಾದ ರೂಪೇಶ್ ಮತ್ತು ಮುಕೇಶ್ ಅವರು ಟಿವಿ9 ಜೊತೆಗೆ ಮಾತನಾಡಿದ್ದಾರೆ.
‘ಆರ್ಆರ್ಆರ್’ (RRR Movie) ಚಿತ್ರತಂಡ ಪ್ರಚಾರಕ್ಕಾಗಿ ಹೆಚ್ಚು ಒತ್ತು ನೀಡುತ್ತಿದೆ. ರಾಜಮೌಳಿ ನಿರ್ದೇಶನ ಮಾಡಿರುವ ಈ ಸಿನಿಮಾ ವಿಶ್ವಾದ್ಯಂತ ಮಾ.25ರಂದು ಬಿಡುಗಡೆ ಆಗಲಿದೆ. ಇಂದು (ಮಾ.19) ಚಿಕ್ಕಬಳ್ಳಾಪುರದ ಅಗಲಗುರ್ಕಿಯಲ್ಲಿ ಅದ್ದೂರಿಯಾಗಿ ಪ್ರೀ-ರಿಲೀಸ್ ಇವೆಂಟ್ (RRR Movie Pre-Release event) ಆಯೋಜಿಸಲಾಗಿದೆ. ಆ ಕಾರ್ಯಕ್ರಮದಲ್ಲಿ ಗಣ್ಯಾತಿಗಣ್ಯರು ಭಾಗಿ ಆಗಲಿದ್ದಾರೆ. ‘ಆರ್ಆರ್ಆರ್’ ಸಿನಿಮಾದಲ್ಲಿ ಮುಖ್ಯ ಪಾತ್ರಗಳನ್ನು ಮಾಡಿರುವ ರಾಮ್ ಚರಣ್, ಜ್ಯೂ. ಎನ್ಟಿಆರ್ ಮುಂತಾದವರು ವೇದಿಕೆ ಏರಲಿದ್ದಾರೆ. ಎಂ.ಎಂ. ಕೀರವಾಣಿ ಅವರ ಸಂಗೀತ ಕಾರ್ಯಕ್ರಮ ಇರಲಿದೆ. ಇದೆಲ್ಲದರ ನಡುವೆ ಲೇಸರ್ ಶೋ ವಿಶೇಷವಾಗಿ ಗಮನ ಸೆಳೆಯಲಿದೆ. ಝಗಮಗಿಸುವ ಲೇಸರ್ (Laser Show) ಶೋಗಾಗಿ ಸಕಲ ತಯಾರಿ ಮಾಡಿಕೊಳ್ಳಲಾಗಿದೆ. ಇದನ್ನು ದೇಶದ ಅತಿ ದೊಡ್ಡ ಪ್ರೀ-ರಿಲೀಸ್ ಇವೆಂಟ್ ಎಂದು ‘ಆರ್ಆರ್ಆರ್’ ತಂಡ ಹೇಳಿಕೊಂಡಿದೆ. ಕರ್ನಾಟಕದಲ್ಲಿ ಕೆವಿಎನ್ ಪ್ರೊಡಕ್ಷನ್ ಸಂಸ್ಥೆಯು ‘ಆರ್ಆರ್ಆರ್’ ಸಿನಿಮಾದ ವಿತರಣೆ ಜವಾಬ್ದಾರಿಯನ್ನು ವಹಿಸಿಕೊಂಡಿದೆ. ಆ ಮೂಲಕ ಹೆಚ್ಚು ಜನರನ್ನು ತಲುಪಲು ಸಿನಿಮಾ ತಂಡ ಪ್ರಯತ್ನಿಸುತ್ತಿದೆ. ಇಂದು ಸಂಜೆ 100 ಎಕರೆ ಜಾಗದಲ್ಲಿ ನಡೆಯಲಿರುವ ಪ್ರೀ-ರಿಲೀಸ್ ಇವೆಂಟ್ನಲ್ಲಿ ಲೇಸರ್ ಶೋನ ವಿಶೇಷತೆ ಏನು ಎಂಬುದನ್ನು ತಂತ್ರಜ್ಞರು ವಿವರಿಸಿದ್ದಾರೆ. ತಯಾರಿ ಹೇಗೆ ನಡೆದಿದೆ ಎಂಬುದನ್ನು ಅವರು ತಿಳಿಸಿದ್ದಾರೆ.
