ಸಿನಿಮಾ ಬಿಡುಗಡೆ ಮುನ್ನ ಅಭಿಮಾನಿಗಳಿಗೆ ಎಚ್ಚರಿಕೆ ಪತ್ರ ಬರೆದ ಸಾಯಿ ಧರಮ್ ತೇಜ್

ಮತ್ತೊಂದು ಪವನ್ ಕಲ್ಯಾಣ್ (Pawan Kalyan) ಸಿನಿಮಾ ತೆರೆಗೆ ಬರಲು ಸಜ್ಜಾಗಿದೆ. ಪವನ್ ಕಲ್ಯಾಣ್ ಮಾತ್ರವೇ ಅಲ್ಲ ಯಾವುದೇ ತೆಲುಗು ಸೂಪರ್ ಸ್ಟಾರ್ (Super Star) ಸಿನಿಮಾ ಬಿಡುಗಡೆ ಆದಾಗಲು ಕೆಲವಾದರೂ ಚಿತ್ರಮಂದಿರಗಳು ಜಖಂ ಆಗುತ್ತವೆ, ಕೆಲವೆಡೆ ಅಭಿಮಾನಿಗಳು ಪರಸ್ಪರ ಹೊಡೆದಾಡಿಕೊಳ್ಳುತ್ತಾರೆ. ಅತಿಯಾದ ಅಭಿಮಾನ ತೋರಲು ಹೋಗಿ ಪೆಟ್ಟು ಮಾಡಿಕೊಳ್ಳುತ್ತಾರೆ. ಪ್ರಾಣ ಕಳೆದುಕೊಂಡಿರುವ ಉದಾಹರಣೆಗಳೂ ಉಂಟು. ಇದನ್ನೆಲ್ಲ ಗಮನದಲ್ಲಿಟ್ಟುಕೊಂಡು ನಟ ಸಾಯಿ ಧರಮ್ ತೇಜ್, ತಮ್ಮ ಹಾಗೂ ಪವನ್​ ಕಲ್ಯಾಣ್​ರ ಕಾಂಬಿನೇಷನ್​ನ ಸಿನಿಮಾ ಬಿಡುಗಡೆ ಆಗುವ ಮುನ್ನ ಅಭಿಮಾನಿಗಳಿಗೆ ಎಚ್ಚರಿಕೆ ಪತ್ರವೊಂದನ್ನು ಬರೆದಿದ್ದಾರೆ.

”ನಿಮ್ಮ ಪ್ರೀತಿ, ಅಭಿಮಾನಕ್ಕೆ ಚಿರಋಣಿ. ನೀವು ತೋರುತ್ತಿರುವ ಪ್ರೀತಿಯಿಂದ ನನ್ನ ಹೃದಯ ತುಂಬಿದೆ. ನೀವುಗಳು ನಮ್ಮ ‘ಬ್ರೋ; ದಿ ಅವತಾರ್’ ಸಿನಿಮಾಕ್ಕೆ ತೋರುತ್ತಿರುವ ಪ್ರೀತಿಗೆ ಅಭಿನಂದನೆ. ಸಿನಿಮಾದ ಪ್ರಚಾರ ಹಾಗೂ ಸಿನಿಮಾವನ್ನು ಸಂಭ್ರಮಿಸುವಲ್ಲಿ ನೀವು ತೋರುತ್ತಿರುವ ಆಸಕ್ತಿಗೆ ಧನ್ಯವಾದಗಳು. ಪ್ರಚಾರ ಕಾರ್ಯಕ್ರಮಗಳಿಗೆ ಭಾರಿ ಸಂಖ್ಯೆಯ ಜನ ಸೇರುತ್ತಿರುವುದಾಗಲಿ, ಸಿನಿಮಾದ ಭಿನ್ನ ಭಿನ್ನ ಬ್ಯಾನರ್, ಕಟೌಟ್​ಗಳನ್ನು ತಯಾರು ಮಾಡುತ್ತಿರುವುದಾಗಲಿ, ನಿಮ್ಮ ಈ ಉತ್ಸಾಹವೇ ನಮ್ಮನ್ನು ಇನ್ನಷ್ಟು ಶ್ರಮವಹಿಸಿ ಕೆಲಸ ಮಾಡುವಂತೆ ಮಾಡಿದೆ. ಅದಕ್ಕಾಗಿ ನಿಮಗೆ ಧನ್ಯವಾದ” ಎಂದಿದ್ದಾರೆ ಸಾಯಿ ಧರಮ್ ತೇಜ್.