ಲೇಸರ್ ಶೋ ತಂತ್ರಜ್ಞರಾದ ರೂಪೇಶ್ ಮತ್ತು ಮುಕೇಶ್ ಅವರು ಟಿವಿ9 ಜೊತೆಗೆ ಮಾತನಾಡಿದ್ದಾರೆ. ‘ದೇಶದಲ್ಲೇ ಇದು ಅತಿ ದೊಡ್ಡ ಲೇಸರ್ ಶೋ. ನಮ್ಮ ಚಿಕ್ಕಬಳ್ಳಾಪುರದಲ್ಲಿ ಆಗುತ್ತಿದೆ. ಇದಕ್ಕಾಗಿ 42 ಲೇಸರ್ ಪ್ರೊಜೆಕ್ಟರ್ಗಳನ್ನು ಬಳಕೆ ಮಾಡಿಕೊಳ್ಳುತ್ತಿದ್ದೇವೆ. ಚಿಕ್ಕಬಳ್ಳಾಪುರ ಜನತೆಗೆ ವಾವ್ ಎಂಬಂತಹ ಅನುಭವವನ್ನು ನೀಡಬೇಕು ಅಂದುಕೊಂಡಿದ್ದೇವೆ. ಸಂಗೀತಕ್ಕೆ ತಕ್ಕಂತೆ ಈ ಲೇಸರ್ ಶೋ ಇರಲಿದೆ. ನೋಡುಗರಿಗೆ ದೃಶ್ಯ ವೈಭವ ಎನಿಸುತ್ತದೆ’ ಎಂದು ರೂಪೇಶ್ ಹೇಳಿದ್ದಾರೆ.
ಈ ಶೋಗಾಗಿ ಕಳೆದ 15 ದಿನಗಳಿಂದ ಪ್ಲ್ಯಾನ್ ಮಾಡಲಾಗಿತ್ತು. ಮೂರು ದಿನಗಳಿಂದ ತಯಾರಿ ನಡೆದಿದೆ. ಈಗ ಎಲ್ಲವೂ ಸಜ್ಜಾಗಿದೆ. ‘ಪ್ರತಿ ಜಾಗದಲ್ಲೂ ಲೇಸರ್ ಶೋ ಬೇರೆ ಬೇರೆ ರೀತಿ ಆಗಿರುತ್ತದೆ. ಕಾರ್ಯಕ್ರಮ ನಡೆಯುವ ಸ್ಥಳ ಎಷ್ಟು ದೊಡ್ಡದಾಗಿದೆ ಎಂಬುದರ ಮೇಲೆ ನಾವು ಪ್ಲ್ಯಾನ್ ಮಾಡಿರುತ್ತೇವೆ. ಇಲ್ಲಿ 140 ಅಡಿಯ ವೇದಿಕೆ ಇರುವುದೇ ಒಂದು ವಿಶೇಷ. 52 ಸಾವಿರ ಚದರ ಅಡಿಯ ಎಲ್ಇಡಿ ಪರದೆ ಇದೆ. ಕೇವಲ ಸ್ಟೇಜ್ನಲ್ಲಿ ಮಾತ್ರವಲ್ಲದೇ ವೇದಿಕೆಯ ಎಡ ಮತ್ತು ಬಲ ಭಾಗಗಳಲ್ಲಿ ಎಲ್ಇಡಿ ಪರದೆ ಅಳವಡಿಕೆ ಮಾಡಿದ್ದಾರೆ. ಅದರ ಜೊತೆಯಲ್ಲೇ ನಾವು ಲೇಸರ್ ಅಳವಡಿಕೆ ಮಾಡಿದ್ದೇವೆ’ ಎಂದು ರೂಪೇಶ್ ಮಾಹಿತಿ ಹಂಚಿಕೊಂಡಿದ್ದಾರೆ.
‘ಲೇಸರ್ ಬೆಳಕು ಹೊರಹೊಮ್ಮುವುದನ್ನು ನೀವು ಎಲ್ಲ ಕಡೆಗಳಿಂದಲೂ ನೋಡಬಹುದು. 2ರಿಂದ 3 ಕಿಲೋಮೀಟರ್ವರೆಗೂ ಇದು ಕಾಣಿಸುತ್ತದೆ. 7 ಗಂಟೆಗೆ ಶೋ ಆರಂಭ ಆಗಲಿದೆ. ಮೂರೂವರೆ ನಿಮಿಷಗಳ ಕಾಲ ಶೋ ಇರಲಿದೆ. ಇನ್ನೂ ಏನೆಲ್ಲ ಇದೆ ಎಂಬುದನ್ನು ಜನರು ಕಾದುನೋಡಬೇಕು. ಅದಕ್ಕೆ ನಾವು ಕೂಡ ಉತ್ಸುಕರಾಗಿದ್ದೇವೆ’ ರೂಪೇಶ್ ಹೇಳಿದ್ದಾರೆ. ದೇಶದ ವಿವಿಧ ಭಾಗಗಳಲ್ಲಿ ಲೇಸರ್ ಶೋ ಮಾಡಿ ಅನುಭವ ಇರುವ ತಂತ್ರಜ್ಞರು ಈಗ ‘ಆರ್ಆರ್ಆರ್’ ಸಿನಿಮಾದ ಪ್ರೀ-ರಿಲೀಸ್ ಇವೆಂಟ್ಗಾಗಿ ಸಜ್ಜಾಗಿದ್ದಾರೆ.
ಈ ಕಾರ್ಯಕ್ರಮದಲ್ಲಿ ಅಕ್ಕ-ಪಕ್ಕದ ರಾಜ್ಯಗಳ ಅಭಿಮಾನಿಗಳು, ಮಾಧ್ಯಮದವರು ಆಗಮಿಸುತ್ತಿದ್ದಾರೆ. ರಾಷ್ಟ್ರಮಟ್ಟದಲ್ಲಿ ‘ಆರ್ಆರ್ಆರ್’ ಸಿನಿಮಾದ ಪ್ರೀ-ರಿಲೀಸ್ ಇವೆಂಟ್ ಸದ್ದು ಮಾಡಲಿದೆ. ಕರ್ನಾಟಕದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಆರೋಗ್ಯ ಸಚಿವ ಡಾ. ಕೆ. ಸುಧಾಕರ್, ನಟ ಶಿವರಾಜ್ಕುಮಾರ್ ಅವರು ಮುಖ್ಯ ಅತಿಥಿಗಳಾಗಿ ಭಾಗವಹಿಸುತ್ತಾರೆ. ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ನೋಡಿಕೊಳ್ಳಲು ಪೊಲೀಸ್ ಬಿಗಿ ಬಂದೋಬಸ್ತ್ ಮಾಡಲಾಗಿದೆ.
ಇದನ್ನೂ ಓದು:
ಕಂಡು ಕೇಳರಿಯದಂತಹ ‘ಆರ್ಆರ್ಆರ್’ ಪ್ರೀ ರಿಲೀಸ್ ಇವೆಂಟ್ಗೆ ಭರ್ಜರಿ ಸಿದ್ಧತೆ: ಇಲ್ಲಿದೆ ವಿಡಿಯೋ
‘ಆರ್ಆರ್ಆರ್’ ಸುದ್ದಿಗೋಷ್ಠಿ: ನಿರ್ದೇಶಕ ರಾಜಮೌಳಿ ಏನಂದ್ರು? ಇಲ್ಲಿದೆ ಪ್ರೆಸ್ಮೀಟ್ ಲೈವ್ ವಿಡಿಯೋ