ಇದನ್ನೂ ಓದಿ:Pawan Kalyan: ಪವನ್ ಕಲ್ಯಾಣ್ ಧರಿಸಿರುವ ಶೂಗಳ ಬೆಲೆ ಎಷ್ಟು ಲಕ್ಷ ಗೊತ್ತೆ?

”ಈ ನಡುವೆ, ಅಭಿಮಾನಿಗಳಲ್ಲಿ ನನ್ನ ಮನವಿ ಏನೆಂದರೆ, ಸಿನಿಮಾ ಬಿಡುಗಡೆ ಆಗುತ್ತಿರುವ ಈ ವೇಳೆ ನೀವು ಹೆಚ್ಚು ಎಚ್ಚರಿಕೆಯಿಂದ ಹಾಗೂ ಜಾಗರೂಕರಾಗಿ ವರ್ತಿಸಿ. ಬ್ಯಾನರ್ ಕಟ್ಟುವುದು, ಕಟೌಟ್ ಕಟ್ಟುವುದು ಒಟ್ಟಾರೆಯಾಗಿ ಸಿನಿಮಾವನ್ನು ಸಂಭ್ರಮಿಸುವ ಸಮಯದಲ್ಲಿ ಹೆಚ್ಚು ಜಾಗರೂಕರಾಗಿರಿ. ಅಭಿಮಾನಿಗಳಿಗೆ ಏನಾದರೂ ಕೆಡುಕಾಗಬಹುದು ಎಂಬ ಆಲೋಚನೆಯೇ ನನಗೆ ಭಯ ಉಂಟುಮಾಡುತ್ತದೆ. ನಿಮ್ಮ ಪ್ರೀತಿ, ಅಭಿಮಾನ ಬೆಲೆ ಕಟ್ಟಲಾಗದ್ದು, ಆದರೆ ನಿಮ್ಮ ಸುರಕ್ಷೆ ಎಲ್ಲದಕ್ಕಿಂತಲೂ ಮೊದಲು. ಎಲ್ಲರೂ ಸುರಕ್ಷತೆಯಿಂದ ಇರಿ” ಎಂದಿದ್ದಾರೆ.

ಸಾಯಿ ಧರಮ್ ತೇಜ್ ಹಾಗೂ ಪವನ್ ಕಲ್ಯಾಣ್ ನಟಿಸಿರುವ ‘ಬ್ರೋ’ ಸಿನಿಮಾ ಜುಲೈ 28ಕ್ಕೆ ಬಿಡುಗಡೆ ಆಗುತ್ತಿದೆ. ಸಿನಿಮಾದಲ್ಲಿ ಪವನ್ ಕಲ್ಯಾಣ್ ಸಮಯ ಅಥವಾ ದೇವರ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಹಿಂದೆ ವೆಂಕಟೇಶ್ ಜೊತೆ ‘ಗೋಪಾಲ-ಗೋಪಾಲ’ ಸಿನಿಮಾದಲ್ಲಿ ಪವನ್ ಕಲ್ಯಾಣ್ ಮಾಡರ್ನ್ ದೇವರ ಅವತಾರದಲ್ಲಿ ನಟಿಸಿದ್ದರು. ಆ ಸಿನಿಮಾ ಸೂಪರ್ ಡೂಪರ್ ಹಿಟ್ ಆಗಿತ್ತು.

‘ಬ್ರೋ’ ಸಿನಿಮಾವು ತಮಿಳು ಸಿನಿಮಾದ ರೀಮೇಕ್ ಆಗಿದ್ದು, ಮೂಲ ಸಿನಿಮಾದ ಕತೆಗೆ ಕೆಲವಾರು ಬದಲಾವಣೆಗಳನ್ನು ತಂದು ತೆಲುಗಿನಲ್ಲಿ ತೆರೆಗೆ ತರಲಾಗುತ್ತಿದೆ. ಮೂಲ ಸಿನಿಮಾ ನಿರ್ದೇಶಿಸಿ ನಟಿಸಿದ್ದ ಸಮುದ್ರಕಿಣಿ, ತೆಲುಗು ಸಿನಿಮಾವನ್ನು ನಿರ್ದೇಶನ ಮಾಡಿದ್ದಾರೆ. ತೆಲುಗಿನಲ್ಲಿ ಸಮುದ್ರಕಿಣಿ ನಟಿಸಿದ್ದ ಪಾತ್ರದಲ್ಲಿ ಪವನ್ ಕಲ್ಯಾಣ್ ನಟಿಸಿದ್ದಾರೆ. ಇತ್ತೀಚೆಗಷ್ಟೆ ಸಿನಿಮಾದ ಪ್ರೀ ರಿಲೀಸ್ ಇವೆಂಟ್ ಅದ್ಧೂರಿಯಾಗಿ ನಡೆದಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